1. Bakwetu bakashi bakwete kukwasha ndumbulwilo a Yehowa naminyi, na nkalakashi kinyi yabakwete kufumankana nayo? (Tala kifwatulo kya ku kipusu.)

TWI na muloo wi bungi wa kwikala na bakwetu bakashi abafubu ngofu mu kakongye! Bu kileshesho, abatusha ngaluulo ibuwa mu bisangilo, na kulungula mukandu wibuwa. Bangi abakwasha mu kulumbuula Mashibo a Bufumu na kupasukila bakwetu balume na bakashi. Kushi mpaka, bakwete kupeta nkalakashi. Bangi bakwete kupasukila baledi baabo abapu kukula. Bangi naamu abanyingila mushikwa wa bena kifuko naabo. Bangi bakwetu bakashi abakusha bana baabo abo banabene, na bakwete kufuba ngofu bwa kulombasha nkalo yabo.

2. Bwakinyi abitungu twikitshishe bwa kukwasha bakwetu bakashi?

² Bwakinyi abitungu tunyingishe bakwetu bakashi? Mwanda mu uno ndumbulwilo tabakwete kwibapa kineemo kibalombene nya. Anka, Bible etunyingisha bwa kwi bakwasha. Bu kileshesho, Mpoolo mutumiibwa baadi mutekye kakongye ka mu Looma bwa kadya kukukila Febee na ‘kumukwasha mu myanda yooso.’ (Lom. 16:1, 2) Bu bibaadi Mufadisee, Mpoolo baadi mu kisaka kya bantu bashi baadi abaata bana bakashi na muulo. Anka, kunyima kwaye kufika mwina Kidishitu, Mpoolo baadi mwambule Yesu, na kubanga kuneemeka bana bakashi na kwibakitshina myanda na kalolo.​—1 Kod. 11:1.

3. Mushindo kinyi ubaadi Yesu akitshina bana bakashi myanda, na baadi amono bana bakashi abaadi abakitshi kikyebe ky’eshimba dy’Efile Mukulu naminyi?

³ Yesu baadi aneemeka bana bakashi booso. (Yo. 4:27) Tabaadi na mweneno bu a bakata ba bipwilo ba bena Yunda ba mu mafuku aye pabitale bana bakashi. Ungi mukanda aupatuula Bible awambashi: “Yesu tabaadi mwakule kintu su kimune bwa kubepuula bana bakashi.” Byabya Yesu baadi aneemeka ngofu bana bakashi booso baabadi abakitshi kikyebe ky’eshimba dya Nshaye. Baadi ebamono bu bakwabo bakashi na kwibaata bu ba mu kifuko kyaye  kya mu kikudi nka bu bibaadi amono bana balume.​—Mat. 12:50.

4. Nkinyi ky’atwisambila mu uno mwisambo?

⁴ Yesu baadi akumiina nsaa yooso kukwasha bana bakashi abaadi abafubila Efile Mukulu. Baadi ebata na kineemo na kwibakwila. Tutaleyi byatudi balombene kwambula Yesu pa kuneemeka bakwetu bakashi.

5. Bwakinyi bi kwelela bakwetu bakashi bukopo bwa kupeta ba kuuku bebuwa?

⁵ Byatwikala balume sunga bakashi, atwe booso atwikalaa na lukalo lwa kupeta ba kuuku bebuwa. Ingi nsaa bilombene kwikeela bakwetu bakashi bukopo bwa kupeta ba kuuku bebuwa. Bwakinyi? Banda kutala ino myanda ayilondo. Ungi mukwetu mukashi abetaminaa bu Jordan * amba’shi: “Bu byandi bukupi, neemona’nka bu’mi shi na mbalo mu kakongye, na nepushaa bu shi na muulo mwanka.” Kristen ungi mbala-mashinda baadi mwende mbalo ibaadi lukalo bwa kutamisha mudimo waye wa bulungudi mu eumbo dyabo amba’shi: “Nsaa yodi mwenyi mu kakongye we pusha bupenka.” Bangi bakwetu balume abepushaa naamu anka bino. Booso be mu bifuko bya bantu bashii ba Temwe ba Yehowa, be kwipusha bu bashii nabo peepi, na dingi be kwipusha bu beekula na bakwetu balume na bakashi ba mu kakongye. Bangi bakwetu bakashi bekwipusha bupenka mwanda wa mukumbo, sunga mwanda wa’shi abitungu bekale’nka ku nshibo nsaa yooso bwa kupasukila mwina kifuko naabo ena maladi. Annette amba’shi: “Tshii nadi na bya kukisha nsaa na bakwetu balume na bakashi, mwanda bibaadi abitungu’shi mpasukile nyinami.”

