BU BYATUDI mu ndumbulwilo mwi nkalakashi ibungi, abitungu tufube ngofu bwatudya kupeta butaale. Dingi, sunga twekala na ndambo ya butaale, misusa ibungi abitungu twikitshishe bwa kwibulama. Nkinyi akyakula Eyi dy’Efile Mukulu kilombene kwitukwasha bwa kupeta butaale bwa binyibinyi na abwisha mafuku ebungi? Na mushindo kinyi watudi balombene kukwasha bangi bwabadya kukita bino?

Bwa kupeta butaale bwa binyibinyi, abitungu twipushe mu bulungantu na kupusha bibuwa mu binangu. Abitungu dingi twikale mu kipwano kibuwa na bangi bantu. Mwanda wi na muulo ngofu, bwa kupeta butaale bwa binyibinyi, abitungu twikale mu kipwano kibukopo n’Efile Mukulu. Twi kukita bino naminyi?

Nsaa yatukookyela miya ya Yehowa ilulame na mayi aaye a kulonda, atulesha’shi twi bakulupile mwadi na’shi twi na lukalo lwa kwikala mu kipwano kibuwa naye. (Yeelemiya 17:7, 8; Shake 2:22, 23) Ku lwaye lupese namu, efubwila pepi netu na kwitwelela myabi pa kwitupa butaale bwa binyibinyi. Mukanda wa Yeeshaya 32:17 awamba’shi: “Bululame abutuushaa butaale bu kikuba: bululame abutuusha kwiyikeela na kumatwi talalaa bwa looso.” Twi balombene kupeta butaale bwa binyibinyi p’atwe kukookyela miya ya Yehowa n’eshimba dimune.​—Yeeshaya 48:18, 19.

Twi balombene dingi kupeta butaale bw’eyendo ku bukwashi bwa kya buntu kikata kyabetupeyaa kwi Nshetu a mwiyilu​—kikudi kyaye ki selele.—​Bikitshino 9:31.

Mpoolo mutumibwa badi mutemune butaale bu kipindji kya kasatu kya ‘kikuba kya kikudi.’ (Beena-Ngalatea 5:22, 23) Bu bikale’shi kikudi ky’Efile Mukulu ngi akitushaa butaale bwa binyibinyi, abitungu tukookyele ku bukitshishi bwa kikudi ki selele bwa’shi kitukwashe bwa kwikala na butaale bwa binyibinyi. Tubandeyi kutala mishindo ibidi yabadi balombene kwitukwasha kwi kikudi ky’Efile Mukulu bwatudya kupeta butaale.

 Wa kumpala, kubadika Eyi diyookyelwe dy’Efile Mukulu efuku dyoso akwitukwasha bwa kupeta butaale. (Misambo 1:2, 3) Su tubekala atunangushena pabitale mukandu wi mu Bible, kikudi ki selele ky’Efile Mukulu akitukwasha bwatudya kupusha bi binangu bya Yehowa mu myanda ibungi. Bu kileshesho, atukamono mushindo walamaa butaale na bwakinyi butaale bwi na muulo ngofu kwadi. Nsaa yatufubila ano malongyesha atupete mu Eyi dy’Efile Mukulu, atunyinsha kwikala na butaale mu muwa wetu.​—Nkindji 3:1, 2.

Wa kabidi, abitungu twikale atutekye kikudi ki selele ky’Efile Mukulu. (Luka 11:13) Yehowa mmwitulee’shi su tubamutekye bukwashi, “butaale bw’Efile Mukulu, abo butabukile binangu byooso, abulama mashimba [eetu] na binangu [byetu] munda mwa Yesu Kidishitu.” (Beena-Fidipe 4:6, 7) Nsaa yatutekye efuku dyoso na kuteka kikudi kya Yehowa, Efile Mukulu eetu etuwushaa na butaale bwa binyibinyi bwapeyaa nka penda baba be mu kipwano kibuwa naye.​—Beena-Looma 15:13.

Bangi bantu mbatumikishe dino elango dya mu Bifundwe na kushintula myanda ayitungu na kwikala mu butaale bwa binyibinyi—na Yehowa, n’abo banabene, mpa na bantu nabo naminyi?

Mu kakongye ka bena Kidishitu lelo uno mwi bantu abadi na “nsungu” ikile bungi kumpala, anka binobino tabadi na binangu bibuwa, be na kalolo, lwishinko, na tabadi na butaale mu nshalelo aabo na bangi. * (Nkindji 29:22) Banda kutala uno mwanda bibaudi ukitshikile ungi mukwetu mulume na mukwetu mukashi abadi bapete bukwashi bwa kukambila nsungu na kukimba bya kwikala mu butaale na bangi.

Binangu bibubi bya David bibadi na bukitshishi mpa na mu ngakwilo aaye. Kumpala kwadya kulambula muwa waye kwi Efile Mukulu, misusa ibungi badi akula bangi myanda ibubi na kwamba bakwabo bishima abibatapa. Kunyima kwa mafuku, David bamwene’shi abitungu ashintulukye na kufika muntu e na butaale. Badi mupete butaale naminyi? Akula’shi: “Nabangile kutumikila mayi a kulonda a mu Bible mu muwa wande, na bu kipeta, tubabangile kunyisha kwinemekyeshena ami na bakwetu.”

Mbalo ibadi ikudile Rachel ibadi na bukitshishi mu binangu byaye. Akula’shi: “Mpa na binobino, nkwete kulwa bwa kukambila nsungu  mwanda ne mukudile mu kifuko kya bantu basha nsungu ibungi.” Nkinyi kimukwashe bwadya kunyisha kwikala na butaale? Alula’shi: “Nadi neele nteko kwi Yehowa efuku dyoso na kumuteka bwa’shi ankwashe.”

