1. Yesu baadi mwitamine balobi bananka bwa kukita kinyi, na abaakitshiine kinyi?

MPYEELE, Andree, Shake na Yowano balongi ba Yesu abaadi na mudimo wa kukwata mishipa na kwiyipaana. Banda kunangushena bibaabadi bakanye pa kupusha lwitamino lwa Yesu lwa’shi: “Fikaayi nundonde nneenwikashe bampiibwe [balobi] ba bantu.” * Abakitshine kinyi? Bible amba’shi: “Babaalekyele’nka paapa makondja aabo, abo nkumulonda.” (Mat. 4:18-22) Kyakya kitshibilo kibaadi kishintuule nshalelo aabo bwa losoo. Pamutwe pa kukwata mishipa, tababaadi “abakwata bantu.” (Luk. 5:10) Lelo uno, Yesu kwete kwitamina bantu balumbuule mashimba na bafule bya binyibinyi bwa kukita nka byabya. (Mat. 28:19, 20) We mukumiine lwitamino lwa Yesu lwa kwikala bu mulobi a bantu su?

2. Bwakinyi abitungu kunangushena ngofu kumpala kwa kwata kitshibilo kya kwikala mulobi a bantu, na kinyi kilombene kwitukwasha bwa kwikyata?

² Pangi wemupwe kulonga Bible munda mwa mafuku ebungi, na we mupwe kushintuula nshalelo oobe. Binobino, tokyebe kwata kitshibilo kya kwikala mulungudi a mukandu wibuwa. Su wekoko bwa kukumiina lwitamino lwa Yesu, tobofulanga kwishimba nya. Wekoko mwanda ouku’shi nyi kitshibilo ki na muulo. Binyibinyi, Bible amba’shi Mpyeele na bakwabo abalekye makondja aabo “nka paapa.” Anka, tabaabadi baate kyakya kitshibilo kushii kwikyelela binangu nya. Myeshi ikile pa isamombo kumpala, abaadi bapwe kuuka Yesu bu Mesiya. (Yo. 1:35-42) Bimumune, wemupwe kulonga bibungi pabitale Yehowa na Yesu, na okumiina kutungunuka na kwifubwila peepi na Yehowa. Kadi kumpala kwa kwata kitshibilo kya kwikala mulungudi, abitungu onangushene ngofu. Kinyi kibaadi kikwashe Mpyeele, Andree na bakwabo bwa kwata kyakya kitshibilo?

3. Ngikashi kinyi ayikukwasha bwa kukumiina lwitamino lwa Yesu?

 ³ Balongi ba Yesu ba kumpala abaadi na katshintshi, baukye mudimo wabo kalolo, banyingye mashimba na abaadi abekitshisha. Ino ngikashi ibaadi ibakwashe bwa kwikala balungudi be buwa ba mukandu wibuwa. Uno mwisambo aulesha mushindo odi mulombene kulumbuula ino ngikashi bwa kwikala mulungudi ebuwa na kulongyesha bangi.

4. Nkinyi kibaadi akitakula Mpyeele bwa kuloba?

⁴ Mpyeele baadi akwata mishipa bwa kulombasha nkalo ya kifuko kyaye, na uno mudimo ubaadi na muulo kwadi. Abimweka’shi Mpyeele baadi mwiufule ngofu. (Yo. 21:3, 9-15) Na dingi baadi mulongye bya kufula mudimo wa kwikala mulobi a bantu. Na bukwashi bwa Yehowa, Mpyeele baadi mufikye mulungudi ebuwa.​—Bik. 2:14, 41.

