1, 2. Bwakinyi Batemwe ba Yehowa abekalaa na nfwadilo ebuwa? (Tala kifwatulo ki kumbangilo.)

JURNALE a mu Néerlande baadi muleeshe mushindo ubaadi nfwadilo a bakata ba bipwilo mu bisangilo byabo. Akula’shi: “We mumone abafwala nka bilamba binane na bi myasa, bikishekishe nsaa i kibobo.” Anka, uno journale umune amba’shi: Batemwe ba Yehowa namu kashaa tatwebamwene mbafwale byabya patwende ku bikongeeno byabo nya. Bakwile dingi’shi bana balume abafwala nka makotshi na tudifwanda na baana bakashi abafwala ma jipe aebapa kinemo na e bula, kadi bya mu ano mafuku eetu. Batemwe ba Yehowa abebakanyishaa pabitale kufwala kwabo. Mpoolo mutumibwa baadi mwakule’shi abitungu beena Kidishitu bekale na “nfwadilo akinemo na kwidinga” mulombeene bafubi b’Efile Mukulu. (1 Timote 2:9, 10) Sunga byekala’shi Mpoolo mutumibwa bakwile pabitale baana bakashi, ino myanda ngitale mpa na beena Kidishitu balume.

² Nfwadilo ebuwa e na muulo bu byatudi mwilo wa Yehowa, na bi na muulo kumeeso kw’Efile Mukulu atulangwila. (Kibangilo 3:21) Bible alesha patooka mushindo wikale Yehowa bu Efile Mukulu sha bukome booso, e na miiya yaadi mwelele baafubi baaye pabitale nfwadilo. Byabya, kyakya kyooso kyatusangula bwa kufwala tankilombeene kwitusankisha nka penda atwe nya, kadi  abitungu kisankishe namu Nfumu na Mwanana Yehowa.

3. Miiya ibabeleele beena Isaleele kwi Efile Mukulu ayitulongyesha kinyi pabitale nfwadilo?

³ Mu Miiya ya Moyiise, mubaadi miiya ibaadi ayikalwila beena Isaleele ku mwikeelo wa lusandji ubaadi mu miilo ibefunyishe. Miiya ibaadi ayileesha’shi Yehowa mmushikwe nfwadilo atuusha mwana mulume bu mwana mukashi, mwana mukashi bu mwana mulume. Lelo uno, nfwadilo shaleesha kwilekeena kwi pankatshi pa bana balume na bana bakashi abamwitanyina bu style unisexe sunga bilamba abituusha bipindji bya mbidi pasha. (Badika Miiya Ikituulwe 22:5.) Ino miiya ayitulongyesha’shi Yehowa tasangalaa na nfwandilo atuusha mwana mulume bu mwana mukashi, na atuusha mwana mukashi bu mwana mulume, sunga nfwadilo a balwa mpaka, aba’shi mmulume aba namu’shi mmukashi.

4. Nkinyi kilombeene kukwasha beena Kidishitu bwa kwata bitshibilo bibuwa pabitale nfwadilo?

⁴ Mayi a kulonda a mu Bible e kwitukwasha bwa kwata bitshibilo bibuwa pabitale nfwadilo eetu. Ano mayi a kulonda ngatale bantu ba mu maumbo na ma mbalo ooso, mwi mashika sunga mwi kibobo ki naminyi sunga twekala na bipikwa bi naminyi. Ta twi na lukalo lwa’shi betufundile mulongo wa bilamba bibuwa na bishii buwa nya. Abitungu tulonde nka penda mayi a kulonda e mu Bifundwe, aetukwasha dingi bwa kufwala bilamba byatukumina. Tubandeyi kutalula ano mayi a kulonda a mu Bible e bya kwitukwasha bwatudya kushinguula “akikyebe Efile Mukulu, kyakya kibuwa, kyakya kimulongamine, na kyakya kipwidikye” nsaa yatusangula bilamba bya kufwala.​—Beena-Looma 12:1, 2.

5, 6. Nfwadilo eetu e kwikala na bukitshishi kinyi kwi bangi?

