1. Bangi mbesumine myanda kinyi, na bwakinyi mbeyisumine?

MIDIYO ya bafubi ba Yehowa lelo uno bakwete kwisumina myanda ibungi. Bakwetu balume na bakashi bebungi mbate kitshibilo kya kwikala bukupi. Ba mulume na mukashi beyibakishene bebungi mbate kitshibilo kya kubanda kupela kutanda. Bifuko bibungi mbipelepeshe nshalelo aabyo. Bano booso, mbate bino bitshibilo bwa kabingilo kamune ke na muulo ngofu​—bwa kukita bibungi mu mufubo wa Yehowa. Be na muloo na mbakulupile’shi Yehowa ebakumbeesha nkalo yaabo. Yehowa akutwa kwibelela myabi su? Nya! Bwakinyi atwibishinkamisha? Mwanda, Yehowa baadi mwelele Abrahame, “nshe baa-sha-lukumiino booso” myabi.​—Lom. 4:11.

2. (a) Muyile Beena-Ebelu 11:8-10, 16, bwakinyi Abrahame baadi mukumiine kukatuka mu kibundji kya Ure? (b) Nkonko kinyi yatwaluula mu uno mwisambo?

² Abrahame baadi mukumiine kukatuka mu kibundji kya Ure mubaadi na nshalelo ebuwa. Bwakinyi? Mwanda baadi atengyela “kibalo ki na bibangilo bi bukopo.” (Badika Beena-Ebelu 11:8-10, 16.) Kyakya “kibalo” nkinyi? Nkalakashi kinyi ibaadi Abrahame mufumankane nayo nsaa ibaadi atengyela kwibakwa kwa kyakya kibalo? Na mushindo kinyi watudya kwambula kileshesho kya Abrahame na kya booso bakwete kulonda kileshesho kyaaye?

3. “Kibalo” kibaadi Abrahame atengyela nkinyi?

³ Kibalo sunga kibundji kibaadi Abrahame atengyela nyi Bufumu bw’Efile Mukulu. Yesu na bedibwe mwimu 144 000 nyi abamunana mu bwabwa Bufumu. Mpoolo etamina bwabwa Bufumu bu “lupata lw’Efile Mukulu atala, Yeelusaleme a mwiyilu.”  (Eb. 12:22; Kibaf. 5:8-10; 14:1) Yesu baadi mulungule balongi baaye bwabadya kuteka pabitale bwabwa Bufumu bumune, na kuteka bwa’shi kikyebe ky’eshimba ky’Efile Mukulu kikitshikye pa nsenga bu mwiyilu.​—Mat. 6:10.

4. Muyile Kibangilo 17:1, 2, 6, Abrahame baadi auku myanda yooso pabitale Bufumu bubaadi Yehowa mulee su?

⁴ Abrahame baadi auku myanda yooso pabitale abikekala Bufumu bw’Efile Mukulu su? Nya. Munda mwa bipwa bibungi, ino myanda ibaadi bu “bifwame bya kishila.” (Ef. 1:8-10; Kol. 1:26, 27) Anka Abrahame baadi auku’shi bangi ba ku twikulu twaye atukekala ba nfumu. Yehowa baadi mu mulee byanka. (Badika Kibangilo 17:1, 2, 6.) Abrahame baadi na lukumiino lwi bukopo mu milayilo y’Efile Mukulu nka bu baadi amono Mesiya, baadi na kya kufika bu Nfumu a Bufumu bw’Efile Mukulu. Nyi bwakinyi Yesu baadi mulungule bena Yunda ba mu mafuku aaye’shi: “Nshenu Abrahame baadi na kusepeela pabaakulupilanga kumona efuku dyande, beedimwene aye nkupusha muloo.” (Yo. 8:56) Abimweka patooka’shi, Abrahame baadi auku’shi bangi ba ku twikulu twaye atukukekala bu bakunkushi ba Bufumu bwabakatulu kwi Yehowa, na baadi akumiina kutengyela bwa’shi Yehowa akumbashe wawa mulayilo.

5. Atuuku naminyi’shi Abrahame baadi atengyela “kibalo” ky’abelele mufunda kwi Efile Mukulu?

⁵ Mushindo kinyi ubaadi Abrahame muleshe’shi baadi atengyela “kibalo,” ky’abelele mufunda kwi Efile Mukulu? Kya kumpala, Abrahame tabaadi mulamate ku myanda ya mafumu a pano pa nsenga nya. Baadi nk’afiluka, kushii kwibaka yaaye nshibo mbalo kampanda, na tabaadi akwatshishena nfumu su ngumune a pa nsenga. Na dingi, Abrahame tabaadi mutompe efuku su ndimune kukita bwaye bufumu. Anka, baadi atungunuka na kukookyela Yehowa na kutengyela kulombana kwa mulayilo waye. Pa kukita byabya, Abrahame baadi muleshe lukumiino lwi pabwalo. Tutaluuleyi imo ya ku nkalakashi yaadi mupete nayo na mushindo watudya ku mwambula.

