1-3. (a) Ba nsongwa boso be mu nshalelo kinyi, na bino twi kwibipwandikisha na kinyi? (Tala kifwatulo ki ku mbangilo.) (b) Nkinyi akikakwasha ba nsongwa bena Kidishitu mu uno mwanda?

PWANDIKISHA’SHI bwata mpango ya kwenda mu kupetekyelwa ku mwanda aukyebe kukitshika mu kibundji ki kula. Bwa kwenda kwanka, abitungu’shi wate mootoka. Nsaa yofiki ku mbalo ayimenaa myootoka, bobanda kupusha bu’be bashimina mwanda wa bantu bakile bungi na myootoka ibungi. Anka mwanda wa muloo, ouku kalolo mbalo yokyebe kwenda na ouku mootoka odya kwata bwa kwenda kwanka. Totwele mu ingi myootoka yoso nya, mwanda ouku’shi ngilombene nkutwala ku ingi mbalo.

² Nshalelo eetu e nka bu lwendo, na anwe ba nsongwa nwi nka bu bantu bemane pa mbalo ayimenaa myootoka. Ingi nsaa we kwikala na myanda ibungi ya kukita na bitshibilo bibungi bya kwata mu kipaso kyodi mulombene kwipusha nka bu’be bashimina. Kadi su ouku mbalo yokyebe kwenda kalolo, abikala bibofule bodya kwata bitshibilo bibuwa. Mbalo kinyi ayitungu’shi wende?

³ Uno mwisambo aukaluula luno lukonko na aukakunkankamika bodya kutuula nshalelo oobe ekale asangasha Yehowa. Bino abipushisha  kulonda malango a Yehowa mu bitshibilo byoso abitungu’shi wate mu muwa oobe, bu kulonga kalasa, mudimo ookafubu sunga su abitungu okatwele mu eyibakishi na kutanda bana. Bino abipushisha kufuba bwa kulombasha bipatshila bya mu kikudi, kwamba’shi, bipatshila abikukwasha bodya kwifubwila pepi na Yehowa. Su bwekala mutuule binangu byobe mu kufubila Yehowa, shinkamisha’shi akwelela myabi na akukwasha bodya koobesha byokyebe kukita.​—Badika Nkindji 16:3.

4. Mu uno mwisambo atukyebe kutaluula kinyi?

⁴ Bibuwa kwikala na bipatshila bya mu kikudi. Bwakinyi? Atukataluula tubingilo tusatu. Ka kumpala na ka kabidi atukakukwasha bodya kumona’shi kufuba bwa kulombasha bipatshila bya mu kikudi akukwikasha kuuku a Yehowa. Ka kasatu akalesha bwakinyi bibuwa kwiatshila bino bipatshila nsaa yokii mukinga.

5. Nkabingilo kinyi kakata katudi nako ka kwata bipatshila bya mu kikudi?

⁵ Kabingilo kakata ka kwiatshila bipatshila bya mu kikudi nka kutumbula Yehowa bwa kifulo kyaye na bwa myanda yadi mwitukitshine. Ungi mufundji a Misambo bambile’shi: “Obe Yehowa kyabidi buwa kukutumbula . . . kino pe! . . . Byabya byodi mukite abimpa mulô, natanya nsadi pa mwanda wa byabya bikitshîno byobe.” (Misambo 92:2, 5, Ñono na malango) Banda kunangushena bintu byabadi bakupe kwi Yehowa: mmukupe muwa, lukumino, Bible, kakongye, na lukulupilo lwa kushala bwa ikalaika mu Mpaladiso. Nsaa ywata bipatshila bya mu kikudi, olesha Yehowa’shi we na lutumbu bwa bino bintu byoso na bino abikukwasha bodya kwifubwila pepi naye.

6. (a) Bipatshila bya mu kikudi bi na bukitshishi ku kipwano kyobe na Yehowa naminyi? (b) Mbimo bipatshila kinyi byodi mulombene kwiatshila pokii mukinga?

