1. Yehowa bapangile bantu na ngobesha kinyi i pa bwayo?

YEHOWA bapangile bantu na ngobesha i pa bwayo. Betupeele ngobesha ya kunangusheena, ayitukwasha bwatudya kupudisha myanda na kwata mpàngo bwa mafuku aafiki. (Nkindji 2:11) Betupeele bukome, bwa’shi tumone bya kulombasha mpàngo yatudi baate na kulombasha biipatshila byetu. (Beena-Fidipe 2:13) Mmwitupe dingi kondo k’eshimba, kintu ki munda mwetu akitukwasha bwa kuuka kibuwa na kibubi. Kondo keetu k’eshimba aketukwasha bwatudya kupela kukita mulwisho na kulumbuula bilubilo byetu.​—Beena-Looma 2:15.

2. Yehowa etutekye’shi tufube na ngobesha yetu naminyi?

² Yehowa etutekye bwatudya kufuba na ngobesha yetu mu kipaso kibuwa. Bwakinyi? Mwanda mmwitufule na auku’shi su tubafubisha bya buntu byadi mwitupe kalolo atwikala na muloo. Bu kileshesho, atubadika bino mu Bifundwe bya kiina Ebelu: “Byooso abipwandjikisha muntu ee na kisumi abikumbana,” na’shi “kyooso akisangana eyaasa dyoobe buu kyadidyaa kukita, ekikite na bukome  bwobe [booso].” (Nkindji 21:5; Mulungudi 9:10) Mu Bifundwe bya kiina Greke namu atwimubadika bino: “Patukii na nguba, tukitshineeyi bantu booso myanda iibuuwa,” na’shi “ekwasheeneeyi, muntu ooso muyiile kipeebwa kyaadi mupete, ku muntu na muntu.” (Beena-Ngalatea 6:10; 1 Mpyeele 4:10) Kushii mpaka, Yehowa akumina’shi tukite myanda ayitukwasha atwe banabeene na bangi.

3. Bantu mbalobele mu myanda kinyi?

³ Yehowa akumina’shi tufube na ngobesha yetu, anka auku’shi twi balobele. Bu kileshesho, ta twi balombeene kukatusha kukutwa kwa kupwidika, mulwisho, na lufu nya. (1 Banfumu 8:46) Na dingi, ta twi balombeene kulama bangi bantu, mwanda muntu ooso e na bulungantu bwa kwisangwila. Sunga twekala na kiukilo kibungi na kumona myanda ibungi, ta twi balombeene kwikala na binangu bi mumune na bya Yehowa nya.​—Yeeshaya 55:9.

4. Mu uno mwisambo atukyebe kumona myanda kinyi?

⁴ Abitungu tutadiile nka Yehowa bwa’shi ekale etuludika nsaa yooso, bakulupile’shi aketukwatshisheena na kwitukitshina myanda yatushii balombeene kukita atwe banabeene. Byabya, Yehowa akumina’shi twikale atunangusheena ku myanda yatudi balombeene kukita bwa kupudisha myanda yetu na kukwasha bangi. (Badika Misambo 37:3.) Abitungu twikale ‘atukulupila kwi Yehowa na kukita myanda iibuuwa.’ Abitungu twikale ‘atukitshi myanda na lulamato.’ Twi kukita bino naminyi? Tubandeyi kutaluula kileshesho kya Nowa, Daavide, na kya bangi bafubi b’Efile Mukulu basha lulamato abaadi batuule lukulupilo mwi Yehowa. Atukamono’shi tababaadi balombeene kukita ingi myanda anka abatshile kitshibilo kya kwimeena pa myanda ibaabadi balombeene kukita.

5. Leesha bibaadi nshalelo a Nowa.

⁵ Nowa baadi mu nsenga ibaadi yuule “na myanda ya buntomboshi” na ibubi. (Kibangilo 6:4, 9-13, EEM) Sunga mbibaadi auku’shi Yehowa akyebe kubutula yawa ndumbulwilo e bubi, Nowa baadi afiitshi munda pa mwanda wa mwikeelo wa bantu. Yaya nsaa, Nowa baadi mushinguule’shi kwi myanda yashii mulombeene kukita, na yaadi mulombeene kukita.

6, 7. (a) Nowa tabaadi mulombeene kukita kinyi? (b) Nshalelo eetu mmwipusheene na a Nowa naminyi?