6. Kibundji kya Ure kibaadi naminyi?

⁶ Abrahame baadi mulekye kibundji kya Ure, kibaadi kilamwe kalolo, na kibaadi bantu balongye kalolo. Kibaadi kikalwilwe na midimba  ilaa na mikola ku mpese isatu. Na bantu ba mu Ure abaadi abauku kufunda na kukita makumi kalolo. Abimweka’shi bantu bebungi abaadi abemukitshi busunga mwanda mbemupete mikanda ibungi ayakwila myanda ya busunga. Mashibo a bantu abaadi b’eebakye na matafwadi, na midimba ibaadi y’eele mpetshi tooka. Angi aku ano mashibo abaadi na tudimbo 13 sunga 14, mu lupango lushima mwelwe sima.

7. Bwakinyi bibaadi abitungu’shi Abrahame akulupile’shi Yehowa amukalwila na kifuko kyaaye?

⁷ Abrahame baadi na kya kukulupila’shi Yehowa a mukalwila na kifuko kyaaye. Bwakinyi? Tentekyesha’shi Abrahame na Sara abaadi balekye nshibo ibabadi bashale mu kibundji kya Ure kibaadi kikalwilwe kalolo, bwa kushaala mu tushibo twa mapema mu mapya a Kanaana. Aku aye na kifuko kyaaye abaadi mu kibundji kibaadi kikalwilwe na midimba na mikola ibuula. Anka, tababaadi dingi bakalwilwe, na beshikwanyi abaadi bya kwibatuka ngoshi kushii lukalakashi.

8. Mmyanda kinyi ibaadi ayitungu’shi Abrahame anyingiile?

⁸ Sunga bibaadi Abrahame akitshi kikyebe ky’eshimba dy’Efile Mukulu, ingi nsaa baadi mukutwe bya kudiisha kifuko kyaaye. Mu kibundji mubaadi Yehowa mumulungule bwa kwenda, mubatwelele nsala ikile. Nsala ibaadi bukopo bukile mu kipaso kibaadi Abrahame mwate kitshibilo kya kwenda bwa kushaala na kifuko kyaaye mu Ejiipitu munda mwa mafuku apeela. Kadi pabafikile mu Ejiipitu, Faraone nfumu a dyadya eumbo, baadi mwate mukashi aaye. Banda kunangushena kenyongoshi kabaadi nako Abrahame mpa na pabaadi Yehowa mutakule Faraone bwa kwalusha Sara.​—Kib. 12:10-19.

9. Nkalakashi kinyi ibaadi Abrahame mupete mu kifuko kyaaye?

⁹ Nshalelo a Abrahame baadi bukopo. Mukashi aaye Sara abaadi mufule, baadi nkunga. Munda mwa bipwa bibungi, abaadi abenyongola bwa uno mwanda. Nyi bwa kinyi Sara baadi mupe Abrahame mufubi aaye mukashi Hagaare, bwa’shi su bekupeta mwana. Kadi pabapetele Hagaare eyimi dya Ismaele, babangile kubepuula Sara. Mwanda ubafikile bukopo mu mushindo ubaadi Sara mubingye Hagaare.​—Kib. 16:1-6.

10. Mmyanda kinyi itale Ismael na Isaake ibaadi ilombene kutompa lukulupilo lwa Abrahame mwi Yehowa?

¹⁰ Ku nfudiilo abyooso, Sara bayimiite, na aaye nkutanda mwana, na Abrahame nkumudika bu Isaake. Abrahame baadi mufule bana baaye booso babidi, Ismaele na Isaake. Bu bibaadi Ismaele asengye Isaake, abaadi balungule Abrahame bwadya kumubinga na nyinaye. (Kib. 21:9-14) Kunyima, Yehowa baadi mutekye Abrahame bwa’shi amulambule Isaake. (Kib. 22:1, 2; Eb. 11:17-19) Mu ino myanda yooso, Abrahame baadi na kya kukulupila’shi Yehowa alombasha milayilo y’aye pabitale bana b’aye.

