1. Nkintu kinyi kitwikashe kunundu kwa nyema?

YEHOWA bapeele bantu kintu ki pa bwakyo. Kino kintu nyi nkondo ketu k’eshimba. Kino ngi kintu kimune akitwikasha kunundu kwa nyema. Atuuku naminyi’shi Adame na Eeva babadi na kondo k’eshimba? Kunyima kwa’bo kutombokyela Efile Mukulu, abamufwamine. Kondo kabo k’eshimba kabadi kebatopekye.

2. Kondo ketu k’eshimba ke bu kamo ka boussole naminyi? (Tala kifwatulo ki ku mbangilo.)

² Kondo ketu k’eshimba nyi ngobesha i munda mwetu ya kuuka kibuwa na kibubi na kwitukunkusha mu muwa wetu. Muntu e na kondo k’eshimba kashii kalongyeshibwe kalolo e nka bu mashuwa e na kamo ka boussole kalwile. Lupunga na mpumo ya mema ngilombene kutuma mashuwa ku lupese. Anka kamo ka boussole akafubu kalolo akakwasha muntu atambusha mashuwa bwadya kutungunuka na kuludika mashuwa mu eshinda di buwa. Mu mushindo umune, su tubalongyesha kondo ketu k’eshimba kalolo, nkalombene kwitukunkusha kalolo.

3. Nkinyi kilombene kukitshika su twakutwa kulongyesha kondo ketu k’eshimba kalolo?

 ³ Su kondo ketu k’eshimba ta nkalongyeshibwe kalolo, taketudimusha bwa kupela kukita myanda i bubi nya. (1 Timote 4:1, 2) Nkalombene mpa na kwitulungula kintu “kibubi’shi ki buwa.” (Yeeshaya 5:20) Yesu balungwile balongi baye’shi: ‘Nguba afiki, ayikala enwipaa anangushena’shi kukita byabya nkulangwila Efile Mukulu.’ (Yowano 16:2) Bino ngi bibadi abipwandikisha bantu babayipayile Etshyene mulongi a Yesu. (Bikitshino 6:8, 12; 7:54-60) Munda mwa bipwa bibungi, bena bipwilo mbakite bibeshi bibungi, bu kwipayishena, na kwamba’shi bakwete kukita bino bwa kusankisha Efile Mukulu. Aku namu mu binyibinyi, bino bibabadi bakite mbikutwene na miiya y’Efile Mukulu. (Efilu 20:13) Abimweneka kalolo’shi, kondo kabo k’eshimba ta nkebakunkushe kalolo nya!

4. Twi kwikala bashinkamishe’shi kondo ketu k’eshimba akafubu kalolo naminyi?

⁴ Byabya twi kwikala bashinkamishe’shi kondo ketu k’eshimba kakwete kufuba kalolo naminyi? Miiya na mayi a kulonda a mu Bible ‘bi na mufubo wa kukwasha mu bulambukishi, kukalasheena bilubilo, kulumbuula na kuyiyisha bantu bululame.’ (2 Timote 3:16) Abitungu twikale atulongo Bible efuku dyoso, kunangushena ngofu ku myanda yakula, na kutumikila ino myanda mu muwa wetu. Mu uno mushindo, atukalongo bya kunangushena ngofu mu mushindo aunangushenaa Yehowa. Kunyima atukashinkamisha’shi kondo ketu k’eshimba akaketukunkusha kalolo. Tubandeyi kwisambila mushindo watudi balombene kufubisha miiya ya Yehowa na mayi aaye a kulonda bwa kulongyesha kondo ketu k’eshimba.

5, 6. Miiya y’Efile Mukulu ayitukwasha naminyi?

⁵ Su atukumina’shi miiya y’Efile Mukulu itukwashe, tabitungu twimene nka penda mu kwiyibadika na kwiyishinguula nya. Abitungu twiyifule na kwiyinemeka. Bible etulungula’shi: “Shikwayi bubi, fulaayi buwa.” (Amose 5:15) Twi kukita bino naminyi? Abitungu tulongye bya kumona myanda mu mushindo awiyimonaa Yehowa. Banda kunangushena pa uno mwanda. Pwandikisha’shi tokwete kulala tulo kalolo, na munganga oobe bakulungula’shi abitungu wekale odi bya-kudya bibuwa, wekale okitshi kalashishi ka mbidi, na kushintuula ingi myanda mu muwa oobe. Bolondo ano malango aaye, na bomono’shi aakukwasha ngofu! We kupusha naminyi bwa malango a uno munganga?

