1. Ba nambutwile bena Kidishitu abakuminaa kushinkamisha kinyi kumpala kwa’shi bana babo babatshishibwe?

“MUNDA mwa myeshi ibungi, nadi nalungula nshami na nyinami’shi nakumina kubatshishibwa, na abo banabene abadi abandungula uno mwanda misusa na misusa. Abadi abakumina kushinkamisha su ne mupwe kushinguula muulo wa kino kitshibilo. Mu 31/12/1934, ngi efuku dinadi mukumbashe uno mwanda wi na muulo ukata mu muwa wande.” Bino ngi bibadi Blossom Brandt mupatuule myanda ibadi ikitshikye nsaa ibadi mwate kitshibilo kya kubatshishibwa. Na lelo uno, ba nambutwile bebungi abakumina kukwasha bana babo bwabadya kwata bitshibilo bibuwa. Su mwana atengyela bwadya kubatshishibwa kunyima kwa mafuku kushi kabingilo, bino mbilombene kulwisha kipwano kya mwana na Yehowa. (Shake 4:17) Kumpala kwa’shi mwan’abo abatshishibwe, ba nambutwile be na binangu abakuminaa kushinkamisha’shi mwan’abo mmupwe kwilumbuula bwadya kufika mulongi a Kidishitu.

2. (a) Bamo bakunkushi ba bifunda mbasangane mwanda kinyi? (b) Mu uno mwisambo atukesambila myanda kinyi?

 ² Bamo bakunkushi ba bifunda mbasangane’shi ba nsongwa bebungi abalombasha bipwa bifikye ku 20 kushi kubatshishibwa, sunga mbyabadi bakudile mu bya binyibinyi. Misusa ibungi, bano ba nsongwa abatwelaa mu bisangilo, abendaa mu bulungudi, na abemonaa bu ba Temwe ba Yehowa. Anka, bwa tungi tubingilo, ta mbabande kwilambula kwi Yehowa na kubatshishibwa nya. Imo nsaa, abikitshika bino pa mwanda wa’shi bebatande abanangushena’shi bana babo ta mbabande kulombana bwa kubatshishibwa. Mu uno mwisambo, atukesambila myanda inanka ayikutshishwa bamo ba nambutwile bwabadya kukankamika bana babo bwa kubatshishibwa.

3. Nshaye na nyinaye na Blossom babadi abekalakasha bwa mwanda kinyi?

³ Nshaye na nyinaye na Blossom batudi batemune mu kikoso kya kumpala, abadi abeyipusha su mwan’abo mmupwe kukula byadi mulombene kushinguula akipushisha kubatshishibwa na muulo wa kubatshishibwa. Ba nambutwile mbalombene kuuka naminyi’shi mwan’abo bapu kulombana bwadya kwilambula kwi Yehowa?

4. Eyi dya Yesu di mu Mateo 28:19, 20 ndilombene kukwasha ba nambutwile naminyi?

⁴ Badika Mateo 28:19, 20. Mu Bible ta mbatshibe bungi bwa bipwa abutungu’shi muntu alombashe bwa kubatshishibwa nya. Anka bi na muulo bwa’shi ba nambutwile banagushene kalolo pabitale akipushisha kwikasha bantu bu balongi. Mu ludimi lwa kina Greke, kishima akipushisha “kwikasha [bantu] bu balongi” kyabadi bafubishe mu Mateo 28:19 akipushisha kulongyesha muntu na kepatshila ka kumukwasha bwa’shi afikye mulongi. Mulongi nyi muntu alongo na kushinguula malongyesha a Yesu na akumina kwiatumikila. Byabya, kubanga nsaa ayitandjikwa bana, abitungu ba nambutwile bebalongyeshe na kepatshila ka kwibakwasha bwabadya kwilambula kwi Yehowa na kufika balongi ba Kidishitu. Byabya, bana batooka ta mbalombene kubatshishibwa nya. Anka, Bible alesha’shi mpa na bana bakinga mbalombene kushinguula na kufula bya binyibinyi bya mu Bible.

5, 6. (a) Myanda yabadi baleshe mu Bible pabitale Timote ayitutakula mu kulamina mwanda kinyi pabitale lubatshisho lwaye? (b) Mmushindo kinyi wi buwa ulombene ba nambutwile be na binangu kukwasha bana babo?

