1, 2. (a) Bamo ba nambutwile abapushaa naminyi nsaa yabebalungula kwi bana babo’shi abakyebe kubatshishibwa? (b) Bwakinyi abitungu bantu boso abakyebe kubatshishibwa beyipushe su mbapwe kwilambula abo banabene kwi Yehowa? (Tala kifwatulo ki ku mbangilo.)

NSHAYE na nyinaye na Maria abadi abatala nsaa ibadi mwan’abo ki ka nsongwakashi mmwimane kumpala na bangi bantu abakyebe kubatshishibwa. Mukwetu badi eele mwisambo badi mwibayipushe nkonko ibidi. Maria badi mwiyaluule n’eyi di bukopo. Kapindji kapela kunyima kwa paapa, badi mubatshishibwe.

² Nshaye na nyinaye na Maria abadi na muloo wibungi pa kumona mwan’abo mukashi alambula muwa waye kwi Yehowa na kubatshishibwa. Anka kumpala kwa paapa, nyin’aye na Maria badi mukalakashwe kapeela. Badi eyipusha’shi: ‘Maria ki mukinga byashii mulombene kubatshishibwa su? Auku binyibinyi’shi kwilambula kwi Yehowa nyi mwanda wi na muulo ukata su? Abitunganga’shi atengyele kangi kapindji kumpala kwa kubatshishibwa?’ Ba nambutwile bebungi bafule bana babo abeyipushaa nkonko i bino nsaa ayibalungula mwan’abo’shi akyebe kubatshishibwa. (Mulungudi 5:5) Kitshibilo ki na muulo  ukata kilombene kwata muntu ooso nkulambula muwa waye kwi Yehowa na kubatshishibwa.​—Tala kashibo akamba’shi: “ We mupwe kwilambula obe nabene kwi Yehowa su?”

3, 4. (a) Mpyeele mutumibwa badi mwitulongyeshe’shi lubatshisho lwi na muulo ukata naminyi? (b) Bwakinyi Mpyeele badi mupwandikishe lubatshisho na lwibako lwa bwato bwa Nowa?

³ Mpyeele mutumibwa badi mupwandikishe lubatshisho na lwibako lwa bwato bwa nowa. Bambile’shi: ‘[Lubatshisho], lwi bu kipwandjikisho kya bino, alwinupaasha binobino.’ (Badika 1 Mpyeele 3:20, 21.) Bwato bubadi bupe bantu kishinkamisho kya patooka’shi Nowa badi akumina kukita kikyebe ky’eshimba dy’Efile Mukulu. Nowa badi mukite mudimo ubabamupeele kwi Yehowa na lulamato loso. Pa mwanda wa lukumino lwa Nowa, Yehowa bamupashishe na kifuko kyaye ku Mpeshi a kabutu. Mpyeele badi akyebe kwitulongyesha kinyi?

⁴ Pabadi bantu abamono bwato, abadi abauku’shi Nowa e na lukumino mwi Efile Mukulu. Nsaa i bantu abamono muntu abatshishibwa, abauku’shi balambula muwa waye kwi Efile Mukulu mwanda e na lukumino mwi Kidishitu badi musangukye. Nka bu Nowa, baba boso ababatshishibwa abakookyela Efile Mukulu na abakitshi mudimo wadi mwibape. Na dingi, nka bibadi Yehowa mupaashe Nowa nsaa ibanokyele Mpeshi a kabutu, akapasha dingi bafubi baye boso babatshishibwe nsaa yakabutula uno ndumbulwilo e bubi. (Maako 13:10; Kibafumbwilwe 7:9, 10) Abimweneka kalolo’shi, kulambula muwa wetu kwi Yehowa na kubatshishibwa nyi mwanda wi na muulo ukata. Byabya, su muntu alenguula kupeta lubatshisho, mulombene kushimisha mwabi wa kupeta muwa wa ikalaika.

5. Mu uno mwisambo atukyebe kulonga kinyi?

⁵ Binobino, bibatupu kuuka muulo wa lubatshisho, abitungu tuukye ngaluulo ya ku ino nkonko isatu: Bible akula kinyi pabitale lubatshisho? Abitungu muntu akite kinyi kumpala kwa kubatshishibwa? Bwakinyi abitungu twikale atutentekyesha  muulo wa lubatshisho nsaa yoso yatulongyesha bana betu sunga bantu batulongo nabo Bible?

6, 7. (a) Lubatshisho lwa Yowano lubadi alupushisha kinyi? (b) Ndubatshisho lwa nanyi lubadi lwilekene na lwa bangi bantu boso, na bwakinyi?