6. Muyile Luka 10:38-42, mushindo kinyi ubaadi Yesu mukwashe Maariya na Maata?

⁶ Yesu baadi akisha nsaa na bakwabo bena Kidishitu bakashi, na baadi kuuku abo ebuwa. Banda kutala bu kuuku bwabo na Maariya na Maata, booso bwabo abaadi pangi bukupi. (Badika Luka 10:38-42.) Bishima na bikitshino bya Yesu bibaadi abikitshi bwa’shi bepushe kalolo. Bu kileshesho, Maariya baadi mwipushe kalolo nsaa ibaadi mushale ku ngwa ya Yesu atemesha bibaadi alongyesha. * Nsaa ibaadi mufiite munda mwanda Maariya tabaadi amukwasha bwa kuteeka, Maata baadi mwipushe kalolo bwa kulungula Yesu bibaadi mu binangu byaye. Yaya nsaa Yesu baadi mukwashe bano bana bakashi bwabadya kulonga myanda i na muulo. Na baadi muleshe’shi apasukila bano bana bakashi na mukwabo Laazare pa kwibatembelanga. (Yo. 12:1-3) Nyi bwakinyi, nsaa ibaadi Laazare mukumbe ngofu, Maariya na Maata abaadi abauku’shi mbalombene kuteka Yesu bukwashi.​—Yo. 11:3, 5.

7. Mushindo kinyi watudi balombene kunyingisha bakwetu bakashi?

⁷ Bwa bangi bakwetu bakashi, ku bisangilo nkwabemonenaa na bakwabo bena Kidishitu. Nyi bwakinyi abitungu tushinkamishe’shi tubebakukila, tubesamba nabo, bwabadya kumona mushindo wa twibapasukila mu bisangilo. Jordan atutemunanga ku mbamgilo amba’shi: “Abinyingishaa ngofu nsaa i bangi abantumbula bwa ngalulo inatusha mu bisangilo, kunteka bwa kutuka nami mu bulungudi sunga kundesha’shi abampasukila mu ingi mishindo.” Abitungu tuleshe bakwetu bakashi’shi, atwibataa na muulo. Ungi mukwetu mukashi abetamina bu Kia amba’shi: “Su natshielewa mu bisangilo nauku’shi bangi bakwetu balume sunga bakashi abantumina ka mesaje bwa kuuka su ne bibuwa. Bino abishinkamisha’shi bakwete kumpasukila.”

8. Ingi mishindo kinyi yatudi balombene kwambula Yesu?

⁸ Nka bu Yesu, twibalombene kukisha nsaa na  bakwetu bakashi. Pangi twikwibetamina kwetu ku nshibo bwa kudya nabo sunga bwa kukisha nabo kapapi. Nsaa yatukitshi byabya, abitungu tushinkamishe’shi miisambo yetu aibanyingisha. (Lom. 1:11, 12) Abitungu bakulu bekale na binangu bu bya Yesu. Baadi auku’shi bukupi mbulombene kwikeela bangi bukopo, anka baadi muleshe kalolo’shi, kwibakila na kutanda bana, ta ndyo akupeya muntu muloo wa losoo. (Luk. 11:27, 28) Anka, atwikala na muloo wa losoo nka su atutulu mufubo wa Yehowa pa mbalo ya kumpala mu muwa wetu.​—Mat. 19:12.

9. Bakulu mbalombene kukita kinyi bwa kukwasha bakwetu bakashi?

⁹ Bikishekishe bakulu, abitungu bamone bakwetu bakashi bena Kidishitu bu ba bakwabo bakashi na bu ba nyina’bo. (1 Tim. 5:1, 2) Bibuwa su bakulu abata nsaa ya kwisamba na bakwetu bakashi kumpala sunga kunyima kwa bisangilo. Mukwetu mukashi Kristen atatutemwine amba’shi: “Ungi mukulu baadi mumone’shi ne na bibungi bya kukita, na baadi akumiina kuuka bi programe ande. Naadi na muloo wi bungi pakumona’shi apansukila.” Nsaa i bakulu abaata nsaa ya kwisamba na bakwetu bakashi bena Kidishitu, abilesha’shi abebapasukila. * Annette atatutemwine apatuula bwakinyi bibuwa kwisamba na bakulu nsaa yooso. Amba’shi: “Bino abitukwasha bwa kwiukena nabo kalolo. Paapa, nsaa  yandi na nkalakashi, abimbofwila bwandya kwenda mu kwibateka bukwashi.”

