1, 2. Ingi nsaa bafubi ba Yehowa bakii ba nsongwa be kwiyipusha naminyi, na Bible atuusha elango kinyi pa uno mwanda?

UNGI mwina kalasa balungwile mukwetu nsongwakashi a mu Grande-Bretagne abadi naaye mu kalasa bino: “Omweneka bu’be e na binangu bikile pa kukumina’shi Efile Mukulu e kwanka.” Ungi mukwetu mulume a mu Allemagne bafundile’shi: “Mulongyeshi eetu amonaa myanda ya mu Bible ayisambila kupangibwa kwa bintu bu myanda ya mpwandikishi. Na mbakulupile’shi balongi abakumina’shi bintu mbituukile.” Ungi mukwetu mukashi a mu France bambile’shi: “Balongyeshi ba ku kalasa keetu bakwete kukema na kushaala batubule mukanwa pa kumona’shi balongi baki’abakumina myanda i mu Bible.”

² Lelo uno bantu bebungi tabakwete kukumina’shi Efile Mukulu mmwitupangye nya. Su we mufubi a Yehowa ki nsongwa sunga’shi okwete kulonga bwa kumuuka, ingi nsaa we kwiyipusha byodya kwibashinkamiisha’shi Yehowa nyi Mupangi eetu. Bible etukwasha bwa kunangusheena kalolo pabitale myanda yatupusha sunga yatubala. Eyi dy’Efile Mukulu adyamba’shi: “Kapatupatu akakukunkusha.” Mu kipaso kinyi? Akakakukwasha bwa kusumbula nangunangu ya madimi na kunyingisha lukumiino lobe mwi Yehowa.​—Badika Nkindji 2:10-12.

3. Mu uno mwisambo atukyebe kwisambila kinyi?

³ Bwa kwikala na lukumiino lwi bukopo mwi Yehowa, abitungu tumuukye kalolo. (1 Timote 2:4) Byabya nsaa yobadika Bible na mikanda yeetu,  abitungu obande kwimana kapindji na kunangusheene pabitale mwanda wabakwete kwakwila. Etatshishe bwa kupusha myanda yobadika kalolo. (Mateo 13:23) Su bwekala welongyela mu kino kipaso, okapete bishinkamisho bibungi abileesha’shi Yehowa nyi Mupangi eetu na’shi Bible mmufikye kwadi. (Beena-Ebelu 11:1) Tutaleyi byatudi balombeene kwibikita.

4. Bantu abakumina’shi bintu mbituukile na abakumina’shi bintu mbipangibwe be mumune mu mushindo kinyi? Byabya, booso bwetu abitungu tukite kinyi?

⁴ Muntu mulombeene nkulungula’shi: “Nakumina’shi bintu mbituukile mwanda beena siyanse mbambe’shi byobyo mbya binyibinyi. We kukumina’shi Efile Mukulu nyi bapangile bintu naminyi aku namu muntu su ngumune ta mumumone?” Bantu bebungi bakwete kunangusheena uno mushindo. Eyendo’shi, ta kwi muntu tabamwene Efile Mukulu sunga kumumona kwapanga bintu nya. (Yowano 1:18) Kadi twi kwamba naminyi pabitale bantu abakumina’shi bintu mbituukile? N’abo namu abakumina kintu kyabashii bamone. Ta kwi mwina siyanse sunga ungi muntu bamwene kintu ki na muuwa akishintuluka kapeela kapeela na kutuuka kingi kintu ki na muuwa nya. Bu kileshesho, ta kwi muntu su ngumune bamwene kiilwa sunga nyoka aluluka bu nyema aomeshaa nya. (Yoobo 38:1, 4) Byabya abitungu’shi booso bwetu tutale bishinkamisho kalolo, tunangusheehe pa byanka, kunyima tumone bya kwata bitshibilo bimeene pa myanda ibatushinkamisha’shi ngya binyibinyi. Bantu bebungi babandile bintu bipangibwe “mbashingule’shi” Efile Mukulu e kwanka. ‘Mbemwene’ patooka’shi nnaye Mupangi a bintu byooso, na’shi e na bukome, na e na ngikashi ibuwa.​—Beena-Looma 1:20.