⁶ Mu Bible, muntu a kumpala abadi baleshe badi abatshisha bangi nyi Yowano mubatshishi. (Mateo 3:1-6) Bwakinyi bantu abadi abafiki kwadi bwa’shi ebabatshishe? Abadi abakitshi bino bwa kulesha’shi abelanga ku milwisho yabo, kwamba’shi, abakumina’shi bekeele batupilwe Miiya ya Moyiise na babenyongola. Anka, lubatshisho lwi na muulo ukata nduno lubabakitshine kwi Yowano lubadi alupushisha ungi mwanda wilekene ngofu. Yowano badi mupete mwabi ukata wa kubatshisha Yesu, Mwan’Efile Mukulu mupwidikye. (Mateo 3:13-17) Yesu ta mukite milwisho nya. Tabadi na lukalo lwa kwilanga ku milwisho nya. (1 Mpyeele 2:22) Byabya, bwakinyi Yesu badi mubatshishibwe? Badi mubatshishibwe bwa kulesha’shi akumina kukita kikyebe ky’eshimba dy’Efile Mukulu mu muwa waye.​—Beena-Ebelu 10:7.

⁷ Kunyima kwa Yesu kubanga mudimo wa bulungudi, balongi baye ababangile kubatshisha bangi bantu. (Yowano 3:22; 4:1, 2) Bano bantu abadi ababatshishibwa dingi pa mwanda wa’shi abadi abelanga ku milwisho yabo ibabadi abakitshi pa kutupilwa Miiya ya Moyiise. Anka kunyima kwa lufu na kusanguka kwa Yesu, bantu boso abadi abakumina kwikala bu balongi baye abadi na kya kubatshishibwa bwa kangi kabingilo.

8. (a) Kunyima kwa kusanguka, Yesu badi mutumine balongi baye eyi kinyi? (b) Bwakinyi abitungu’shi bena Kidishitu babatshishibwe?

⁸ Mu kipwa kya 33, mafuku apela kunyima kwa Yesu kusanguka, badi mwisambe kumpala kwa bana balume bakile pa 500, bakashi mpa na bana. Pangi uno ngi musango ubadi mwakule’shi: “Byabya ndaayi; mu miilo yooso nwibeekashe bu balongi bande, nwibabatshishe mwishina dya Yaaya na dya mwana na dya kikudi ki selele, nwibalambukishe bya kulama byooso binaadi mwinufundile.” (Mateo 28:19, 20; 1 Beena-Kodinda 15:6) Yesu badi mutumine balondji baye eyi dya kwikasha bantu bu balongi. Muntu oso akumina kwikala mulondji aaye, sunga kusemuna “kikumbo” kyaye, abitungu abatshishibwe. (Mateo 11:29, 30) Bwa kufubila Efile Mukulu mu kipaso akimusankisha, abitungu muntu akumine’shi Efile Mukulu kwete kufubisha Yesu bwadya kukita kikyebe ky’eshimba dyaye. Kunyima, yawa muntu mulombene kubatshishibwa na kukuminyibwa kwi Efile Mukulu. Bible etupa bishinkamisho bibungi abilesha’shi balongi ba Yesu ba kumpala abadi abauku’shi kubatshishibwa kwi na muulo ukata. Tababadi abanangushena’shi mbalombene kubanda kwindjila bwa kubatshishibwa kunyima kwa mafuku nya.​—Bikitshino 2:41; 9:18; 16:14, 15, 32, 33.

9, 10. Lubatshisho lwa muntu a mu Etshopi na lwa Soolo a lwitulongyesha kinyi?

⁹ Badika Bikitshino 8:35, 36. Ungi muntu a mu Etshopi badi mukumine malongyesha a bena Yuuda badi alukila kwaye kunyima kwa’ye kulangwila mu ntempelo a mu Yeelusaleme. Mwikeyilu a Yehowa batumine Fidipe bwadya kwenda mu kwimonena na yawa muntu, akupu Fidipe bamulongyeshe “mukandu wibuwa wa Yesu.” Uno muntu a mu Etshopi bakitshine naminyi? Bapushishe’shi bi na muulo bwadya kukumina Yesu bu Mwanana, na bakuminyine kukita mwanda wabatekye bena Kidishitu boso kwi Yehowa. Ngi bwakinyi badi mubatshishibwe kushi kunyengakana.

