1. Kunyima kwa Adame na Eeva kukita mulwisho, Yehowa badi mufumbule myada kinyi pabitale mwishikwanyi netu?

ADAME badi auku’shi nyoka ta ngilombene kwakula nya. Byabya pabapushishe’shi nyoka bakula na Eeva, pangi Adame baukile’shi nyi muntu a mu kikudi besamba naye. (Kibangilo 3:1-6) Adame na Eeva tababadi abauku’shi uno muntu a mu kikudi mmuntu kinyi nya. Anka, Adame basangwile bwa kukila ku lupese lwa uno muntu mwenyi na kutombokyela Nshaye a mwiyilu sha kifulo. (1 Timote 2:14) Mususa umune, Yehowa babangile kufumbula myanda ibungi itale uno mwishikwanyi na kulaa’shi uno mwishikwanyi akabutudibwa. Anka Yehowa badi muukishe’shi kumpala kwabadya kumubutula, uno muntu a mu kikudi badi mwisambe kukiila kwi nyoka akekala na mushikwa kwi bantu boso bafule Efile Mukulu.​—Kibangilo 3:15.

2, 3. Nkabingilo kinyi kabadi kalombene kutakula Yehowa bwa kufumbula myanda ipeela ya Satana kumpala kwa kufika kwa Mesiya?

² Yehowa ta mwitulungule eshina dinabene dya mwikeyilu badi mumutombokyele nya. * Anka bipwa 2 500 kunyima kwa’bo kutombokyela Yehowa mu lupango lwa Edene ngi pababadi betufumbwile uno muntu kwi Yehowa. (Yoobo 1:6) Mmuukibwe mu mwasu wa bu “Satana,”  aupushisha’shi “Mwishikwanyi.” Mu Bifundwe bya kina Ebelu mbatemune Satana penda mu mikanda isatu, mu 1 Myanda, Yoobo, na Sekadya. Bwakinyi mbateemune uno mwishikwanyi penda ino misusa ipeela kumpala kwa kufika kwa Mesiya?

³ Mu Bifundwe bya kina Ebelu, Yehowa ta muleshe myanda ibungi pabitale Satana na midimo yaye nya. Kya kumpala, kepatshila ka Bifundwe bya kina Ebelu kabadi ka kukwasha bantu bwabadya kutundula Mesiya. (Luka 24:44; Beena-Ngalatea 3:24) Pabafikile Mesiya, Yehowa bafubile naye na balongi baye bwa kufumbula myanda ibungi yatuuku pabitale Satana na ba mwikeyilu be ku lupese lwaye. * Bino mbilombane, mwanda Yehowa akafubu na Yesu na bedibwe mwimu bwa kubutula Satana na bantu be ku lupese lwaye.​—Beena-Looma 16:20; Kibafumbwilwe 17:14; 20:10.

4. Bwakinyi ta twi balombene kutshina Diabulu?

⁴ Mpyeele mutumibwa badi mwitanyine Satana Diabulu bu “ntambwe e bukyelo,” Yowano namu bamwitanyine bu “nyoka mukata” na bu “nyoka a kala.” (1 Mpyeele 5:8; Kibafumbwilwe 12:9) Anka ta twi balombene kutshina Diabulu nya. Matalwa aaye e na mikalo. (Badika Shake 4:7.) Abetukalwila kwi Yehowa, Yesu na kwi ba mwikeyilu basha lulamato. Ku bukwashi bwabo, twi balombene kushinamina uno mwishikwanyi netu. Anka, twi na lukalo lwa kuuka ngalulo ku ino nkonko i na muulo: Satana e na bukitshishi bwi naminyi? Kwete kutompa bukitshishi bwaye kwi bangi bantu naminyi? Na myanda kinyi yashi mulombene kukita? Tubandeyi kwalula ku ino nkonko na kutala malongyesha atudi balombene kulonga.

5, 6. Bwakinyi ma mbulamatadi a bantu ta e na ngobesha ya kushintuula myanda ikata yabakumina kwi bantu?