5. Mbintu bya kukimbuula kinyi bilombeene kwitukwasha bwa kulonga myanda ibungi pabitale bipangwa?

⁵ Nsaa yatutala bipangwa na kunangusheena ngofu pa byanka, atumono’shi kintu kyooso nkipangibwe mu kipaso kya kukaanya. “Ku lukumiino atushinguula’shi” kwi Mupangi, sunga ekala muntu shamwenekaa. Atushinguula’shi e na ngikashi ibuwa na binangu bibungi. (Beena-Ebelu 11:3, 27) Twi balombeene kulonga myanda ibungi imutale kukiila ku bintu byadi mupangye pa kubadika myanda ya bintu byabadi batundule kwi beena siyanse. Imune ya ku ino myanda we kwiyipeta mu bintu bya kukimbuula myanda bu mu video a Les merveilles de la création révèlent la gloire de Dieu, mu broshire a La vie a-t-elle été créée ? na a Cinq questions à se poser sur l’origine de la vie, na mu mukanda wa Y a-t-il un Créateur qui se soucie de vous ? Mu jurnale a Réveillez-vous ! mwi miisambo ya bantu abeyeleshena nkonko na beena siyanse, na ya bangi abaleesha bwakinyi bababanga kukumina binobino’shi Efile Mukulu e kwanka. Na dingi amutukaa miisambo ayamba’shi “Hasard ou conception ?” mwanka, bakwete kwimupatuula myanda ibungi itale nyema na bingi bintu bipangibwe na bileshesho bya beena sianse abaleesha byabadi batompe kwambula bintu abikitaa yaya nyema.

6. Bintu bya kukimbuula myanda bi nkukwasha naminyi?

⁶ Ungi mukwetu mulume e na bipwa 19 a mu États-Unis bakwile bino pabitale ino broshire ibidi ibatuteemuna: “Ne mufube na ino broshire ngofu. Ne mwiyilongyele munda misusa ekumi na ibidi.” Ungi mukwetu mukashi a mu France bafundile’shi: “Mwisambo wa ‘Hasard ou conception?’ ngunkemeshe ngofu! Abaleesha’shi ba nsendwe bakata mbalombeene kwambula kadi ta be bya koobesha kulombasha bintu byooso bipangibwe nya.” Baledi ba ungi nsongwakashi e na bipwa 15 ba mu Afrique du Sud babakwile’shi: “Kintu kya kumpala akibadikaa  mwan’etu mukashi mu jurnale a Réveillez-vous ! nyi mwisambo wabeele bantu nkonko (interview).” Ino mikanda i nkukwasha n’obe namu bwa kumona bishinkamisho abileesha’shi kwi Mupangi, na okamono bya kutundula na kusumbusheena malongyesha a madimi. Lukumiino lobe alukanyingi ngofu mu kipaso kyokekala nka bu mutshi wi na mishi itwele mu nsenga ngofu na aushaala wimane sunga kwela kipunga kibukopo.​—Yeelemiya 17:5-8.

7. Bwakinyi Efile Mukulu akumina’shi ofube na binangu byoobe?

⁷ Bi bubi kwiyipusha nkonko bu’shi ‘Bwakinyi nakumina’shi myanda ayakula Bible ngya binyibinyi su?’ Ta mbyabya nya. Yehowa takumina’shi okumine kintu pa mwanda bangi mbekikumine nya. Akumina’shi ofube na “kinangu” kyoobe bwa kuuka myanda i mu Bible na kupeta bishinkamisho abilesha’shi Bible nyi mukanda aufiki kwadi. Su bonyiisha kuuka myanda ayakula Bible, okanyiisha kunyingisha lukumiino lobe mu yanka. (Badika Beena-Looma 12:1, 2; 1 Timote 2:4.) Mushindo umune odya kuuka Bible kalolo, nkwilongyela mitwe ya mwanda yokumiina kushinguula kalolo.

8, 9. (a) Bangi bantu abakuminaa kwilongyela myanda kinyi? (b) Mmyabi kinyi yabadi bapete pa’bo kunangusheena ku myanda yababadika?