11. Bwakinyi Abrahame baadi mutengyele Yehowa na lwishinko?

¹¹ Munda mwa ano mafuku ooso, Abrahame baadi mulongye bya kutengyela Yehowa na lwishinko. Baadi pangi na bipwa bikile pa 70 nsaa ibaadi mukatukye na kifuko kyaaye mu Ure. (Kib. 11:31–12:4) Pangi munda mwa bipwa lukama, Abrahame baadi mushaale mu tushibo twa mapema, na kufiluka mu bibundji bya mu Kanaana. Abrahame mmufwe na bipwa 175. (Kib. 25:7) Kadi, tamumone Yehowa kwadi mulombashe mulayilo Waye wakutusha eumbo dibaadi mumulee aye na bekulu baaye nya. Na ta mushaale mafuku ebungi bwa kumona apatudibwa kibundji, sunga’shi Bufumu bw’Efile Mukulu nya. Sunga mbyabya, bifundwe abilesha’shi Abrahame mmufwe “mu bununu bwa mwabi.” (Kib. 25:8) Sunga mbibaadi mupete nkalakashi ibungi, Abrahame baadi mushaale  nka na lukumiino lwi bukopo na baadi na muloo wa kutengyela Yehowa. Bwakinyi baadi na ngobesha ya kunyingila? Mwanda, mu muwa waye ooso, Yehowa baadi amukalwila na kumumona bu kuuku aye.​—Kib. 15:1; Yesh. 41:8; Shak. 2:22, 23.

12. Nkinyi kyatukwete kutengyela, na nkinyi kyatutaluula?

¹² Nka bu Abrahame, tukwete kutengyela kibundji ki na bibangilo bibukopo. Tatukwete kutengyela’shi kino kibalo kibakibwe nya. Bufumu bw’Efile Mukulu tabubatudilwe mu 1914 na tabubabangile kumunana mwiyilu. (Kibaf. 12:7-10) Kadi tukwete kwibutengyela bwa’shi bukunkushe nsenga. Patukya twibutengyela, twi balombene kufumankana na nkalakashi ibungi bu Abrahame na Sara. Lelo uno, kwi bafubi ba Yehowa bakwete kwambula kileshesho kya Abrahame. Miisambo ya bantu ikwete kutuka mu Kitenta kya Mulami ayilesha’shi, nka bu Abrahame na Sara, bafubi ba Yehowa lelo uno bakwete kulesha lukumiino na lwishinko. Tutaluuleyi imo ya ku ino miisambo, na kyatulongyela ku yanka.

13. Nkinyi kibolongyela ku mwisambo wa mukwetu Bill Walden?

¹³ Kumiina kwisumina ingi myanda. Su twatula Bufumu bw’Efile Mukulu pa mbalo ya kumpala mu muwa wetu, atwikala nka bu Abrahame baadi mukumiine kwisumina ingi myanda bwa kusankisha Efile Mukulu. (Mat. 6:33; Mak. 10:28-30) Tala kileshesho kya mukwetu Bill Walden. * Mu kipwa kya 1942, Bill tabaadi peepi na kupudisha kilongyelo kikata mu États-Unis, bu ingeniere mu myanda ya kwibaka pa babangile kulonga Bible na ba Temwe ba Yehowa. Ungi a ku balongyeshi ba Bill baadi mukite bya’shi apete mudimo nka’ye kyapudisha, kadi Bill nkupela. Alesha’shi, baadi mwate kitshibilo kya kupela mudimo wabamufutu kalolo bwa kufubila Yehowa ngofu. Kunyima kwa byabya, mbulamatadi baadi mulungule Bill bwadya kutwela mu busalayi. Na kaneemo kooso, Bill baadi mupele nyi bwakinyi abaadi bamutshibile kibawe kya kufuta  dolare 10 000 na kukita bipwa bitano mu lukano. Abamufungwile kunyima kwa bipwa bisatu. Kunyima, abaadi bamwitamine ku kalasa ka Galaade, na abo nkumutuma bu misionere mu Afrique. Akupu, Bill baadi mwiyibakishene na Eva, booso bw’aabo abaadi bafube mu Afrique mubaadi amwibatungu kwitatshisha. Kunyima kwa bipwa bibungi, abaadi balukile mu États-Unis bwa kupasukila nyinaye na Bill. P’akula pabitale nshalelo aye, Bill amba’shi: “Panangushena pabitale kineemo kimpe Yehowa kya kumufubila munda mwa bipwa bikile pa 70, mpolo ayintuuku ku meso. Namutumbula p’aye nkukwasha bwandya kumufubila mu muwa wade.” We kukumiina kukita mudimo wa nsaa yooso mu muwa oobe su?

14-15. Nkinyi kibolongyela ku mwisambo wa mukwetu Apostolidis na mukashi aaye Eleni?