⁵ Timote nyi mulongi badi mwate kitshibilo kya kufubila Yehowa kubanga pabadi ki mukinga. Mpoolo mutumibwa bakwile’shi Timote babangile kulonga bya binyibinyi bya mu Eyi dy’Efile Mukulu ‘byatshile ku bukinga bwaye.’ Nshaye na Timote tabadi afubila Yehowa nya, anka nyinaye na nyinaye-kulu abadi bakwashe Timote bwadya kufula Eyi dy’Efile Mukulu. Ngi bwakinyi, badi na lukumino lwi bukopo ngofu. (2 Timote 1:5; 3:14, 15) Badi mulombene kwikala na bipwa ekumi na bungi sunga 20 nsaa ibadi mulombashe mpa na myanda itekibwe bwadya kupeta mashito e pa bwao mu kakongye.​—Bikitshino 16:1-3.

⁶ Bana boso ta be mumune nya. Bana boso tabafikaa banyingye mu bipwa bimune nya. Bamo bana abapushaa bya binyibinyi, kwata bitshibilo bibuwa, na kukumina kubatshishibwa kubanga abo baki bakinga. Bangi namu mbalombene kukutwa kulombana bwa kubatshishibwa mpa n’abo abapu kukula kapindji. Ba nambutwile be na binangu tabatakulaa bana babo pabukopo bwabadya kubatshishibwa nya. Anka, abakwashaa mwana ooso bwadya kwenda kumpala muyile ngobesha yaye. Ba nambutwile abekalaa na muloo wibungi nsaa yabatumikila mayi e mu Nkindji 27:11. (Badika.) Anka abitungu batentekyeshe’shi kepatshila kaabo nka kukwasha bana babo bwabadya kufika balongi. Na uno mwanda mu binangu, abitungu beyipushe’shi, ‘Mwan’ande tadi na kiukilo kilombanyine kyadi  mulombene kwilambula kwi Efile Mukulu na kubatshishibwa su?’

7. Abitungu muntu aukye tu myanda toso twa mu malongyesha a mu Bible kumpala kwadya kubatshishibwa su? Patuula.

⁷ Nsaa i ba nambutwile abalongyehsa bana babo, abebakwasha bwabadya kuuka bya binyibinyi kalolo. Kino kiukilo akikatakula bana bwabadya kwilambula kwi Efile Mukulu. Anka bino tabipushisha’shi abitungu mwana aukye tu myanda toso tutale dilongyesha dyoso dya mu Bible kumpala kwadya kwilambula na kubatshishibwa nya. Mulongi a Kidishitu oso e na kya kutungunuka na kulonga mpa na kunyima kwa’ye kubatshishibwa. (Badika Beena-Kolose 1:9, 10.) Byabya, abitungu’shi muntu ekale na kiukilo ki naminyi kumpala kwadya kubatshishibwa?

8, 9. Mmwanda kinyi ubadi ufikile muntu badi alama ku lukano lwa mu Fidipe, na uno mwanda awitulongyesha kinyi?

⁸ Myanda ya mu kingi kifuko kya mu mafuku a kala ngilombene kukwasha ba nambutwile lelo uno. (Bikitshino 16:25-33) Mu kipwa kya 50, Mpoolo bayile mu kibundji kya Fidipe mu lwendo lwaye lwa kabidi lwa bu misionere. Pabadi kwakwa, aye na Silase abadi bebadimbile myanda, bebakwata, na kwibela mu lukano. Munkatshi mwa bufuku, kubadi kukitshikye kutshinkakana kwa nsenga kwi bukopo kubadi kubaule biibi byoso bya ku lukano. Muntu badi alama ku lukano badi munangushene’shi bena lukano boso abasuuku, aye nkukyeba kwiyipaa. Anka Mpoolo bamwimikile. Kunyima Mpoolo na Silase abadi balambukishe uno muntu badi alama ku lukano na kifuko kyaye bya binyibinyi pabitale Yesu. Abadi bakumine myanda ibabadi balongye pabitale Yesu na kushinguula muulo wa kumukookyela. Ngi bwakinyi abadi babatshishibwe nka paapa. Uno mwanda wabo ngulombene kwitulongyesha kinyi?

⁹ Uno muntu badi alama ku lukano badi pangi musalayi a Bena Looma badi mupwe kuleka mudimo wa busalayi. Tabadi auku Eyi dy’Efile Mukulu nya. Ngi bwakinyi, kumpala kwadya kufika mwina Kidishitu, bibadi abitungu’shi alongye malongyesha a kitako a bya binyibinyi bya mu Bible, ashinguule myanda ibadi Yehowa mutekye bafubi baye, na kukumina kukookyela malongyesha a Yesu. Myanda ibalongyele mu kaka kapindji kapeela ibamukwashishe bwadya kukumina kubatshishibwa. Kushi mpaka, badi mutungunukye na kulonga ingi myanda ibungi kunyima kwa’ye kubatshishibwa. Byabye, nsaa ayikulungula mwan’obe’shi, akumina kubatshishibwa pa mwanda wa’shi mmufule Yehowa na akumina kumukookyela, we kukita naminyi? We kumulungula bwa’shi akemonene na bakulu bwa’shi abo baate kitshibilo su mmulombashe myanda itekibwe bwa kubatshishibwa. * Nka bu bangi bena Kidishitu boso bapwe kubatshishibwa, akatungunuka na kulonga myanda ibungi itale Yehowa munda mwa muwa waye ooso, mpa na bwa ikalaika.​—Beena-Looma 11:33, 34.