⁸ Bangi bantu abakuminaa kulonga matemuki a mu Bible. Sunga’shi abakuminaa kupwandikisha myanda ya mu Bible na myanda ya kala yabadi bafunde, myanda ya beena siyanse, sunga myanda ayakula bantu abakimbulaa myanda ya kala babetanyina bu archéologue. Tubande kwata kileshesho kya mukanda wa Kibangilo 3:15. Mu uno verse Yehowa baadi mutemukye mwanda wi na muulo ukata kunyima kwa Adame na Eeva kumutombokyela na bufumu bwaye. Ngi butemuki bwa kumpala ku matemuki ooso e mu Bible aetuleesha’shi, ku bukwashi bwa Bufumu bwaye, Yehowa akaleesha’shi kumunana kwaye ngi kwibuwa na akakatusha makyenga ooso. We kwilongyela mukanda wa Kibangilo 3:15 naminyi? We kufunda mulongo wa maverse a mu Bible ooso aapatuula kipaso akikalombana buno butemuki. Akupu we kukimba mafuku abaabadi bafunde ano maverse na kwiafunda muyiile kwilondeena kwao. Yaya nsaa, okashinkamisha’shi baaba bafundji ba Bible babaadi kwanka mu bipungo bilekeene kadi ooso a kwabadi bafundile mwanda aunyisha kutoosha mpushisho eetu pabitale buno butemuki. Bino mbilombeene nkushikamiisha’shi kikudi kiselele kya Yehowa kibaadi kibakunkushe bwa kufunda ino myanda.​—2 Mpyeele 1:21.

⁹ Ungi mukwetu mulume a mu Allemagne baadi munangusheene pabitale kipaso kyabakula myanda itale Bufumu mu mukanda ooso wa mu Bible. Bambile’shi: “Bi nka byabya, sunga mbibaabadi bafunde Bible kwi batu bakile pa 40. Na bebungi ba kwabadi babekeele kwanka mu bipungo bilekeene na tababaadi abeukeena nya.” Ungi mukwetu mukashi a mu Australie baadi elongyela mwisambo wa mu Kitenta kya Mulami na kulonga kwipusheena kwi pankatshi pa Pasaka sunga kidibwa kya lukilo na mwanda wi mu Kibangilo 3:15 na Mesiya. ^[1] (Tala mayi e kunfudiilo.) Bafundile’shi: “Kuno kulonga kwande kubaadi kumbuule meeso bwa kumona bi buwa bwa Yehowa. Pa’mi kumona bibaatshile ino mpàngo bwa beena Isaleele na kukita bwa’shi ikalombeene mwi Yesu bibaadi binkemeshe ngofu. Ne kwamba’shi bibaadi abitungu’shi ngimane na kubandila buwa bwa kino kidiibwa kya Pasaka kibaabadi batemukye!” Bwakinyi uno mukwetu mukashi bapushishe bino? Baadi munangusheene ngofu pa myanda ibaadi abadika na kwiyipusha kalolo. Bino bibamukwashishe bwa kunyingisha lukumiino lwaye na kunyiisha kwifubwila peepi na Yehowa.​—Mateo 13:23.

10. Kululama kwa bafundji ba Bible akunyingisha lukumiino lwetu mu Bible naminyi?

¹⁰ Banda kunangusheena dingi pabitale kululama kwa bantu babafundjile Bible. Babaadi abakula nka bya binyibinyi nsaa yooso na tababaadi na moo nya. Mu aa mafuku bantu babaadi abafundu nka penda myanda ibuwa pabitale mwilo wabo na bakata baabo. Anka batemuki ba Yehowa tambafunde nka penda myanda ibuwa kadi babafundile mpa na pabitale myanda ibubi ibakitshine mwilo wa Isaleele na ba nfumu baabo. (2 Myanda 16:9, 10; 24:18-22) Babafundile mpa na bilema  byabo’bo banabeene na bya bangi bafubi b’Efile Mukulu. (2 Samwele 12:1-14; Maako 14:50) Ungi mukwetu a mu Grande-Bretagne bambile’shi: “Bi bukopo bwa kumona bantu be na kululama kwi bino. Bino abinyiisha kwitushinkamiisha’shi Bible nyi mukanda aufiki kwi Yehowa binyibinyi.”