¹⁰ Kingi kileshesho nkya mwina Yuuda ababadi abetanyina bu Soolo. Mwilo wa bena Yuuda oso ushima ubadi wilambule kwi Efile Mukulu, anka Yehowa badi mupwe kusumbushena bena Yuuda mwanda tababadi abamukookyela nya. Soolo badi mukumine’shi bena Yuuda bakwete kufubila Efile Mukulu mu kipaso kibuwa,  ngi bwakinyi badi abingabinga bena Kidishitu. Anka dingi efuku, Yesu mupwe kusanguka, badi mwisambe aye nabene na Soolo, Aye e mwiyilu aku namu Soolo badi apwandikisha’shi mmufwe. Soolo bakitshine kinyi? Bakuminyine bukwashi bubabadi bamupe kwi Anania mulongi a Kidishitu na muloo oso. Bible akula’shi: “Bebwele, bamubatshisha.” (Bikitshino 9:17, 18, Kilombeeno kipya 2014; Beena-Ngalatea 1:14) Kunyima ababangile kumwitanyina bu Mpoolo mutumibwa. Lamina’shi yaya nsaa ibaukile’shi Efile Mukulu kwete kufubisha Yesu bwa kukita kikyebe ky’eshimba Dyaye, Soolo badi mubatshishibwe kushi kunyengakana.​—Badika Bikitshino 22:12-16.

11. (a) Nkinyi akitakula balongi ba Bible lelo uno bwabadya kwata kitshibilo kya kubatshishibwa? (b) Atupushaa naminyi nsaa ayibatshishibwa muntu?

¹¹ Lelo uno, bi mumune mpa na bwa balongi ba Bible bebungi, bakulu na bakinga. Bu byabadi bafule na kukumina myanda ayakula Bible, abakumina kulambula myuwa yabo kwi Yehowa na kubatshishibwa kushi kunyengakana. Byabya, nsaa ya mwisambo wa lubatshisho, ayikalaa bu nsaa i pa bwayo ku bikongeno bya kifunda na bya mafuku asatu. Ba Temwe ba Yehowa abekalaa na muloo apakumina balongi ba Bible bya binyibinyi na kwata kitshibilo kya kubatshishibwa. Na ba nambutwile namu abekalaa na muloo wibungi nsaa ayata bana babo kino kitshibilo kimune. Mu kipwa kya mudimo kya 2017, bantu bapya bakile pa 284 000 mbabatshishibwe bwa kulesha’shi mbalambule myuwa yabo kwi Yehowa. (Bikitshino 13:48) Abimweneka’shi, mbapushe kalolo’shi kubatshishibwa nyi mwanda wi na muulo kwi bena Kidishitu. Byabya myanda kinyi ayitunganga’shi bakite kumpala kwa kubatshishibwa?

12. Myanda kinyi ayitungu’shi balongi ba Bible bakite kumpala kwa kubatshishibwa?

¹² Kumpala kwa’shi balongi ba Bible babatshishibwe, abitungu balongye bya binyibinyi pabitale Efile Mukulu, mpàngo yaye bwa bantu na bwa nsenga, na myanda yadi mukite bwa kupasha bantu. (1 Timote 2:3-6) Kunyima kwa byabya, abitungu bekale na lukumino, alukebakwasha bwabadya kukookyela miya y’Efile Mukulu na kuleka kukita myanda yadi mushikwe. (Bikitshino 3:19) Kukita bino kwi na muulo, mwanda Yehowa ta mulombene kukumina muntu elambula kwadi kadi atungunuka na kukita myanda Yadi mushikwe nya. (1 Beena-Kodinda 6:9, 10) Anka kwi ingi myanda ayitungu’shi bakite. Bantu abakumina kulambula myuwa yabo kwi Yehowa abitungu bekale abatwele mu bisangilo bya mu kakongye na kulungula mukandu wibuwa kwi bangi bantu na katshintshi. Ino ngi myanda ayitungu’shi muntu oso akumina kulonda Kidishitu akite. (Bikitshino 1:8) Abitungu mulongi a Bible abande kukita ino myanda yoso. Kunyima ngi amone bya kulambula muwa waye kwi Yehowa mu luteko lwakitshi aye nabene akupu ngi abatshishibwe.

13. Nsaa yatulongyesha bangi bantu, bwakinyi abitungu tutentekyeshe’shi abitungu babatshishibwe bwabadya kwikala bena Kidishitu ba binyibinyi?

¹³ Nsaa yatukwasha mwan’etu na bangi balongi ba Bible bwabadya kukita ino myanda i na muulo, abitungu tutentekyeshe’shi, baba abakumina kwikala balondji ba Yesu ba binyibinyi abitungu babatshishibwe. Kunyima tatukapusha bukopo bwa kwibalungula pa nsaa ilombane bi muulo wa kubatshishibwa. Atukumina’shi bana betu na bangi balongi ba Bible batungunukye na kwenda kumpala na kubatshishibwa!

