“NAKUSEME! We naminyi?”

Kushi mpaka we mupwe kusema muntu na ano mayi. Ingi nsaa, kunundu kwa uno moyo, wemwele dingi muntu moyo wa ku maboko. Bipikwa na mayi a kwela nao bantu moyo ngalombene kwilekena muyile ma mbalo abadi bashale, anka kepatshila ka moyo nkamune. Byabya, kukutwa kwela muntu moyo sunga kukutwa kukumina moyo nkulombene kutakula bantu mu kwitumona bu muntu e na mushikwa sunga bu muntu e na mwikelo wi bubi.

Anka ta mbantu boso be na kyubishi kya kwela bangi moyo nya. Bamo abapushaa bukopo bwa kwela bantu moyo pa mwanda wa bufu sunga kwimona bu bashadile. Bangi abapushaa bukopo bwa kusema bantu be na malangi a bikoba elekene na abo, bipikwa, sunga nshalelo mwilekene na aabo. Anka, moyo oseme muntu sunga bwa kapindji kapela ngulombene kwikala na bukitshishi bwi buwa.

Eyipushe’shi: ‘Moyo ngulombene kwikala na bukitshishi kinyi? Eyi dy’Efile Mukulu di kwitulongyesha kinyi pabitale kwela bantu moyo?’

Pabadi Mpyeele mutumibwa mupokyele Korneye muntu a kumpala shi mwina Yuuda batwelele mu kakongye ka bena Kidishtu, bambile’shi: “Efile Mukulu te na ntondo.” (Bikitshino 10:34) Kunyima, Mpyeele bafundile’shi Efile Mukulu “akyebe’shi bantu boso belangye ku milwisho yâbo.” (2 Mpyeele 3:9, EEM) Twi kwamba’shi ano ma verse ngatale bantu bakwete kulonga bya binyibinyi. Anka Mpyeele badi musendele dingi bena Kidishitu’shi: “Nemekayi bantu booso; fulayi bakwenu boso.” (1 Mpyeele 2:17 Kilombeno kipya 2014) Byabya, ta twi balombene kwamba’shi bibuwa twikale atwele bantu moyo kushi kutala elangi dyabo, bipikwa, sunga ma mbalo abadi bakudile su? Kukita bino akulesha’shi atwibanemeka na’shi twi bebafule.

Mpoolo mutumibwa balangile bantu boso be mu kakongye’shi: “Ekuukisheneeyi ku muntu na muntu, bu bibaadi Kidishitu mwinukuukile.” (Beena-Looma 15:7) Mpoolo badi mutemune mashina a bakwetu abadi ‘bamusambe bikata.’ Lelo uno bafubi b’Efile Mukulu be na lukalo lwa kusambibwa ngofu kukila mu mafuku a Mpoolo. Mwanda Satana e na nsungu ikata mu ano mafuku a ku nfudilo.​—Beena-Kolose 4:11, EEM; Kibafubwilwe 12:12, 17.

Bileshesho bya mu Bifundwe abilesha kalolo’shi moyo wi na bukitshishi bukata, kushi penda kukwasha muntu bwadya kupusha’shi abamuseme.

Pabalombene nsaa ya’shi Efile Mukulu atume muwa wa Mwan’aye munda mwa Madiya, Yehowa batumie mwikeyilu bwadya kwenda mu kwisamba naye. Mwikeyilu babangile kwisamba naye’shi: “Nakwimuna, obe akwashibwa n’Efile Mukulu ku kalolo kaaye! Yehowa e noobe.” Madiya “badi mukalakashwe,” mwanda tabadi auku bwakinyi mwikeyilu badi mufikye mu kwisamba naye nya. Pa kumona bino, mwikeyilu bamulungwile’shi: “Totshinanga, Madiya, mwanda bopete buwa kumpala kw’Efile Mukulu.” Badi mumupatulwile’shi Efile Mukulu ngi bakumina’shi Madiya atande Mesiya. Pamutwe padya kutungunuka na kukalakashwa, Madiya bamwalulwile na kukookyela’shi: “Tala mpika a Yehowa; binkitshikile muyile eyi dyobe.”​—Luka 1:26-38.

Uno mwikeyilu badi na mwabi wa kufuba bu mukyendji wa Yehowa; anka tabadi mumone’shi kwisamba na muntu shi mupwidikye mmudimo ushadile kwadi nya. Babangile kwisamba na Madiya pa ku mwela moyo. Twi kupeta dilongyesha ku kino kileshesho su? Oolo. Abitungu twikale atwele bangi moyo na kwibakankamika. Twi balombene kukwasha bangi na penda mayi apeela, na kwibashinkamisha’shi be mu mwilo wa Yehowa.