5. Muyile Luka 5:8-11, bwakinyi Mpyeele baadi atshinyi, na nkinyi kilombene kwitukwasha bwa kukambila binangu bi byabya?

⁵ Atulungula mukandu wibuwa mwanda twi bafule Yehowa; kano nyi kabingilo kakata aketutakula bwa kukita uno mudimo. Kifulo kyetu bwa Yehowa akitukwasha bwa kulungula myanda imutale sunga atumono’shi tatwibakumbanyine uno mudimo. Nsaa ibaadi Yesu mwitamine Mpyeele bwadya kwikala mulobi a bantu, bamulungwile’shi: “Totshinanga.” (Badika Luka 5:8-11.) Mpyeele t’abaadi na moo pakibaadi kilombene kukitshika su afika mulongi a Yesu. Kadi baadi mwipushe bu shii mulombene kufuba naye, p’aye kumona bungi bwa mishipa ibaadi Yesu mwibakwashe bwa kukwata mu kilengyeleshi. Nka bu Mpyeele, we kupusha moo p’onangushena myanda itekibwe bwakwikala mulongi a Kidishitu. Su mbyabya, nyingisha kifulo kyobe bwa Yehowa, bwa Yesu na bwa bantu n’obe, bino abikukwasha bwa  kukumiina lwitamino lwa Yesu lwa kwikala mulobi a bantu.​—Mat. 22:37, 39; Yo. 14:15.

6. Ntungi tubingilo kinyi atwitutakula bwa kulungula mukandu wibuwa?

⁶ Tubande kutaluula tungi tubingilo atwitutakula bwa kulungula mukandu wibuwa. Atukumiina kukokyela eyi dya Yesu dya’shi: “Ndaayi . . . nwibekashe bu balondji.” (Mat. 28:19, 20) Atulungula dingi mukandu wibuwa mwanda bantu ‘mbakookye na mbafwambukye,’ na be na lukalo lwa kuuka bya binyibinyi pabitale Bufumu bw’Efile Mukulu. (Mat. 9:36) Yehowa akumiina’shi bantu ba mishindo yooso bapete kiukilo kya binyibinyi na bapashibwe.​—1 Tim. 2:4.

7. Mukanda wa Beena-Looma 10:13-15, aulesha naminyi’shi mudimo wa bulungudi wi na muulo ukata?

⁷ Patunangushena ku mushindo ulombene mudimo wetu wa bulungudi kupasha bantu, bino abitupa muloo wa kwiulungula. Mu kwilekena na mulobi akwata mishipa bwa kwiyidya sunga bwa kwiyipana, atwe “atukwata” bantu bwa kupasha myuwa yaabo.​—Badika Beena-Looma 10:13-15; 1 Tim. 4:16.

8-9. Abitungu mulobi aukye kinyi, na bwakinyi?

⁸ Mu mafuku a Yesu, mulobi mwina Isaleele baadi auku mushindo wa mishipa ibaadi mulombene kukwata. (Lv. 11:9-12) Na dingi, baadi auku mbalo ibaadi mulombene kwiyipeta. Mishipa ayikamba kushala mbalo i mema ataale na ibyakudya bibungi. Nsaa ayisangula muntu bwa kwenda mu kuloba, ina muulo. Pabitale nsaa ibuwa ya kuloba, lamiina kibaadi kyakule ungi Temwe a Yehowa a mu ka kisangisangi ka mu Pacifique, pabayitamine ungi misionere bwabadya kwenda mu kuloba. Yawa misionere bamulungwile’shi, “Nafiki maloba ku namashika mu nsaa ya kitema.” Yawa mukwetu mulume bamwalulwile’shi, “Yaya nsaa tayibuwa. Atuyiya nsaa yatudi balombene kukwata mishipa, kushii nsaa yatukumiin’atwe banabene.”

⁹ Mu mushindo umune, balongi ba Yesu abaadi bafikye balobi ba bantu mu siekele a kumpala, abaadi abende mbalo na nsaa yabaadi balombene kwibapeta. Bu kileshesho, balongi ba Yesu abaadi abalambukisha mu ntempelo, mu bitumbwilo, ku nshibo na nshibo na pa mbalo ya kisalwe. (Bik. 5:42; 17:17; 18:4) Natwe namu, abitungu twiukye mbalo na nsaa yatudi balombene kupeta bantu ba mu teritware etu bwa kwibalungula mukandu wibuwa. Twikitshishe bwa kushintuula programe etu, bwa’shi bitukwashe bwa kwenda mu bulungudi mu nsaa na mu mbalo yatudi balombene kupeta bantu.​—1 Kod. 9:19-23.