⁵ Mpoolo mutumibwa baadi muyookyelwe bwadya kufunda eyi dya kulonda di na muulo di mu mukanda wa 2 Beena-Kodinda 6:4. (Badika.) Kipaso kyatumweneka ku meeso, akilungula bantu abetumono mwanda kampanda, na bantu bebungi mbalombeene kuuka mushindo watudi bekale kukiila ku byatumweneka. (1 Samwele 16:7) Bu byatudi bafubi b’Efile Mukulu, tabitungu twimeene nka penda pa kufwala bintu abitunsangasha na abitwikasha bibuwa nya. Su twafubila mayi a kulonda a mu Bible, ngalombeene kwitukwasha bwa kupela kufwala bilamba bitunane, bi myasa sunga abileesha bi mbidi yeetu ya buufu. Bino abileesha’shi abitungu tulekye kufwala bilamba abituusha sunga kuleesha bipindji bya mbidi bya buufu. Tabitungu’shi muntu su ngumune apushe buufu sunga’shi atadiile kungi nsaa yetumono byatudi bafwale nya.

⁶ Nsaa yatufwala bilamba bilombane, bitookye, na kwilongamisha kalolo na kupopela, bantu mbalombeene kwituneemeka ngofu bu bafubi ba Nfumu na Mwanana Yehowa. Na dingi mbalombeene kukimba bya kuuka Efile Mukulu atulangwila, kunyiisha kuneemeka ndumbulwilo eetu, na kupusha muloo wa kuteemesha mukandu wetu aupaasha bantu.

7, 8. Nsaa kinyi ayitungu’shi tunyiishe kufwala bilamba bibuwa?

⁷ Twi na kitungo kya kupa Efile Mukulu eetu e selele kineemo, kupa bakwetu beena Kidishitu kineemo, na kwi bantu be mu teritware eetu pa kwikala na nfwadilo atumbisha Yehowa na mukandu watukwete kulungula. (Beena-Looma 13:8-10) Nfwadilo eetu e na muulo ukata bikishekishe nsaa yatwende mu bisangilo bya beena Kidishitu sunga nsaa yatudi mu bulungudi. Abitungu twikale na nfwandilo mulombeene bantu abalangwila Efile Mukulu. (1 Timote 2:10) Byabya, bingi bilamba bipwandikile mu mbalo kampanda mbilombeene kukutwa kupwandikila mu ingi mbalo. Ngi bwakinyi sunga twekala bashale mbalo kinyi, atwe Batemwe ba Yehowa tabitungu twakokosha bangi ku nfwadilo eetu nya.

 ⁸ Badika 1 Beena-Kodinda 10:31. Nsaa yatwende ku bikongeeno, abitungu nfwadilo eetu ekale mulombanyine na etupa kineemo. Tatwambulanga nfwadilo ebubi mupalakane mu uno ndumbulwilo. Kumpala sunga kunyima kwa programe na nsaa yatukimbi bya kushaala mu otele, tatwikalanga na bilamba bipulumukye sunga byembeele nya. Su tubekala na nfwadilo ebuwa atukekala na kineemo kya kwilubula bu Batemwe ba Yehowa, na atukapusha’shi twi belumbuule bwa kutuusha bu kamonyi nsaa yooso.

9, 10. Bwakinyi mayi e mu mukanda wa Beena-Fidipe 2:4 ngatale nfwadilo eetu?

⁹ Badika Beena-Fidipe 2:4. Bwakinyi abitungu’shi tunangusheene bi kupusha bangi bakwetu beena Kidishitu pabitale nfwadilo eetu? Kamune ka ku tubingilo nka’shi bafubi b’Efile Mukulu abetatshishaa ngofu bwa kulonda dino elango: “Byabya ikashayi biina-mbidi byenu bii pa nsenga bu bifwe, bu lukyebano kyebano, myanda i butete, lwabi lwibubi.” (Beena-Kolose 3:2, 5, Kilombeeno kipya 2014) Bangi bakwetu balume na bakashi mbalekye mwikeelo wa kutambuka masandji, kadi bi kwikala’shi baki’abalu na binangu bibubi. Su twakutwa kupasuka, nfwadilo eetu mulombeene kwibeleesha bukopo bwabadya kulonda elango dya mu Bible dya kulwa bwa kukambila binangu bibubi. (1 Beena-Kodinda 6:9, 10) Tatukumina  kwibeleesha ngoshi yabo bukopo nya, ta mbyobyo su?

¹⁰ Patudi munkatshi mwa bakwetu balume na bakashi, twi kula na bantu abakankamika mwikeelo wa lusandji. Abitungu’shi nfwadilo eetu anyiishe kukwasha bwa’shi twikale munkatshi mwa bantu be selele, byatwikala mu bisangilo sunga nsaa yatukisha kapapi. Eyendo’shi twi na bulungantu bwa kwisangwila bilamba bya kufwala, anka twi na bushito bwa kufwala bilamba abikwasha bangi bwabadya kulama binangu, mayi na mwikeelo wabo wiselele kumeeso kw’Efile Mukulu. (1 Mpyeele 1:15, 16) Kifulo ky’eyendo “takikitaa kintu kibubi ku meeso a bantu, takikimbaa mwabi wa bupenka.”,​—1 Beena-Kodinda 13:4, 5.