⁶ Mu mushindo umune, Mupangi eetu mmwitupe miiya bwa kwitukalwila bwa’shi tatupetanga bipeta bibubi abitukila ku milwisho na bwa’shi twikale na nshalelo e buwa. Bu kileshesho, Bible etulongyesha’shi tabitungu kudimba madimi, kwiba, kutambuka lusandji, kukita myanda ya bu ntomboshi, sunga kukita kintu kyoso kipushene na bikudi bibi. (Badika Nkindji 6:16-19; Kibafumbwilwe 21:8) Nsaa yatumono bipeta bibuwa abituku patukokyela Yehowa, kifulo kyetu bwaye na bwa miiya yaye akinyisha kutama.

7. Myanda ayakula Bible i kwitukwasha naminyi?

⁷ Tabitungu nka’shi atwe banabene tupete masaku a kutupilwa ku miiya y’Efile Mukulu ngi tumone mushindo wa kulonga bwa kuuka kibuwa na kibubi nya. Twi balombene kulongyela ku bilubilo bibabakitshine kwi bantu ba mu mafuku a kala. Bino bileshesho bi mu Bible. Mukanda wa Nkindji 1:5 awamba’shi: “Sha-binangu atemeshe, bwa kufimisha kuuka kwaye.” Ano malongyesha aafiki kwi Efile Mukulu na ngakile angi malongyesha oso! Bu kileshesho, banda kunangushena bibakyengyele Daavide kunyima kwa’ye kukutwa kukookyela Yehowa na kutambuka lusandji na Betesheba. (2 Samwele 12:7-14) Nsaa yobadika ino myanda, eyipushe obe nabene’shi: ‘Daavide badi mulombene kupela kukita ino myanda naminyi? Ami namu ne mulombene kukita naminyi su napeta mwanda wi mumune na uno? Su ne kumpala kwa kitompwanga kya kutambuka  lusandji, ne mulombene kukita bu Daavide su ne kukita bibakitshine Yoosefe?’ (Kibangilo 39:11-15) Su tubanangushena kalolo pabitale bipeta bibubi byatudi balombene kupeta ku mulwisho, atukanyisha ‘kushikwa bubi’ mu myanda yoso.

8, 9. (a) Kondo ketu k’eshimba aketukwasha bwatudya kukita kinyi? (b) Kondo ketu k’eshimba akafubaa na mayi a kulonda a Yehowa naminyi?

⁸ Abitungu tusukye myanda yoso yabadi bashikwe kwi Efile Mukulu. Byabya twi balombene kukita kinyi nsaa yakushi mwiya awulesha wawa mwanda mu Bible? Atukauku myanda yabakumina’shi tukite kwi Efile Mukulu naminyi? Su tubalekyela Bible bwa’shi alongyeshe kondo ketu k’eshimba, atwikala atwata bitshibilo bibuwa.

⁹ Bu byabadi betufule kwi Yehowa, mmwitupe mpa na mayi a kulonda alombene kuludika kondo ketu k’eshimba. Apatuula’shi: “Nami Yehowa, Efile Mukulu oobe, akupa bulambukishi abukukwasha, akukunkusha mwishinda dyoobe.” (Yeshaya 48:17, 18) Su tubanangushena ngofu pabitale mayi a kulonda a mu Bible na kwialekyela bwa’shi alongyeshe mashimba eetu, twi balombene kuludika na kushintuula kondo ketu k’eshimba. Bino abitukwasha bwatudya kwata bitshibilo bibuwa.

10. Eyi dya kulonda nkinyi, na mushindo kinyi ubabadi bafubishe mayi a kulonda kwi Yesu mu malongyesha aye?

¹⁰ Eyi dya kulonda nyi mbya binyibinyi bya kitako abiludika ngyelelo etu a binangu, na kwitukwasha bwatudya kwata bitshibilo bibuwa. Kuuka mayi a kulonda a Yehowa akwitukwasha bwa’shi tuukye byakwete kunangushena na bwakinyi etwelelaa ingi miiya. Yesu badi mutumikye na mayi a kulonda bwa kulongyesha balongi baye’shi binangu na bikitshino byabo bi na bukitshishi. Bu kileshesho, badi mulongyeshe’shi nsungu ngilombene kutuma muntu ku bu ntomboshi, na’shi myanda i butete ngilombene kutuma muntu ku lusandji. (Mateo 5:21, 22, 27, 28) Su tubalekyela mayi a kulonda a Yehowa bwa’shi etuludikye, kondo ketu k’eshimba akekala kalongyeshibwe kalolo, na dingi atukata bitshibilo bibuwa abitwadila Efile Mukulu kinemo.​—1 Beena-Kodinda 10:31.

