1, 2. (a) Bwakinyi ta mbibofule bwa ba nambutwile kulongyesha bana baabo bwabadya kwikala na lukumiino mwi Yehowa, na nkipaso kimune kinyi kilombeene ba nambutwile kukita bino? (b) Mmyanda kinyi inanka yatukyebe kutaluula?

BANGI ba nambutwile ba mwiumbo dya France babakwile’shi: “Atwe twi bakumine mwi Yehowa, tabilesha’shi bana betu abakekala bakumine mwi Yehowa nya. Mwanda lukumiino tabelupyanaa nya. Bana abapetaa lukumiino bipeelabipeela.” Ungi mukwetu a mu Australie bafundjile’shi: “Kwibaka lukumiino mwishimba dya mwan’oobe nkwikale nka bu lukalakashi lukata lukile nkalakashi yooso.” Ambanyi’shi: “We mulombeene kupusha’shi bwaluula lukonko lwa mwan’oobe bibamusankisha. Na kunyima okasangana’shi bakwele nka lwalwa lukoko lumune! Ngalulo ayisankisha eshimba dya mwan’oobe lelo uno, ngilombeene kukutwa kumusankisha maloba.” Bu bi bana abende na kukula, ba nambutwile bebungi mbalombeene kusangana’shi kwi lukalo lwa kumupatulwila dingi nka yaya myanda, umune ku umune. Abasangana’shi abitungu bafube na mayele elekeene bwa kulongyesha bana baabo bwabadya kufula Yehowa.

² Su we nambutwile, ingi nsaa weyipushaa byodi mulombeene kwikala na ngobesha ya kulongyesha bana boobe bwabadya kufula Yehowa na kuyidiidila na kumufubila mpa na ku bukulu bwabo su? Kushii mpaka, ta kwi muntu mulombeene kwibikita mu ngobesha yaaye’ye nabeene  nya. (Yeelemiya 10:23) Nyi bwakinyi abitungu kukulupila mwi Yehowa bwa’shi etukwashe. Mmupe ba nambutwile bintu bibungi bilombeene kwibaludika. We kukwasha bana boobe naminyi? (1) Abitungu webaukye kalolo. (2) Ebalongyeshe myanda i mwishimba dyoobe pabitale Yehowa. (3) Fuba na bileshesho. (4) Teka kikudi kiselele na ikala na lwishinko kwi bana boobe.

3. Ba nambutwile be kwambula Yesu bibaadi alongyesha balongi baaye naminyi?

³ Misango ibungi Yesu baadi ayipusha balongi baaye pabitale myanda yabadi bakumine. (Mateo 16:13-15) We kwambula kileshesho kyaye. Nsaa yotentekyesha na bana boobe sunga yanukitshi ungi mwanda pamune, ebayipushe bakulungule byabapwandikisha na webateemeshe bwa kuuka byabapusha. Be na mpaka mwishimba su? Ungi mukwetu mulume a mu Australie e na bipwa 15 bambile’shi: “Papa baadi esamba nami kebungi pabitale lukumiino lwande na kunkwasha bwa kunangusheena. Baadi angipusha’shi: ‘Bible akula kinyi?’ ‘Okumiina byobyo abyakula Bible su?’ ‘Bwakinyi webikumiina?’ Baadi akumiina bwa’shi ngaluule mu mayi ande’mi nabeene kushii’mi kwambuula nka mayi aaye sunga a Mama. Bu binaadi nende na kukula naadi nende na kutamisha ngaluulo yande.”

4. Bwakinyi bi na muulo kwikala na lwishinko na kwaluula nkonko ya bana boobe? Tuusha kileshesho.

⁴ Su bana boobe t’abakumina mwanda aulongyesha Bible musango umune, ikala na lwishinko. Ebakwashe bwabadya kupeta ngaluulo ku nkonko yaabo. Ungi nshe bana bambile’shi: “Ata nkonko ya bana boobe na muulo. Tweyibepuulanga bu ishii na muulo, na topelanga kwisamba nabo pabitale mwanda kampanda pa mwanda ngulombeene nkukalakasha nya.” Anka, bibuwa bana boobe bakwele nkonko, mwanda bino abileesha’shi be na lukalo lwa kupusha. Mpa na Yesu baadi ele nkonko pabaadi ki mukinga. (Badika Luka 2:46.) Ungi nsongwa a mu Danemark bambile’shi: “Panebalunngwile’shi nkwete kwiyipusha su twi mu kipwilo kya binyibinyi, baledi bande babaadi banteemeshe na kalolo kooso​—sunga mbibaabadi balombeene kunfiitshila munda. Babangalulwile nkonko yande yooso, ku bukwashi bwa Bible.”

