MWANDA AUKAANYISHA BANTU NGOFU! Mupangi eetu mmwitulee’shi aketupa muwa wa ikalaika, pano pa nsenga. Anka, bantu bebungi, abapusha bukopo bwa kukumina uno mwanda. Abamba’shi: ‘Muntu oso e na kya kufwa kunyima kwa mafuku. Ngi bibabadi balumbuule bwa’shi muntu ekale atandjikwa na kufwa.’ Bamo abamono’shi bantu mbalombene kwikala na muwa wa ikalaika, anka kushi pano pa nsenga. Abakula’shi muntu mulombene kupeta muwa wa ikalaika nka su baafu na bende mwiyilu. Obe namu omono naminyi?

Kumpala kwa kwaluula luno lukonko, bwakinyi twe mulombene namu kutala akyamba Bible pabitale ino nkonko isatu: Mushindo ubabadi bapangye muntu aulesha’shi badya kwikala na muwa munda mwa mafuku bungi kinyi? Efile Mukulu badi na mpàngo kinyi bwa nsenga na bwa bantu ku kibangilo? Lufu lubatwelele mwi bantu naminyi?

Mu bintu byoso bi na muwa byabadi bapangye kwi Efile Mukulu pa nsenga, bantu mbapangibwe mu mushindo wi pa bwao. Mu mushindo kinyi? Bible alesha’shi nka penda bantu ngi babadi bapangibwe “kwifwanyiko” na mu kifwanyi ky’Efile Mukulu. (Kibangilo 1:26, 27) Bino abipushisha kinyi? Abipushisha’shi bantu mbebape mwikeelo na ngikashi ifwanene na y’Efile Mukulu nabene, bu kifulo na kululama.

Na dingi, bantu mbebape ngobesha ya kunangushena, pamune na ngobesha ya kushinguula kibuwa na kibubi, na kwikala na lukalo lwa kuuka na kwikala mu kipwano n’Efile Mukulu. Ngi bwakinyi twi balombene kusangeela bintu bilekene bi mwiyilu na bi pa nsenga na bintu bibuwa bitwifunyishe, bu bintu byabadi basole, misambo, na ngono. Kunundu kwa byoso, nka penda bantu ngi be na ngobesha ya kulangwila Mupangi aabo. Ino ngikashi ngikashe bantu bu beleekene bikata na bingi bipangwa byoso bi na muwa bi pa nsenga.

Byabya, banda kunangushena uno mwanda: Efile Mukulu badya kupa bantu ino ngikashi, mpa na mushindo wa kwiyitamisha, su badi mupangye bantu bwabadya kwikala na muwa penda munda mwa bipwa bipeela su? Mwanda wa binyibinyi wi’shi, Efile Mukulu bapeele bantu ino ngikashi i pa bwayo na ngobesha bwa’shi bekale na muwa pano pa nsenga bwa ikalaika.

Anka, bangi bantu abamba’shi, Efile Mukulu tabadi akumina’shi bantu bekale na muwa wa ikalaika pa nsenga. Abamba’shi nsenga abadi beyipangye bwa’shi bantu bekale abemushala bwa mafuku apeela, bu  mbalo ya kutompa bantu bwa kumona bantu balombene kwenda mwiyilu na kwikala na muwa wa ikalaika pamune n’Efile Mukulu. Kadi su bino mbya binyibinyi, tabibadya kwikala’shi, Efile Mukulu ngi nsulo ya myanda yoso i bubi i pa nsenga su? Bino bibadya kwikala bikutwene na ngikashi y’Efile Mukulu. Bible akula bino pa mwanda w’Efile Mukulu: “Mwatambukila mooso mmululame; nyi Efile Mukulu a lulamato; mwadi ta mwi kukutwa bululame dingi nsha-kalolo.”—Miiya Ikituulwe 32:4.

Bible alesha kalolo bikale mpàngo y’Efile Mukulu ya ku kibangilo bwa nsenga mu bino bishima: “Eyilu nyi eyilu dya Yehowa, anka nsenga, mmwiyipe bantu.” (Misambo 115:16) Eyendo, Efile Mukulu bapangile nsenga bwayidya kwikala kishalelo kibuwa na ki kwanka bwa ikalaika bwa bantu, aye nkwimutuula bintu byatudi nabyo lukalo bwa kusankila muwa ushi na nfudilo.—Kibangilo 2:8, 9.