11, 12. Mayi e mu mukanda wa Mulungudi 3:1, 17 aetukwasha bwa kwikala na nkatshinkatshi naminyi?

¹¹ Nsaa yabasangula bilamba bya kufwala, bafubi b’Efile Mukulu abaukaa’shi “kwi kipungo bwa kintu kyooso na kikitshino kyooso.” (Mulungudi 3:1, 17) Mbalo i mashika sunga kibobo, mu mpeshi sunga mwishipo, nshaleelo atudi, na mudimo watufubu mbilombeene kwitutakula mu kusangula bilamba bya kufwala. Kadi miiya ya Yehowa tayishintulukaa nya.​—Malakii 3:6.

¹² Nsaa yakudi kibobo kibukopo, abikalaa bukopo bwa kuuka su bilamba byatudi bafwale abitupa kaneemo na tabikokosha bangi. Bakwetu be kusangala su twapela kufwala bilamba bitumamiine pa mbidi na abibebweshesha lukalo lwibubi. (Yoobo 31:1) Na dingi, nsaa yatudi ku meema, abitungu’shi bilamba byatwitumpu nabyo bikale abitupa kineemo. (Nkindji 11:2, 20) Sunga bantu be bungi bekala na kyubishi kya kufwala bilamba abibweshesha bantu lukalo nsaa yabetumpu meema, abitungu tushinkamishe’shi bilamba byatufwala abipa Yehowa Efile Mukulu eetu eselele kineemo.

13. Mushindo kinyi ulombeene kwitukwasha elango di mu 1 Beena-Kodinda 10:32, 33 pabitale nfwadilo etu?

¹³ Kwi dingi eyi dya kulonda dilombeene kwitukwasha bwa kusangula bilamba. Abitungu twikale badimukye bwa kupela kukokosha bangi ku mashimba. (Badika 1 Beena-Kodinda 10:32, 33.) Twi na bushito bwa kupela kufwala bilamba bilombeene kukokosha bakwetu mpa na bantu bashi’abafubila Yehowa ku mashimba. Mpoolo mutumibwa bafundile’shi: “Ooso a kwanudi akimbe bya kusangasha muntu-naaye bwa buwa [bwaye] na kutamisha lukumiino [lwaye].” Mpoolo badi muleeshe kabingilo ka kukita bino’shi: “Mwanda Kidishitu tammukimbe kibaamusangashanga.” (Beena-Looma 15:2, 3) Anka bu Yesu, abitungu’shi kukita akikyebe Efile Mukulu na kukwasha bangi kwikale na muulo kukila kukita akitusangasha atwe banabeene. Byabya t’atusangula bwa kwikala na nfwadilo atudi bafule kadi mulombeene kukutshisha bantu kuteemesha mukandu watwibatwadila nya.

14. Ba nambutwile mbalombeene kulambukisha bana baabo bya kutumbisha Efile Mukulu mu nfwadilo aabo naminyi?

¹⁴ Ba nambutwile beena Kidishitu be na bushito bwa kulongyesha bana baabo bwabadya kufubila mayi a kulonda a mu Bible. Bwa kukita bino abitungu bashinkamishe’shi abo na bana baabo bakwete kusangasha Efile Mukulu mu nfwadilo na mu ntshibilo sunga mu kwitshikisha kwabo kwa nyeene kwibuwa. (Nkindji 22:6; 27:11) Ba nambutwile mbalombeene kulambukisha bana baabo bya kuneemeka Efile Mukulu eetu eselele na miiya yaye naminyi? Abitungu ba nambutwile bekale kileshesho kibuwa kwi bana baabo. Abitungu bebalongyeshe dingi na kifulo kyooso mbalo na kipaso kyabadya kupeta bilamba bipwandikile. Bana ta mbalombeene kusangula bilamba nka pa mwanda bibebasangasha nya, kadi abitungu basangule bilamba abipa Yehowa kineemo, mwanda abaleesha mpala y’Efile Mukulu.

