“Kya-buntu kyooso kya muulo na bwedi booso bupwidikye abituukila mwiyilu kwi Yaaya sh’etaata.” (Shake 1:17) Uno verse akula pabitale kalolo ka Nshetu e mwiyilu, Yehowa Efile Mukulu. Na dingi, ku bya buntu byoso bibungi byabadi bape bantu kwi Efile Mukulu, kwi kimune kikile bingi byoso ku buwa. Nkya buntu kinyi? Mayi a Yesu abauku kwi bantu bebungi e mu mukanda wa Yowano 3:16, aetulungula’shi: “Efile Mukulu mmufule baa pano bikile, mu kipaso kyadi mupaane mwan’aaye eeleka, bwa’shi muntu ooso amukumiina tashiminanga, anka ayikale na muwa wa iikalaika.”

Kya buntu kya Mwan’eeleka a Efile Mukulu​—ngi kya buntu kikile bingi byoso ku buwa kyatudi bapete atwe boso, mwanda ku bukwashi bwakyo, twi balombene kupoososhibwa ku bupika bwa mulwisho, kununupa, na kufwa. (Misambo 51:5; Yowano 8:34) Sunga twekitshisha naminyi, ta kwi kintu kyatudi balombene kukita atwe ba nabene kilombene kwitutuusha mu buno bupika nya. Anka, mu kifulo kyaye kikata, Efile Mukulu betupeele kintu kibatudi nakyo lukalo ngofu bwatudya kutuuka mu luno lukano. P’aye kutusha Mwan’aye eeleka, Yesu Kidishitu, bu mulambu wa nkuulo, Yehowa Efile Mukulu mmupe bantu be na kukookyela mushindo wabadya kupeta muwa wa ikalaika. Kadi mulambu wa nkuulo nkinyi? Bwakinyi wi na muulo? Na twi balombene kwiupetela myabi naminyi?

Mulambu wa nkuulo nyi efuto dyabafutaa bwa kukuula sunga kwalusha kintu kishimine sunga kutuusha muntu e mu lukano. Bible apatuula’shi ba nkambwa betu ba kumpala, Adame na Eeva, abadi bapangibwe kushii mulwisho, na mwabi wa kwikala na muwa wa ikalaika mu mpaladiso pa nsenga pamune na bana bababadi balombene kutanda. (Kibangilo 1:26-28) Mwanda wa malwa, abadi bashimishe bino byoso p’abo kutombokyela Efile Mukulu​—kwamba’shi abafikile basha milwisho. Mbipeta kinyi bibatukile? Bible aluula’shi: “Milwisho ibatwelele pa nsenga pa mwanda wa muntu umune, Adame, yaya milwisho yafwisha lufu. Byabya lufu alukwata bantu boso mwanda boso mbalwishe.” (Beena-Looma 5:12) Pamutwe pa kupa bana babo muwa wa ikalaika, Adame badi mwibape mulwisho na mwanda wibubi autuukila ku mulwisho, lufu.

Pabitale nkuulo, bibadi abitungu kufuta kintu ki mumune na kibadi kishimine. Adame pabadi mupele kukookyela Efile Mukulu, bakitshine mulwisho, na kipeta, badi mushimishe muwa wa bu muntu mupwidikye​—kwamba’shi muwa wa Adame. Muyile abyakula Bible, uno mwanda ubatwesheshe bana ba Adame boso mu bupika bwa mulwisho na lufu. Pa mwanda wa byabya, bibadi abitungu’shi ungi muntu mupwidikye alambule muwa waye​—nkwamba’shi, muwa wa Yesu—eutushe bu mulambu bwa kupososha bantu boso ku buno bupika. (Beena-Looma 5:19; Beena-Efeso 1:7) Bu bibadi Efile Mukulu mutushe uno mulambu na kifulo kyoso, ngi bwakinyi bantu boso be na mushindo wa nkapeta kintu kibabadi bashimishe kwi Adame na Eeva​—muwa ushi na mpwilo mu mpaladiso pa nsenga.​—Kibafumbwilwe 21:3-5.