⁶ Myanda yabashibaadi balombeene kukita  kwi Nowa: Nowa balungwile mukandu wa kudimusha wa Yehowa na lulamato looso, anka tabaadi mulombeene kukuminyisha bantu pa bukopo nya. Na dingi tabaadi mulombeene kunokyesha Mpeshi a kabutu bukidi nya. Bibaadi abitungu’shi Nowa akulupile’shi Yehowa akalombasha mulayilo Waye wa kufudiisha buntomboshi, na kukumiina’shi Efile Mukulu ebikitshi pa nsaa ilombane.​—Kibangilo 6:17.

⁷ N’atwe namu twi mu ndumbulwilo muule buntomboshi, na atuuku kalolo’shi Yehowa akyebe kumubutula. (1 Yowano 2:17) Byabya, ta twi balombeene kukitshisha bantu pa bukopo bwabadya kukumina “mukandu wibuuwa wa Bufumu” nya. Na dingi ta twi balombeene kukita kintu su nkimune kilombeene kufwisha “mpombo ikata” bukidi. (Mateo 24:14, 21) Nka bu Nowa, abitungu twikale na lukumiino lwi bukopo, na kukulupila’shi Efile Mukulu akyebe kufudiisha bu ntomboshi binobino. (Misambo 37:10, 11) Twi bashinkamishe’shi Yehowa takatentuula efuku su ndimune ku mafuku aadi mutshibe bwa kubutula uno ndumbulwilo nya.​—Abakuke 2:3.

8. Nowa baadi mwipaane mu kukita kinyi? (Tala kifwatulo ki ku mbangilo.)

⁸ Myanda ibabadi balombeene kukita kwi Nowa: Pamutwe pa kutshoboloka bwa myanda yashibaadi mulombeene kukita, Nowa baadi mwipaane mu myanda ibaadi mulombeene kukita. Nowa baadi mulungule mukandu wa kudimusha wa Yehowa na katshintshi. (2 Mpyeele 2:5) Uno mudimo ubamukwashishe bwadya kulama lukumiino lwaye lunyingye. Kunundu kwa mudimo wa kulungula, baadi mutumikile eyi dya Yehowa dya kwibaka bwato.​—Badika Beena-Ebelu 11:7.

9. Twi kwambula kileshesho kya Nowa naminyi?

⁹ Nka bu Nowa, twikaleyi na katshintshi “mu mufubo wa Mwanaana.” (1 Beena-Kodinda 15:58) Bu kileshesho, twi balombeene kukwasha mu mudimo wa kwibaka na kulumbuula Mashibo a Bufumu na Mashibo a bikongeno, kufuba midimo ku bikongeno, ku biro bya filiale sunga ku biro bya kwaluula mikanda. Mwanda wi na muulo ngofu, abitungu twikale na katshintshi mu mudimo wa bulungudi, aunyingisha lukulupilo lwetu mu myanda ayifiki. Ungi mukwetu mukashi sha lulamato bambile’shi nsaa yesamba na bantu pabitale myabi yakapete mu Bufumu bw’Efile Mukulu, amono’shi bantu ta be na lukulupilo su ndupeela nya, na abamono nkalakashi yabo nka bu i kwanka bwa ikalaika. Nka bu bibakwile uno mukwetu mukashi, atwe twi na lukulupilo, na luno lukulupilo alunyingi nsaa  yatwilulungula bangi bantu. Luno lukulupilo alwitukwasha bwatudya kushaala mwishinda dya muwa!—1 Beena-Kodinda 9:24.

10. Leesha bibaadi mwanda wa Daavide.

¹⁰ Nfumu Daavide baadi muntu sha lukumiino, na Yehowa baadi mumufule ngofu. (Bikitshino 13:22) Sunga mbyabya, Daavide batambukile lusandji na Betesheba, na uno ubaadi mulwisho ukata. Kunyima kwa papa, bakimbile bya kufya mulwisho waye pa kwata mpàngo ya kwipayisha Uriya mulume a Betesheba ku ngoshi. Daavide baadi mupe mpa na Uriya mukanda wi mayi a kumwipayisha aye nabeene! (2 Samwele 11:1-21) Ku nfudiilo a byooso, mulwisho wa Daavide ubaadi ufumbukye. (Maako 4:22) Nsaa ibaadi ifumbukye mulwisho waye, Daavide bakitshine kinyi?

11, 12. (a) Kunyima kwa’ye kukita mulwisho, Daavide tabaadi mulombeene kukita kinyi? (b) Yehowa aketukitshina kinyi su tubelanga ku bilubilo byetu?