10. Nkinyi kilombene kukwasha bakwetu bakashi bwa kwikala na muloo?

¹⁰ Byatwikala bana balume sunga bana bakashi, atwikalaa na muloo nsaa i bangi abasankila ngobesha yetu na mudimo wetu watukitshi. Anka, su t’abasankila ngobesha yetu na mudimo wetu, twi kubofula ku mashimba. Ungi mukwetu mbala-mashinda e bukupi abetaminaa bu Abigail amba’shi ingi nsaa epushaa bu’shi, bantu t’abamwataa na muulo. Amba’shi: “Namono nka bu’shi bantu t’abanguku, abauku nka penda’shi ne mwana a kampanda sunga’shi ne mukwabo na ba kampanda, ingi nsaa napusha nka bu’shi, bantu ta bakwete nkumona.” Anka, pusha abyakula mukwetu mukashi abetaminaa bu Pam. Sunga byadi bukupi, mmufube munda mwa bipwa bibungi bu misionere. Kunyima, balukile mwiumbo dyabo bwa kupasukila baledi baye. Binobino, sunga bitaadi na bipwa bikile pa 70, kyatungunuka nka na kwikala bu mbala-mashinda. Pam amba’shi, “Kinkwashe ngofu pa kumona bangi abantumbula bwa mudimo wa nkwete kukita.”

11. Yesu baadi muleshe lutumbu naminyi bwa mudimo ubaadi bano bana bakashi basha lulamato abamukitshina?

¹¹ Yesu baadi asankila bukwashi bwa bana bakashi abaadi abatshinyi Efile Mukulu, na abaadi abamukwasha na “bintu byaabo.” (Luk. 8:1-3) Ta mwibatadile penda bwabadya kwikala na kineemo kya kumufubila nya, anka mwibalongyeshe bya binyibinyi bi na muulo pabitale kikyebe ky’eshimba dy’Efile Mukulu. Bu kileshesho, baadi mwibaukishe’shi abitungu afwe na kusanguka. (Luk. 24:5-8) Baadi mulumbuule bano bana bakashi, nka bu bibaadi mwibikite na batumiibwa bwa nkalakashi ibabadya kupeta. (Mak. 9:30-32; 10:32-34) Sunga bibaadi batumiibwa basuukye nsaa ibabaadi bakwate Yesu, bangi ba ku bano bana bakashi, abaadi kulupese lwaye nsaa ibaadi afu ku mutshi wa makyenga.​—Mat. 26:56; Mak. 15:40, 41.

12. Mudimo kinyi ubaadi Yesu mupe bana bakashi?

¹² Yesu baadi mupe bana bakashi mudimo wi na muulo. Bu kileshesho, bana bakashi abaadi abatshinyi Efile Mukulu, nyi abaadi ba kumpala kumumona kunyima kwaye kusanguka. Baadi mutekye baaba bana bakashi bwabadya kwenda mu nkalungula batumiibwa’shi basanguka. (Mat. 28:5, 9, 10) Abimweka’shi, nsaa ibabaadi beele balongi mwimu ku bukwashi bwa kikudi kiselele mwifuku dya Pentekote mu kipwa kya 33 bino bipungo byetu (B.B.), bana bakashi abaadi munkatshi mwaabo. Su mbyabya, n’abo namu abaadi bapete ngobesha ya kwakula mu ndimi na kulungula bangi bantu “myanda ya-kukaanya y’Efile Mukulu.”​—Bik. 1:14; 2:2-4, 11.

13. Bakwetu bakashi bena Kidishitu bakwete kukita kinyi lelo uno, na we kulesha lutumbu bwa byabakwete kukita pa bupenka boobe naminyi?

¹³ Bakwetu bakashi mbalombene lutumbu bwa byooso bya bakwete kukita mu mudimo wa Yehowa. Wawa mudimo ngutale kwibaka na kulumbula Mashibo a Bufumu, kukwatshishena tusaka twa ndimi yenyi, na kukwasha ku Betele. Bakwete dingi kukwasha mu ma mbalo aatuku masaku, kwaluula mikanda yetu, kufuba bu mbala-mashinda na bu misionere. Nka bu bakwetu balume, bakwetu bakashi bakwete kutwela mu kalasa ka ba mbala-mashinda, Kalasa ka balungudi ba Bufumu na Kalasa ka Galaade. Na dingi, bakwete kukwasha balume baabo bwabadya kukumbasha mashito abaadi nao mu kakongye na mu ndubulwilo a Yehowa. Bano bakwetu balume abafubu bu “bantu [bekale] bya buntu,” bakwete kukwasha bangi ngofu. Anka kushii bukwashi bwa bakashi baabo, mbilombene kwibekela bukopo bwa kwibikita. (Ef. 4:8) We kunangushena mu mishindo ilekelekene modi mulombene kukwasha bakwetu bakashi mu mudimo wa bakwete kukita su?