Patutala kulombana kwa ino myanda yatupete ku bukwashi bwa mulambu wa nkuulo, ngi bwakikyi atwakula kushi mpaka’shi, kya buntu ky’Efile Mukulu kya mulambu wa nkuulo, akitupetesha mushindo wa nkapeta muwa wa ikalaika, ngi kya buntu kikile byoso ku buwa. Bwa kuuka bwakinyi ngwikale “bwedi bupwidikye,” tubandeyi kutala mushindo, waulombasha myanda ayitutakula  bwa kwata kya buntu na muulo ukata, bu byatudi bebiteemune mu mwisambo ubashala.

Aulombasha myanda yatukumina. Atwe bantu atukuminaa kutungunuka na kwikala kwanka kushi kufwa. (Mulungudi 3:11) Sunga byekala’shi atwe banabene ta twi na ngobesha ya kulombasha uno mwanda watudi bakumine, mulambu wa nkuulo awitupa mushindo wa kupeta muwa wa ikalaika. Bible akula’shi: “Mwanda efuto dya milwisho ndufu; kipebwa kya buntu bw’Efile mukulu naamu nyi mmuwa wa iikalayika mwi Yeesu Kidishitu Mfumwetu.”​—Beena-Looma 6:23.

Aulombasha lukalo lwetu. Bantu ta be na ngobesha ya kutusha mulambu wa nkuulo nya. Bible apatuula’shi: “Nkulo ya muwa ngikile bukopo, ta kwi kipaso kya kwiyilombasha nya!” (Misambo 49:8, EEM) Byabya, tubadi na lukalo lukata lwa’shi Efile Mukulu etukwashe bwatudya kutushibwa mu bupika bwa mulwisho na lufu. Anka ku bukwashi bwa “kipandjilo kitutwadile Yesu Kidishitu,” Efile Mukulu mmwitupe kintu kibatudi nakyo lukalo ngofu.​—Beena-Looma 3:23, 24.

Ngutushibwe pa nsaa ilombane. Bible etulungula’shi: “Kidishitu betufwidiile pabatudi tuki basha milwisho.” (Beena-Looma 5:8) Bu bibabadi beutushe “pabatudi tuki basha milwisho,” mulambu wa nkuulo awitushinkamisha bi bukata bwa kifulo kyabadi betufule kwi Efile Mukulu sunga twekala mu milwisho. Na awitupa mushindo watudya kunyingiila sunga twekala na myanda ayituukila ku mulwisho.

Mbeutuushe na binangu bibuwa na bya kwisumina miloo. Bible alesha patoka kibatumine Efile Mukulu bwadya kutusha Mwan’aye bu mulambu. Akula’shi: “Talaayi bibalesheshe Efile Mukulu kifulo kyaye, baatumine Mwan’aye eeleka pa nsenga, bwa’shi twikeele na muwa mwadi. Kinyi kifulo ki bino: ta nnatwe babekeele bafule Efile Mukulu, anka nnaye mwitufule.”​—1 Yowano 4:9, 10.

We kulesha naminyi’shi we na lutumbu bwa kino kya buntu kikile byoso ku buwa? Tentekyesha mayi a Yesu e mu Yowano 3:16 aalesha’shi: nka penda baba ‘abakumina’ sunga kwikala na lukumino mwadi ngi abakapanda. Muyile Bible, lukumino “nyi nkipaso kya kushinkamisha kwikala kwa kyaakya kyatukulupila.” (Beena-Ebelu 11:1) Bwatudya kwikala na kushinkamisha, abitungu twikale na kiukilo kya binyibinyi. Ngi pa mwanda kinyi, atukutekye bodya kwata nsaa ya kulonga bwa kuuka Yehowa Efile Mukulu, aye Mwitupe “bwedi bupwidikye” na bodya kuuka myanda ayitungu’shi okite bwa nkapeta muwa wa ikalaika oodi mulombene kupeta ku bukwashi bwa mulambu wa nkuulo wa Yesu.

We kulonga bino byoso pa kutalula myanda ya mu Bible i mu Internete mu www.pr418.com. Ba Temwe ba Yehowa be na muloo wa nkukwasha. Twi bakulupile’shi pano pabobadika na kupusha myabi yatukapetela ku kya buntu kikile byoso ku buwa, okapusha muloo wa kwakula’shi: “Lutumbu kwi Efile Mukulu pa kukiila kwi Yesu Kidishitu Nfumwetu!”​—Beena-Looma 7:25.