¹¹ Myanda yabashibaadi balombeene kukita kwi Daavide: Daavide tabaadi mulombeene kulumbuula myanda ibaadi mulwishe nya. Anka, baadi mulombeene kukyenga bwa mulwisho waye mu nshalelo aaye. (2 Samwele 12:10-12, 14) Sunga mbyabya, bibaadi abitungu’shi ekale na lukumiino. Baadi na kya kukulupila’shi nsaa ibaadi mwinyongole n’eshimba dimune, Yehowa baadi mumufwile lusa na amukwasha bwadya kunyingiila nkalakashi ibaadi mupete bwa mulwisho waye.

¹² Bu byatudi bantu bakutwe kupwidika, booso bwetu atukitaa milwisho. Anka atukitaa bingi bilubilo bikata bikile bingi, na ingi nsaa ta twi balombeene kulumbuula bilubilo byetu nya. N’atwe namu twi balombeene kukyenga pa mwanda wa bikitshino byetu. (Beena-Ngalatea 6:7) Anka twi na lukulupilo mu mulayilo w’Efile Mukulu wa’shi su tubenyongola, aketukwatshisheena mu kipungo kyatudi na nkalakashi, sunga ino nkalakashi yekala ayituukila ku bilubilo byetu.​—Badika Yeeshaya 1:18, 19; Bikitshino 3:19.

13. Daavide baadi mulumbuule kipwano kyaye na Yehowa naminyi?

¹³ Myanda ibabadi balombeene kukita kwi Daavide: Daavide baadi na lukalo lwa kulumbuula kipwano kyaye na Yehowa. Baadi mwibikite naminyi? Daavide bakuminyine bwa’shi Yehowa amukwashe. Bu kileshesho, bakuminyine elango dya mutemuki Natane. (2 Samwele 12:13) Na dingi Daavide beelele luteko kwi Yehowa na kutonda milwisho yaye, na kuleesha’shi e na lukalo lwa’shi Yehowa amufwile lusa. (Misambo 51:1-17) Pamutwe pa kutadiila’shi kinyongwa kimukambile, Daavide baadi mupete dilongyesha ku bilubilo byaye. Ta mukite dingi ino milwisho ikata nya. Kunyima kwa bipwa, bafwile bu muntu sha lulamato, na bino nyi abimutentekyeshaa Yehowa.​—Beena Ebelu 11:32-34.

14. Kileshesho kya Daavide akitulongyesha kinyi?

¹⁴ Kileshesho kya Daavide akitulongyesha kinyi? Su tubakitshi mulwisho ukata, abitungu twinyongole binyibinyi, tutonde mulwisho wetu kwi Yehowa, na kumuteka lusa. (1 Yowano 1:9) Abitungu dingi tulungule bakulu, mwanda be kwitukwasha bwa kulumbuula kipwano kyetu na Yehowa. (Badika Shake 5:14-16.) Nsaa yatukumina bukwashi bwa Yehowa, atuleesha’shi twi bakulupile mulayilo waye wa kwitufwila lusa. Na dingi, abitungu tulongyele ku bilubilo byetu na kutungunuka na kufubila Yehowa pa kutuula lukulupilo mwadi.—Beena-Ebelu 12:12, 13.

15. Kileshesho kya Aana akitulongyesha kinyi?

¹⁵ We mulombeene kunangusheena ku bangi bafubi ba Yehowa basha lulamato, babaadi na lukulupilo mwadi, babadi baleeshe mu Bible, abakitshine myanda ibaabadi balombeene kukita abo be mu nkalakashi ibukopo. Bu kileshesho, kwi kipungo kibaadi Aana te na bana. Tabaadi mulombeene kushintuula uno mwanda nya. Anka baadi mukulupile’shi Yehowa amusamba. Ngi bwakinyi batungunukile na kulangwila ku tabernakele na kwela nteko kwi Yehowa, na kumulungula bibaadi apusha.  (1 Samwele 1:9-11) Mmwikale kileshesho kibuwa kwatudi! Nsaa yatudi na maladi sunga ingi nkalakashi yatushii balombeene kushintuula, tusumbwileyi Yehowa twinyongoshi twetu na kukulupila’shi etupasukila. (1 Mpyeele 5:6, 7) Na dingi tukiteyi mwetu mooso bwatudya kutwela mu bisangilo bya beena Kidishitu na kuteemisha angi ma programe abetupa kwi ndumbulwilo a Yehowa.​—Beena-Ebelu 10:24, 25.

