1. Mmwabi kinyi watudi nao?

TWI NA mwabi ukata wa kwikala mu kakongye ka Yehowa! Twi mu mpaladiiso a mu kikudi, mwi bantu be na kufukama na muloo. We na mudimo kinyi mu kakongye?

2. Nkileshesho kinyi kibaadi Mpoolo mufubishe mu mikanda yaye ibungi iyokyelwe?

² Kileshesho kibaadi Mpoolo mutumiibwa mufubishe mu mikanda yaye ibaadi mufunde ku bukome bwa kikudi kiselele, ki kwitukwasha bwa kulonga bibungi pabitale mudimo watudi nao mu kakongye. Mu ooso wa ku yaya mikanda, Mpoolo mmupwandikishe kakongye na mbidi ya muntu. Mmupwandikishe dingi bantu be mu kakongye na bipindji bya mbidi.​—Lom. 12:4-8; 1 Kod. 12:12-27; Ef. 4:16.

3. Mmalongyesha kinyi asatu atukyebe kutaluula mu uno mwisambo?

³ Mu uno mwisambo, atukyebe kutaluula malongyesha asatu atudi balombene kulongyela ku kileshesho kya Mpoolo. Dya kumpala, atukyebe kulonga’shi ooso a kwatudi e na mbalo * mu kakongye ka Yehowa. Dya kabidi, atukyebe kwakwila pabitale kyatudya kukita su atumono’shi tatwi na mbalo mu kakongye. Na dya kasatu, atukyebe kumona bwakinyi abitungu tufube ngofu bwa kulombasha mudimo watudi nao mu kakongye k’Efile Mukulu.

4. Mukanda wa Beena-Looma 12:4, 5 awitulongyesha kinyi?

⁴ Dilongyesha dya kumpala dyatulongyela ku kileshesho kya Mpoolo ndya’shi, ooso a kwatudi e na mbalo ikata mu kifuko kya Yehowa. Mpoolo abanga kileshesho kyaye na kwakula’shi: “Mwanda, sunga byatudi na bipindji bibungi mu mbidi imune, bipindji byooso byaabya tabii na mufubo umune nya, byabya atwe bebungi twi’nka mbidi imune mu Kidishitu, beekale booso ku muntu na muntu bu bipindji bya mbidi imune.” (Lom. 12:4, 5) Mpoolo baadi akyebe kwakula kinyi? Sunga byatudi na midimo ilekene mu kakongye, ooso a kwatudi e na muulo.

5. ‘Mbyabuntu’ kinyi byabadi betupe kwi Yehowa mu kakongye?

⁵ Nsaa y’onangushena pabitale baaba be na mudimo mu kakongye, binangu byobe abyende mususa umune kwi baaba abakunkusha. (1 Tes. 5:12; Eb. 13:17) Eyendo’shi kukiila kwi Kidishitu, Yehowa mmwitupe “bantu [bekale] bya buntu” mu kakongye. (Ef. 4:8) Mu bano “bantu [bekale] bya buntu” mwi Kasaka ka Bakunkushi Bakulu, bakwashi baabo, bena Komite a filiale, bakunkushi ba bifunda, balongyeshi ba ku tulaasa twa teokrasi, bakulu mu tukongye, na bafubi ba midimo. Bano bakwetu booso mbebasangule kwi kikudi kiselele, bwa kupasukila mikooko ya Yehowa na kunyingisha kakongye.​—1 Mp. 5:2, 3.

6. Muyile 1 Beena-Tesalonika 2:6-8, bakwetu babadi basangule kwi kikudi kiselele bakwete kwitatshisha bwa kukita kinyi?

⁶ Kikudi kiselele kikwete kusangula bakwetu balume bwabadya kutwala mashito elekenelekene. Nka bu abifubaa bingi bipindji bya mbidi bu maboko na mikoolo bwa kukwasha mbidi ishima, bakwetu balume babadi basangule kwi kikudi kiselele bakwete kufuba ngofu bwa kukwasha kakongye kashima. Tabakwete kukimba nkumo yabo nya. Anka, bakwete kwitatshisha bwa kunyingisha bakwetu bena Kidishitu. (Badika 1 Beena-Tesalonika 2:6-8.) Atutumbula Yehowa bwa bano bantu banyingye mu kikudi, bashabatala penda nkalo yabo baadi mwitupe.