10, 11. (a) Bamo ba nambutwile abanangushena naminyi? (b) Nkinyi kilombene kukalwila mwana?

¹⁰ Bamo ba nambutwile abanangushena’shi mbikile buwa mwan’abo abande kulonga tulasa tukaamine na kupeta mudimo wibuwa kumpala kwa kubatshishibwa. Bano ba nambutwile mbalombene kwikala na binangu bibuwa, anka abitungu beyipushe’shi: ‘Bino abikakwasha mwan’ande bwadya kobesha myanda yakyebe kukita kalolo? Bino mbipushene na abilongyesha Bible su? Yehowa akumina’shi tufube naminyi na muwa wetu?’​—Badika Mulungudi 12:1.

 ¹¹ Bi na muulo kutentekyesha’shi uno ndumbulwilo na myanda i mwanka mbikutwene na abikumina Yehowa na byanangushena. (Shake 4:7, 8; 1 Yowano 2:15-17; 5:19) Kwikala mu kipwano kibukopo na Yehowa ngi bulami bwibuwa bulombene kukalwila mwana kwi Satana, uno ndumbulwilo, na binangu bibubi bya uno ndumbulwilo. Su ba nambutwile abatuulu kulonga kwa tulasa na kukimba mudimo wibuwa pa mbalo ya kumpala mu muwa wabo, mwan’abo mulombene kumona bintu bya mu uno ndumbulwilo bu bi na muulo kukila kwikala mu kipwano kibukopo na Yehowa. Ano nyi masaku akata. Bu byodi nambutwile e na kifulo, okumina binyibinyi bwa’shi uno ndumbulwilo alongyeshe mwan’obe’shi binangu bya mu uno ndumbulwilo ngi abikamwikasha na muloo su? Mushindo umune wa kwikala na muloo wa binyibinyi nkutuula Yehowa pa mbalo ya kumpala mu muwa wetu.​—Badika Misambo 1:2, 3.

12. Bwakinyi bamo ba nambutwile abanangushena’shi bibuwa mwan’abo abande kutengyela bwa kubatshishibwa?

¹² Ungi nyina bana badi mupatuule bwakinyi tabadi akumina’shi mwan’aye mukashi abatshishibwe. Bambile’shi, “Ne na buufu bwa kwakula’shi kabingilo kakata kampelela nyi mpàngo ya kutushishena mu kakongye.” Nka bu uno mukwetu mukashi, bamo ba nambutwile abamono’shi bibuwa mwan’abo abande kutengyela bwadya kubatshishibwa nka su bapu kukula bwa kupela akita bilubilo bikata. (Kibangilo 8:21; Nkindji 22:15) Bano ba nambutwile be kumona’shi su mwan’abo ta mubatshishibwe, ta mbalombene kumutusha mu kakongye nya. Kadi bwakinyi bino binangu bibubi?​—Shake 1:22.

13. Su muntu ta mubatshishibwe, bino abipushisha’shi Yehowa tamubadikila bubi bwakinyi su? Patuula.

¹³ Kushi mpaka, ba nambutwile tabakumina’shi mwan’abo abatshishibwe kumpala kwadya kulombana bwa kulambula muwa waye kwi Yehowa nya. Anka mbilombene kwikala kilubilo kikata su banangushena’shi Yehowa ta mulombene kubadika kilubilo kya mwana su ta mubande kubatshishibwa. Efile Mukulu abadikilaa mwana kilubilo kyakitshi kubanga nsaa yauku akyakula Yehowa pabitale kibuwa na kibubi. (Badika Shake 4:17.) Ba nambutwile be na binangu tababofushaa mwan’abo bwa’shi alekye kubatshishibwa nya. Sunga mwana ekala ki mukinga, abamulongyesha byadya kufula myanda ilulame ku meso kwa Yehowa na kushikwa myanda ibubi ku meso kwaye, nka bu byabakitshi nabo namu. (Luka 6:40) Kifulo kya mwan’obe bwa Yehowa akikamukalwila bwadya kukutwa kukita milwisho ikata, mwanda akakumina kukita myanda ilulame ku meso kwa Yehowa.​—Yeeshaya 35:8.

