“Bantu booso bafikye koodi obe opushaa nteko yeetu.”​—Misambo 65:3, EEM.

Bangi bantu abatekaa mwanda abamba’shi kukita byabya akwibesha kalolo, sunga bekala abapwandikisha’shi takwi muntu ebapusha. Luteko ntampenda kintu akitukwasha bwa kwipusha kalolo na kumona byakukila na myanda yeetu nya. Bible etushinkamiisha’shi “Yehowa * epeepi na booso abamwididi, bano booso abamwididi mu binyibinyi. . . . Atemeshaa misaase yaabo na ebapasha.”​—Misambo 145:18, 19.

Twibalombene kushinkamisha’shi, Yehowa atemeshaa nteko ya balangwidi baaye. Nakifulu kyoso akula’shi: “Byabya anukangitanyina na kunteka, ami namu nakenupushisha.”​—Yeelemiya 29:12, EEM.

“Ikalayi na katshintshi mu nteko.”​—Bena-Loma 12:12.

Mu Bible abetunyingisha bwa “kutungunuka na kuteka” na “kuteka mu myanda yooso.” Mu binyibinyi Yehowa akumiina’shi tumutekye.​—Mateo 26:41; Bena-Efeso 6:18, NWT.

Bwakinyi Efile Mukulu akumiina’shi tumutekye? Bu kileshesho: Muledi kinyi shakukumina’shi mwana’aaye amulugule’shi “papa we kunkwasha namu”? Byabya muledi mulombene kubadiila kuuka nkalo ya mwan’aye na byepusha, anka papusha mwan’aye amutekye bukwashi, abilesha’shi mumukulupile na be mu kipwano ki buwa. Mu mushindo umune patutekye Yehowa Efile Mukulu atulesha’shi twibamukulupile na akumiina’shi twifubwile peepi naye.​—Nkindji 15:8; Shake 4:8.

“Munyenyekyeyi myanda yooso ayinukalakasha, mwanda nee kwete kwinupasukila.”​—1 Mpyeele 5:7, EEM.

Efile Mukulu akumina’shi tumutekye mwanda mwitufule na etupasukilaa. Efile Mukulu awuku myanda yooso pabitale nkalakashi yeetu na akumiina kwitukwasha.

Mfumu David mu nshalelo aaye ooso baadi atekye Yehowa bukwashi na kumulungula bi binagu byaaye na bibaadi epusha. (Misambo 23:1-6) Efile Mukulu bapushishe naminyi pabitale David? Efile Mukulu baadi mufule David na baadi atemesha nteko yaaye. (Bikitshino 13:22) Mu mushindo umune Efile Mukulu atemeshaa nteko yeetu mwanda etupasukilaa.

Ano nyi mayi abafundile umune a ku tuyimba twa misambo mu Bible. Baadi mushinkamishe’shi Yehowa atemeshaa nteko yaaye, na bino bibaadi bimukwashe ngofu. Baadi epusha peepi n’Efile Mukulu na baadi apete bukome bwa kunyingila nkalakashi na twinyongoshi tubaadi nato mu nshalelo.​—Misambo 116:1-9.

Pabatudi bashinkamishe’shi Efile Mukulu apushaa nteko yeetu, tubatungunukile na kwisamba naaye. Tubande kutala myanda ibaadi ifikile Pedro mushalele kunundu kwa Espagne. Bafwishishe nsongwalume’aye a bipwa 19 ku masaku a motoka. Mu twinyongoshi twaye Pedro baadi mulungule Efile Mukulu byoso bibaadi epusha, baadi atekye misusa ibungi bwa kunyingishibwa na kupeta bukwashi. Nkinyi kibaadi kikitshikye? Pedro nabene amba’shi: “Yehowa baadi mwalule ku nteko yande, aye nkunyingisha mukashi’ande nkukwatshishena na ami nkupeta bukwashi bwa bakwetu bena Nkidishitu.”

Sunga mwana’aye tabaadi musangukye, luteko lubaadi lunyingishe Pedro ngofu aye na kifuko kyaaye. Mukasha’aye María Carmen alesha’shi: “Kwela nteko kubaadi kunyingishe bwa kukambila nkalakashi yaande. Naadi naukushi Efile Mukulu ampusha mwanda, panaadi namutekye, naadi nampusha butale na kufukama.”

Bible na myanda imone bantu ayilesha binyibinyi’shi Efile Mukulu apushaa nteko. Na abimweka’shi Efile Mukulu taalulaa ku nteko yoso. Bwakinyi Efile Mukulu alulaa inyi nteko na kuleka ingi?