5. Sunga bana bamweneka bu be na lukumiino mwi Yehowa, ba nambutwile mbalombeene kukita kinyi?

⁵ Eukye bana boobe kalolo. Topwandikishanga’shi be na lukumiino mwi Yehowa nka pa mwanda webamono abende mu bulungudi na kutwela mu bisangilo. Abapushaa naminyi pabitale Yehowa, na abanangushenaa naminyi pabitale Bible? Kita bukopo boobe booso bwa kushingula su kwi ka mwanda akebakutshishwa bwabadya kushaala na lukumiino mwi Yehowa. Esambe pabitale Yehowa efuku dyooso nsaa yofubu na bana boobe. Ebatekyele, pabadi panka na poodi bupenka.

6. Nsaa ayitungunuka ba nambutwile na kulonga myanda ibungi pabitale Yehowa na Bible, abibakwasha bwa kulongyesha bana baabo naminyi?

⁶ Bantu babaadi abakumina kuteemesha Yesu mwanda mmufule Yehowa na baadi auku Bifundwe kalolo. Na dingi babaadi abapusha’shi Yesu mmwibafule. Nyi bwakinyi babaadi abamuteemesha kalolo. (Luka 24:32; Yowano 7:46) Mu mushindo umune, nsaa ayimono bana boobe’shi we mufule Yehowa, bino abibatakula bwabadya kumufula namu. (Badika Miiya Ikituulwe 6:5-8; Luka 6:45.) Byabya ididiila na kwilongyela Bible, na kubadika mikanda yeetu efuku dyooso. Kimba bya kuuka myanda ibungi pabitale bipangwa bya Yehowa. (Mateo 6:26, 28) Su bonyiisha kushinguula myanda ibungi, okanyiisha kupeta myanda ibungi ya kulongyesha bana boobe pabitale Yehowa.​—Luka 6:40.

7, 8. Su bopete mwanda upya utale Yehowa, we kukita naminyi? Bangi ba nambutwile babakitshine naminyi?

⁷ Su bolongo mwanda upya utale Yehowa, eulungule bana boobe. Ebalungule yanka nsaa yooso yodi nabo, kushii penda nsaa yanulumbuula bisangilo sunga mu lulangwilo lwa mu kifuko. Bangi ba nambutwile ba mu États-Unis abakitaa bino. Abesambaa na bana baabo pabitale Yehowa nsaa yooso yabamono kipangwa kibuwa sunga nsaa yabadi  kidiibwa kibuwa. Abambile’shi: “Atutentekyeshaa bana beetu pabitale kifulo na abimonaa Yehowa myanda kumpala kwa kwitupa kintu kyooso.” Ungi mulume na mukashi ba mu Afrique du Sud abakuminaa kwisamba na bana baabo babidi pabitale bipangwa nsaa yabafubu mu lupango. Bu kileshesho, abesambaa abimenaa lutete lwafika mutshi ukata mu kipaso kya kukaanya. Bano ba nambutwile babambile’shi: “Atukimbaa bya kukuna kaneemo bwa muwa mwi bana beetu na kwibaleesha bungi bwa bintu bi na muuwa.”

⁸ Ungi nshe bana a mu Australie baatshile mwan’aye mulume, baadi peepi na kulombasha bipwa ekumi enda naye ku nshibo yabalamaa bintu bya kala yabetanyinaa bu musée. Nshe mwana baatshile ino nsaa bwa kukwasha mwan’aye bwadya kunyingisha lukumiino lwaye na kumona bishinkamiisho abileesha’shi Yehowa nyi Mupangi. Bambile’shi: “Tubamwene bifwanyi bya bipangwa bya mu meema akata bya kala bi bu mongole byabetanyinaa bu ammonoide na bingi bintu bi bu mpeesu byabetanyinaa bu trilobites. Bibaadi bitukume ku mashimba pa kumona’shi ino nyema ibaadi kwanka kala ibaadi buwa, ilekeenelekeene, na ishii kalema—nka bu ino yatukwete kumona ano mafuku. Byabya su bintu bibaadi bituukile pa kushintuluka kukatuka ku tuntu tupeela na ku bintu bikata, bwakinyi bino bipangwa bya kala bibaadi nka bilekeene? Dino ndilongyesha dikata dinapetele, ami nkubanga kwidilongyesha mwan’ande.”