14. Bakulu mbalombene kukwatshishena mudimo wabakitshi kwi ba nambutwile naminyi?

¹⁴ Bakulu mu kakongye mbalombene kukwatshishena mudimo wabakitshi kwi ba nambutwile p’abo kwikala na binangu bibuwa pabitale bipatshila bya kufubila Yehowa. Ungi mukwetu mukashi atentekyesha’shi mukwetu Russell badi mwisambe naye pabadi na bipwa bisamombo. Bambile’shi, “Badi mwate minite 15 bwa kwisamba nami pabitale bipatshila byande bya mu kikudi.” Mbipeta kinyi bibadi bitukye? Kunyima, uno mukwetu mukashi badi mufikye mbala-mashinda, na badi mufube bu mbala-mashinda munda mwa bipwa bikile pa 70! Abimweneka kalolo’shi, bishima bibuwa na kukankamika muntu nkulombene kwikala na bukitshishi mu muwa waye oso. (Nkindji 25:11) Bakulu mbalombene dingi kuteka ba nambutwile na bana babo bwabadya kukwasha mu kufuba ingi midimo ku Nshibo ya Bufumu. Mbalombene kuteka bana bwabadya kukita midimo ipushene na bipwa na ngobesha yabo.

15. Bangi bantu be mu kakongye mbalombene kukwasha bana naminyi?

 ¹⁵ Bangi bena kakongye mbalombene kukwasha naminyi? Mbalombene kulesha’shi abasankila bana bakinga. Bu kileshesho, we kukimba bwa kumona bitundwilo abilesha’shi bana bakwete kwifubwila pepi na Yehowa. Mwana kampanda tushishe lwalulo lwibuwa mu bisangilo, su ekeele na mudimo mu bisangilo bya munkatshi mwa lubingo? Ekele mulungule mukandu wibuwa ku kalasa, su kitshine bibuwa nsaa yabamutompanga bwa kumukitshisha mwanda wibubi? Su bomono mwanda wi byabya, ikala na bukidi bwa kumulungula’shi kitshine bibuwa! Twi kwikala na kyubishi kya kwisamba na bana kumpala na kunyima kwa bisangilo. Su tubakitshi byabya, bana abakapusha’shi be munkatshi mwa “kakongye kakata.”​—Misambo 35:18.

16, 17. (a) Bwakinyi bi na muulo bwa’shi bana babatshishibwe? (b) Ba nambutwile bena Kidishitu mbalombene kwikala na muloo wa kinyi? (Tala kifwatulo ki ku mbangilo.)

¹⁶ Umune wa ku myabi ikata i na ba nambutwile nkulongyesha bana babo bwabadya kufula Yehowa. (Misambo 127:3; Beena-Efeso 6:4) Mu mwilo wa Isaleele abadi abalambula bana kwi Yehowa nsaa ibabadi abatandjikwa. Bu bi ba nambutwile mbafule Yehowa na bya binyibinyi, bino tabilesha’shi na bana babo namu abakebifulu nya. Kubanga nka efuku aditandjikwa mwana, abitungu ba nambutwile bekale na kepatshila ka kumukwasha bwadya kufika mulongi, elambule kwi Efile Mukulu na kubatshishibwa. Mwanda kinyi ulombene kwikala na muulo ukata? Kwilambula kwa muntu, kubatshishibwa, na mufubo wafubila Yehowa na lulamato loso abikamupa mushindo wadya nkapashibwa ku mpombo ikata.​—Mateo 24:13.

¹⁷ Nsaa ibadi ayikyebe Blossom Brandt kubatshishibwa, bamutande abadi abakyebe kushinkamisha su mmupwe kulombana. Nsaa ibabadi bashinkamishe’shi mmupwe kulombana, abadi bakwatshishene kitshibilo kyaye. Blossom badi mubwele bibakitshine nshaye mu bufuku bwa muladilo wa lubatshisho lwaye. Bambile’shi: “Badi mwitukunamishe atwe boso, aye nkwela luteko. Balungwile Yehowa’shi e na muloo wibungi bwa kitshibilo kya mwan’aye mukashi kya kwilambula Kwadi.” Bipwa bikile pa 60 kunyima, Blossom bambile’shi: “Ikala mushinkamishe’shi, munda mwa bipwa byoso abifiki, ntshi mulombene kuluba buno bufuku nya!” Anwe ba nambutwile, nwi balombene kwikala na uno muloo umune nsaa yanumono bana benu abafiki bafubi ba Yehowa belambule na babatshishibwe.