Bino ngi bibapushishe kangi ka nsongwakashi ke na bipwa 13 nsaa ibakapetele ki popi kya mbwa kibabekapeele bu kya buntu. Ungi mwana mukashi akitaa mudimo wa busunga badi mwakule’shi, ordinatere ababamupeele kwi nshaye pabadi ku kilongyelo kikata ngi kya buntu kikata kishintuule nshalelo aaye. Ungi mwana mulume mukatukye mu kwibakila badi mupushe’shi ka mukanda kababadi bamufundile ku maboko kwi mukashi’aye mu musangeelo wabo wa kipwa kimune kunyima kwa kwiyibakishena ngi kya buntu kikile buwa kyadi mupete.

Ku kipwa kyoso, bantu bebungi abakishaa nsaa na bukome bwibungi mu kukimba bintu “bikile buwa” byabadi balombene kupa bakuuku sunga bakwabo mu nsaa ya mwanda kampanda. Na dingi bantu bebungi abakuminaa’shi bantu babapa bakule mayi bu ano abadi bakule kunundu. Obe namu we kwamba naminyi? Okumina kupa bantu sunga kupeta bya buntu byabasankila ngofu su?

Uno mwanda wi na muulo kushii penda pa mwanda wa bukitshishi bulombene kwikala na kya buntu kwi muntu ekitambula, kadi, mpa na pa mwanda wa mushindo ulombene kupusha winyi ekitusha. Ku nfudilo a byoso, Bible akula’shi: “Mwabi wa mu kupaana ngukile wa mu kupeebwa.” (Bikitshino 20:35) Byabya, muloo aupetaa muntu apaana ngulombene kunyisha kutama su kinyi kya buntu bekyata na muulo ngofu kwi winyi ababekipa.

Byabya, we kukita naminyi bwa’shi kya buntu kyobe kikupeteshe muloo wa binyibinyi mpa na kwiupetesha winyi wekipa? Na dingi su twe na mushindo wa kupa muntu kya buntu “kikile buwa ku byoso,” we kukita kinyi bwa’shi muntu oopa asankile kya buntu kyobe?