¹⁴ Topwandikishanga’shi topete nkalakashi. Kileshesho kya Abrahame kibetulongyesha’shi, booso abafubila Yehowa mu muwa w’abo ooso abapete nkalakashi. (Shak. 1:2; 1 Mp. 5:9) Kileshesho kya mukwetu Aristotelis Apostolidis * akibishinkamisha. Baadi mubatshishibwe mu Grèce mu kipwa kya 1946, na mu 1952 baadi mwibakile mukwetu mukashi Eleni baadi na bipatshila bu byaaye. Anka Eleni bakumbile, abo nkumukwata na mukumbo wa cancer ka mu bongo wa betaminaa bu Tumeur du cerveau. Uno mukumbo ubapwile, kadi bipwa bipela kunyima n’aabo kwiyibakishena, ubaadi walukile dingi. Doktere nkumubala dingi, anka Eleni baadi mufwe lupese na tabaadi dingi akula kalolo. Baadi mushaale nka na kisumi mu bulungudi sunga bibaadi na wawa mukumbo na kubingwabingwa kwa mbulamatadi mu aa mafuku.

¹⁵ Munda mwa bipwa 30 Aristotelis baadi nka apasukila mukashi aaye. Mu aa ooso mafuku, baadi mukulu mu kakongye, na baadi dingi afubu mu komite ku bikongeno bya mafuku asatu, na kukwasha ku lwibako lwa ma nshibo a bikongeno. Mu 1987, pa baadi Eleni alungula mukandu wibuwa kumpala kwa lupango lwetu, kiibi kya kyamo kibushito kibaadi kimwikupile, akyo nkumusakula ngofu. Baadi mukambilwe munda mwa bipwa bisatu, na aaye nkufwa. Ku nfudiilo kwa mwisambo w’aye Aristotelis  amba’shi: “Munda mwa bipwa, nemupete nkalakshi ibungi na ingi ibaadi ya mu kabasamushi. Naadi na kitshibilo kya kunyingiila kushii kulekyela kintu su nkimune bwakidya ku mbofusha kwishimba. Yehowa baadi ampa bukome bunaadi n’aabo lukalo bwa kunyingiila ino nkalakashi.” (Mis. 94:18, 19) Yehowa mmfule bafubi b’aaye booso bakwete kukita mwabo mooso bwa kumufubila sunga bekala na nkalakashi!

16. Elango kinyi di buwa dibaadi mukwetu Nathan Knorr mupe mukashi aaye?

¹⁶ Tuula binangu ku myanda ayifiki kumpala. Abrahame baadi mutule binangu ku efuto dibaadi Yehowa mu mulee, na bino bibaadi bimukwashe bwa kunyingiila nkalakashi ibaadi nayo. Mukwetu mukashi Audrey Hyde baadi mutungunukye na kulama lukulupilo lwaye bwa mafuku aafiki sunga bibaadi mulume aaye a kumpala Nathan H. Knorr, mufwe na mukumbo wa cancer, na bibaadi mulume aaye a kabidi Glenn Hyde mukumbe mukumbo wa mu bongo wabetanyina bu Alzheimer. * Amba’shi kintu kibaadi ki mukwashe nyi mayi abaadi amulungule mukwetu Nathan Knorr mafuku apeela kumpala kwa’shi afwe. Amba’shi: “Nathan baadi muntentekyeshe’shi: ‘kunyima kwa lufu, lukulupilo lwetu ndwa binyibinyi, na tatukumbu dingi.’ Akupu aye nkunyigisha’shi: ‘Tala kumpala, mwanda nyi kwi efuto dyobe.’ . . . Aye nkwakula dingi’shi: ‘Ikala na bibungi bya kukita​—tompa kufubisha muwa oobe bwa kufubila bangi. Bino abikupa muloo.’” Dino nyi elango dibuwa bwetu, bwa kukitshina bangi bibuwa na bwa kwikala na “muloo mu lukulupilo”!​—Lom. 12:12.

17. (a) Bwakinyi twi na kabingilo ka kutula binangu byetu ku myanda i kumpala? (b) Kulonda kileshesho ki mu Mika 7:7, akwitukwasha naminyi bwa kukapeta myabi mu mafuku aafiki?

¹⁷ Lelo uno, twi na tubingilo twi bungi twa kutuula binangu byetu ku myanda i kumpala. Myanda ikwete kukitshika lelo uno, ayilesha patoka’shi twi ku nfudiilo kwa mafuku a ku nfudiilo kwa uno ndumbulwilo. Mu mafuku apela’mu, kibundji ki na bibangilo bi bukopo akikukunkusha nsenga ishima. Kimune kya ku bintu byatutengyela akitwikasha na muloo, nyi nkukemonena na bakwetu batudi bafule p’abakasanguka. Mu aa mafuku, Yehowa akafutu Abrahame bwa lukumiino na lwishinko lwaye, pa kumusangula na kifuko kyaaye. Okekala panka bwa kwibakukila su? Oolo, we mulombene nka su okumiina kwisumina ingi myanda bwa Bufumu bwa Yehowa, oshaala na lukumiino sunga opeta nkalakashi, na su olonga bya kwindjila Yehowa na lwishinko bu Abrahame.​—Badika Mika 7:7.