BA MWIKEYILU—BE KWANKA BINYIBINYI SU? MWANDA WABO NGWITUTALE NAMINYI?
Ba mwikeyilu mbalombene nkukwasha naminyi?
Ba mwikeyilu basha lulamato abekalaa bepane mu myanda ya bantu na abafubaa ngofu bwa kulombasha kikyebe ky’eshimba dya Yehowa. Efile Mukulu pabadi mupangye nsenga, ba mwikeyilu ‘abaayimbanga pamune . . ., naa baana booso b’Efile Mukulu babeelele musaase wa kusepeela.’ (Yoobo 38:4, 7) Mu kukila kwa mafuku, ba mwikeyilu mbaleshe lukalo lukata lwa “kubandjila” kulombana kwa matemuki a myanda ayikekala pa nsenga mu mafuku aafiki.—1 Mpyeele 1:11, 12.
Bible alesha’shi ingi misusa ba mwikeyilu babadi bakalwile balangwidi ba binyibinyi bwa kulombasha kikyebe ky’eshimba dy’Efile Mukulu. (Misambo 34:7) Bu kileshesho:
-
Nsaa ibadi Yehowa mubutule kibundji kya Sodoma na Gomore pa mwanda wa buntomboshi bwa bantu abadi mwanka, ba mwikeyilu abakwashishe Loota muntu badi mululame na kifuko kyaye bwabadya kusuuka.—Kibangilo 19:1, 15-26.
-
Mu Babilone a kala, nsaa ibabadi batshibile ba nsongwalume basatu bena Ebelu kimu kya lufu bwa kwibeela mu nfuulo a kaalo, Efile Mukulu ‘batumine umune a ku ba mwikeyilu bê bwa kupososha [bafubi baye].’—Ndanyele 3:19-28.
-
Kunyima kwa Ndanyele muntu mululame kukisha bufuku bushima mu bwina bwa ntambwe i bukyelo, badi mupatuule’shi bapanda mwanda ‘Efile mukulu batumu mwikeyilu aaye, bakanga mbangabanga ya ntambwe.’—Ndanyele 6:16, 22.
Ba mwikeyilu ababangile kukwasha bantu basha lulamato kubanga kala
BA MWIKEYILU ABADI BAKWASHE KAKONGYE KA BENA KIDISHITU BA KUMPALA
Ingi misusa, ba mwikeyilu abafubaa bu mikyendji y’Efile Mukulu abadi bakwatshishene midimo ya kakongye ka bena Kidishitu ba kumpala nsaa ibabadi na lukalo lwa bukwashi bwabadya kumona bya kulombasha mpàngo ya Yehowa. Bu kileshesho:
-
Mwikeyilu badi mubawile batumibwa abadi mu lukano kiibi kya lukano bwabadya kutuka na kutungunuka na kulungula mukandu wibuwa mu ntempelo.—Bikitshino 5:17-21.
-
Mwikeyilu badi mulungule Fidipe badi mulungudi a mukandu wibuwa bwadya kwenda mu eshinda dya ku kabaaka adikatuka ku Yeelusaleme bwa kwenda ku Gaza bwadya nkalungula mukandu wibuwa kwi mwina Etshopi bafikile mu kulangwila ku Yeelusaleme.—Bikitshino 8:26-33.
-
Nsaa ibadi Efile Mukulu mukumine’shi bantu bashi bena Yuuda bafikye bena Kidishitu, mwikeyilu badi mumwenekyele Korneye mukata a bena Looma mu kimonwa na kumulungula bwadya kwitanyina mutumibwa Mpyeele kwaye ku nshibo.—Bikitshino 10:3-5.
-
Mpyeele mutumibwa pabadi mu lukano, mwikeyilu badi mumumwenekyele na kumutusha mu lukano.—Bikitshino 12:1-11.