⁶ Kabingilo ka kabidi ka kwata bipatshila bya mu kikudi nka’shi nsaa yofubu bwa kulombasha bino bipatshila, okwete kufubila Yehowa mudimo wibuwa. Bino abinyisha nkwikasha pepi naye. Mpoolo mutumibwa balayile’shi: “Efile Mukulu mmululame; ta mulombeene kuluba byanudi bakite, na kifulo kyanudi baleeshe bw’eshina dyaaye.” (Beena-Ebelu 6:10) Twe mukambe kwikala bukinga boshi mulombene kwiatshila bitshibilo nya. Bu kileshesho, Christine badi na bipwa 10 nsaa ibatshile kitshibilo kya kubadika mweshi ooso miisambo ya nshalelo a Batemwe basha lulamato. Toby badi na bipwa 12 nsaa ibadi mwiatshile kitshibilo kya kwibadikila Bible oso mushima kumpala kwadya kubatshishibwa. Maxim badi na badi na bipwa 11 na mukwabo mukashi Noemi badi na bipwa 10 nsaa ibadi mubatshishibwe. Boso bwabo abadi beatshile bipatshila bya kufuba ku Betele. Bwabadya kushala batuule binangu byabo ku bino bipatshila, abadi balamikye esaki dya kuteka bwa kutwela ku Betele ku midimba wa mu mashibo aabo. Kadi obe namu? We kunangushena pa bipatshila byodi mulombene kwata na kubanga kufuba bwa kwibilombasha su?​—Badika Beena-Fidipe 1:10, 11.

7, 8. (a) Kwiatshila bipatshila akwitubofwisha bwatudya kwata bitshibilo naminyi? (b) Bwakinyi ungi mwana mukashi e mu bipwa ekumi na bungi badi mwate kitshibilo kya kupela kwenda ku universite?

⁷ Nkabingilo kinyi ka kasatu akalesha’shi bibuwa kwata bipatshila poki mukinga? Poki mukinga, we na bitshibilo bibungi abitungu’shi wate. Abitungu osangule kalasa sunga mudimo okafubu na bingi bitshibilo bibungi. Bino bitshibilo mu muwa wetu bi nka bu masanka a mashinda okwete kusangana nsaa yodi mu lwendo. Su ouku mbalo ywende, abikekala bibofule bodya kusangula eshinda dya kwenda. Mu mushindo umune, su ouku bipatshila byobe, abikekala bibofule bodya kwata bitshibilo bibuwa. Mukanda wa Nkindji 21:5 awamba’shi: “Byooso abipwandjikisha muntu ee na kisumi abikumbana.” Su bopwandjikisha myanda kumpala pa kwata bipatshila bibuwa, okebikumbasha bukidibukidi. Bino ngi bibamwene Damaris nsaa ibadi na lukalo lwa kwata bitshibilo bikata aye e mu bipwa ekumi na bungi.

⁸ Damaris badi na mpwee ibungi nsaa ibapwile kalasa kakata, na badi mulombene kwenda mu kulonga ku kilongyelo kikata (universite) mu kulonga miiya ya mu eumbo dyabo kushi kufuta makuta.  Pamutwe pa byabya, batshile kitshibilo kya kufuba mu banke. Bwakinyi? Mwanda pabadi ki mwana mukinga, badi mwate kitshibilo kya kufuba bu mbala-mashinda. Akula’shi: “Bibadi abitungu’shi nfube munda mwa mafuku apeela. Su nadya kwenda mu kulonga miya, nadya kupeta makuta ebungi, anka tshinadya kwikala na mwabi wa kupeta mufubo wa kufuba mafuku apeela ku lubingo nya.” Damaris mmufube bu mbala-mashinda munda mwa bipwa 20. Apusha’shi badi na kepatshila na kitshibilo kibuwa pabadi mu bipwa ekumi na bungi su? Oolo. Ku banke kwakwete kufuba, kwete kufumankana na bantu bebungi balongye miiya bakwete kufuba mudimo ubadya kufuba su bayile ku universite. Akula’shi bebungi ba kwabadi ta be na muloo pa mwanda wa midimo yabo nya. Damaris apusha’shi bino bipwa byoso byadi mufube bu mbala-mashinda mbimupe muloo wibungi na mbimukwashe bwadya kusuuka nshalelo a kukutwa muloo bu aabo.

