Apakabanga binobino kukunkusha mbulamatadi mupia a muiyilu a Efile Mukulu kui bantu boso, nsenga ayikafiki mbalo ya muloo ayikekala bantu mu buumune na kukita mudimo wibuwa awibasankisha. Efile Mukulu mmusangule Yesu Kidishitu bua kukunkusha nsenga. Mu kuilekena na bakunkushi be bungi lelo uno, Yesu akakitshina bantu nka mianda ibuwa. Bukunkushi buaye abuikala buimene pa kifulo, akekala Mfumu sha kalolo, lusa na kululama.​—Yeeshaya 11:4.

Nsenga ipia ayikekala na bantu bashii betshibule muanda wa bisamba na tubila. Nsenga ishima ayikekala na bantu be mu buumune. (Kibafumbwilwe 7:9, 10) Bantu boso abekala na muwa pa nsenga abakekala bafule Efile Mukulu na bantu nabo, na abakafubu mu butaale boso bua kulombasha mpango y’Efile Mukulu ya ku kibangilo ya kulumbula nsenga.​—Misambo 115:16.

Apakabanga kumunana Bufumu bu’Efile Mukulu pa nsenga, Mupangi eetu akakatusha masaku oso aatukila ku bipangua. (Misambo 24:1, 2) Pabadi Yesu muimikie kipapi kibukopo pabadi pa nsenga, balesheshe’shi e na ngobesha ya kuibikita ku bukuashi bua bukome bu’Efile Mukulu. (Maako 4:39, 41) Mu bukunkushi bua Kidishitu, muntu su ngumune t’akatshinyi masaku aatukila ku bipangua. Bufumu bu’Efile Mukulu abukalusha dingi kuipushena pankatshi pa bantu na bingi bipangua.​—Osea 2:18.

Muntu ooso akekala na muloo wa kuikala na mbidi ipuidikie. Ta kui muntu su ngumune akakumbu, akanunupa sunga kufua. (Yeeshaya 35:5, 6) Bantu abakekala na muloo wa kuikala mu nsenga ibuwa na isuulukie nka bu bibadi ba mulume na mukashi ba kumpala mu lupango lua Edene. Mu nsenga ipia, nka bu mu lupango lua Edene, nsenga aikatusha bidibua bibungi, na bantu boso abakekala nabio bikile bungi. (Kibangilo 2:9) Nka bu bibadi muilo w’Efile Mukulu wa Isalele a kala, muntu ooso mu Mpaladiso ‘akadi bia kudia biaye ekute.’​—Bena-Levi 26:4, 5.

Apakakunkusha Bufumu bu’Efile Mukulu mu nsenga ishima, bantu boso abakekala mu butaale na abakekitshishena mianda na kalolo na kululama. Takukekala ngoshi, sunga kufubisha matalua bi bubi, na muntu oso akekala na kintu kioso kiadi nakio lukalo. Bible mmulee’shi: ‘Abakashala muntu oso mushi’a mfinyo aaye, na mfigiye aaye, dingi takukekala muntu su ngumune bwa kwibakalasha.’​—Mika 4:3, 4.

Kifuko kioso akikekala na yakio nshibo, na takui muntu akekala na moo washi tala bamutusha muanka, na atukapete efuto bua mudimo oso watukakitshi. Nka bu abiakula Bible, boso abakekala mu nsenga ipia y’Efile Mukulu “tabaakafumbakana dimo bisumanga.”​—Yeeshaya 65:21-23.

Bible mmulee’shi: ‘Nsenga ayikala iwule na kiwukilo kya Yehowa.’ (Yeeshaya 11:9) Bantu abakekala mu Bufumu bu’Efile Mukulu abakalongieshibua na binangu bia kukanya bia Mupangi etu Yehowa, na ku bintu bikile buwa biadi mupangie. Tabakafubisha kiwukilo kiabo bua kukita bina ngoshi sunga bua kukitshina bangi bibubi nya. (Yeeshaya 2:4) Pamutue pa biabia, abakalongo bia kuikala mu butaale na bangi na biabadia kulama nsenga.​—Misambo 37:11.

Efile Mukulu badi mukite nsenga biashi tuikale atusankila muwa efuku dioso. Badi na mpango ya’shi bantu bekala na muwa pa nsenga bua loso. (Misambo 37:29; Yeeshaya 45:18) Bua kulombasha mpango yaye ya ku kibangilo, Efile Mukulu ‘akashimisha lufu bwa loso.’ (Yeeshaya 25:8) Bible alaa’shi: “Lufu taalwikala kwanka dimo, sunga kwidila sunga mukumbo.” (Kibafumbwilwe 21:4) Efile Mukulu akapa bantu boso mushindo wa kuikala na muwa wa loso, kuamba’shi baba bakapasha pakabutula uno ndumbuluilo e bubi na baba bakasangusha mu nsenga ipia.​—Yowano 5:28, 29; Bikitshino 24:15.

 Kubanga binobino, midiyo ya bantu bakuete kuilumbula bua nkekala na muwa mu Bufumu bu’Efile Mukulu. Sunga biekala’shi mbakutue kupuidika, bakuete kuitatshisha bua kuikala kipaso kia bantu babakumina kui Efile Mukulu’shi batuele mu nsenga ipia. Mu mushindo kinyi? Nsaa y’abalongo pabitale Yehowa Efile Mukulu, na yawa abatumine, Yesu Kidishitu.​—Yowano 17:3.

Talula ingi mianda yodia kukita bua kupanda ku nfudilo a ino nsenga na nkekala na muwa mu nsenga ibuwa itayidi pepi. Kumina kulonga Bible buntu na Temwe a Yehowa sunga kuteka buabadia kufika mu nkakutembela po’be kutuela mu site a jw.org.