INO mikanda abadi abeyitanyina bu collection arc-en-ciel. Panadi mupete ngobesha ya kwiyitaluula, napetele bileshesho bibuwa bibadi abintakula mu kwela binangu ngofu. Ngi bwakinyi kubanga ku bukinga bwande, nadi na nsala ya kuuka myanda ya mu Bible, ibabadi bafunde mu ino mikanda.

Pabatwelele Ngoshi ya kabidi ya nsenga ishima mu Inde, nshalelo ande babangile kulwila. Nshami na nyinami abadi beabuule kunyima abatshibile eyibakishi. Ntshinadi nashinguula bwakinyi bantu babidi banadi mufule ngofu abadi bepelene nya. Eshimba dibadi dinfudile na kupusha bu’mi ababasumbushena. Nadi mwan’eleka, na ntshinadi nakulupila’shi ne mulombene kupeta kusambibwa na bukwashi bunadi nabo lukalo nya.

Kunyima, ami na nyinami tubayile mu kushala mu Karachi mu epata dya province. Dingi efuku, Fred Hardaker munganga badi mupwe kukula badi umune a ku ba Temwe ba Yehowa, bafikile akookola ku kibelo kya nshibo yetu. Badi na malongyesha e mumune na a misionere badi mwitupe mikanda. Batekyele nyinami bwa’shi su akumina babangye kulonga Bible. Nyinami bapelele kadi bamulungwile’shi ami ne mulombene kukumina  kulonga. Nabangile kulonga Bible na mukwetu Hardaker mu lubingo lubalondele.

Kunyima kwa mbingo ipeela, nabangile kutwela mu bisangilo bya bena Kidishitu bibabadi abatwele ku lupitalo lwa mukwetu Hardaker. Ba Temwe abapu kukula bafikye ku 12 abadi abebungila ino mbalo bwa kulangwila. Abadi bansambe na kumpasukila nka bu mwana aabo. Natentekyesha bibabadi abashala nami na kifulo kyoso, abadi abayinama bwa kwisamba nami, na abadi abesamba nami nka bu kuuku’abo, aku namu nadi na lukalo lwa ino myanda mu aa mafuku.

Kunyima kwa mafuku apeela, mukwetu Hardaker badi mundungule bwandya kumushindikila mu bulungudi. Bandongyeshe byandya kwikala natembesha fono abatudi atusemuna bwa kupushisha bantu miisambo ya myanda ya mu Bible iipi ibabadi bakobole. Imune ya ku ino miisambo ibadi ayifitshisha basha nshibo munda mwanda tababadi abakumina kupusha myanda i mwanka. Kadi nadi na muloo wa kulungula bangi mukandu wibuwa. Nadi na katshintshi bwa bya binyibinyi bya mu Bible na nadi nakumina kwibilungula bangi bantu.

Nsaa ibadi ifubwile basalayi ba bena Japon pepi na Inde, bakata ba bena Grande-Bretagne abadi banyishe kukyengyesha ba Temwe ba Yehowa. Ku nfudilo, mu mweshi wa Musambo mu kipwa kya 1943, abadi bankyengyeshe ami nabene. Mukata a kalasa, badi mukata a kipwilo kya Anglican badi mumbingye’shi “ne na mwikelo ushi buwa.” Balungwile nyinami’shi kwibunga pamune na ba Temwe ba Yehowa akungikasha bu kileshesho kibubi kwi bangi balongi. Nyinami bapushishe moo aye nkumpelesha kwibunga na ba Temwe ba Yehowa. Kunyima kwa mafuku, bantumine kwi nshami mu kibundji kya Peshawar, ki mu bilometre 1370 dya kunundu. Pa mwanda wa kukutwa kupeta bidibwa bya mu kikudi na kukutwa kwibunga pamune na bakwetu, nadi mubofule mu kikudi.

Mu kipwa kya 1947, nadi mwalukye mu Karashi mu kukimba mudimo. Panafikile mwanka, nayile mu kutemba ku lupitalo lwa munganga Hardaker. Badi munkuukile ngofu.

Bu bibadi apwandikisha’shi nafiki bwabadya kumbuka, bangipwishe’shi: “Nkinyi akikukalakasha binobino?”

Namwalulwile’shi: “Munganga, ntshi na maladi a ku mbidi nya, ne na maladi a mu kikudi. Ne na lukalo lwa kulonga Bible.”

Bangipwishe’shi: “Okumina kubanga kulonga mafuku kinyi?”

Namwalulwile’shi: “Nka binobino su kwi mushindo.”

Tubakishishe kyolwa kibuwa bukile pa’twe kubanga kulonga Bible. Napushishe buwa ngofu pa kwimonena dingi na bafubi ba Yehowa. Nyinami batompele kuntunyisha dingi kwibunga pamune na ba Temwe, anka uno mususa nadi mwate kitshibilo kyande kya kufubila Yehowa. Mu 31/8/1947, nadi mubatshishibwe mu mema bwa kulesha’shi ne mwilambule kwi Yehowa. Kunyima kwa mafuku apeela, panadi na bipwa 17, nabangile kufuba bu mbala-mashinda a myeshi yoso.

