YESU batemukile’shi balongi baye abakasankila kukita mudimo ukata wa kuumbula mu ano mafuku a ku nfudilo. (Mateo 9:37; 24:14) Banda kutala bilombane ano mayi aaye mu mushindo wi pabwao mu kipindi kya nsenga kya Transcarpathia, mu Ukraine. Mu bibundi bisatu bikungishene bi mu kino kipindji kya nsenga, mwi tukongye 50 na balungudi bakile pa 5 400. * Uno mwanda wa kukaanya pa kumona’shi su babunga bantu boso ba mu bino bibundji bisatu, muntu 1 pa 4 mwikale Temwe a Yehowa!

Myanda kinyi yabadi bakumine kwi bantu ba mu kino kipindji kya nsenga? Mukwetu mulume abetanyi bu Vasile akula’shi: “Bantu be mwanka abanemekaa Bible, abakumina kululama, mbepusheene ngofu mu bifuko byabo, na abekitshisha bwa kwikwashena binyibinyi. Tabakuminaa malongyesha etu’nka misusa yoso nya. Anka nsaa ywebalesha mwanda kampanda wi mu Bible, abakutemesha kalolo.”

Byabya, bakwetu balume na bakashi bakwete kufumankana na nkalakashi nsaa yabakwete kulungula mu bibundji mwi balungudi bebungi kukila bantu ba kulungula. Bu kileshesho, mu kangi kakongye mwi balungudi 134 kadi mu teritware aabo mwi penda mashibo 50! Bano balungudi bakwete kukita kinyi bwa kukila na uno mwanda?

Bakwetu balume na bakashi bebungi abatamisha mudimo wabo wa bulungudi pa kwenda mu ma mbalo e na lukalo lukata lwa balungudi. Mukwetu mulume abayitanyina bu Ionash tadi na bipwa 90 akula’shi: “Mu teritware a kakongye ketu, patutala bungi bwa mashibo, atusangana’shi abitungu kupa balungudi 2 nshibo 1.” Nalungulaa mu kino kibundji, kadi kumpala kwa’shi nkumbe maladi andi mukumbe binobino, nekalanga nende mu lwendo lwa bilometre 160, mu teritware abadi bampe, bwandya nkalungula mukandu wibuwa mu ludimi lwabetanyina bu Hongrois. Balungudi abendaa mu kukwasha mu angi ma teritware. Ionash akula’shi: “Bwa kutwela mu mashuwa a ndjandja, nabukaa mu nsaa ya 4:00 nenda mu kulungula mukandu wibuwa mpa na mu nsaa ya 18:00 nsaa ayalukilaa mashuwa bwandya kwaluka ku nshibo. Nadi nende bino misusa ibidi sunga isatu ku lubingo.” Apusha’shi kuno kwitatshisha kwaye nkwa bisumanga su? Akula’shi: “Nadi napete miloo ibungi mu uno mushindo wa bulungudi. Nadi na muloo wa kukwasha bakwetu be ku mbalo i kula bwabadya kulonga bya binyibinyi.”

Abipushika kalolo’shi, ta mbantu boso be mu tukongye twa mu ino mbalo be na mushindo wa kwenda ku ma mbalo e kula nya. Anka boso bwabo, mpa na balungudi batabadi banunu, bakwete kwikitshisha bwabadya kulungula bantu boso be mu teritware a kakongye kabo. Bipeta bitukye kwanka mbino, mu kipwa kya 2017, pabadi basangye bungi bwa bantu batwele mu Kitentekyesho ba mu bino bibundji bisatu, bungi bwa bantu batwele mbukile bungi bwa balungudi misusa ibidi.—sunga kya pankatshi kya bantu boso. Kushi mpaka, mu mbalo yoso yatufubu, muki bibungi bya kukita “mu mufubo wa Mwanaana.”​—1 Beena-Kodinda 15:58.