Eshina dy’Efile Mukulu nnanyi? Efile Mukulu nabene amba’shi: “Nnaami Yehowa, Dyaadya ngi eshina dyande.” (Yeeshaya 42:8) a Eshina dy’Efile Mukulu mbedifunde mu Bible misusa 7 000. Kadi, mu ma Bible ebungi abadi baluule, mbedipyanyikye na myasu bu “Mwanana.” Efile Mukulu akumiina’shi wekale kuuku aye, byabya kwete akutekye bwa ‘kupalakasha nkumo y’eshina dyaye.’​—Misambo 105:1.

Myasu ya Yehowa. Mu Bible kwi ma mbalo abadi batemune Yehowa mu myasu bu “Efile Mukulu,” “Sha bukome booso,” “Mupangi,” “Yaaya,” “Mwanana,” na “Nfumu.” Mu nteko ibungi i mu Bible yabadi bele kwi Yehowa mbamutemune mu yaya myasu ya kinemo mpa na mwishina dyaye dya bu Yehowa.​—Ndanyele 9:4.

Bi Efile Mukulu. Efile Mukulu tamwekaa mwanda nkikudi. (Yowano 4:24) Bible amba’shi “takwi muntu su ngumune tabaamwene Efile Mukulu.” (Yowano 1:18) Bible mmuleshe bi binangu bya Yehowa. Bantu be kumwinyongosha, sunga ‘kumusangasha.’​—Nkindji 11:20, EEM; Misambo 78:40, 41.

 Ngikashi ya kukanya y’Efile Mukulu. Efile Mukulu te na ntondo kwi bantu ba miilo yoso na ba nshalelo yoso. (Bikitshino 10:34, 35) Dingi e na “lusa na kalolo, shaakwataa nsungu bukidi, muule na kifulo na boolokye [na bya binyibinyi].” (Efilu 34:6, 7) Anka, Efile Mukulu e na ngikashi inanka i na muulo.

Bukome. Nyi “Efile Mukulu sha bukome boso,” e na bukome bushi mpwilo bwa kukita kyoso kyadi mulee.​—Kibangilo 17:1, EEM.

Binangu. Binangu by’Efile Mukulu mbikile bya bantu boso. Nyi bwakinyi Bible amba’shi “sha-binangu buupenka bwaye.”​—Beena-Looma 16:27.

Kululama. Efile Mukulu akitaa nka myanda ilulame. Bikitshino byaye ‘mbipwidikye’ na ‘mmululame.’​—Miiya Ikituulwe 32:4.

Kifulo. Bible amba’shi “Efile Mukulu nyi nkifulo.” (1 Yowano 4:8) Taleshaa penda kifulo nya​—aye nyi nkifulo. Kifulo kyaye kikile bukata nyi akimutakulaa mu myanda yoso y’akitaa, na bino abitukwashaa mu mishindo ilekenelekene.

Kipwano ky’Efile Mukulu na bantu. Efile Mukulu nyi Shetu e mwiyilu sha kifulo. (Mateo 6:9) Su twekala na lukumiino mwadi, twibalombene kwikala ba kuuku baye. (Misambo 25:14) Na dingi, Efile Mukulu akwitamina bodya kwifubwila pepi naye mu luteko na ‘kumulubwila mpobo yobe yoso, mwanda aye kwete nkulama.’​—1 Mpyeele 5:7; Shake 4:8.

Yesu t’Efile Mukulu nya. Yesu ngungi muntu​—naye muntu a kumpala ababapangile kwi Efile Mukulu. Nyi bwakinyi Bible amwitamina bu Mwan’Efile Mukulu. (Yowano 1:14) Kunyima kwaye kupanga Yesu, Yehowa baadi mufube na mwanaye mbedi bu “mukwashi” bwa kupanga bingi bintu byoso.​—Nkindji 8:30, 31; Beena-Kolose 1:15, 16.

Kasha Yesu Kidishitu takimbile kwikaka bu Efile Mukulu. Kadi amba’shi: “ami nafiki kwadi, mwanda  aye [Efile Mukulu] nyi muntume.” (Yowano 7:29) Nsaa ibaadi esamba na balongi baye, Yesu baadi mwitamine Yehowa’shi “Nshami na Nsheenu” na bu “Efile Mukulu ande n’Efile Mukulu eenu.” (Yowano 20:17) Kunyima kwaye kufwa, Yehowa baadi mumusangule bwa kwikala na muwa mwiyilu na mmumupe matalwa ebungi a kwikala ku mboko Yaye ibalume.​—Mateo 28:18; Bikitshino 2:32, 33.

Yesu kidishitu e nkukwasha bwa kwifubwila peepi n’efile mukulu

Yesu bafikile pa nsenga bwa kwitulongyesha pabitale Nshaye. Yehowa bakwile pabitale Yesu’shi: “uno nyi Mmwan’ande a kifulo kikata, muteemesheeyi.” (Maako 9:7) Yesu euuku Efile Mukulu kukila bantu boso. Bambile’shi: “Takwi muntu ashingula bi Mwan’ee, anka penda Yaya. Takwi muntu ashingula bi Yaya anka penda Mwan’ee nabene.”​—Luka 10:22.

Yesu baadi mwambule ngikashi y’Efile Mukulu mu mushindo upwidikye. Yesu baadi mwambule ngikashi ya Nshaye mu mushindo kipwidikye, nyi bwakinyi bambile’shi: “Mmumone mmumone Yaaya.” (Yowano 14:9) Yesu baadi akaka bantu kwi Efile Mukulu pa kwambula kifulo kya Nshaye mu ngakwilo na bikitshino byaye. Bambile’shi: “Ami nee eshinda, nee biinyibiinyi, nee muuwa. Muntu su ngumune ta kwenda kwi Yaaya kushii kukiila kwandji.” (Yowano 14:6) Bambile dingi’shi: “Balangwidi b’eyendo abakalangwila Yaya mu kikudi na mwiyendo ; mwanda namu Yaya akimbi [balangwidi] be biabia abamulangwila.” (Yowano 4:23) Banda kunangushena! Yehowa kwete kukimba bantu be byodi, bantu abakumiina kuuka bya binyibinyi pa bimutale.