7. Mmyabi kinyi yikwete kupeta baaba be mu mudimo wa nsaa yooso?

⁷ Mbalombene kusangula bangi mu kakongye bwabadya kufuba bu ba misionere, ba mbala-mashinda ba nsaa yooso sunga ba myeshi yooso. Anka, mu nsenga ishima, bakwetu balume na bakashi mbate kitshibilo kya kulungula mukandu wibuwa na kwikasha bangi bu balongi bu mufubo wabo. P’abo kukita byabya, mbakwashe bantu bebungi bwabadya kufika bu balongi ba Yesu Kidishitu. Sunga’shi bano bakwetu abafubu nsaa yooso be na bintu bipeela bya ku mbidi, Yehowa kwete kwibelela myabi mu muwa wabo. (Mak. 10:29, 30) Twi bafule bano bakwetu balume na bakashi ngofu, na twi na muloo wa kwikala nabo mu kakongye!

8. Bwakinyi mulungudi ooso mu kakongye e na muulo ku meso kwa Yehowa?

⁸ Nka penda bakwetu be na mashito na baaba be mu mudimo wa nsaa yooso nyi be na mbalo mu kakongye su? Nya! Balungudi booso ba mukandu wibuwa be na muulo kwi Efile Mukulu na mu kakongye. (Lom. 10:15; 1 Kod. 3:6-9) Kadi, kamune ka ku bipatshila bikata mu kakongye nka kwikasha bantu bu balongi ba Nfumw’etu Yesu Kidishitu. (Mat. 28:19, 20; 1 Tim. 2:4) Booso be mu kakongye, balungudi babatshishibwe na bashi babatshishibwe, bakwete kwitatshisha bwa kutuula uno mudimo pa mbalo ya kumpala.​—Mat. 24:14.

9. Bwakinyi atwataa bakwetu bakashi bena Kidishitu na muulo?

 ⁹ Yehowa mmupe bakwetu bakashi mbalo ya kineemo mu kakongye. Kwete kwata na muulo bakashi, ba nyina bana, bakashi kilele, na bakwetu bakashi be bukupi abamufubila na lulamato. Mu Bible mbatemune bantu bakashi bebungi abaadi basankishe Efile Mukulu. Mbebaleshe bu bileshesho bibuwa mwanda abaadi na binangu, lukumiino, katshintshi, eshimba dinyingye, kalolo, na mifubo ibuwa. (Luk. 8:2, 3; Bik. 16:14, 15; Lom. 16:3, 6; Fid. 4:3; Eb. 11:11, 31, 35) Twi na lutumbu lukata kwi Yehowa mwanda wa bakwetu bakashi bena Kidishitu baadi mwitupe mu kakongye, be na ngikashi ibuwa nka bu ya baaba bakashi ba mu Bible!

10. Bwakinyi atwata bantu banunu na muulo?

¹⁰ Dingi twi na mwabi wa kwikala na bantu banunu mu kakongye. Tungi tukongye twi na bena Kidishitu banunu bafubile Yehowa mu muwa wabo ooso. Bangi namu mbalongye bya binyibinyi ku bukulu. Bebungi ba ku bano bakwetu banunu be na nkalakashi ya mbidi mwanda wa bununu. Ino nkalakashi ikwete kwibakutshishwa bya kukita bibungi mu kakongye na mu mudimo wa bulungudi. Anka, bakwete kwitatshisha bwa kulungula mukandu wibuwa, na kukita mwabo mooso bwa kunyingisha na kulongyesha bangi! Na tukwete kulonga bi bungi kwabadi. Be na muulo ku meso kwa Yehowa mpa na kwetu.​—Nki. 16:31.

11-12. Bwakinyi atunyingishibwa pa kwikala na ba nsongwa mu kakongye?

¹¹ Nangushena dingi pabitale ba nsongwa. Bakwete kupeta nkalakashi ibungi, mwanda abakudila mu uno ndubulwilo kwete kukunkusha Satana Diabulu na bukitshishi bwaye bwi bubi. (1 Yo. 5:19) Twi na muloo patumono ba nsongwa abaluula mu bisangilo, kulungula mukandu wibuwa n’eshimba dinyigye. Ba nsongwa, nwi na mbalo ikata mu kakongye ka Yehowa!​—Mis. 8:3.

¹² Anka, bibukopo bwa bangi bakwetu balume na bakashi kukumiina’shi be na muulo mu kakongye. Byabya, nkinyi kilombene kukwasha  ooso akwatudi bwadya kwipusha’shi e na mbalo mu kakongye? Tutaluuleyi.

13-14. Bwakinyi bangi abemonaa bu bashii na muulo mu kakongye?