Mbalo ya kumpala ibabantumine bwa kufuba bu mbala-mashinda nyi mu Quetta. Kumpala, mu kino kibundji kya mu Grande-Bretagne mubadi kisaka kya basalayi kibadi akilama ku mikalo. Mu kipwa kya 1947, abatshibile dino eumbo pankatshi batusha eumbo dya Inde na dya Pakistan. * Uno mwanda ubadi wibweshe bu ntomboshi bukata pankatshi pa bena bipwilo, na bino bibadi bitakule bantu bebungi ngofu bwabadya kusuukila mu maumbo abene. Bantu bafikye ku midiyo 14 babasuukile. Ba Mizilma ba mu Inde abayile mu Pakistan, ba Hindu na bena kipwilo kya Sikhs ba mu Pakistan namu abakatukile benda mu Inde. Mu kano kafutakanyi kakata, natwelele mu mashuwa a ndjandja abadi aule bantu abakatukile mu Karachi ami nkukamiina ngofu ku mulonda ubadi pasha pa mashuwa mpa na bibatukafikile ku Quetta.

Mu Quetta, nadi mwimonene na George Singh, mbala-mashinda a nsaa yoso badi na bipwa 25. George bampeele nkinga itayidi ikulu inadi nashindula mu myengye. Misusa ibungi, nadi nalungula mukandu wibuwa bupenka. Munda mwa myeshi isamombo, nadi nalongo Bible na bantu 17, na bangi balongi mbatwele mu bya binyibinyi. Umune a kwabadi, nyi mukata a basalayi ababadi abetanyina bu Sadiq Masih, betukwashishe ami na George bwatudya kwaluula mikanda ayipatuula Bible mu Urdu, ludimi lwabakulaa kwi bantu bebungi mu Pakistan. Kunyima kwa mafuku, Sadiq bafikile mulungudi a mukandu wibuwa sha katshintshi.

Kunyima, nalukile ku Karachi atwe nkubanga kufuba pamune na Henry Finch, na Harry Forrest ba misionere bapya babafikile abakatukila ku kalasa ka Gileade. Abadi bandongyeshe myanda ibungi ya mu ndumbulwilo! Ungi mususa nadi mushindikile mukwetu Finch mu lwendo lwa bulungudi dya kunundu kwa  Pakistan. Pabatudi pepi na myengye ya ma ngulu, tubasangene misoko i na bantu bebungi abakula ludimi lwa Urdu be na nyota ya bya binyibinyi bya mu Bible. Kunyima kwa bipwa bibidi, abadi bangitanyine ku kalasa ka Gileade; kunyima kwa kalasa, nadi mwalukye mu Pakistan bu mukunkushi a kifunda mukwashi. Nadi mushale mu nshibo ya ba misionere i mu Lahore, pamune na bangi bakwetu balume ba misionere.

Mwanda wa malwa, mu kipwa kya 1954, ba misionere babadi ku Lahore, tababadi abepushena nya, bino bibadi bitakule bakwetu be mu biro bya filiale bwabadya kwibatuma mu ma mbalo elekene. Bu binadi mutwelakane mu ino myanda ya kukutwa kwipushena, abadi bampe elango di bukopo. Nadi mutapikye kwishimba ngofu, na kwamba’shi ntshi munyingye mu kikudi. Nakatukile naluka ku Karachi akupu nayile ku Londre, mu Angleterre, nadi mupushe’shi abitungu ngikishe na kubanguula kufuba mu ingi mbalo.

Panadi mu Londre, mu kakongye kanadi natwele mubadi bena kifuko kya Betele a mu Londre bebungi. Mukwetu Pryce Hughes, badi bu mufubi a filiale badi mundongyeshe myanda ibungi na kifulo kyoso. Dingi efuku, badi mundungule’shi ungi mususa abadi bamupe elango di bukopo kwi mukwetu Joseph Rutherford, badi akunkusha mudimo wa bulungudi mu nsenga ishima. Pabatompele mukwetu Hughes kukimba byadya kwibingisha, mukwetu Rutherford badi mumusaashile bi bukopo. Nadi mukeme ngofu pa kumona’shi mukwetu Hughes badi asepe nsaa ibadi atentekyesha uno mwanda. Bambile’shi uno mwanda ubadi umufitshishe munda kumpala. Anka kunyima badi mushinguule’shi badi na lukalo lwa kupeta dino elango na’shi dino elango dibadi adilesha’shi Yehowa mmumufule. (Beena-Ebelu 12:6) Ano mayi abadi ankume kwishimba na kunkwasha bwa kutungunuka na kufuba na muloo.

Mu aa mafuku, nyinami badi mukatukye enda mu Londre na kukumina kulonga Bible na mukwetu John Barr, badi mufube kunyima kwa mafuku mu Kasaka ka Bakunkushi-Bakulu. Badi mwende kumpala mu kikudi na badi mubatshishibwe mu kipwa kya 1957. Kunyima napushishe’shi kumpala kwa’shi nshami afwe, naye namu badi mulongye Bible na ba Temwe ba Yehowa.