11. Bukunkushi bwatusangana mu Bible mbulombeene kwitushinkamiisha naminyi’shi Bible mmukanda w’Efile Mukulu?

¹¹ Nsaa ayikumina bantu’shi Bible ebakunkushe, bakwete kumona byadi na bukitshishi bwi buwa mu muwa wabo. Bino abibashinkamisha’shi Bible nyi mukanda aufiki kwi Efile Mukulu. (Badika Misambo 19:7-11.) Ungi mukwetu nsongwakashi a mu Japon bafundiile’shi: “Nsaa ibabangile kifuko kyetu kutumikila malango a mu Bible, tubaadi bapete muloo w’eyendo, butaale, buumune, na kifulo munkatshi mwetu.” Bible mmukwashe bantu bebungi bwabadya kuuka’shi bingi bintu byabakuminanga mbya madimi. (Misambo 115:3-8) Atakula bantu bwabadya kutuula lukulupilo mwi Yehowa, mwikale Efile Mukulu sha bukome booso na kutuusha lukulupilo lwa nshalelo e buwa mu mafuku e kumpala. Kukasha byabya bangi bantu abamba’shi Efile Mukulu te kwanka, aku namu abekasha bingi bipangwa bu b’efile baabo. Bangi abamba’shi bantu mbalombeene kulongamisha myanda i kumpala, kadi p’atutala byabadi bapwe kukita, ta mbobeshe kupudisha myanda i mu nsenga nya.​—Misambo 146:3, 4.

12, 13. Twi kwisamba na bantu pabitale bipangwa na Bible naminyi?

¹² Nsaa yokwete kwisamba na bangi bantu pabitale bipangwa sunga pabitale Bible, kya kumpala banda kuuka bi lukumiino lwabo. Tentekyesha’shi baaba abakumiina’shi bintu mbituukile abakuminaa dingi’shi Efile Mukulu e kwanka. Abamba’shi Efile Mukulu atumikaa na kwitukila kwa bintu bwa kupanga byooso bi na muwa. Bangi abakuminaa’shi lulambukisho lwa’shi bintu mbitukile ndwa binyibinyi mwanda mbebilongye mu kalasa. Bangi namu mbalekye kukumiina mwi Efile Mukulu mwanda bipwilo mbibalwishe ku mashimba. Banda kwipusha muntu kyakumiina na bwakinyi mmukumiine byanka. Akupu oteemeshe kalolo byaluula. Su bokitshi byabya, mmulombeene kukumiina nkuteemesha.​—Tite 3:2.

¹³ Su muntu amba’shi twe na binangu p’okumiina’shi kwi Mupangi, we kumwaluula naminyi? Ipusha yawa muntu na kanemo kooso akupatulwile bwakinyi apwandikisha byabya. We mulombeene kwamba’shi, su bintu mbishintulukye, kintu kya kumpala kibadya kwikala na mushindo wa kulama kifwatulo kyakyo. Ungi mulongyeshi a Chimie bambile’shi kubaadi akutungu bingi bintu mu byabya bintu: (1) kubadya kwikala kintu ki bu musokya bwa kwikilama, (2) ngobesha ya kupeta bukome na kwibutumikisha, (3) myanda ilombeene kwikikwasha bwa kutaluula mushindo wakidya kukula, na (4) mushindo wa kwikala na mbalo ya kulamina yaaya myanda yooso. Bambile dingi’shi: “Ungi mwanda ngutale bukopo bwa kupatuula abikalaa sunga kantu kapeela ka ku muwa.”

14. Nsaa ywesamba na muntu pabitale bipangwa we kunangusheena naye naminyi?

¹⁴ Nsaa yanwisamba na muntu pabitale bipangwa, nangusheena naye mu myanda ipeelepeele ibafubiishe Mpoolo. Bafundjile’shi: “Nshibo i nka na mwiyibakye, anka mwibakye byooso nyi Efile Mukulu.” (Beena-Ebelu 3:4) Byabya, nshibo yooso ayimweneka na meeso i nka na muntu mwiyibakye. Mu kipaso kimune, bintu bi na muuwa, bibukopo kukita kukila nshibo, bi nka na muntu mwibikite sunga mwibipangye. We kufubisha dingi mikanda yeetu. Ungi mukwetu mukashi besambile na ungi nsongwalume shibaadi akumina’shi Efile Mukulu e kwanka. Bamupeele broshire ibidi yatudi bateemune kunundu, na kunyima kwa mbingo ibidi, yawa nsongwalume bambile’shi, “Nakumiina binobino’shi Efile Mukulu e kwanka.” Uno nsongwalume babangile kulonga Bible, kunyima kwa mafuku bafikile mukwetu mwina Kidishitu.