9. Bwakinyi bibuwa kufuba na bileshesho? Na mbileshesho kinyi byabadi bafube nabyo kwi ungi nyina bana?

⁹ Kebungi Yesu baadi afubu na bileshesho. Baadi atuusha malongyesha akata pa kwibalondela mwanda sunga kwibapa bileshesho. (Mateo 13:34, 35) Su botuusha bileshesho, okwasha bana boobe bwabadya kunangusheena. Kukita bino akwibakwasha bwabadya kunangusheena pa myanda ywebalongyesha, kwiyipusha kalolo, na kwiyitentekyesha. Abakekala dingi na muloo wa kulonga ingi myanda. Bu kileshesho, ungi nyina bana a mu Japon baadi akumina kulongyesha bana baaye babidi bwa kuuka’shi kipaso kyabadi bapangye Athmosphère (lupapi) pa nsenga akileesha’shi Yehowa kwete kwitupasukila. Umune a ku bana baye baadi na bipwa mwanda na ungi namu baadi na bipwa ekumi. Byabya baadi mutuushe kileshesho kyabadi balombeene kupusha muyiile bipwa byabo. Bapeele bano bana baaye balume mabeele, nsukaadi, na kafe. Akupu balungwile ooso a kwabadi bwadya kwata dyaye ekupo dya kafe. Aleesha’shi: “Babaadi abapasukila makopo aabo kalolo. Panebepwishe bwakinyi abealama kalolo, abalulwile’shi mbakumine kutoma kafe mu kipaso kyankumina’shi bikale. Naadi mwibapatulwile’shi Efile Mukulu baadi mwele gaze mu lupapi sunga (mu athmosphère) mu mushindo wa’shi bitukwashe kalolo nka bwa buwa bwetu.” Bana betu balume babaadi bapete muloo bwa dino dilongyesha ku mwanda tambedilwankane nya!

10, 11. (a) Nkileshesho kinyi kyodya kufuba nakyo bwa kuleesha bana boobe’shi kwi Mupangi? (Tala kifwatulo ki kumbangilo.) (b) Mbileshesho kinyi byodi mufube nabyo?

¹⁰ Mbileshesho kinyi byodi mulombeene kufuba nabyo bwa kulesha bana boobe’shi kwi Mupangi? We kuteeka mikate pamune na mwan’obe ku bukwashi bwa mukanda ufunde bya kwiyiteeka. Na omukwashe bwadya kuuka bwakinyi bi na muulo kulondesha bintu byabadi bafunde kalolo.  Kunyima ope mwan’oobe kikuba kya pome sunga kingi kikuba, na omwipushe’shi: “Ouku’shi kino kikuba ki na mukanda auleesha byabadi bekikite su?” Kubapu tshiba kino kikuba pabidi, na omupe lutete. Mupatulwile’shi luno lutete lwi nka bu mukanda auleesha bya kupwa kikuba. Lwi na myanda ilombeene kukita bwa kumona mushindo wa kupeta pome. Kadi mwi myanda ya kulonda ibungi kukila myanda ayitungu kulonda bwa kuteeka mikate. We kumwipusha’shi: “Muntu ngi baadi mufunde myanda ya kulonda bwa kuteeka mikate. Kadi nanyi baadi mufunde bya kukita pome?” Su bana babaapu kukula, we kwibapatulwila’shi myanda ya kulonda bwa kukita mutshi wa pome na ma pome ebungi bi mu ADN e munda mwa lutete. We kwibaleesha bifwatulo na bileshesho bi mu broshire a Cinq questions à se poser sur l’origine de la vie esaki dya 10 na ku 20.