9. Bwakinyi twi na nfyeedi bwa bakwetu ba nsongwa?

⁹ Ba nsongwa binunu na binunu be mu nsenga ishima bakwete kukita myanda ibuwa na twi balombene kwibakampula. Kipwano kyabo na Yehowa na bipatshila byabo bya mu kikudi ngi myanda i na muulo ngofu mu muwa wabo. Bano ba nsongwa be na muloo wa binyibinyi mu muwa wabo na bakwete kulonga bya kulonda bukunkushi bwa Yehowa mu myanda yoso, mu ino myanda mwi tulasa, mudimo, na shalelo a mu kifuko. Salomone bambile’shi: “Kulupila kwi Yehowa n’eshimba dyoobe dyooso.” Aye nkwamba dingi’shi: “Mu mwikeelo oobe ooso, omutentekyeshe, aye alumbuula mashinda oobe ooso.” (Nkindji 3:5, 6) Anwe ba nsongwa, Yehowa mmwinufule ngofu! Nwi na muulo ukata ku meso kwaye, na aye namu akenukalwila, enukunkusha, na kwinwelela myabi.

10. (a) Bwakinyi abitungu’shi kulungula mukandu wibuwa kwikale bu mwanda wi na muulo ngofu kwatudi? (b) We kulongamisha mushindo oobe wa kupatulwila bantu malongyesha oodi mukumine naminyi?

¹⁰ Nsaa yotuulu nshalelo oobe bwa kusankisha Yehowa, okekala na muloo wa kulungula bangi mwanda waye. Yesu Kidishitu bambile’shi, “abikyebe kubanda kupalakasha mukandu wibuwa.” (Maako 13:10) Byabya mudimo wa kulungula mukandu wibuwa autungu kukita bukidibukidi na abitungu wikale bu mwanda wi na muulo ngofu kwatudi. We kwikala na kepatshila ka kunyisha kulungula mukandu wibuwa su? We kwata mudimo wa bu mbala-mashinda su? Kadi we kukita naminyi su twe na muloo wa kukisha nsaa ibungi mu bulungudi? Na we kulongamisha mushindo oobe wa kupatulwila bantu malongyesha oodi mukumine naminyi? Bino bintu bibidi mbilombene nkukwasha: Ikala welumbuula kalolo, na tokookanga kulungula bangi myanda youku pabitale Yehowa. We kukema ngofu pa kumona byokanyisha kwikala na muloo wa kulungula mukandu wibuwa.

11, 12. (a) We kukita kinyi bwa kwilumbuula bwa kulungula bangi pabitale Yehowa? (b) Ungi mukwetu nsongwalume badi mufube na nsaa ibadi mupete mushindo wa kwisamba pabitale Yehowa ku kalasa naminyi?

¹¹ Banga kulumbuula ngaluulo ku imune ya ku nkonko yabadi balombene nkwipusha kwi bena kalasa nobe, bu kileshesho, “Bwakinyi we mukumine’shi Efile Mukulu e kwanka?” Kwi miisambo i mu site eetu a jw.org ilombene nkukwasha bwa kwalula luno lukonko. Su botala pa mbalo ifunde’shi LA BIBLE ET VOUS > ADOLESCENTS, okapete esaki dya kufuba nadyo di na mutwe wa mwanda awamba’shi “Pourquoi est-ce que je crois en Dieu?” Londa matabula e mu dino esaki bodya kulumbuula lwaluulo lobe’be nabene. Okasangana ma verse asatu oodi mulombene kufubisha: Beena-Ebelu 3:4, Beena-Looma 1:20, na Misambo 139:14. Kwi angi masaki a kufuba nao oodi mulombene kufubisha bwa kulumbuula ngalulo ku nkonko ibungi.​—Badika 1 Mpyeele 3:15.

¹² Lungula bena kalasa nobe’shi mbalombene kubandjila bintu bi mu jw.org abo banabene. Bino ngi bibakitshine Luca. Bena kalasa naye abadi abakula pabitale bipwilo bilekene. Luca bamwene’shi mukanda ubabadi ababadika ubadi awakula myanda ya madimi pabitale ba Temwe ba Yehowa. Sunga mbibadi Luca mufiite munda, batekyele mulongyeshi aabo bwa’shi amupe matalwa a  kupatulwila bena kalasa naye bwakinyi ino myanda ngya madimi. Mulongyeshi bamupeele matalwa adya kupatuula myanda yadi mukumine, na bapetele mushindo wa kulesha bena kalasa naye boso site eetu a Internete. Mulongyeshi batekyele mwina kalasa ooso bwadya nkabandjila pasha video a Mets un harceleur K.-O. sans utiliser les poings ! We kupwandikisha muloo ubapushishe Luca p’aye kwakula pabitale Yehowa ku kalasa!