“Eyilu nyi eyilu dya Yehowa, anka nsenga, mmwiyipe bantu.”

Bible apatula kalolo bi mpàngo y’Efile Mukulu bwa bantu. Bapeele mulume na mukashi ba kumpala mudimo wa ‘kuwusha nsenga, na kudya bufumu . . . pa tonyi twa mwiyilu na nyema yoso i pa nsenga.’ (Kibangilo 1:28) Babadi na kinemo kikata kya kutamisha Mpaladiso pa nsenga! Byabya, miloo ibadi ilombene kupeta Adame na Eeva na bana babo nyi muwa wa ikalaika pa nsenga, ta mbwedi bwa kwenda mwiyilu nya.

Kadi, bwakinyi tukwete kufwa? Bible alesha’shi kingi kipangwa ky’Efile Mukulu kya mu kikudi, kyabadi betamine kunyima bu Satana Diabulu ntomboshi, kibatompele kulwisha mpàngo y’Efile Mukulu mu Edene. Bibadi naminyi?

Satana badi mukakye baledi betu ba kumpala, Adame na Eeva bwabadya kumulonda mu kutombokyela Efile Mukulu pamune naaye. Nsaa ibadi Satana mupwandikishe’shi Efile Mukulu badi asumina bantu kintu kibuwa—matalwa a kutshiba kibuwa na kibubi—babatshile kitshibilo kya kwikala ku lupese lwa Satana abo nkutombokyela Efile Mukulu. Nkinyi kibakitshikile kunyima? Babafwile, nka bibambile Efile Mukulu. Abo nkushimisha mwabi wa kwikala na muwa wa ikalaika mu Mpaladiso pa nsenga.—Kibangilo 2:17; 3:1-6; 5:5.

Etombo dya Adame na Eeva ndikwate bantu boso mpa na lelo uno. Eyi dy’Efile Mukulu adyamba’shi: “Milwisho ibatwelele pa nsenga pa mwanda wa muntu umune Adame, yaya milwisho yafwisha lufu. Byabya, lufu alukwata bantu boso.” (Beena-Looma 5:12, EEM) Tukwete kufwa mwanda twi bapyane mulwisho na lufu kwi baledi betu ba kumpala, kushi pa mwanda wa’shi bibadi bipwe kutshibibwa mu ‘mpàngo’ y’Efile Mukulu yatushatuuku.

Etombo dya mu Edene ta ndimikye mpàngo y’Efile Mukulu ya ku kibangilo bwa bantu na bwa nsenga nya. Kifulo ky’Efile Mukulu kipwidikye na kilulame kibadi kimutakule mu kutusha mushindo wa kwitufungusha ku bupika bwa mulwisho na lufu byatudi bapyane. Mpoolo mutumibwa bapatulwile’shi: “Efuto dya milwisho ndufu; kipebwa kya buntu bw’Efile Mukulu namu nyi muwa wa ikalaika mu Yesu Kidishitu Nfumwetu.” (Beena-Looma 6:23) Na kifulo kyoso, Efile Mukulu “mupaane Mwan’aye eeleka [Yesu Kidishitu], bwa’shi muntu ooso amukumiina tashiminanga, anka aikale na muwa wa ikalaika.” (Yowano 3:16) Pa kwilambula aye nabene bu mulambu wa nkuulo, Yesu mmwalwishe bantu byoso bibabadi bashimishe kwi Adame. a

Kubashala mafuku apela, bwa’shi mulayilo w’Efile Mukulu wa mpaladiso pa nsenga ulombane binyibinyi. Ino myanda ibuwa ayifiki kumpala we mukumbene kwiyipeta su bolondo dino elango dya Yesu adyamba’shi: “Twelelayi ku kiibi kibungye, mwanda kiibi kikata, akifishana ku lufu; bebungi abemutwele. Nkiibungye ngofu kyakya kiibi, ndiibonde dyadya eshinda adifishana ku muuwa; na mbapela abeditundula.” (Mateo 7:13, 14) Eyendo, nshalelo oobe a mu mafuku aafiki akekala muyile kitshibilo kyobe. Okakitshi naminyi?