11. Kondo ketu k’eshimba nkalombene kwilekena na ka bangi bantu naminyi?

¹¹ Sunga bena Kidishitu bafuba na Bible bwa kulongyesha kondo kabo k’eshimba, mbalombene kwata bitshibilo bilekene pa myanda kampanda. Bu kileshesho pabitale kutoma maalwa. Bible takula’shi bibubi kutoma maalwa nya, anka etudimusha’shi tatwi balombene kutoma maalwa akile bungi sunga kukwatshika. (Nkindji 20:1; 1 Timote 3:8) Bino abipushisha’shi su mwina Kidishitu tatomo maalwa akile bungi, tabitungu anangushene ku kingi kintu nsaa yata kino kitshibilo su? Nya. Sunga byekala’shi kondo kaye k’eshimba akamutumu mu kutoma maalwa, abitungu anangushene namu pabitale kondo k’eshimba ka bangi.

12. Mayi e mu Beena-Looma 14:21 aetukwasha bwa kunemeka kondo k’eshimba ka bangi naminyi?

¹² Mpoolo mutumibwa badi muleshe’shi abitungu kunemeka kondo k’eshimba ka bangi nsaa ibafundile’shi: “Kii buwa nkuleka kudya mwita, kutoma nfinyo, na kyooso kilombeene kuponesha mukwenu.” (Beena-Looma 14:21) Sunga twekala na matalwa a kutoma maalwa, twi kukumina kwisumina ano matalwa su twauka’shi kutoma maalwa nkulombene kukokosha kondo k’eshimba ka bangi bena Kidishitu netu. Pangi mukwetu badi mpika a maalwa kumpala kwa kulonga bya binyibinyi na badi mwate kitshibilo kya kupela kutoma maalwa a mishindo yooso. Ta twi balombene kukita kintu su nkimune kilombene kumutakula bwadya kwalusha mwikelo waye wa kala nya. (1 Bena-Kodinda 6:9, 10) Su yawa mukwetu ekala muntu atudi betanyine ku nshibo kwetu, twi kutompa kumulungula bwadya kutoma ndambo ya maalwa, sunga etulungula’shi mwiapele su? Lwalulo lwi’shi nya.

13. Timote badi munemekye kondo k’eshimba ka bangi bwa kwibakwasha bwabadya kukumina mukandu wibuwa naminyi?

 ¹³ Nsaa ibadi Timote ki nsongwalume, badi mukumine kusadibwa sunga mbibakudi busungu. Badi muukye’shi kusadibwa kubadi na muulo kwi bena Yuuda babadi ende mu kulungula mukandu wibuwa. Nka bu Mpoolo, Timote tabadi akumina kukokosha muntu su ngumune. (Bikitshino 16:3; 1 Beena-Kodinda 9:19-23) Obe namu we kwisumina ingi myanda bwa kukwasha bangi su?

14, 15. (a) Twi kufika bantu banyingye mu kikudi naminyi? (b) Mwina Kidishitu munyingye mu kikudi akitshinaa bangi myanda naminyi?

¹⁴ Abitungu atwe boso tulekye “myanda ya ku kibangilo kya bwina Kidishitu” kunyima na “kwenda kumeeso bwa kwifubwila ku . . . [bu muntu] mukulu.” (Beena-Ebelu 6:1, Kilombeno kipya) Ta twi balombene kufika bena Kidishitu banyingye mu kikudi nka pamwanda’shi tatudi mu bya Binyibinyi munda mwa bipwa bibungi nya. Abitungu kwikitshisha bwa kwikala munyingye mu kikudi. Abitungu tutungukye na kutamisha mpushisho na kiwukilo kyetu. Na dingi abitungu twikale atubadika Bible efuku dyoso. (Misambo 1:1-3) Su bwekala obadika Bible efuku dyoso, okapusha miiya na mayi a kulonda a Yehowa kalolo.

