Bible—nyi nsulo ya bya binyibinyi ya kukulupila
Kubanga kala, bantu belekenelekene abataa Bible bu mukanda wa bya binyibinyi wa kukulupila. Lelo uno, midiyo ya bantu bakwete kulonda malongyesha aaye. Anka bangi namu, abamonaa Bible bu mukanda wa myanda ipwe kukila sunga wa myanda ya mpwandikisho. Obe opwandikisha naminyi? We kupeta bya binyibinyi mu Bible su?
WE MULOMBENE KUKULUPILA BIBILE
Mbikunyi byodya kushinkamisha’shi abitungu okulupile Bible? Twate kileshesho: Su kuuku oobe ekala akulungula nka bya binyibinyi munda mwa bipwa bibungi, we kumukulupila ngofu. Bible, e nka bu yawa kuuku, akulaa nka bya binyibinyi? Banda kutala ino ndambo ya bileshesho.
Bafundji ba binyibinyi
Bafundji ba Bible mbantu basha kululama, mbakule mpa na bilubilo byabo. Bu kileshesho, mutemuki Yoona bafundjile pabitale kukutwa kukokyela kwaye. (Yoona 1:1-3) Mmufudiishe mukanda waye na kulesha bibaadi Efile Mukulu mumunyokye, kadi tamuleshe bibaadi mulumbuule binangu byaye’ye nabene. (Yoona 4:1, 4, 10, 11) Kululama kwa bafundji ba Bible akulesha’shi abaadi abakumiina kwakula penda bya binyibinyi.
Mukanda wa malango ebuwa
Bible atushaa malango ebuwa pabitale myanda kampanda ayitungu kukita su? Oolo. Bu kileshesho, tala byakula pabitale kulama kipwano kibuwa na bangi: “Byabya byoso by’okyebe’shi bantu bakukitshine, ebakitshine namu byanka.” (Mateo 7:12, EEM) “Lwaluulo lwa kalolo alubatshikaa nsungu, anka kishima kibi akikaamishaa nsungu.” (Nkindji 15:1) Oolo, bya binyibinyi bya mu Bible bi na muulo ukata lelo uno nka bu byabibaadi nao mafuku ababadi bamufunde.
Akula myanda yakala nka byaidi
Bintu bibungi byabadi bende na kufumbula kwi bantu abikimbuulaa myanda ya kala, abilesha bantu na ma mbalo abaadi kwanka binyibinyi, mpa na myanda ikitshikye yabadi bakwile mu Bible. Bu kileshesho, tubande kutaluula kishinkamiisho pabitale uno mwanda. Bible amba’shi mu mafuku a Neemiya, bena Tiire abaadi bashale mu Yeelusaleme “abafwishanga . . . mishipa na bingi bidibwa byabo bilekenelekene.”—Neemiya 13:16, EEM.
Kwi kishinkamiisho kampanda akilesha’shi uno verse a mu Bible mmwakule bya binyibinyi su? Oolo, kiikudi. Bantu abakimbuulaa bintu bya myanda ya kala mbafumbule bintu bibabadi abaudisha kwi bena Tiire abilesha’shi bena Tiire na bena Isaleele abaadi abeudishena bintu binyibinyi. Akupu, abaadi bafumbule nsele ya mishipa ya mu Kalunga ka Maditerane mu Yeelusaleme. Bantu abakimbuulaa bintu bya myanda ya kala abalesha’shi, yaya mishipa abaadi bafikye nayo kwi ba nsunga abaadi bashale ku kyese kya kaka kalunga. Kunyima kwa kutaluula bishinkamiisho, ungi muntu ataluula myanda ya mu Bible amba’shi: “Myanda yabadi bakule mu mukanda wa Neemiya 13:16 shi bena Tiire abaadi abaudisha mishipa mu Yeelusaleme ngya binyibnyi.”
Awakula myanda ya sianse nka byaidi
Bible nyi mukanda wa myanda y’Efile Mukulu na ya kala. Kadi pawakwila myanda ya sianse, awiyakula’nka byayidi. Banda kutala kileshesho kimune.
Takudi bipwa bifikye ku 3 500, Bible bakwile’shi nsenga ngipudikwe “pashii kintu.” (Yoobo 26:7) Bino mbilekene ngofu na mpwadikisho ya bantu ibaadi ayamba’shi nsenga i pa meema sunga’shi ngishaale pa nkofu mukata. Bipwa pangi 1 100 kunyima kwa mukanda wa Yoobo kufundjibwa, bantu babadi nka na mpaka’shi nsenga ta ngilombene kwikala pashii kintu, ngishale nka ku kintu kampanda. Takudi bipwa bikile pa nkama isatu, mu 1687, Isaac Newton baadi mutuushe mukanda pabitale bukome abulamaa bintu pa nsenga bwabetamina bu gravité na alesha’shi nsenga mbeilame kwi bukome kampanda bushabumweka. Uno mwanda ukata mu myanda ya sianse ubaadi ushinkamishe kibakwile Bible bipwa bikile pa 3 000 kumpala!
Awakula matemuki nka byaadi
Mushindo kinyi wikale matemuki ebungi a mu Bible a binyibinyi? Banda kutala kileshesho kimune: Mutemuki Yeeshaya baadi mutemukye pabitale kupona kwa Babilone.
Butemuki: Mu kipwa kya mwanda kumpala kwa bipungo byetu (K.B.B.), Yeeshaya mufundji a Bible, baadi muleshe’shi Babilone—baadi epata dya empire e bukome—baadi na kya kubutulwa na ta mu baadya kushala dingi muntu. (Yeeshaya 13:17-20) Yeeshaya baadi mpa na mutemune eshina dya yawa badya kumubutula—Siiruse. Baadi dingi muleshe mayele a Siiruse, pa kulesha’shi meema ‘aakakama.’ Baadi dingi mutemukye’shi biibi bya lupata abikekala bilekye mwaasa.—Yeeshaya 44:27–45:1.
Kulombana kwabo: Bipwa pangi 200 kunyima kwa Yeeshaya kutemuka, nfumu a bena Perse baadi mubutule babilone. Eshina dyaye nnanyi? Siiruse. Bu bibaadi Babilone mwifunyishwe na bimano bibukopo, Siiruse baadi mukamishe Mwela wa Efrate ubaadi wifunyishe Babilone. Basalayi baaye abaadi babundule mukola kunundu kwa mwela bwa kutuma meema a mwela kungi. Meema a mwela abaadi akame ngofu na basalayi ba Siiruse nkupeta mushindo wa kusabuka mwela ku ngwa, na nkufika ku bimano by’eumbo. Bena Babilone abaadi balekye biibi bya ku lupese lwa mwela bishitulwe! Basalayi ba Siiruse abatwelele mu Babilone ku bibelo bifungule na nkumubutula.
Dingi kwi ungi mwanda: Mu Babilone mmushale nka mushi bantu? Bantu abaadi bemushale munda mwa bipwa nkama. Kadi, Lelo uno kinkulu kya Babilone—peepi na Bagdad, mu Iraq—akishinkamisha’shi bwabwa butemuki bubaadi bulombane booso. Oolo, Bible nga kukulupila sunga nsaa yakula bwa myanda ayikafiki mu mafuku e kumpala.