¹³ Dilongyesha dya kabidi dya mu kileshesho kya Mpoolo aditumu binangu byetu ku myanda ikwete kufumankana nayo bantu lelo uno; ayibatakula mu kunangushena’shi tabe na muulo mu kakongye. Mpoolo bafundjile’shi: “Su lwao lwamba’shi: ‘Bu byashii eyaasa, byaabya ntshi kipindji kya mbidi nya, ndulombeene kuleka kwikala ku mbidi su?’ Su etwi dyamba’shi: ‘Mwanda ntshi eyiso, ntshi kipindji kya ku mbidi nya,’ adilekye paapa kwikala ku mbidi su?” (1 Kod. 12:15, 16) Mpoolo baadi akyebe kwakula kinyi?

¹⁴ Su wekala wepwandikisha na bangi mu kakongye, we kubanga kwimona bu’be shii na muulo mwanka. Mu kakongye, bangi mbalombene kwikala abalongyesha kalolo, abalumbuula myanda kalolo, sunga be na ngobesha ya kunyingisha bangi. Pangi omono’shi twe byabadi nya. Byabya abilesha’shi we mwiyishe na ouku mikalo yobe. (Fid. 2:3) Kadi abitungu wekale mudimukye. Mwanda su otungunuka nka na kwipwandjikisha na baaba be na ngobesha nkukila, we kubofula kwishimba bisumanga. We kwimona’nka bu’be shi na mbalo mu kakongye bu bibakwile Mpoolo. Nkinyi kilombene nkukwasha bwa kukatusha byabya binangu?

15. Muyile 1 Beena-Kodinda 12:4-11, nkinyi akitungu’shi tuukye pabitale bya buntu byatudi nabyo?

¹⁵ Banda kutala uno mwanda: Yehowa baadi mupe bangi ba ku bena Kidishitu ba mu siekele a kumpala bya buntu bya kukita bilengyeleshi na bukome bwa kikudi kiselele, kadi ta mbena Kidishitu booso babaadi bapete nka kyakya kya buntu nya. (Badika 1 Beena-Kodinda 12:4-11.) Yehowa baadi mwibape bya buntu na ngobesha ilekenelekene, kadi mwina Kidishitu ooso baadi na muulo. Lelo uno, tatwi na kya buntu kya kukita bilengyeleshi nya. Kadi, bi nka bu bibabidi mu siekele a kumpala. Tatwi na ngobesha i  mumune, kadi atwe booso twi na muulo ku meso kwa Yehowa.

16. Elango kinyi ditupe Mpoolo aditungu tutumikile?

¹⁶ Pamutwe pa kwipwadjikisha na bangi bena Kidishitu, abitungu tutumikile elango diyokyelwe dya Mpoolo mutumiibwa bafundjile’shi: “Muntu na muntu atalûle byabya byadi mukite ê nabêne. Su mmulombêne kwitumbisha, etumbishe mu byabya byadi mukite ê nabêne kushi mwipiki [kwipikena] na bibakitshi bangi.”​—Nga. 6:4, EEM.

17. Nkinyi kyatupete su atulondo elango dya Mpoolo?

¹⁷ Su twatumikila elango dituushe Mpoolo ku bukwashi bwa kikudi kiselele na kutaluula bikitshino byetu, twi kumona’shi twi na kya buntu kibuwa na ngobesha. Bu kileshesho, mukulu kampanda e kukutwa kwikala mulongyeshi ebuwa pakitshi mwisambo, kadi ekala mulongyeshi e buwa ngofu mu bulungundi. Sunga’shi e kukutwa kwikala alumbuula myanda kalolo bu abikitaa ungi mukulu a mu kakongye, kadi e na ngobesha ya kunyingisha bangi na balungudi abakumiinaa kumuteka malango. Sunga’shi e kwikala na nkumo ya muntu akukila benyi. (Eb. 13:2, 16) Su twauka ngobesha yetu, atwikala na muloo wa kukita kyakya kilombene kunyingisha kakongye. Na t’atwikala atukwatshila bangi kyuutu mwanda wa ngobesha yabadi n’ayo kadi yatushii n’ayo.

18. Mushindo kinyi watudi balombene kulumbula ngobesha yetu?

¹⁸ Sunga twekala na mashito e naminyi mu kakongye, abitungu atwe booso twikale na lukalo lwa kulumbula ngobesha yetu mu mudimo wetu wa bulungudi na mu nfubilo etu. Bwa kwitukwasha mu uno mushindo, Yehowa mmulumbuule tulaasa mu ndumbulwilo aaye. Bu kileshesho, mu bisangilo byetu bya munkatshi mwa lubingo, atulongyeshibwaa mushindo wa kufuba kalolo mu mudimo wa bulungudi. W’etatshishaa bwa kutumikila aa malongyesha su?