¹¹ Ba nambutwile bebungi ababadikaa pamune na bana baabo miisambo i mu Réveillez-vous! i na mutwe wa mwanda awamba’shi “Hasard ou conception?” Su bana baabo bakii bakinga ngofu, ba nambutwile mbalombeene kwibapatulwila myanda ibababadika mu mayi apelepele. Bu kileshesho, ungi mulume na mukashi ba mu Danemark babaadi abapwandikisha ndekye na toonyi. Abayipwishe bana’shi: “Ndekye e nka bi koonyi. Kadi ndekye mulombeene kwela mayi na kutootola tu ndekye tupeela su? Toonyi twi na lukalo na kipalwe kya kuponena su? Na dingi we kupwandikisha mukungulo wa ndekye na kudila kwa koonyi? Byabya nnanyi e na binangu kukila mwinaye—muntu bapwile ndekye su Mupangi a toonyi?” Nsaa yonangusheena na bana boobe na kwibela nkonko, webakwasha bwabadya kufuba na “binangu byabo” na kunyingisha lukumiino lwabo mwi Yehowa.—Nkindji 2:10-12.

12. We kufuba na bileshesho bwa kulongyesha bana boobe’shi myanda yooso ayakula Bible ngy’eyendo naminyi?

¹² We kufuba na bileshesho bwa kulongyesha bana boobe’shi myanda yooso yabakula mu Bible ngy’eyendo. Bu kileshsho, we kubadika mukanda wa Yoobo 26:7. (Badika.) Tolungulanga bana boobe’nka penda’shi myanda i mu uno verse ayifiki kwi Yehowa. Anka, ebakwashe bwabadya kufuba na binangu byabo. We kumulungula’shi mu mafuku a Yoobo tababaadi abakumina’shi nsenga ngimane mu lupunga bisumanga nya. Babaadi abakula’shi kintu kyooso, kibumbe bu ndundo sunga ebwe, abitungu kikale kishale pa kingi kintu. Mu aa mafuku, muntu su ngumune tabaadi auku’shi nsenga ngimane ayo inabeene mu lupunga nya, mwanda takubaadi byamo abimono kula bu télescope sunga byamo abyendaa mwiyilu byabetanyinaa bu vaisseau spatial nya. Dilongyesha di’shi sunga byekala’shi Bible baadi mufundibwe takudi bipwa bibungi, akula myanda nka byayidi mwanda mukanda aufiki kwi Yehowa.​—Neemiya 9:6.

13, 14. Ba nambutwile be kulongyesha bana baabo bwa kukookyela abyamba Bible naminyi?

¹³ Bi na muulo bodya kulongyesha bana boobe’shi abakekala na muloo nsaa yabakookyela myanda yooso ayakula Bible. (Badika Misambo 1:1-3.) Bu kileshesho, we kulungula bana boobe’shi babande kupwandikisha bu’bo babende mu kushala mu kisangi kya mwela. Abitungu basangule bantu ba kwenda nabo mu kushala. Kubapu webepushe’shi: “We kwata bantu ba mushindo kinyi bwa kwenda nabo su okumina’shi booso bwenu nukashaale bibuwa?” Akupu badika nabo mukanda wa Beena-Ngalatea 5:19-23 bwa kumona bantu abakumina Yehowa bwa’shi bakatwele mu nsenga ipya.

¹⁴ Mu uno mushindo, we kulongyesha bana boobe malongyesha abidi. Dya kumpala, Yehowa etulongyesha byatudya kwikala na nshalelo ebuwa na mu butaale na bangi kubanga binobino. Dya kabidi, kwete kwitulongyesha byatudya nkashala mu nsenga ipya. (Yeeshaya 54:13; Yowano 17:3) We kulesha dingi mwan’obe byabadi bakwashe bangi bakwetu kwi Bible. Kileshesho, we kukimba mwisambo wa nshaleelo a muntu wi mu mikanda yetu, pangi we kwata mu miisambo ayamba’shi “Bible kwete kushintuula bantu” mu Kitenta kya Mulami. Sunga’shi we kwipusha muntu a mu kakongye keenu enulondela na mwan’obe bibadi bimukwashe  Bible bwadya kushintuula myanda bwa kusangasha Yehowa.​—Beena-Ebelu 4:12.