10. Bina mudimo kinyi bitupe ndumbulwilo a Yehowa?

¹⁰ Mulobi e na lukalo na bina mudimo bibuwa na kuuka kipaso kya kwibifubisha. Natwe namu twi na lukalo na bina mudimo bibuwa mu mudimo wa bulungudi na kuuka bya kwibifubisha kalolo. Yesu baadi mulungule balongi baye mushindo ubabadya kulungula mukandu wibuwa. Badi mwibalungule kyabadya kwata, mbalo yabadya kulambukisha na kyabadya kwakula. (Mat. 10:5-7; Luk. 10:1-11) Lelo uno, ndumbulwilo a Yehowa mmutushe kashete ka bina mudimo ke na bintu byooso bilombene kwitukwasha bwa kukita mudimo kalolo. * Na kwete kwitulongyesha mushindo wa kwibifubisha. Aa malongyesha aetukwasha bwa kwikala bashinkamishe bya binyibinyi byatulambukisha na kupeta ngobesha yatudi nayo lukalo bwa kwikala balongyeshi bebuwa.​—2 Tim. 2:15.

11. Bwakinyi abitungu’shi balobi ba bantu bekale n’eshimba dinyingye?

¹¹ Balobi ba mishipa abekalaa na lukalo lw’eshimba dinyingye. Mu mema, abafumankanaa na nkalakashi yabasha bapwandjikishanga. Abakambaa kufuba bufuku na ingi nsaa  bipapi bi bukopo abibakalakashaa. Mu mushindo umune, balobi ba bantu abekalaa na lukalo lw’eshimba dinyingye. Nsaa yatubanga kulungula na kuukibwa bu Temwe a Yehowa, twi balombene kufumankana na “bipapi” kwamba’shi mushikwa wa bena kifuko netu, kumonyibwa ku bisumanga kwi bena mudimo netu, na nsaa ibangi abapele kutemesha mukandu wetu. Bino t’abitukanyisha nya. Yesu baadi mudimushe’shi akatumu balongi baye munkatshi mwa bantu bebashikwe.​—Mat. 10:16.

12. Muyile Yooshwa 1:7-9, nkinyi kilombene kwitukwasha bwa kunyisha kunyinga eshimba?

¹² Mushindo kinyi odi mulombene kunyisha kunyinga eshimba? Kya kumpala, ikala mushinkamishe’shi, Yesu kwete kutugunguka na kukunkusha mudimo wa kulungula mukandu wibuwa kukatukila mwiyilu. (Yo. 16:33; Kibaf. 14:14-16) Akupu, nyingisha lukumiino lobe mu mulayilo wa Yehowa wa’shi akupasukila. (Mat. 6:32-34) Apanyisha kunyinga lukumiino lobe, onyisha kunyinga eshimba. Mpyeele na benaye, abaadi baleshe lukumiino lwi bukopo nsaa ibaabadi balekye mudimo wabo wa kuloba bwa kulonda Yesu. Mu mushindo umune, bodi muleshe lukumiino lwi bukopo nsaa ibodi mulungule bena mudimo nobe na be na kifuko kyobe’shi, bobanga kulonga Bible na ba ba Temwe ba Yehowa na kutwela mu bisangilo byabo. Kushii mpaka, we mushintule nshalelo obe bwadya kwipushena na miiya ya Yehowa. Bino bibaadi abitekye lukumiino, n’eshimba dinyingye. P’okwete kutungunuka na kunyisha kunyinga eshimba, ekala mushinkamishe’shi: “Yehowa Efile Mukulu oobe, eekala noobe kooso kwende.”​—Badika Yooshwa 1:7-9.