MUSHINDO ULOMBENE NKUKWASHA BA MWIKEYILU
Lelo uno, ta kwi kishinkamisho su nkimune akilesha’shi Efile Mukulu kwete kutuma ba mwikeyilu bwabadya kukwasha bantu mu bilengyeleshi mu mushindo wabadi bebileshe mu Bible nya. Anka pabitale ano mafuku eetu, Yesu bambile’shi: ‘Uno mukandu wibuwa wa Bufumu, aukalungulwa mu nsenga ishima; aukekala bu kamonyi kwi bantu ba maumbo ooso. [kunyima] nfudilo ayifiki.’ (Mateo 24:14) Ouku’shi balongi ba Yesu bakwete kukita uno mudimo mu bukunkushi bwa ba mwikeyilu su?
Ba mwikeyilu bakwete kukwasha bantu abalungula mukandu wibuwa mu nsenga ishima
Mukanda wa Kibafumbwilwe aulesha’shi, ba mwikeyilu be na muloo wa kukwasha bantu be pa nsenga ishima bwabadya kulonga bya kuuka Yehowa Efile Mukulu na mpàngo yaye bwa bantu. Yowano mutumibwa bafundile’shi: “Namwene ungi mwikeyilu badi apapama kunundu kwa mitwe ngofu. Badi na mukandu wibuwa wa looso wa kuukisha kwi bano bashaale pa nsenga: kwi eumbo dyooso, kisamba, mwakulo na mwilo ooso. Badi amba n’eyi di bukopo’shi: ‘Tshinaayi Efile Mukulu, mupeeyi ntumbo, mwanda bakumbana nguba a kiimu kyaye. Langwilaayi Mupangi a eyilu na nsenga, a mbuu na nsulo ya meema.’” (Kibafumbwilwe 14:6, 7) Myanda ibungi ikitshikye mu ano mafuku eetu ayilesha’shi ba mwikeyilu bakwete kukwatshishena mudimo wa kulungula mukandu wibuwa wa Bufumu mu nsenga ishima. Eyendo, nsaa ayinyongola nkitshishi a milwisho su ngumune na kwalukila kwi Yehowa, ‘akwikalaa muloo kwi ba mwikeyilu b’Efile Mukulu.’—Luka 15:10.
Nkinyi akikakitshika kunyima kwa kupudisha mudimo wa kulungula mukandu wibuwa? Kunyima, “bilwilo bya mwiyilu” bya ba mwikeyilu abakakwatshishena Yesu Kidishitu, aye mwikale Nfumu a ba nfumu, bwadya kulwa “ngoshi y’efuku dikata y’Efile Mukulu sha bukome booso” sunga Armagedone. (Kibafumbwilwe 16:14-16; 19:14-16) Ba mwikeyilu be bukome abakafubu bwa kulombasha kiimu ky’Efile Mukulu mu nsaa ayikafiki Nfumu Yesu bwa “kwiobwela kwi . . . bashi’abakookyela mukandu wibuwa wa Nfumwetu Yesu.”—2 Beena-Tesalonika 1:7, 8.
Byabya, ikala mushinkamishe’shi, ba mwikeyilu bakwete kukupasukila. Bakwete kwikalakasha ngofu bwa’shi bantu boso abakumina kufubila Efile Mukulu bekale bibuwa, na Yehowa mmufube nabo misango ibungi bwabadya kukankamika na kulama bafubi baye basha lulamato be pa nsenga.—Beena-Ebelu 1:14.
Byabya, ooso a kwatudi e na kitshibilo kikata kya kwata. Atukumina kwata kitshibilo kya kuteemesha na kukookyela mukandu wibuwa wabakwete kulungula mu nsenga ishima su? Ba Temwe ba Yehowa be mu kibundji kyenu be na muloo wa kukukwasha bodya kupeta myabi ya bukwashi bwabetupa kwi Efile Mukulu na kifulo kyoso ku bukwashi bwa ba mwikeyilu.