Mu kipwa kya 1958, nadi mwibakile Lene, ungi mukwetu mukashi a mu Danemark badi mushale mu Londre. Mu kipwa kibalondele, tubapetele mwabi wa kutanda Jane, mwan’etu mukashi a kumpala mu bana betu batano. Ne mupete dingi mwabi wa kufuba mu kakongye ka mu Fulham. Anka kunyima kwa mafuku, pa mwanda wa kukumba kwa Lene bibadi abitungu’shi tukatukye twende mu kushala mu mbalo i kibobo. Ngi bwakinyi, mu kipwa kya 1967, tubakatukile twenda mu Adelaide, mu Australie.

Mu kakongye ketu ka mu Adelaide mubadi bakwetu bapwe kukula 12 babadi bena Kidishitu bedibwe mwimu. Babadi abakunkusha mudimo wa bulungudi na katshintshi. Ta nkukile mafuku e bungi bwatudya kubanguula kyubishi kyetu kya kufubila Yehowa nya.

 Mu kipwa kya 1979, ami na Lene tubadi na muloo wa kutanda Daniel mwan’etu a katano. Uno mwana badi mukwatshibwe na mukumbo wa Trisomie * na dingi tabadi na mushindo wa kwikala na muwa munda mwa mafuku ebungi nya. Mpa na binobino abingyelela bukopo bwa kupatuula kinyongwa kibatudi bapushe. Tubadi bekitshishe na mwetu moso bwa kulombasha nkalo yaye, kushi kulenguula bangi bana betu bananka. Ingi misusa, mbidi ya Daniel ibadi ayata elangi dya bulese (bleu) bu bibadi akutwa oxygène mu mbidi pa mwanda wa myasa ibidi ibadi mu eshimba dyaye, na bibadi abitungu’shi tumutwale ku lupitalo bukidibukidi. Anka sunga mbibadi na maladi, badi na binangu ngofu na badi na kifulo. Badi mufule myanda ya mu kikudi. Nsaa ibatudi atwele luteko mu kifuko kumpala kwa kudya, badi abungu maboko aaye, ayinyika mutwe, na kwakula n’eshimba dimune’shi: “Amene!” Kunyima kwa kwela luteko ngi amone bya kudya.

Pabadi Daniel na bipwa binanka, badi mukumbe mukumbo wa cancer ka mu mase. Ami na Lene tubadi bakalakashwe ngofu, ku mbidi mpa na mu binangu. Anka, efuku dibatudi babofule bikishekishe, mukwetu Neville Bromwich, mukunkushi a kifunda kyetu bafikile mu kwitutala. Bwabwa bufuku, badi mwitukume maboko aaye na mpolo ku meso. Boso bwetu tubabangile kudila. Bishima byaye bya kifulo na abilesha’shi kwete kwituula pa mbalo yetu bibadi bitusambe ngofu. Bakatukile ku nshibo kwetu mu nsaa ya kumpala y’efuku dibalondele. Kunyima kwa kapindji kapeela, Daniel bafwile. Lufu lwaye nyi mwanda ubadi witutape kwishimba ngofu mu muwa wetu. Sunga mbyabya, tubadi bakambile kinyongwa, bakulupile’shi kintu su nkimune​—sunga lufu—​tandulombene kwabuula Daniel ku kifulo kya Yehowa. (Looma 8:38, 39) Twi na lukalo lukata lwa kushala naye pabakamusangula kwi Efile Mukulu mu ndumbulwilo mupya!​—Yowano 5:28, 29.

Lelo uno, kunyima kwa kukambila myanda ibidi intape kwishimba ngofu, nkwete nka kufuba bu mukulu mu kakongye. Myanda yandi mumone ngimpe kifulo na lusa bwa bangi bantu, bikishekishe bantu abekitshisha bwa kukambila myanda i bukopo. Ntanebatopekeyaa nya. Anka, neyipushaa ami nabene’shi: ‘Myanda yabadi bafumankane nayo mu muwa wabo i na bukitshishi kinyi ku byabapushaa mwishimba na byabanangushenaa? Ne kwibalesha’shi nebapasukila naminyi? Ne kwibakankamika bwabadya kukita kikyebe ky’eshimba dya Yehowa naminyi?’ Nakuminaa kwenda mu kutala mikooko mu kakongye ketu! Eyendo, nsaa yansamba na kunyingisha bangi mu kikudi, napusha’shi nkwete kwinyingisha na kwisamba ami nabene.

Napushaa nka bu mufundji amiisambo bambile’shi: “Pabammonanga mpombo iilekeene, [obe Yehowa] naapetanga mulòo wa kunyingisha kwobe.” (Misambo 94:19) Munyingishe mu nkalakashi yandi mupete mu kifuko kyande, mu kubingwabingwa pa mwanda wa lulangwilo, kukutwa kwa kwipushena kwa bantu, na ku kinyongwa. Kushi mpaka, Yehowa mmwikale Nshami!