⁵ Ba mwikeyilu be bungi abadi balonde Satana mu kutombokyela Efile Mukulu. Kumpala kwa Mpeshi a kabutu, Satana badi mutomboshe bamo ba mwikeyilu bafika mu kutambuka lusandji na bana bakashi. Bible apatuula bino mu ngakwilo a mu kifwanyi nsaa yamba’shi, nsaa ibaponene kinyoka kikata mwiyilu kibakakile kya mbisatu kya nyenyeene ayika nakyo. (Kibangilo 6:1-4; Yunda 6; Kibafumbwilwe 12:3, 4) Nsaa ibapelele baba ba mwikeyilu kwikala mu kifuko kya bana b’Efile Mukulu, babakidile abo banabene ku lupese lwa Satana. Ta twi balombene kupwandjikisha’shi baba ba mwikeyilu boso batombokye be mu kisaka kishi kilumbuulwe nya. Mu uno ndumbulwilo a mu kikudi, Satana mmutuule aaye mbulamatadi aadi mwambule Bufumu bw’Efile Mukulu. Mmwituule aye nabene bu nfumu, na mmulumbuule ba demo, ebapa matalwa, na kwibekasha bu bakunkushi ba uno ndumbulwilo.​—Beena-Efeso 6:12.

⁶ Satana kwete kufubisha ndumbulwilo aaye bwa kukunkusha mbulamatadi yoso. Twi balombene kushinkamisha bino, mwanda badi muleshe Yesu “mafumu ooso a pa nsenga,” aye nkwamba’shi: “Nankupa buno bufumu booso na nkumo ya ano maumbo, mwanda nnami abadi bebipe; ne kwibipa ooso ankyebe.” (Luka 4:5, 6) Anka, ma mbulamatadi e bungi akwete kukitshina bantu ba mu maumbo aabo myanda ibuwa, na bamo bakunkushi bebuwa abakumina kukwasha bantu. Anka ta kwi mukunkushi su ngumune mulombene kushintuula myanda ikata yatudi nayo lukalo nya.​—Misambo 146:3, 4; Kibafumbwilwe 12:12.

7. Kukatusha kufubisha mafumu a mbulamatadi, Satana kwete kufubisha bipwilo bya madimi na ndumbulwilo a busunga naminyi? (Tala kifwatulo ki ku mbangilo.)

⁷ Satana na ba demo bakwete kufuba dingi na bipwilo bya madimi na ndumbulwilo ya busunga bwa kupambwisha “ba pano boso,” sunga bantu boso. (Kibafumbwilwe 12:9) Satana kwete kufubisha bipwilo bya madimi bwa kudimba bantu pabitale Yehowa, na mmutompe mpa na kufwamisha eshina dy’Efile Mukulu. (Yeelemiya 23:26, 27) Bu kipeta, bamo bantu be na mashimba ebuwa abapwandikisha’shi bakwete kulangwila  Efile Mukulu, aku namu bakwete kulangwila ba demo. (1 Beena-Kodinda 10:20; 2 Beena-Kodinda 11:13-15) Satana kwete kufuba dingi na ndumbulwilo a busunga bwa kupalakasha myanda ya madimi, bu binangu bya madimi bya’shi makuta na bintu mbilombene kupa bantu nshalelo a muloo. (Nkindji 18:11) Bantu abakumina ino myanda ya madimi bakwete kukisha nshalelo aabo mu kufubila “Mapeta” pamutwe pa kufubila Efile Mukulu. (Mateo 6:24) Sunga byekala’shi abekalanga bafule Efile Mukulu kumpala, kifulo kyabo bwa bintu bya ku mbidi akinyisha kutama ngofu mu kipaso kyabashimisha mpa na kifulo kyabekalanga bafule Efile Mukulu.​—Mateo 13:22; 1 Yowano 2:15, 16.

8, 9. (a) Mmalongyesha kinyi abidi atudi balombene kulonga pa myanda ibakitshine Adame, Eeva, na ba mwikeyilu abatombokyele? (b) Bwakinyi bi na muulo bwatudya kuuka’shi Satana kwete kukunkusha uno ndumbulwilo?