14. Muyile Misambo 68:11, bakulu basha kinangu abakitaa kinyi?

¹⁴ Bakulu basha binangu abaukaa’shi bakwetu  bakashi nyi “kilwilo kikata” kya bantu abakumiina kufuba, na ke bungi abauku kukita mudimo wa bulungudi kalolo. (Badika Misambo 68:11.) Byabya, bakulu bekale abakimbi bya kulongyela ingi myanda kwi bakwetu bakashi. Abigail atutemunanga, anyingishibwa nsaa aimwipusha bakwetu balume mishindo ibuwa ya kubanga miisambo mu bulungudi. Amba’shi: “Bino abinkwasha bwa kumona’shi Yehowa mumpe mudimo wi na muulo wa kukita mu ndumbulwilo aye.” Na dingi, bakulu abashingula’shi bakwetu bakashi basha lulamato abaapu kukula, mbalombene kukwasha ba nsongwakashi kalolo nsaa y’abapete nkalakashi. (Tt. 2:3-5) Kushii mpaka, abitungu tufule bakwetu bakashi na kwibalesha lutumbu!

15. Nsaa kinyi ilombene bakwetu bakashi kwikala na lukalo lwa muntu akwibakwila?

¹⁵ Ingi nsaa bakwetu bakashi abekalaa na lukalo lwa muntu a kwibakwila nsaa y’abapete lukalakashi kampanda. (Yesh. 1:17) Bu kileshesho, mukashi kilele sunga mukwetu mukashi mwipelene na mulume aye, mbalombene kwikala na lukalo lwa muntu akwibakwiila na kwibakwasha bwa kukita tungi tu midimo tubaadi balume baabo abakitshi. Mukwetu mukashi baapu kununupa ekwikala na lukalo lwa muntu mulombene kwisamba na doktere. Sunga’shi mukwetu mukashi mbala-mashinda kwete kufuba ingi midimo ya teokrasi, mulombene kwikala na lukalo lwa muntu akumwakwila nsaa i bangi abamwakula bi bubi pabitale bya sha lombasha kalolo mudimo waye wa bu mbala-mashinda. Mushindo kinyi dingi watudi balombene kukwasha bakwetu bakashi? Tutaluuleyi dingi kileshesho kya Yesu.

16. Muyile Maako 14:3-9, mushindo kinyi ubaadi Yesu mwakwile Maariya?

¹⁶ Yesu baadi akwikala bakwabo bena Kidishitu bakashi bukidibukidi nsaa ishii baadi bantu abebapushisha. Bu kileshesho, baadi mwakwile Maariya nsaa ibabaadi abamwakula bi bubi kwi Maata. (Luk. 10:38-42) Baadi dingi mu mwakwile nsaa ibaadi bangi abamwakula bi bubi pabitale kitshibilo kyaye. (Badika Maako 14:3-9.) Yesu baadi mutundule kibaadi kitakule Maariya bwa kukita byabya na aye nkumutumbula pa kwakula’shi: “Bankitshina mwanda wii buwa. . . . Bakitshi kyakya kyadi mulombeene kukita.” Baadi mpa na mutemukye’shi “kooso kwana lungudibwe uno mukandu wibuwa pa nsenga poso,” ba n’akule namu pabitale kaka kalolo kaye nka bu bikwete kulesha uno mwisambo. Bibuwa bwi moo pakupusha Yesu amba’shi, mukandu wibuwa aukalungulwa mu nsenga ishima nsaa ibaadi atumbisha Maariya bwa kikitshino kyaye kii buwa. Ano mayi abaadi asankishe Maariya ngofu kunyima kwabo kumwakula bi bubi!