Mpoolo badi muukile myanda ibungi ya mu kakongye mu Asie Mineure na mu Europe. Mu mikanda yaye mwi mashina a bantu badi mwele moyo ku muntu na muntu. Atusangana uno mwanda mu mukanda wa Beena-Looma mu shapitre a 16. Mpoolo badi mutumine  bena Kidishitu naye bebungi moyo. Badi mutemune Febee, “nkashyaaneetu,” na kulungula bakwetu’shi “mupokyeleeyi mwishina dya Mwanaana bu byabidi bilombeene ben’Efile; mukwasheeyi mu myanda yooso.” Mpoolo badi museme Priskila na Akila, na kwamba’shi “ntshi bupenka mu kwibatumbula nya. [Tukongye] tooso twa mu angi maumbo atwibafwambusha namu.” Badi museme bangi bantu bashi bakambe kuukika lelo uno. Bambile’shi: “Semaayi kuuku ande a kifulo Epenete” pamune na “Trifene naa Trifose, abo bafwambukye pa mwanda wa Mwanaana.” Eyendo, Mpoolo badi akumina kusema bakwabo balume na bakashi.​—Beena-Looma 16:1-16.

Banda kunangushena muloo ubapushishe bano bakwetu pa’bo kupusha’shi bakwete kwibatentekyesha. Kifulo kyabo bwa Mpoolo na kifulo ki munkatshi mwabo kibadi kinyingye ngofu! Na dingi pa’bo kupusha ino myoyo ya kifulo, abadi banyingishe bangi bena Kidishitu, pa kwibakwasha bwabadya kushala bashimate mu lukumino. Eyendo, moyo aulesha’shi muntu kwete kwitula pa mbalo yobe binyibinyi na mayi a kukankamika nao bangi aanyingishaa bukuku na kubunga bafubi ba Yehowa basha lulamato mu buumune.

Nsaa ibafikile Mpoolo ku efwa dya ku Puzole, pababadi abende ku Looma, bena Kidishitu ba mu kino kibundji abafikile mu kwimonena naye. Nsaa ibebamwene ku bula, Mpoolo “batumbwile Efile Mukulu, eshimba nkumunyinga.” (Bikitshino 28:13-15) Ingi nsaa twi kupeta penda mushindo wa kusepesha muntu sunga kumupuupa maboko bwa kumusema. Kukita byabya nkulombene kulumbuula nshalelo a muntu pangi e na kinyonga.

Shake mulongi a Yesu badi akumina kupa bantu elango di bukopo. Bamo bena Kidishitu babadi abatambuka lusandji lwa mu kikudi pa kwikala mu bukuuku na uno ndumbulwilo. (Shake 4:4) Banda kutala mushindo ubabangile Shake kwakula mu mukanda waye:

“Ami Shake, mufubi eEfile Mukulu naa a Mwanana Yesu Kidishitu, naseme bisamba 12 bi mu kapalakanyi! (Shake 1:1) Kushi mpaka bantu ababadikile mukanda waye abakuminyine elango dyaye bipelepele nsaa ibabamwene mu moyo waye’shi boso bwabo be na kinemo ki mumune kumpala kw’Efile Mukulu. Eyendo, kwela muntu moyo wi na kwiyisha nkulombene nkupa mushindo wa kwisamba na muntu mwanda sunga wekala bukopo bwi naminyi.

Abitungu moyo wikale wi buwa, wipi, autukila mwishimba na aulesha kifulo kya binyibinyi. Bibuwa kukita bino sunga omona’shi bantu bebungi tabapusha uno moyo. (Mateo 22:39) Ungi mukwetu mukashi a mu Irlande bafikile ku Nshibo ya Bufumu kapindi kapeela kumpala kwa’shi bisangilo bibangye. Pabatwelele mu Nshibo ya Bufumu, ungi mukwetu mulume bealulwile, amusepesha, na kumwambashi: “Nakuseme, ne na muloo wibungi panakumono.” Mukwetu mukashi bayile musango umune ku mbalo ya kushala.

Kunyima kwa mbingo ipeela, bafikile kwi uno mukwetu mulume na kumulungula’shi ekalanga mukalakashwe na mwanda wibukopo ku nshibo. Aye nkwamba’shi: “Nadi mukalakashwe bikile dyadya efuku, mu mushindo unakyebele kukutwa kufika ku Nshibo ya Bufumu. Ntshi mulombene kutentekyesha myanda ibungi ibabakwile mu bisangilo nya, kadi ne mulamine nka penda moyo oobe. Ubadi unsankishe ngofu. We mufwambikye ngofu.”

Uno mukwetu badi mukeme pa kupusha bukitshishi bwa moyo wipi ubadi museme uno mukwetu mukashi. Akula’shi: “Pabandungwile’shi ano mayi apeela abadi na mulo ngofu kwadi, napushishe muloo wibungi bwa bino binakitshine. Napushishe buwa binyibinyi.”

Salomone bafundjile’shi: “Ela dyampa dyoobe kunundu a meema, mwanda wedipetuula kuunyima a mafuku.” (Mulungudi 11:1) Su tubashinguula muulo wa kwela bantu moyo, bikishekishe kwi bakwetu bena Kidishitu, atukwasha bangi mpa n’atwe banabene. Byabya tatukumanga efuku su ndimune kubepuula bukitshishi bwi na moyo.