David na Rachel nyi mbileshesho bya penda bantu babidi abilesha’shi nsaa yatutumikila mayi a kulonda a mu Bible na kuteka Efile Mukulu bwa’shi kikudi kyaye kitukwashe, atukapete butaale. Abimweneka kalolo’shi, sunga twekala mu ndumbulwilo mwi bilumbu, twi balombene kupeta butaale bwa binyibinyi bulombene kwitukwasha bwatudya kwikala bibuwa mu kifuko kyetu na munkatshi mwa bakwetu bena Kidishitu. Na dingi, Yehowa etulanga bwatudya “kushaala mu butaale na bantu booso.” (Beena-Looma 12:18) Bino mbilombene kukitshika su? Na mmasanka kinyi atudi balombene kupeta nsaa yatwikitshisha bwa kwikala mu butaale na bangi?

Ku bukwashi bwa mudimo wetu wa bulungudi, atwitanyina bantu bwabadya kupeta masanka aatuukila ku mukandu wetu wa butaale wa Bufumu bw’Efile Mukulu. (Yeeshaya 9:6, 7; Mateo 24:14) Mwanda wa muloo, bantu bebungi mbakumine uno mukandu wetu. Bu kipeta, ta mbekale dingi na binangu bibubi sunga nsungu bwa myanda yabamono ayikitshika mu nsenga nya. Pamutwe pa byabya, binobino tabadi na lukulupilo lwa binyibinyi bwa mafuku aafiki na be na lukalo lwa “kukimba butaale, na kwibwimeena.”​—Misambo 34:14.

Anka, ta mbantu boso abakumina mukandu wetu nya, bikishekishe ku mbangilo. (Yowano 3:19) Sunga mbyabya, kikudi ky’Efile Mukulu akitukwasha bwatudya kwibalungula mukandu wibuwa mu butaale na kaneemo. Mu uno mushindo, atulondo mayi a kulonda a Yesu atale kulungula mukandu wibuwa e mu Mateo 10:11-13, mwanka badi mwitulangye’shi: “Panutwele mu nshibo nwibayimune. Na su nshibo ngipwandjikile eyendo, kufukama kwenu kwikala mu yaya nshibo; anka su tangipwandjikile, kufukama kwenu kwinwalukile.” Nsaa yatulondo elango dya Yesu, twi balombene kukatuka na butaale bwetu boso na kukulupila’shi uno muntu aketuteemesha mususa aufiki.

Atukitshi bya’shi tunyishe kwikala mu butaale nsaa yatwisamba na bakata ba mbulamatadi na kaneemo—mpa na baba balombene kushikwa mudimo wetu. Bu kileshesho, mbulamatadi a mu dingi eumbo dya mu Afrique badi mupele kwitupa matalwa a kwibaka mashibo a Bufumu pa mwanda wa myanda ibabadi abetudimbila. Bwa kudila kupudisha uno mwanda mu butaale, abadi batume ungi mukwetu badi mufube kumpala bu misionere mu dyadya eumbo dya mu Afrique bwadya nkesamba na mukata a Haut Commissariat a mu dino eumbo mu Londre, mu Angleterre. Bibadi abitungu’shi alungule uno mukata bwa mudimo wa butaale wa ba Temwe ba Yehowa mwiumbo dyabo. Mwisambo wabo ubadi ukile naminyi?

Abwela’shi: “Panafikile pa mbalo yabatambulaa beenyi, penda nka binamwene bibadi bifwale muntu badi atambula beenyi, naukile munda mwande’shi nga mu kisamba kya bantu abakulaa ludimi lunadi mulongye. Ngi bwakinyi namusemene mu ludimi lwaye lwa butandwa. Pa mwanda wa kukema, badi mungipushe’shi: ‘Bofiki mu kwitutala bwakinyi?’ Namulungwile na kanemo koso’shi nakumina namu kwimonena na mukata a Haut Commissariat. Badi mumwitanyine ku telefone, aye nkufika mu kwimonena nami na kunsema mu ludimi lwa kisamba kyabo. Kunyima kwa papa, badi munteemeshe kalolo panadi namupatulwila midimo ya butaale yabakwete kufuba kwi ba Temwe ba Yehowa.”

Myanda ibadi imupatulwile uno mukwetu na kanemo kooso ibadi ikatushe myanda yabapushanga bibubi kwi uno mukata na kukatusha myanda yabadimbila mudimo wetu. Kunyima kwa mafuku apeela, mbulamatadi a dino eumbo dya mu Afrique badi mukumine bwatudya kutungunuka na kwibaka Mashibo a Bufumu. Bakwetu abadi basankye ngofu pa kupusha uno mukandu wibuwa! Eyendo, kukitshina bangi bantu myanda na kaneemo akutushaa myabi ibungi—mpa na butaale.

Lelo uno, bafubi ba Yehowa be na muloo wa kwikala mu mpaladiso a mu kikudi mwi butaale bwibungi. Su bwekitshisha bwa kwikala na kino kipindji kya kikuba kya kikudi mu muwa oobe, okwasha bwa’shi buno butaale bunyishe kwikala kwanka. Mwanda wi na muulo ngofu, okanyiisha kukuminyibwa na Yehowa na kupeta butaale bwibungi bwa ikalaika mu ndumbulwilo mupya a Efile Mukulu.​—2 Mpyeele 3:13, 14.