⁸ Kwi malongyesha abidi e na muulo atudi balombene kupetela ku myanda ibakitshine Adame na Eeva, na buntomboshi bwa ba mwikeyilu. Dya kumpala, atulongo’shi kwi nka penda mpese ibidi na’shi abitungu tusangule lupese lumune. Twi balombene kwikala ku lupese lwa Yehowa sunga ku lupese lwa Satana. (Mateo 7:13) Dya kabidi, atulongo’shi baba boso abakidi ku lupese lwa Satana abapete nka penda masanka apeela. Adame na Eeva abapetele mushindo wa kusangula abo banabene kibuwa na kibubi. Na dingi ba demo be na matalwa ku mbulamatadi ya bantu. (Kibangilo 3:22) Anka kusangula bwa kukila ku lupese lwa Satana akutushaa nka bipeta bibubi. Ta kwi na masanka su ngapeela!​—Yoobo 21:7-17; Beena-Ngalatea 6:7, 8.

⁹ Bwakinyi bibuwa tuukye’shi Satana kwete kukunkusha uno ndumbulwilo? Kuuka bino akwitukwasha bwa kwikala na mweneno mulombane a ma mbulamatadi na akwitutakula bwa kulungula mukandu wibuwa. Atuuku’shi Yehowa akumina tuneemekye bakata ba mbulamatadi. (1 Mpyeele 2:17) Etutekye bwatudya kukookyela miya yabo pekale’shi ino miya ta ngikutwene na miya yaye. (Beena-Looma 13:1-4) Anka atuuku dingi’shi abitungu tushale belamuune ku myanda ya politike na kupela kukwatshishena kisaka sunga mukunkushi kampanda a myanda ya politike. (Yowano 17:15, 16; 18:36) Bu byatuuku’shi Satana kwete kutompa bya kufwamisha eshina dya Yehowa na kulwisha nkumo Yaye, atukitshi mwetu moso bwa kulongyesha bantu bya binyibinyi pabitale Efile Mukulu. Twi na nfyedi ya kwitaminyibwa mwishina dyaye na kwidifubisha. Kifulo ky’Efile Mukulu ki na muulo kukila kifulo kya nfwalanga na kya bintu.​—Yeeshaya 43:10; 1 Timote 6:6-10.

10-12. (a) Satana badi mufube na kinunwa bwa kutompa bangi ba mwikeyilu naminyi? (b) Mmyanda kinyi yatulongyela ku myanda ibabakitshine kwi baba ba mwikeyilu?

¹⁰ Satana kwete kufuba na mayele e bukopo bwadya kutakula bangi bantu mu kukita myanda yakumina. Bwa kwibatakula ku ino myanda, ingi nsaa afubaa na binunwa bwa kwibatompa, ingi nsaa namu atompaa kwibakitshisha pa bukopo.

¹¹ Satana badi mufube na kinunwa bwa kutompa kisaka kikata kya ba mwikeyilu. Pangi badi mwibabekyeele munda mwa mafuku ebungi bwadya kuuka kintu kyadi mulombene kwibatompa nakyo. Bamo ba mwikeyilu abadile ku kinunwa kyaye abo nkufika mu kutambuka masandji na bana bakashi. Bana babo abadi bantu be na kikiso, bipambe bibadi na bu ntomboshi kwi bantu bebefunyishe. (Kibangilo 6:1-4) Kunyima kwa kufuba na lusandji bwa kutompa ba mwikeyilu, pangi Satana badi mwibalee’shi abakekala na matalwa kwi bantu boso. Mu uno mushindo, Satana badi pangi atompo kukutshishwa kulombana kwa butemuki bwa “kekulu ka mukashi.” (Kibangilo 3:15) Anka Yehowa ta mumutadile bwa’shi alombashe ino mpango yaye nya. Badi mufwishe Mpeshi a kabutu, badi mulwishe ino mpàngo yoso ya Satana na ba demo.