13. Bwakinyi ta twi balombene kubofula nsaa yatufumankana na nkalakashi?

¹³ Nsaa yofumankana na nkalakashi tobofulanga, anka tungunuka na kufuba bwa kulombasha bipatshila byobe. (2 Timote 4:2) Bino ngi bibakitshine Katharina. Badi na bipwa 17 pabadi mwate kepatshila ka kulungula mukandu wibuwa kwi mwina mudimo naye ooso. Umune a kwabadi badi mumukee misusa ibungi. Anka ta mulekyele kepatshila kaaye nya. Mwikelo waye wi buwa ubadi ukemeshe ungi muntu ababadi abafubu naye, ababadi abetanyina bu Hans. Babangile kubadika mikanda yetu, kulonga Bible, mpa na kubatshishibwa. Katharina tabadi auku bino nya, mwanda mu aa mafuku abadi bapwe kumutuma ingi mbalo. Ngi bwakinyi badi mukeme ngofu nsaa ibadi mumone kunyima kwa bipwa 13, pabadi ku bisangilo na kifuko kyaye, mukwetu badi akitshi mwisambo wa bantu boso nyi Hans! Badi na muloo wibungi p’aye kukutwa kubofula bwa kulombasha kepatshila kaye ka kulungula muntu oso ababadi abatumika naye mukandu wibuwa.

14, 15. (a) Abitungu otentekyeshe kinyi nsaa yabakutakula kwi bangi bwa kukita myanda yabakitshi? (b) We kukita kinyi bwa kushala munyingye nsaa yabakutakula kwi bangi bwa kukita myanda yabakumina?

¹⁴ Mu kipindji kyatumonanga kunundu, uno mwisambo ubakukankamika bodya kwata kitshibilo kya kutuula nshalelo oobe ku myanda ayisangasha Yehowa na kwikala na bipatshila bya mu kikudi. Anka ba nsongwa bebungi ba bula bobe abakumina penda kwikala abakisha nsaa ibuwa. Pangi mbalombene nkwitanyina bodya kukita nabo myanda yabakitshi. Lelo sunga maloba, okekala na lukalo lwa kukwasha bangi bwabadya kumona’shi kulombasha bipatshila bya mu kikudi ngi mwanda wi na muulo ngofu kodi. Totadilanga bangi bwa’shi bakulubishe bino bipatshila. Su bodya kwikala pa mbalo ayimenaa myootoka yatudi bateemune ku mbangilo kwa uno mwisambo, bodya kutwela mu mootoka ooso wawa, nka pa mwanda wa’shi bomono bantu be mwanka abakisha nsaa ibuwa su? Nya, ta mbyabya nya!

 ¹⁵ Byabya, we kukita naminyi bwa kushala munyingye nsaa yabakutakula kwi bangi bwa kukita myanda yabakitshi? Suuka myanda ilombene nkufikisha mu nshalelo akwelela bukopo bodya kupela kukita myanda yabakitshi kwi bangi. (Nkindji 22:3) Nangushena pa bipeta bibubi bilombene kutuka su bokitshi myanda ibubi. (Beena-Ngalatea 6:7) Na dingi kumina na kwiyisha koso’shi we na lukalo na malango ebuwa. Teemesha ku byabakulungula kwi nshobe na nyin’obe na byabakulungula kwi bakwetu balume na bakashi be mu kakongye bapwe kumona myanda ibungi.—Badika 1 Mpyeele 5:5, 6.