17. Tusha kileshesho akilesha nsaa yatudi balombene kwakwila mukwetu mukashi.

¹⁷ Wakwila bakwetu bakashi bena Kidishitu pakudi mushindo su? Banda kutala kino kileshesho. Bangi balungudi abamonaa ungi mukwetu mukashi sha mulume shi Temwe a Yehowa, afiki misuusa ibungi nka kunyima mu bisangilo, na kukatuka nka’byo bikyabipu. Abamono dingi’shi t’akambaa kufika na bana ku bisangilo. Nyi bwakinyi abamwakula bi bubi’shi, bwakinyi ta mulombene kuteka mulume aye bwa’shi ekalanga afiki na bana ku bisangilo. Aku namu t’abauku’shi yawa mukwetu mukashi kwete kwikitshisha ngofu. Te na bulungantu bwa kwikitshina myanda; sunga kwata kitshibilo kya nfudiilo pabitale bana baye. Nkinyi kyodi mulombene kukita su opusha bangi abakula mukwetu mukashi myanda i bubi mu uno mushindo? Su wekala na lutumbu bwa abikitshi mukwetu mukashi, we kwimika wawa mwisambo pa kwibalungula myanda yaye i buwa.

18. Ingi mishindo kinyi yatudi balombene kukwasha bakwetu bakashi?

¹⁸ Twi balombene kulesha’shi atupasukila bakwetu bakashi, nsaa yatwibakitshina tu bintu bwa kwibakwasha. (1 Yo. 3:18) Annette kwete kupasukila nyin’aye akumbu amba’shi: “Bangi bakwetu balume na bakashi abafikaa kwetu ku  nshibo bwa kukwasha nyina’mi sunga kumutwadila bya kudya, na bino abimpaa nsaa yandya kukita kingi kintu. Pabankitshina bino n’epusha bu’mi mufudibwe, na’shi ne na mbalo mu kakongye.” Jordan baadi n’aye namu mupete bukwashi. Ungi mukwetu mulume baadi mumulongyeshe mushindo wadi mulombene kulumbuula motoka waye. Amba’shi: “Bi muloo pakumona’shi bakwetu balume na bakashi abampasukila na t’abakumiina’shi mpete masaku nsaa yantambusha motoka wande.”

19. Ingi mishindo kinyi ilombene bakulu kukwasha bakwetu bakashi?

¹⁹ Abitungu bakulu bapasukile nkalo ya bakwetu bakashi. Abauku mushindo aukumiina Yehowa’shi bebakitshine myanda. (Shak. 1:27) Abitungu bakulu bambule Yesu na bekale na nkatshi-nkatshi. Pamutwe pa kwela miiya pa mbalo ishii ya kwiyela, abitungu bekala na kalolo na mpushisho e buwa. (Mat. 15:22-28) Nsaa i bakulu abetatshisha bwa kupasukila bakwetu bakashi, bino abibakwasha bwabadya kumona’shi Yehowa na ndumbulwilo aye, mwibafule. Nsaa ibaadi mukunkushi a kasaka ka bulungudi ka Kia mupushe’shi akyebe kwenda mu kutwela mu ingi nshibo, baadi mwate mpángo ya kumukwasha kushii kunyengakana. Kia amba’shi: “Bino bibaadi binkatushe kenyongoshi kwishimba. Bukwashi na kunyingishibwa binaadi mupete kwi bakulu, bibaadi bileshe patooka’shi, ne na mbalo mu kakongye na ntshii bupenka nsaa yandi na nkalakashi.”

20-21. Twi kulesha naminyi’shi twibafule bakwetu bakashi bena Kidishitu?

²⁰ Patutala mu tukongye twi mu nsenga ishima, atwimupete bakwetu bakashi bena Kidishitu bebungi abafubaa ngofu, be na lukalo lwa bukwashi bwetu. Nka bu bibatulongyela ku kileshesho kya Yesu, twi balombene kwibakwasha pakukisha nabo nsaa pamune bwa kwibeuka kalolo. Twibaleshe lutumbu bwa byooso byabakwete kukita mu mudimo wa Yehowa. Na twibakwile pakudi mushindo.

²¹ Ku nfudiilo kwa mukanda wa Beena-Looma, Mpoolo mutumiibwa mmutemune mashina kitema a bena Kidishitu bakashi. (Lom. 16:1, 3, 6, 12, 13, 15) Kushii mpaka, bano bana bakashi abaadi banyingishwe pababaadi bapushe lwimuno lwa Mpoolo na kw’ebasaamuna. Nka bu Mpoolo, n’atwe namu abitungu tukwashe bakwetu bakashi mu kakongye. Su tubakitshi byabya, atulesha’shi twibebafule nka bu bena kifuko kyetu.