¹⁵ Mmwiya kinyi wi na muulo ukata bwa bena Kidishitu? Nyi mwiya wa kifulo. Yesu balungwile balongi baye’shi: “Abakatundula’shi nwi balongi bande anka ku kifulo kyaanwifuleena.” (Yowano 13:35) Kifulo abekitanyina bu “eyi dya bufumu” na bu “kukumbasha kw’eyi dyooso dishima.” (Shake 2:8; Beena-Looma 13:10) Ta twi balombene kukaanya pa kuuka’shi kifulo ngi ki na muulo ngofu nya, mwanda Bible akula’shi: “Efile Mukulu nyi nkifulo.” (1 Yowano 4:8) Kifulo ngi eyikashi dikata dy’Efile Mukulu. Aleshaa kifulo kyaye ku mifubo yaye. Yowano bafundjile’shi: “Talaayi bibaaleesheeshe Efile Mukulu kifulo kyaaye: baatumine Mwan’aye eeleka pa nsenga bwa’shi twikale na muuwa mwadi.” (1 Yowano 4:9) Su tubalesha kifulo bwa Yehowa, bwa Yesu, bwa bakwetu, na bwa bangi bantu, atulesha’shi twi bena Kidishitu banyingye mu kikudi.​—Mateo 22:37-39.

16. Nsaa yatufiki bena Kidishitu banyingye, bwakinyi atunyisha kukumina mayi a kulonda?

 ¹⁶ Nsaa yatufiki bena Kidishitu banyingye mu kikudi, atunyisha kwata mayi a kulonda na muulo. Miiya abeyifubishaa pa mwanda kampanda wabadi bateemune, anka mayi a kulonda abeafubishaa mu myanda ilekene. Bu kileshesho, mwana mukinga tashingula masaku aatukila mu kwikala na ba kuuku bebubi nya, ngi bwakinyi abitungu bamutande bamwelele miiya bwa kumukalwila. (1 Beena-Kodinda 15:33) Anka nsaa ayifiki mwana bu muntu mukulu, alongo mushindo wadya kwikala anangushena pa mayi a kulonda a mu Bible. Ano mayi a kulonda aamukwasha bwadya kusangula ba kuuku bebuwa. (Badika 1 Beena-Kodinda 13:11; 14:20.) Su tubanyisha kwikala atunangushena pa mayi a kulonda a mu Bible, kondo ketu k’eshimba akanyisha kufuba bibuwa. Atukashinguula kalolo mushindo aukumina Efile Mukulu’shi tukite mu myanda yoso.

17. Bwakinyi twi kwamba’shi twi na bintu byoso byatudi nabyo lukalo bwa kwata bitshibilo bibuwa?

¹⁷ Twi na bintu byoso byatudi nabyo lukalo bwa kwata bitshibilo abisangasha Yehowa. Mu Bible, atwimupete miiya na mayi a kulonda aetukwasha bwa kufika ‘bakumbane, na bakumbanyinyiine bwa mufubo ooso wi buwa.’ (2 Timote 3:16, 17, Kilombeeno kipya 2014) Mayi a kulonda a mu Bible aetukwasha bwa kushinguula mushindo aunangushenaa Yehowa. Anka abitungu kwikitshisha ngofu bwa kwibishinguula. (Beena-Efeso 5:17) Bwa kwitukwasha, twi na Index des publications des Témoins de Jéhovah, Mukanda aukwasha Batemwe ba Yehowa bwa kukimbuula myanda, Watchtower Library, Watchtower MIKANDA I MU INTERNET, na application a JW Library. Su tubafubisha bino bina mudimo, atukapete bipeta bibuwa mu kwilongyela kwetu sunga mu kulonga kwa mu kifuko.

18. Nkinyi akikitshika nsaa yatutumikila miiya na mayi a kulonda a Yehowa mu muwa wetu?

¹⁸ Nsaa yatutumikila miiya na mayi a kulonda a Yehowa, nshalelo eetu alumbuluka ngofu. Mukanda wa Misambo 119:97-100 awamba’shi: “Ne na kifulo kikata kya miiya yoobe, mafuku ooso neyinangushenaa. Eyi dyoobe adimpa bukome bukile bwa balwishi bande, adiikala dyande bwa looso. Nee mupatulukye kukila balambukishi bande booso, mwanda nkwete kunangusheena pa mayi ootumu. Nee na kushinguula kukile kwa bakulu, mwanda nee mulame mayi oobe.” Patwata nsaa ya kunangushena ngofu pa miiya y’Efile Mukulu na mayi aaye a kulonda, atukakitshi myanda na binangu na lushingulwilo lwa myanda lukata. Na dingi patufubisha miiya na mayi aaye a kulonda bwa kulongyesha kondo ketu k’eshimba, atukafiki ku “bukata bwa Kidishitu mu kupwidika kwaye.”—Beena-Efeso 4:13.