Yesu bambile’shi: “Kisamba akikatuuku kingi kisamba ngoshi, na mafumu aeketupisheena. Akwikala kutshinkatshinka kwa nsenga kukata, na mu mbalo iilekeene, amwikala bipupa bya mikumbo naa bya nsala.” (Luka 21:10, 11) Nka bu bi tu mifunda atutushaa kifwatulo kya kyala, ino myanda yooso ayilesha kitundwilo kishii bya kwelesha mpaka. Na dingi nka bu byabatundulaa muntu ku kifwatulo kya kyala kyaye, ino myanda ikwete kulombana nsaa imune ayishinkamisha’shi, “Bufumu bw’Efile Mukulu bwi peepi.” Ino myanda tayipwile kulombana yooso pamune na kumweneka mu nsenga ishima su? Tubande kutala bino bishinkamiisho.

1. NGOSHI

Mu kipwa kya 1914, mmubabangile ngoshi ibakwatshile bisamba na ma mbalo ebungi byabishekeele dimo kwanka! Bantu abakimbaa myanda ya kala abaleshaa kipwa kya 1914 bu kipwa kyalulukye myanda ya bantu, mwanda nyi kibabangile ngoshi ishekeele dingi kwanka mu nsenga ishima. Yaya ngi ngoshi ya kumpala ibabadi bafubishe ma mputu a ma chars, ma ndekye aele ma bombe na angi mamputu akata, ibadi mu ma mbalo ebungi mu nsenga bwa kwipaa bantu bebungi. Ibaadi ifwishe ngoshi ya kabidi ya nsenga ishima ibatweshele ma mputu a nucléaires (ma bombe a luwa). Kubanga mu 1914 bantu mbalwe ngoshi mu ma mbalo ebungi, na yaya ngoshi yooso ngipee midiyo ya bantu.

2. KUTSHINKATSHINKA KWA NSENGA

Ungi mukanda (Britannica Academic) awamba’shi, ku kipwa kyoso, akukitshikaa kutshinkatshinka kukata kwa nsenga pangi misango 100 akufwishaa “masaku akata.” Dingi, rapore ya bantu abalongaa myanda ya muushi mwa nsenga ba mu États-Unie ayilesha’shi “muyile myanda yabadi bafunde kubanga kala (pangi kubanga mu 1900), akubanga kukitshika ku kipwa kyoso kutshinkatshinka kwa nsenga kukata misango 16.” Bangi be kunangushena’shi ta kwi kutshinkatshinka kwa nsenga kwibungi, mwanda bena siyanse be na mishindo ikile buwa ya kutundula’shi akukyebe kukitshika kutshinkatshinka kwa nsenga. Na dingi, kutshinkatshinka kwa nsenga kukata kukwete kukitshika mu nsenga ishima, kukwete kufwisha makyenga na lufu mu kipaso kyabishekeele dimo kwanka.

 3. BIPUPA BYA NSALA

Ngoshi, kutshiba milomo, kukutwa kwa makuta, bulanda bwa kukutwa bikunwanga sunga kukutwa kwata mpàngo ya kuuka kipungo ki kukutshikwa bidiibwa nyi bikwete kufwisha bipupa bya nsala. Rapore ya mu 2018 ya Ndumbulwilo atalaa myanda ya bya kudya ayilesha’shi: “Mu nsenga ishima, midiyo 821 ta be na bidiibwa bilombane, kadi bantu midiyo 124 bakwete kulaala na nsala.” Kukutwa kwa kudya kalolo kukwete kwipaa baana bafikye ku midiyo 3 na kipindji ku kipwa kyooso. Mu kipwa kya 2011, bino bibadi kabingilo ka lufu lwa baana pangi 45 pa lukama mu nsenga ishima.

4. BIPUPA NA MIKUMBO IBUKOPO

Mukanda wa Ndumbulwilo atalaa myanda ya mbidi bukome (OMS) awamba’shi: “Siekele a 21 mmubangye na bipupa bi bukopo bibungi. Mikumbo ya kala bu​—kolera, bipupa na fièvre jaune​—mbibanguule dimo, na ingi mikumbo ipya ituukye bu maladi a kikoolo kya muwa kibabangile mu Chine (SARS), kupalakana kwa kikoolo kibukopo, kikoolo kya muwa kibabangile mu Asie (MERS), Ebola na Zika.” Kikupa kia COVID-19 nkituukye binobino. Sunga byekala’shi bena siyanse na ba doctere bakwete kulonga bibungi pabitale maladi, ta be na ngobesha ya kupeta bwanga bwa ano maladi ooso sunga kwimika bipupa nya.

5. MUDIMO WA BULUNGUDI MU NSENGA ISHIMA

Yesu baadi muleshe dingi kimune kya ku kitundwilo pabaadi mwakule’shi: “Uno mukandu wibuwa wa Bufumu aukalungulwa pa nsenga yoso ishaadibwe, bwa kulesha bu kamonyi kwi maumbo ooso na kunyima nfudilo ayikafiki.” (Mateo 24:14 Kilombeeno kipya 2014) Sunga byekala’shi mu nsenga yooso ishima bakwete kupetekyelwa na nkalakashi ikile bukopo, bantu bakile pa midiyo mwanda (8) batukile mu miilo yooso bakwete kulungula mukandu wibuwa wa Bufumu bw’Efile Mukulu mu maumbo 240 na mu ndjimi ikile pa 1 000. Bino tabyakitshikile dimo kasha bantu bekala kwanka nya.

Myanda ayilombasha kitundwilo kibabatushishe kwi Yesu ikwete kulombana lelo uno. Bwakinyi twi kukimba kuuka yaaya myanda? Mwanda Yesu bambile’shi: “Paanumono byaabya abifiki, uukaayi’shi Bufumu bw’Efile Mukulu bwi peepi.”​—Luka 21:31.

Kumweneka kwa kitundwilo kibabatushishe kwi Yesu, pamune na kwilondena kwa myanda ya mu Bible, nkwitukwashe bwa kupusha’shi Efile Mukulu batudile Bufumu bwaye mwiyilu mu kipwa kya 1914. a Mu aa mafuku, nyi mubatudile Mwana aye Yesu Nkidishitu bu Nfumu. (Misambo 2:2, 4, 6-9) Binobino, Bufumu bw’Efile Mukulu abukyebe kumunana pa nsenga, na kukatusha mbulamatadi yooso na kwikasha nsenga bu mpaladiisu bwa’shi bantu bemushaale bwa looso.

Mu mafuku apeela muno, mayi a luteko lwa kileshesho lwa Yaaya eetu lubadi Yesu mulongyeshe aakyebe kulombana: “Bufumu bwobe bufikye. Kyokyebe kikitshikye pa nsenga, mumune na mwiyilu.” (Mateo 6:10) Myanda kinyi ikwete kukita Bufumu kasha bwabanga kumunana mu kipwa kya 1914? Na nkinyi kyatudi balombene kukulupila nsaa ayikamunana Bufumu bwa mwiyilu kwi bantu pa nsenga?