16. Kileshesho kya Samwele nkilombeene kulongyesha ba nambutwile kinyi?

¹⁶ Twi kwamba naminyi bwa ba nambutwile basha lulamato be na bana bapele kulangwila Yehowa? Mutemuki Samwele tabaadi mulombeene kukitshisha bana baaye batabadi bakulu bwabadya kushaala na lulamato kwi Efile Mukulu pa bukopo nya. (1 Samwele 8:1-3) Baadi na kya kuleka uno mwanda mu maasa a Yehowa. Anka, Samwele bakitshine bukopo bwaye booso bwadya kushaala na lulamato kwi Efile Mukulu na kusangasha Nshaaye a mwiyilu. (Nkindji 27:11) Lelo uno, ba nambutwile beena Kidishitu bebungi be mu uno nshalelo. Anka abakulupila’shi, nka bu nshe mwana a mu lukindji lwa Yesu lwa mwana mushimine, Yehowa e peepi bwadya kutambula dingi muntu ooso enyongola ku mulwisho waye. (Luka 15:20) Na dingi, ba nambutwile mbalombeene kukita mwabo mooso bwa kushaala na lulamato kwi Yehowa, bakulupile’shi kileshesho kyabo nkilombeene kutakula bana baabo bwabadya kwalukila kwadi.

17. Bwakinyi kileshesho kya mukashi kilele mulanda akitukankamika?

¹⁷ Kingi kileshesho kibuwa nkya mukashi kilele mulanda a mu mafuku a Yesu. (Badika Luka 21:1-4.) Tabaadi mulombeene kukita nkintu su nkimune pabitale kutshiba kwa milomo kubaadi akukitshika ku ntempelo nya, na dingi tabaadi mulombeene kushintuula bulanda bwaye. (Mateo 21:12, 13) Anka lukulupilo lwaye mwi Yehowa lubaadi lumutakule bwadya kukwatshisheena lulangwilo lwa binyibinyi. Baadi na kalolo aye nkutuusha “tukuta tubidi,” makuta ooso abaadi nao. Uno mwana mukashi sha lukumiino balesheshe’shi e na lukulupilo lwi bukopo mwi Yehowa. Baadi auku’shi su batuulu mufubo wa Yehowa pa mbalo ya kumpala, Yehowa namu akamulombeesha nkalo yaye yooso. Mu kipaso kimune, twi bakulupile’shi su tubatuulu Bufumu bw’Efile Mukulu pa mbalo ya kumpala, Yehowa namu aketulombeesha nkalo yetu yooso.—Mateo 6:33.

18. Tuusha kileshesho kya mukwetu baadi na binangu bibuwa.

¹⁸ Lelo uno bakwetu balume na bakashi bebungi bakwete kuleesha lukulupilo lwi bino mwi Yehowa p’abo kwimeena pa myanda yabadi balombeene kukita pamutwe pa kwimeena pa myanda yabashii balombeene kukita. Tubande kwata kileshesho kya mukwetu abetanyina bu Malcolm, baadi mushale na lulamato mpa na pabafwile mu kipwa kya 2015. Munda mwa bipwa bibungi byadi mufubile Yehowa pamune na mukash’aye, abaadi bapete bipungo bibuwa na bipungo bibubi. Akula’shi: “Ingi nsaa mu muwa wetu ta twi balombeene kuuka myanda ayifiki nya, atufumankana na myanda ibukopo mu kabasamushi. Anka Yehowa elelaa baba booso abamukulupila myabi.” Malcolm batushishe elango kinyi? Amba’shi: “Ikala wele nteko bodya kwikala otuusha bipeta bibuwa na kukita myanda ibuwa mu mufubo wa Yehowa. Imeena pa myanda yoodi mulombeene kukita, twemenanga pa myanda yoshii mulombeene kukita.” *

19. (a) Bwakinyi kifundwe kyetu kya kipwa kya 2017 nkipwandikile? (b) Okafubisha kifundwe kya kipwa kya 2017 naminyi mu muwa oobe?

¹⁹ Uno ndumbulwilo e bubi kwete ‘kuyididiila mu bubi,’ ngi bwakinyi atukulupila’shi atukafumankana na nkalakashi ibungi. (2 Timote 3:1, 13) Bi na muulo ukata bwa’shi tatulekyelanga nkalakashi yetukambila. Anka, abitungu twikale na lukulupilo lwi bukopo mwi Yehowa na kwimeena pa myanda yatudi balombeene kukita. Nyi bwakinyi kifundwe kyetu kya kipwa kya 2017 akyamba’shi: “Kulupila kwi Yehowa, kita myanda iibuuwa”!​—Misambo 37:3.