15. Nkinyi akikakukwasha bwa kulongyesha bana boobe?

¹⁵ Nangusheena ngofu bodya kulongamisha myanda yolongyesha bana boobe na bwabadya kwiyisankila. Nangusheena mishindo ilekeene ya kwibakwasha bwabadya kwikala na muloo wa kulonga pabitale Yehowa na kwifubwila peepi naye. Tungunuka na kukita bino nsaa yabende na kukula. Ungi nshe bana bambile’shi: “Tokookanga kufiimisha mishindo ipya ya kwisamba na bana pabakwete kukula.”

16. Nsaa yolongyesha bana, bwakinyi abitungu wekale na lwishinko? Bangi ba nambutwile mbaleeshe lwishinko naminyi?

¹⁶ Ku bukwashi bwa kikudi kiselele, bana boobe mbalombeene kunyingisha lukumiino lwabo. (Beena-Ngalatea 5:22, 23) Kadi mbilombeene kwata mafuku ebungi bwa’shi lukumiino lwabo lunyingye. Byabya ikala na lwishinko kwi bana boobe, na ididiila na kwibalongyesha. Ungi nshe bana a mu Japon baadi na bana babidi mulume na mukashi bambile’shi: “Ami na mukashi’ande tubaadi atupasukila bana beetu. Kubanga ku bukinga bwabo, naadi nalongo nabo munda mwa minite 15 efuku dyooso, kukatusha efuku dya bisangilo bya mu kakongye. Minite ekumi na itano ibadi nsaa ipela kwandi na kwi bana.” Ungi mukunkushi a kifunda bafundile’shi: “Panaadi mu bipwa ekumi, naadi na nkonko ibungi sunga mpaka mwishimba yanshi naadi na mushindo wa kwakula. Mu kukila kwa mafuku napetele ngaluulo ku nkonko ibungi mu bisangilo, mu lulangwilo lwa mu kifuko, sunga mu kwilongyela. Ngi bwakinyi abitungu ba nambutwile batungunukye na kulongyesha bana baabo.”

17. Bwakinyi abitungu’shi ba nambutwile banyingishe lukumiino lwabo’bo banabeene? Ungi mulume na mukashi ba mu Bermuda mbakwashe bana baabo bwa kwikala na lukumiino mwi Yehowa naminyi?

¹⁷ Byabya, bana boobe mbalombeene kulonga myanda ibungi nsaa yabamono’shi we na lukumiino lwibukopo mwi Yehowa. Abakutala byooso byokitshi. Ngi bwakinyi abitungu otungunukye na kunyingisha lukumiino loobe. Abitungu bana boobe bamone’shi Yehowa muntu a binyibinyi koodi. Bu kileshesho, nsaa ibaadi ayipete ungi mulume na mukashi ba mu kibundji kya Bermuda lukalakashi bwa mwanda ooso, abaadi abatekye buludiki bwa Yehowa mu luteko pamune na bana baabo bakashi. Babaadi abakankamika dingi bana baabo bwabadya kuteka abo banabeene. Abakula’shi: “Twi balungule mwan’etu mukashi bapu kukula bwadya ‘kukulupila mwi Yehowa n’eshimba dimune, kufuba midimo ibungi mu mudimo wa Bufumu, na kupela kwikalakasha bikilekile.’ Nsaa yamono mwanda wibukopo awitukwata, auku’shi Yehowa etukwasha. Bino bibaadi bitamishe lukumiino lwaye mu mushindo wa kukaanya mwi Efile Mukulu na mu Bible.”

18. Ba nambutwile abitungu balamine kinyi?

¹⁸ Ba nambutwile, laminayi’shi tanwi balombeene kukitshisha bana beenu pa bukopo bwa’shi bekale na lukumiino nya. Obe okunu na kumyamina meema, kadi nka penda Yehowa nyi mulombeene kukusha. (1 Beena-Kodinda 3:6) Ngi bwakinyi anwe kitayi mwenu mooso bwa kulongyesha bana beenu pabitale Yehowa, na kumuteka bwa’shi enupe kikudi kiselele bwa’shi kibakwashe bwabadya kwikala na lukumiino. Ikalayi bashinkamishe’shi Yehowa akenwelela myabi ku uno mudimo wibukopo wanudi nao.​—Beena-Efeso 6:4.