14. Bwakinyi tatukitshishaa muntu pabukopo bwadya kubatshishibwa?

¹⁴ Byabya, muntu su ngumune ta mulombene kutakula sunga kukitshisha mwana sunga mulongi a Bible bwadya kubatshishibwa nya. Yehowa takitshishaa bantu bwa’shi bamufubile pa bukopo nya. (1 Yowano 4:8) Nsaa yatulongyesha bangi, abitungu twibakwashe bwabadya kupusha muulo wa kwikala mu kipwano kya bupenka na Yehowa. Kunyima, su mulongi a Bible e na muloo wa kuuka bya binyibinyi pabitale Efile Mukulu  na su akumina binyibinyi kukita myanda yoso ayitungu’shi bena Kidishitu ba binyibinyi bakite, akakumina kubatshishibwa.​—2 Beena-Kodinda 5:14, 15.

15, 16. (a) Kwi bungi bwa bipwa butshibibwe bwa’shi muntu abatshishibwe su? Patuula. (b) Bwakinyi abitungu’shi mulongi a Bible abatshishibwe bu umune a ku ba Temwe ba Yehowa sunga ekala mupwe kubatshishibwa mu kingi kipwilo?

¹⁵ Ta kwi bungi bwa bipwa butshibibwe bwa’shi muntu abatshishibwe nya. Bantu mbelekene, na bamo balongi abendaa kumpala bukidi kukila bangi. Bebungi mbabatshishibwe abo baki bakinga, na mbashale na lulamato kwi Yehowa mpa na ku bukulu. Bamo namu mbalongye Bible na kubatshishibwa abo batabadi bakulu. Bamo mbabatshishibwe abo abapu kukisha bipwa 100!

¹⁶ Ungi tabo badi mulongye Bible kunyima kwa’ye bapu kubatshishibwa misusa ibungi mu bipwilo bilekene. Ngi bwakinyi badi mwipushe mukwetu mukashi badi alongo naye Bible su bi nka na muulo bwadya kubatshishibwa dingi. Uno mukwetu badi alongo naye Bible bamulesheshe ma verse a mu Bible aaluula lukonko lwaye. Kunyima kwa uno tabo kupusha myanda itekibwe mu Bible, badi mubatshishibwe, sunga mbitabadi mupwe kulombasha bipwa 70. Kino kileshsho akitulongyesha kinyi? Akitulongyesha’shi Yehowa mulombene kukumina lubatshisho lwetu nka su atuuku bya binyibinyi pabitale kikyebe ky’eshimba dyaye. Ngi bwakinyi sunga twekala bapwe kubatshishibwa mu kingi kipwilo, abitungu tubatshishibwe bu umune a ku ba Temwe ba Yehowa.​—Badika Bikitshino 19:3-5.

17. Abitungu’shi muntu anangushene myanda kinyi mu efuku dya kubatshishibwa kwaye?

¹⁷ Efuku adibatshishibwa muntu adikalaa efuku dya muloo wibungi. Na dingi nyi efuku aditungu kunangushena ngofu pabitale akipushisha kwilambula na kubatshishibwa. Kukita myanda yoso yabadi batekye bena Kidishitu ba binyibinyi kwi mudimo wi bukopo. Abitungu’shi balongi ba Yesu “tabekalanga na muwa bwabo banabeene, anka bwa yawa bafwile asanguka pa mwanda wabo.”​—2 Beena-Kodinda 5:15; Mateo 16:24.

18. Mu mwisambo aulondo atukesambila nkonko kinyi?

¹⁸ Nka bu bibatukatuka mu kulonga mu uno mwisambo, kitshibilo kya kufika mwina Kidishitu a binyibinyi nyi nkitshibilo kikata. Ngi bwakinyi nyinaye na Maria badi eyipusha nkonko yabadi baleshe ku mbangilo kwa uno mwisambo. Su we nambutwile, we mulombene kwiyipusha’shi: ‘Mwan’ande mmupwe kulombana bwadya kubatshishibwa su? Mwan’ande mmupwe kwikala na kiukilo kilombanyine pabitale Yehowa bwadya kumona bya kwilambula kwi Efile Mukulu su? Abitungu mwan’ande alongye ngofu na kupeta mudimo kumpala kwa kubatshishibwa su? Bi kwikala naminyi su mwan’ande bakitshi mulwisho ukata kunyima kwa’ye kubatshishibwa?’ Atukesambila ino nkonko mu mwisambo aulondo, na atukalongo mushindo ulombene ba nambutwile bena Kidishitu kwikala na mweneno ebuwa pabitale lubatshisho.