¹² Bino abitulongyesha kinyi? Abitulongyesha’shi lusandji na kwitatula nyi mbinunwa bikata abifubaa na Satana. Ba mwikeyilu abakidile ku lupese lwa Satana abadi bakishe bipwa bibungi mwiyilu mu bwipi mw’Efile Mukulu nabene! Sunga mbyabya, bebungi ba kwabadi abatadidile bwa’shi malaka e bubi atame mwabadi, na ano malaka abatamine ngofu. Abitungu twikale atutentekyesha nsaa yoso’shi sunga twekala bapwe kukita bipwa bibungi mu kufubila Yehowa, malaka e bubi ngalombene kumena mishi mwishimba dyetu. (1 Beena-Kodinda 10:12) Ngi bwakinyi abitungu twikale atwitaluula nsaa yoso bwa kutala myanda i mu mashimba eetu na kukatusha binangu byoso bya lusandji na kwitatula!​—Beena-Ngalatea 5:26; badika Beena-Kolose 3:5.

13. Nkimo kinunwa kinyi kyabakwete kufibisha kwi Satana, na twi kwikisuuka naminyi?

¹³ Kingi kinunwa kyabakwete kufubisha kwi Satana ndukalo lwa kuuka myanda ya mu mufito. Lelo uno, kwete kutompa bwa kukaka bantu bwabadya kwikala na lukalo lwa ba demo pa kufubisha bipwilo bya madimi mpa na kukisha kwa kapapi. Ma filme, masha a mu ma ordinatere, na ingi mishindo ya kukisha kapapi ngilombene kulesha myanda ya mu mufito bu ibuwa. Twi kusuuka kino kinunwa naminyi? Ta twi balombene kukulupila’shi ndumbulwilo a Efile Mukulu etupe mulongo wa mishindo ya kukisha kapapi ibuwa na ibubi nya. Abitungu tulongyeshe kondo ketu k’eshimba bwa’shi kekale aketukwasha bwa kwata bitshibilo bimeene pa mayi a kulonda a Yehowa. (Beena-Ebelu 5:14) Na dingi su kifulo kyetu bw’Efile Mukulu ta ki na “bu nsesa,” atukaata bitshibilo bibuwa. (Beena-Looma 12:9, Kilombeeno kipya 2014) Muntu nsesa akulaa myanda ilekene na yakitshi. Byabya, nsaa yatusangula mushindo wa kukisha kapapi, abitungu twiyipushe’shi: ‘Nalondaa mayi a kulonda amune ankwete kulungula bangi bwabadya kwialonda su? Bantu bandongaa nabo Bible sunga bantu bangitanyina mbalombene kunangushena naminyi su bamona uno mushindo wa kukisha kapapi wansangula?’ Nsaa yatulondo mayi a kulonda atulungula bangi bwabadya  kwialonda, abiketubofwila bwatudya kusumbula binunwa bya Satana.​—1 Yowano 3:18.

14. Satana mulombene kutompa kwitutshinyisha naminyi, na twi kumushinamina naminyi?

¹⁴ Satana atompaa dingi kwitukitshisha myanda pa bukopo na kwitutshinyisha bwa’shi tukutwe kushala na lulamato kwi Yehowa. Bu kileshesho, mulombene kutakula bakata ba mbulamatadi bwabadya kukandjika mudimo wetu wa bulungudi. Mulombene kutakula bena mudimo netu sunga bena kalasa netu bwabadya kwitusepa pa mwanda wa’shi atulondo miya ya mu Bible. (1 Mpyeele 4:4) Satana mulombene kutakula mpa na bakwetu ba mu kifuko bashi bena kukumina netu, balombene kwikala na binangu bibuwa kadi mbalombene kutompa bwa kwitwimika kwenda mu bisangilo. (Mateo 10:36) Twi kukita kinyi bwa kushala banyingye nsaa ayitompo Satana kwitukitshisha myanda pa bukopo na kwitukwatshisha moo? Ta twi balombene kutshina nsaa yatumono ino myanda nya, mwanda atuuku’shi Satana kwete kwitulwisha ngoshi. (Kibafumbwilwe 2:10; 12:17) Na dingi, abitungu tutentekyeshe bi nfudilo a binyibinyi a myanda: Satana akula’shi atufubila Yehowa nka penda mu nsaa yabidi bibofule na’shi atukasumbushena Efile Mukulu su twi kumpala kwa mwanda wibukopo. (Yoobo 1:9-11; 2:4, 5) Na dingi abitungu twikale atutekye Yehowa nsaa yoso bwadya kwitupa bukome. Tentekyesha’shi Yehowa taketulekyela nya.—Beena-Ebelu 13:5.