19. Mushindo kinyi odi mulombene kulombasha kipatshila ka kutwela mu Kalasa ka balungudi ba Bufumu?

¹⁹ Ungi mushindo wibuwa wakwete kwitulongyesha, nku Kalasa ka balungudi ba Bufumu. Kano kalasa mbekatuule bwa bakwetu balume na bakashi be mu mudimo wa nsaa yooso be na bipwa kubanga 23 na ku 65. We kumona bu’be shii mulombene kulombasha kino kipatshila. Kadi, pamutwe pa kufunda mulongolongo wa tubingilo atulesha bwakinyi twe mulombene kobesha, funda tubingilo atulesha bwakinyi okumiina kwimutwela. Akupu, ata mpángo ilombene nkukwasha bwa kulombasha myanda itekiibwe. Kubukwashi bwa Yehowa na kwitatshisha k’obe, kyakya kyomonanga bu ki bukopo, akikala kibofule.

20. Nkinyi akitulongyesha mukanda wa Beena-Looma 12:6-8?

²⁰ Dilongyesha dya kasatu dyatudi balombene kulongyela ku kileshesho kibadi Mpoolo mutushe, di mu Beena-Looma 12:6-8. (Badika.) Muno dingi, Mpoolo alesha’shi muntu ooso mu kakongye e na kya buntu kilekene. Kadi, pano ashimika kasele’shi, abitungu tufubishe kya buntu kyatudi n’akyo bwa kunyingisha kakongye.

21-22. Ndilongyesha kinyi dyatulongyela kwi Robert na Felice?

²¹ Tala kileshesho kya mukwetu Robert. * Kunyima kw’aye kufuba mu dingi eumbo, abaadi bamwitamine bwa kufuba ku Betele mwiumbo dyaabo. Sunga bibabaadi bamushinkamiishe’shi kushintuluka kwa mudimo  nta kwamba’shi mukite mwanda wibubi, kadi amba’shi: “Naadi mwinyongole munda mwa myeshi ibungi, mwanda naadi napwandikisha’shi ntshii mufube kalolo. Angi mafuku naadi napusha mpa na bya kukatuka ku Betele.” Mushindo kinyi ubaadi mupetuule muloo? Ungi mwinaye mukulu baadi mumutentekyeshe’shi mu mudimo ooso watukitshi, Yehowa kwete kwitulongyesha bwa’shi sunga twapeta ungi, twiukite kalolo. Robert baadi mumone’shi abitungu alekye kunangushena ku myanda ipwe kukila na atuule binangu byaye ku abitungu’shi akite binobino.

²² Mukwetu Felice Episcopo baadi mufumankane na mwanda wi mumune. Aye na mukashi aaye abatwelele mu kalasa ka Galaade mu 1956 na baadi mufube bu mukunkushi a kifunda mu Bolivie. Mu 1964 abatandile mwana. Felice bambile’shi: “Tubapushiishe bibubi pa kukatuka mu mudimo wetu ubaatudi bafule. Naadi mwinyongole munda mwa kipwa kishima. Kadi, ku bukwashi bwa Yehowa nashintulwile binangu byande ami nkukumiina mudimo wande upya wa bu nshe-mwana.” Wepushaa bu Robert sunga bu Felice su? Obofulaa kwishimba mwanda tokii na mashito obodi nao kumpala su? Su mbyabya, wekala na muloo su oshintuula binangu byobe na kwibituula ku byabya byokitshi binobino bwa kufubila Yehowa na bakwenu bena Kidishitu. Ikala na bibungi bya kukita, fubisha kya buntu na ngobesha yobe bwa kukwasha bangi, paapa opete muloo wa kunyingisha kakongye.

23. Nkinyi akitungu’shi twate nsaa ya kukita, na nkinyi kyatukataluula mu mwisambo aulondo?

²³ Ooso a kwatudi e na muulo ku meso kwa Yehowa. Akumiina’shi twikale mu kifuko kyaye. Su twata nsaa ya kunangushena ku byatudi balombene kukita bwa kunyingisha bakwetu bena Kidishitu, na kufuba ngofu bwa kulombasha wawa mudimo, tatwikala atwimono bu bashii na mbalo mu kakongye nya! Kadi twi kwakula kinyi pabitale kipaso kyatumonaa bangi mu kakongye? Mbikunyi byatudya kulesha’shi twibebafule na kwibanemeka? Mu mwisambo aulondo, atukataluula wawa mwanda wi na muulo ukata.