16. Kileshesho kya Christoph akilesha’shi kwikala na kwiyisha kwi na muulo naminyi?

¹⁶ Kwiyisha kubadi kukwashe Christoph bwadya kukumina elango dibuwa. Mafuku apeela kunyima kwa’ye kubatshishibwa, babangile kwenda ku mbalo yabakitaa kalashishi ka mbidi efuku dyoso. Pabadi afiki kwakwa, bangi ba nsongwa abadi abamwitanyina bwadya kutwela mu kisaka kyabo kya kalashishi. Balungwile ungi mukulu mu kakongye pabitale uno mwanda, na uno mukulu bamulungwile bwadya kunangushena pabitale amo masaku, bu kwikala na binangu bya kwipikeena. Christoph baatshile kitshibilo kya kutwela mu kino kisaka. Anka kunyima kwa mafuku apeela, bamwene’shi kalashishi kabo kabadi ka myanda ya bu ntomboshi na nkalombene kutusha masaku. Bafikile esamba na bakulu dingi, abo nkumupa malango a mu Bible. Christoph akula’shi, “Yehowa badi muntumine bantu abauku kutusha malango kalolo, ami nkumuteemesha, sunga mbibabidi byate mafuku ebungi.” We mwiyishe mu kipaso kyodi mulombene kukumina elango dibuwa su?

17, 18. (a) Yehowa akumina’shi ba nsongwa bekale naminyi lelo uno? (b) We kupela kwinyongola bwa bitshibilo byobe nsaa yokakulu naminyi? Tuusha kileshesho.

¹⁷ Bible akula’shi: “A nsongwalume [sunga nsongwakashi] sepêlanga mu bukinga bobe! Sangalanga poki nsongwalume!” (Mulungudi 11:9, EEM) Yehowa akumina’shi wekale na muloo pokii mukinga. Mu uno mwisambo, tubalongo’shi mushindo penda umune oodi mulombene kwikala na muloo nkwikala mutuule meso pa bipatshila byobe bya mu kikudi na kulonda elango dya Yehowa mu myanda yoso yopwandikisha kukita na mu bitshibilo byobe. Su bokitshi bino bukidibukidi mu muwa oobe, okamono bukunkushi bwa Yehowa, akulama, na akwelela myabi. Tentekyesha malango oso ebungi aadi mukupe mu Eyi dyaye, na ofubile dino elango: “Dingi tentekyesha mukupangye mafuku a bukinga boobe.”​—Mulungudi 12:1.

¹⁸ Ba nsongwa abakulaa bukidibukidi na kufika bantu bakulu. Mwanda wa malwa, bebungi ba kwabadi abenyongolaa kunyima pa kumona’shi abadi beatshile bipatshila bibubi sunga’shi tambaate kipatshila su nkimune pababadi ba nsongwa. Kadi su boshala mutuule binangu byobe pa bipatshila byobe bya mu kikudi, okekala na muloo pabitale bitshibilo byobe pokekala muntu mukulu. Bino ngi abipushaa Mirjana. Pabadi ki mu bipwa ekumi na bungi, badi akitshi kalashishi ka mbidi kalolo kakile. Abadi bamwitanyine mpa na bwadya kufika mu kwasha Maasha olympique a mu hiver. Anka, basangwile bwadya kufubila Yehowa mu mudimo wa nsaa yoso. Kunyima kwa bipwa bikile pa 30, kwete nka kufuba mudimo wa nsaa yoso, pamune na mulum’aye. Akula’shi bantu abakumina kwenda nkumo, kupeta kineemo, bukome, na mapeta, tabekalaa na muloo wa binyibinyi nya. Akula dingi’shi bipatshila bikile buwa mbya kufubila Efile Mukulu na kukwasha bantu bwabadya kumuuka.

19. Bwakinyi bibuwa kutuula binangu ku bipatshila bya mu kikudi pokii mukinga?

¹⁹ Anwe ba nsongwa nwi balombene kusaamunyibwa mwanda nwi batuule muwa wenu bwa kufubila Yehowa sunga mbyanukwete kufumankana na nkalakashi. Anwiatshila bipatshila bya mu kikudi, na nukwete kumona mudimo wa bulungudi bu mwanda wi na muulo ngofu mu muwa wenu. Na dingi, tanutadilanga bwa’shi uno ndumbulwilo enulubishe bipatshila byenu nya. Ikalayi bashinkamishe’shi mudimo wenu wi bukopo wanukitshi, ta ngwa bisumanga nya. Nwi na bakwenu balume na bakashi bakwete kwinukwatshishena. Ngi bwakinyi “lubwila Yehowa byokyebe kukita, byabya byoodi mupwandjikishe abikumbana.”