Munda mwa bipwa binunu, takwi muntu su ngumue baadi auku lwaluulo ku luno lukonko. Pa mwanda wa byabya, bipupa na mikumbo ya lwambu mbipee midiyo ya bantu. Bena sianse abaadi batundule akufiki yaya mikumbo. Abaadi batundule’shi mikumbo abeyifwishaa kwi ma microbe bu ma bacterie na ma virus. Kuuka byabya nkukwashe bantu bwa kupela kukwatshibwa na mikumbo sunga bwa kwiyibuka, na byabya mbikwashe midiyo yabantu bwa kwikala na muwa mafuku ebungi na mbidi bukome.

Twi kwamba kinyi pabitale ingi nkonko i na muulo? Kukimba bya binyibinyi pabitale ino nkonko ayilondo kwi nkukwasha naminyi?

• Efile Mukulu nnanyi?

• Yesu Kidishitu nnanyi?

• Bufumu bw’Efile Mukulu nkinyi?

• Nkinyi kyatukapete mu mafuku e kumpala?

Midiyo ya bantu mbapete ngaluulo ku ino nkonko na mbalumbule nshalelo aabo. Ino ngaluulo i nkukwasha n’obe namu.

We kwiyipusha’shi, ‘Mbibofule bwa kupeta bya binyibinyi mu myanda yoso su?’ Kadi,  kupeta bya binyibinyi pabitale myanda ibungi akumweka bu kukwetu kwela bukopo. Bwakinyi?

Bantu bebungi tabakulupilaa dingi mwi mbulamatadi, bansunga sunga bisashi na Internete bwa kwibalungula bya binyibinyi. Abamonaa bu bi bukopo bwa kushinguula bya binyibinyi na mweneno ya bantu, ndambo ya binyibinyi, na madimi abalesha kwi bantu bu myanda ya binyibinyi. Mwanda wa myanda ya madimi ikile bungi, bantu tabakulupila bangi nya, nyi bwakinyi sunga mwanda wekala wa binyibinyi, tabeukumiina sunga wekala wibatale.

Sunga mbyakudi yaya nkalakashi, mbibofule bwa kupeta ngaluulo ku nkonko i na muulo ya mu nshalelo. Mushindo kinyi? Pakukita nka byokitaa mafuku oso bwa kupeta ngaluulo ku nkonko kampanda.

Misango ibungi, okimbaa bya binyibinyi efuku dyoso. Banda kutala mwanda wa Jessica. Amba’shi “Su mwana ande mukashi a bipwa 12 adya nyimu, ayimukitshi bibubi, eyidiila sunga mu kingi kintu, bi masaku.” Kumpala kwa kuula bidibwa byoso, bibaadi abitungu’shi Jessica ekale mushinkamishe’shi bi buwa bwa mwan’aye. Amba’shi: “Nabadiilaa kubadika tukanda twabalamikaa ku byakudya bwa kutaluula bi mwanka. Akupu, nakimbuula mpa na kwitamiina basha byabya bintu bwa kuuka su tambemusangye nyimu. Nakimbuula dingi kwi bangi bantu abauku yawa sosiete bwa kushinkamisha’shi abateekaa bidibwa bibuwa.”

Kwitatshisha kobe bwa kupeta ngaluulo ku nkonko ya mu nshalelo obe, takwi lukalakashi bu kwa Jessica, kadi nka bu Jessica, we kukita bino abilondo bwa kukimba ngaluulo ku nkonko yodi nayo:

• Uuka bi mwanda.

• Kimbuula.

• Shinkamisha’shi mbalo yokimbuula ibuwa.

Bino mbilombene nkukwasha bwa kupeta ngaluulo ya binyibinyi ku nkonko ikata ya mu nshalelo oobe. Mushindo kinyi?

Pabaadi akimbuula bwa kupeta bya binyibinyi bya mu Bible, Jessica baadi mufubishe nka aa mayele afubishaa pa kukimbula bidibwa bibuwa bwa mwana aaye. Amba’shi: “Kubadika kalolo na kukimbuula nkunkwashe bwa kupeta bya binyibinyi bya mu Bible.” Nka bu Jessica, midiyo ya bantu mbalongye akyakula Bible pabitale ino nkonko ayilondo:

• Bwakinyi twi pano pa nsenga?

• Nkinyi akikitshikaa apafu muntu?

• Bwakinyi kwi makyenga?

• Efile Mukulu kwete kukita kinyi bwa kupudisha makyenga oso?

• Mbikunyi byatudya kwikala na nshalelo a muloo mu kifuko?

We kupeta ngaluulo ku ino nkonko na ingi pa kubadika Bible na kukimbuula mu www.pr418.com ku Internete.