13. Kunangushena na kuteka mbilombene nkukwasha naminyi bwa kunyisha kunyinga eshimba?

 ¹³ Mushindo kinyi dingi odi mulombene kunyisha kunyinga eshimba? Teka bwa’shi wekale mukankamane na munyingye eshimba. (Bik. 4:29, 31) Yehowa akaluula nteko yobe na t’akakusumbushena nya. Ekala kwanka nsaa yooso bwa nkukwatshishena. Dingi, we kunangushena mu mushindo ubadi Yehowa mupashe bantu kala. Nangushena dingi pabitale mushindo ubaadi mu kukwashe bwa kunyingiila nkalakashi kampanda na mukupe bukome bwa kushintula nshalelo obe. Kushii mpaka, yawa baadi mukwashe mwilo waye bwa kusabuka Kalunga kamonga, mulombene nkukwasha bwa kwikala mulongi a Kidishitu. (Efi. 14:13) Ikala na kushinkamisha bu mufundji a misambo bambile’shi: “Yehowa ee naami, ntantshiinyi kintu; kilombeene kunkitshiina bantu nkinyi?”​—Mis. 118:6.

14. Mwisambo wa Masae na Tomoyo ubakulongyesha kinyi?

¹⁴ Ungi mushindo wa kunyisha kunyinga eshimba, nyi nkulonga mushindo ubaadi Yehowa mukwashe bantu abaadi na buufu, kadi batabadi n’eshimba dinyingye. Tala mwanda wa mukwetu mukashi abetaminaa bu Masae. Baadi na buufu na baadi apusha’shi, t’amulombene kwakula pe bantu bebungi pabitale lukumiino lwaye. Baadi amono’shi kwisamba na bantu boshe’ukena nabo, kwi bukopo nka bu muntu atompo kwitumba kimano kii bula, na kupwandjikisha’shi ta mulombene kobesha kwibikita. Anka baadi mukite mwaye mooso bwa kutamisha kifulo kyaye bwa Yehowa na bantu naye. Baadi munangushene ngofu pabitale bwakinyi bi na muulo kulungula mukandu wibuwa bukidibukidi kubanga binobino, na aye nkuteka bwa’shi apete bukome bwadi nabo lukalo bwa kulungula mukandu wibuwa. Baadi mukambile moo ubaadi nao, aye nkufuba mpa na bu mbala-mashinda a myeshi yooso. Yehowa mulombene dingi kukwasha balungudi bapya bwabadya kwikala ‘banyingye mashimba.’ Banda kutala mwanda wa mukwetu mukashi abetaminaa bu Tomoyo. Pa babangile kulungula mukandu wibuwa ku nshibo na nshibo, mwana mukashi abasangene ku nshibo ya kumpala ku bakokwele, bamusashiile amulungula’shi: “Ntankumiinaa kwisamba na ba Temwe ba Yehowa!” na aye nkushita kiibi musango umune. Tomoyo tabaadi mutshine nya, baadi mulungule mukwetu mukashi abaadi naye mu bulungudi’shi: “Bopusha bibamba? Ntshi mwakule mwanda su ngumune nya. Ne na muloo ngofu mwanda bantundula’shi ne Temwe a Yehowa!” Binobino, Tomoyo taadi mbala-mashinda a myeshi yooso.

15. Kwikitshisha akulesha kinyi, na bwakinyi kwi na muulo bwa bena Kidishitu?

¹⁵ Bwadya koobesha, abitungu mulobi ekitshishe. Kwikitshisha mbekuleshe bu “ngobesha yakukita mwetu mooso bwa kulombasha mudimo kampanda autungu’shi tukite.” Bantu abalobaa mishipa ya kuudisha, abitungu bekitshishe bwa kubuka kunamashika bwee, na kutungunuka na kukita mudimo mpa na pa upwila sunga bafumanka na nkalakashi. Natwe namu, su atukumiina kunyingiila na kukumbasha mudimo wetu, abitungu twikitshishe.​—Mat. 10:22.