15. Nkinyi kilombeene kwitukwasha bwa kusangula bilamba bibuwa?

¹⁵ Bible nyi mukanda wibuwa ulombeene kwitukwasha na kwitukunkusha bwa kusangula bilamba abitumbisha Efile Mukulu. Sunga mbyabya, bilamba byatufwala abileesha bi bumuntu bwetu. Nfwadilo atukumina na bilamba byatulakila bi kwikala bilekeene na abikuminaa bangi. Byabya, abitungu bilamba byeetu bikale nka bilombane, bitookye, abitupa kineemo, bilombane muyiile mwanda watukitshi, na byabakumina kwi bantu mu mbalo yatudi.

16. Bwakinyi abitungu tukite bukopo bwetu booso bwa kwikala na nfwadilo ebuwa?

¹⁶ Tambibofule nka misango yooso bwa kupeta bilamba abitupa kineemo na bilombanyine nya. Ba nsunga bebungi abaudishaa nka bilamba byabafwala kwi bantu bebungi. Ngi bwakinyi twi balombeene kwata nsaa ibungi bwa kupeta jipe, na mbuluuse sunga ebaya aditupa kineemo, sunga kusangula ekotshi na mutakataka bishii bitunane. Byabya su tubakitshi bukopo bwetu booso bwa kufwala bilamba bibuwa na bipwandikile, bakwetu abaketumono abakasangala ngofu. Na dingi atukekala na muloo wibungi wa kutumbisha Nshetu a mwiyilu sha kifulo kukila bintu byooso bibatulekye bwa kufwala bilamba bibuwa bwa kumutumbisha.

17. Nkinyi ki bya kutakula mukwetu mulume mu kuleka sunga kutshiba myefu?

¹⁷ Bibuwa mwana mulume alekye myefu su? Miiya ya Moyiise ibaadi ayipa mwana mulume kitungo kya kuleka myefu. Sunga mbyabya, beena Kidishitu ta be mushi mwa Miiya ya Moyiise sunga’shi mbatekibwe bwa kwiyilonda nya. (Beena-Levi 19:27; 21:5; Beena-Ngalatea 3:24, 25) Mu bingi bipikwa, muntu e na myefu itende kalolo mbalombeene kumunemeka na kumukumina, tambilombeene kukutshishwa bantu bwabadya kupusha mukandu wetu nya. Byabya, bangi bakwetu be na myefu. Na dingi, bangi namu mbaate kitshibilo kya kutshiba myefu. (1 Beena-Kodinda 8:9, 13; 10:32) Mu bingi bipikwa sunga angi mambalo, bantu tabakuminaa kuleka myefu nya na ayimweneka bu ishii buwa kwi mwina Kidishitu. Byabya kwikala na myefu kwi kukutshiishwa mukwetu kutumbisha Efile Mukulu na kwikala muntu ‘atopekwa.’​—1 Timote 3:2, 7; Beena-Looma 15:1-3.

18, 19. Mukanda wa Mika 6:8 awitukwasha naminyi?

¹⁸ Twi na muuloo pa kumona’shi Yehowa ta mwitwelele mulongo wa miiya pabitale kufwala bilamba na kutshibisha kwa nyene kwi buwa na kwibubi nya. Anka, mwitupe bulungantu bwa kwiatshila bitshibilo bibuwa abitukila mu mayi a kulonda e mu Bible. Byabya nsaa yatwiatshila bitshibilo pabitale kufwala na kwitshika kwa nyene, twi balombeene kulesha’shi atukyebe kwikala bantu beyishe abafubila Efile Mukulu.​—Mika 6:8.

¹⁹ Atushinguula na kwiyisha kooso’shi Yehowa e selele na mmusantu, na’shi miiya yaye ngilombeene kwituludika kalolo. Su atukyebe’shi betwate na kineemo na beyishe, abitungu tulonde miiya yaye mu muwa wetu. Kupopeela akuketukwasha dingi bwa kuneemeka abipusha bantu na mweneno aabo.

20. Nfwadilo na ntshibilo sunga kwitshika kwetu kwa nyene bi na bukitshishi kinyi kwi bangi?

²⁰ Abitungu’shi nfwadilo eetu aleeshe patooka’shi twi bafubi ba Yehowa. Miiya ya Yehowa i kunundu, na twi na muloo wa kwiyitumikila. Atwele bakwetu balume na bakashi mboko kwiyilu mu kibungi bwa nfwadilo na mwikeelo wabo wibuwa, abikaka bantu be na mashimba ebuwa ku mukandu wibuwa aupaasha myuwa yabo bwa kutumbisha na kupa Yehowa muloo wibungi. Nsaa yatwata bitshibilo bibuwa pabitale bilamba, atuyididiila na kupa Yehowa ntumbo Aye “mufwale kineemo na nkumo.”​—Misambo 104:1, 2.