15, 16. Twi kukita kinyi kumpala kwa kupatulwila muntu’shi Bible mmukanda aufiki kwi Efile Mukulu? Na abitungu tutentekyeshe kinyi nsaa yooso?

¹⁵ Su muntu eelesha mpaka pabitale Bible, we kunangusheena naye naminyi? Nka bu byatudi bebisambe kunundu, banda kumwipusha bwa kuuka bi lukumiino lwaye. Akupu, okimbe bya kuuka  myanda yakuminaa. (Nkindji 18:13) Su mmukumiine myanda ya siyanse, mupe kileshesho kya mu Bible akileesha’shi myanda ayakula Bible pabitale myanda ya siyanse ngya binyibinyi. Su akuminaa malondo a myanda ya kala, we kumulondela mwanda ubakitshikile wabadi baleeshe mu mikanda ya myanda ya kala na kumuleesha bibaadi Bible mutemukye wawa mwanda bipwa bibungi kumpala kwa’shi ukitshikye. Bangi bantu be nkuteemesha su webaleesha kintu mu Bible kilombeene kulongamisha nshalelo aabo, bu milango i mu Mwisambo wa Yesu wa pa Mwengye.

¹⁶ Tentekyesha’shi tatukuminaa kwikakeena na bantu nya. Atukumina’shi bekale na muloo wa kwisamba neetu na kulonga myanda ya mu Bible. Byabya ebeele nkonko na kaneemo kooso, akupu webateemeshe kalolo. Nsaa yoleesha muntu myanda yoodi mukumiine, ikala na bukalanga, bikishekishe su wesamba na muntu mukulu oobe. Su bwekala oneemeka bangi, n’abo namu abakakuneemeka. Na abakakeme ngofu pa kumona’shi we munangusheene bibukopo pabitale wawa mwanda oodi mukumiine sunga wekala nsongwa. Byabya, su muntu akyebe penda kwikakeena noobe sunga nkusepa, tomwaluulanga.​—Nkindji 26:4.

17, 18. (a) Nkinyi kilombeene nkukwasha bwa kunyingisha lukumiino loobe mu myanda ya mu Bible? (b) Ndukonko kinyi lwatukaluula mu mwisambo aulondo?

¹⁷ Twi kuuka malongyesha a kitako a mu Bible, kadi abitungu tukimbe ingi myanda ikile paapa bwa kwikala na lukumiino lwi bukopo. Abitungu tukimbuule myanda bwatudya kushinguula bya binyibinyi bifwame mwanka, nka bu’twe bakwete kukimba bupeta bufwame. (Nkindji 2:3-6) Umune wa ku mishindo ibuwa yodya kunyingisha lukumiino loobe nkubadika Bible ooso mushima. Pangi we kutompa kumubadika na kumupudisha munda mwa kipwa kimune. Bino bibakwashishe ungi mukunkushi a kifunda bwadya kwifubwila peepi na Yehowa pabaadi ki nsongwalume. Bambile’shi: “Kintu kibankwashishe bwa kukumina’shi Bible nyi Eyi dy’Efile Mukulu nkumubadika ooso mushima. Myanda yabadi balonde mu Bible inaadi mulongye panaadi nki nsongwalume nginkwashe bwa kwikala na nshalelo ebuwa.” Na dingi, fuba na bintu bya kukimbuula byoodi nabyo mu ludimi lwenu bwa’shi bikukwashe bwa kupusha myanda yobadika. We kwikala na DVD a Watchtower Library, Watchtower MIKANDA I MU INTERNET, Index des publications Watch Tower, sunga Mukanda aukwasha Batemwe ba Yehowa bwa kukimbuula myanda.

¹⁸ Ba nambutwile, longyeshayi bana benu pabitale Yehowa misango ibungi. Byabya, nwi kwibakwasha bwa kunyingisha lukumiino lwabo naminyi? Mwisambo aulondo aukaleesha byanudi balombeene kwibikita.