16. Nkinyi kilombene kwitukwasha bwa kukita myanda ayitwelelaa bukopo kukita?

¹⁶ Kebungi, atukumiinaa kukita nka myanda ibofule. Anka, ingi nsaa, myanda i na muulo tayi nka ibofule kukita nya. Byabya abitungu twikitshishe. Nyi bwakinyi twi na lukalo lwa bukwashi bwa kukita myanda ayitwelelaa bukopo kukita. Kubukwashi bwa kikudi kiselele, Yehowa etupa bwabwa bukwashi.​—Nga. 5:22, 23.

17. Muyile 1 Beena-Kodinda 9:25-27, mushindo kinyi ubaadi Mpoolo ekitshisha?

¹⁷ Mpoolo mutumiibwa baadi ekitshisha. Nyi bwakinyi alesha’shi ingi nsaa baadi ‘afwambusha  mbidi yaye na kwiyitonta’ bwa kukita kyakya kii buwa. (Badika 1 Beena-Kodinda 9:25-27.) Mpoolo baadi munyingishe bangi bwabadya kwikitshisha, na bwa kukita byooso “mu kipaso kilombâne na kwilondêna kalolo.” (1 Kod. 14:40, EEM) Abitungu twikitshishe bwa kulama byubishi bya mu kikudi mpa na kukita mudimo wa mu kifwanyi; wa kuloba.​—Bik. 2:46.

18. Nkinyi akitungu’shi tukite su atukyebe’shi Yehowa amone’shi tubobesha mu mudimo wetu wa bulungudi?

¹⁸ Muntu alobaa mishipa ya kuudisha amona’shi bobesha, nka su bakwata mishipa ibungi. Anka, mudimo wa bulungudi ngwilekene, mwanda kobesha kwetu nta nkutale bungi bwa bantu babatukwasha bwa kwikala ba Temwe ba Yehowa. (Luk. 8:11-15) Su twa tungunuka na kulungula mukandu wibuwa na kulongyesha bangi, Yehowa etumono’shi tubobesha. Bwakinyi? Mwanda tubamukookyela aye na Mwan’aye.​—Mak. 13:10; Bik. 5:28, 29.

19-20. Kangi kabingilo kinyi kakata aketutakula bwa kulungula mukandu wibuwa binobino?

¹⁹ Mu angi maumbo, abatshibaa myeshi kampanda ya kuloba. Mu aa maumbo, mulobi a akita mwaye mooso na bukidibukidi bwa kuloba ngofu kumpala kwa’shi kyakya kipungo kimane. Bu byatudi balobi ba bantu, kano nyi kangi kabingilo aketutakula bwa kukita bukidibukidi mudimo wa bulungudi kubanga binobino, mwanda: Nfudiilo auno ndumbulwilo kwete kunyisha kwifubwila peepi! Nsaa yibashala ngipela bwa kukita uno mudino aupasha myuwa. Totengyela nka’shi nshalelo obe ekale mupwidikye bwa kukita uno mudimo wi na muulo.​—Mul. 11:4.

²⁰ Kita mobe mooso bwa kubanga kunyingisha lukalo lobe lwa kulungula mukandu wibuwa, kutamisha kyukilo kyobe kya Bible, kunyisha kunyinga eshimba na kwikitshisha. Fuba pamune na balobi ba bantu bakile pa midiyo mwanda, na okamono muloo wa Yehowa. (Ne. 8:10) Ikala na kitshibilo kya kulungula mukandu wibuwa muyile ngobesha yobe, na kutungunuka na kwiukita mpa na nsaa ayikamba Yehowa’shi ubalombana. Bu byatudi balobi ba bantu, mwisambo aulondo awitulesha myanda isatu yatudi balombene kukita bwa kunyingisha kitshibilo kyetu kya kutungunuka na kulungula mukandu wa Bufumu.