15. Satana mulombene kwitukitshisha pabukopo myanda yakumina su? Patuula.

¹⁵ Satana ta mulombene kukitshisha bantu pabukopo bwabadya kukita myanda yabashi’abakumina kukita nya. (Shake 1:14) Bantu bebungi be mu nsenga tabakwete su nkutundula’shi be kulupese lwa Satana nya. Anka nsaa ayilongo muntu bya binyibinyi, abitungu asangule su akumina kwikala ku lupese lwa Yehowa sunga ku lwa Satana. (Bikitshino 3:17; 17:30) Su twi na kitshibilo kya kukookyela Efile Mukulu, Satana ta mulombene kutshiba lulamato lwetu nya.​—Yoobo 2:3; 27:5.

16, 17. (a) Ngungi mwanda kinyi wabashi balombene kukita kwi Satana na ba demo? (b) Bwakinyi ta twi balombene kupusha moo wa kuteka Yehowa n’eyi di bukopo?

¹⁶ Kwi ingi myanda yabashi balombene kukita kwi Satana na ba demo. Bu kileshesho, Bible takula mbalo su ngimune’shi mbalombene kuuka myanda i mu mashimba na mu binangu byetu. Nka penda Yehowa na Yesu ngi balombene kukita byabya. (1 Samwele 16:7; Maako 2:8) Byabya twi balombene kutshina’shi su tubakula sunga kuteka n’eyi di bukopo, Diabulu na ba demo abapusha myanda yatwakula na kufuba na ino myanda bwa kwitulwisha su? Nya! Bwakinyi ta twi balombene kutshina? Banda kwela binangu pa kino kileshesho: Tatupushaa moo wa kukita myanda ibuwa mu mudimo wetu watufubila Yehowa pa mwanda wa’shi Diabulu mulombene kwitumona nya. Mu mushindo umune, ta twi balombene kutshina kwela nteko n’eyi di bukopo pa mwanda wa’shi tala Diabulu etupusha. Na dingi, Bible etulungula misusa ibungi’shi bafubi b’Efile Mukulu abadi abeele nteko na mayi e bukopo, kadi mu mbalo su ngimune tatubadika’shi abadi na moo wa’shi Diabulu mulombene kwibapusha nya. (1 Banfumu 8:22, 23; Yowano 11:41, 42; Bikitshino 4:23, 24) Su tubakitshi bukopo bwetu boso bwa kwakula na kukita myanda ayisankisha Efile Mukulu, twi kwikala bashinkamishe’shi Yehowa takatadila Diabulu bwadya kwitukyengyesha mu mushindo su ngumune nya.​—Badika Misambo 34:7.

¹⁷ Abitungu tuukye mwishikwanyi netu, anka tabitungu twikale atumutshinyi nya. Sunga twekala bantu bakutwe kupwidika, twi balombene kukambila Satana ku bukwashi bwa Yehowa! (1 Yowano 2:14) Su tubamushinamina, akasuuku kula netu. (Shake 4:7; 1 Mpyeele 5:9) Lelo uno, abimweneka’shi Satana kwete kukamba kulwisha ba nsongwa. Mbalombene kunyinga ku ngoshi yabebalwisha kwi Diabulu naminyi? Atukesambila uno mwanda mu mwisambo aulondo.