Mu mwisambo ushale, twikeele bataluule kitundwilo kibabatushile kwi Yesu. Kyakya kitundwilo akilesha kutudiibwa kwa Bufumu bw’Efile Mukulu mwiyilu na Yesu Kidishitu bu Nfumu.

Bible akula’shi, pabadi Yesu’nka kyapete matalwa a kumunana, badi na kya kubinga Satana na bademo baaye mwiyilu. Bwa binobino, be na bukitshishi penda ku myanda ayikitshika pa nsenga, na kano nkamune ka ku tubingilo tunyinshe kulwila myanda kubanga mu kipwa kya 1914.​—Kibafumbwilwe 12:7, 9.

Sunga byekala’shi myanda mu uno ndumbulwilo ikwete kunyisha kulwila, Yesu Nfumu a Bufumu bw’Efile Mukulu mmukite myanda bwa kukwasha bantu mu nsenga ishima. Twi na lutumbu bwa mudimo wa kulongyesha Bible mu nsenga ishima ukwete kukwasha bantu bebungi bwabadya kulonga na kufubila miiya ya mu Bible mu nshalelo aabo a kwifuku n’efuku. (Yeeshaya 2:2-4) Bantu midiyo mbalongye bya kwikala na byubishi bibuwa bya mudimo, kulumbuula nshalelo a bifuko byabo na kwikala na mweneno e na nkatshinkatshi pabitale bintu bya ku mbidi. Baba bantu mbalongyeshibwe bwabadya kupeta bukwashi kubanga binobino na bwabadya kufika bantu bakuminyibwe n’Efile Mukulu bu bena Bufumu bwaye.

Sunga byekala’shi Yesu mmupwe kubanga kumunana mwiyilu, mafumu a bantu akyaatungunuka nka na kumunana pa nsenga. Anka, Efile Mukulu mulungule Yesu’shi: ‘Enda, odye bufumu mpaa na munkatsh’a beeshikwanyi noobe.’ (Misambo 110:2) Binobino, Yesu akyebe kubutula beshikwanyi naye booso na kupaasha baaba abakumiina kukookyela Efile Mukulu.

Mu yaaya nsaa, Bufumu bw’Efile Mukulu abukakitshi ino myanda ayilondo:

• Kubutula bipwilo bya madimi. Bipwilo bikwete kulongyesha myanda ya madimi pabitale Efile Mukulu na kwikasha bantu mu nshalelo e bukopo t’abikala kwanka dimo nya. Bible alesha bipwilo bya madimi bu mukashi a ndumba. Kubutudiibwa kwabyo akukatapa bantu bebungi ku mashimba.​—Kibafumbwilwe 17:15, 16.

• Kufudiisha bukunkushi bwa bana ba bantu. Bufumu bw’Efile Mukulu p’abukamunana, abukafudiisha mafumu ooso a bana ba bantu.​—Kibafumbwilwe 19:15, 17, 18.

• Kukatusha bantu booso bebubi. Twi kwamba naminyi pabitale booso bakwete kukita myanda ibubi na abapele kukookyela Bufumu bw’Efile Mukulu? Bible akula’shi “bantu babi abakatushiibwa pa nsenga, naa bashii na bululame abeebapaasula panka.”​—Nkindji 2:22.

• Kubutula Satana na ba demo. Satana na ba demo t’abekala na ngobesha ya “kulendwisha dimo maumbo.”​—Kibafumbwilwe 20:3, 10.

Bino byoso abikalesha kinyi bwa baaba abakumiina Bufumu bw’Efile Mukulu?

Bu byakwete kukunkusha mwiyilu bu Nfumu, Yesu akakitshi myanda ibungi ishii bya kukita mafumu a bana ba bantu. Abakamukwatshishena kwi bantu 144 000 basangudibwe munkatshi mwa bantu pa nsenga. (Kibafumbwilwe 5:9, 10; 14:1, 3) Yesu akashinkamisha’shi kikyebe ky’eshimba dy’Efile Mukulu kikwete kukitshika pa nsenga. Bufumu bw’Efile Mukulu abukakitshi kinyi bwa bantu abekala pa nsenga?

• Kukatusha mikumbo, na lufu. “Mwimushaale sunga umune t’amba dimo’shi: ‘Nee na mukumbo’” na “lufu taalwikala kwanka dimo.”​—Yeeshaya 33:24; Kibafumbwilwe 21:4.

• Abukalusha butaale bwa binyibinyi na kwiyikeela. “Baana boobe . . . abakeekala mu butaale,” na ‘abashaala muntu ooso muush’a nfinyo aaye, a nfigiyee aaye, dingi t’akwikala muntu su ngumune ebakalakasha.’​—Yeeshaya 54:13; Mika 4:4.

• Abupa bantu mudimo wibuwa. “Basangulwe bande abeekala balombeene kudya bituukye ku maasa aabo. Taabafumbakana dimo bisumanga.”​—Yeeshaya 65:22, 23.

• Kukatusha myanda yooso ayilwisha nsenga. “Akukafiki mafuku aakekala kabâka na mbalabala na mulô, aa ma mbalo a kaume aakasepêla, atûshe bilongo bibungi bu bya mbata a mu mabanda.”​—Yeeshaya 35:1, EEM.

• Kulongyesha bantu kyabadya kukita bwa kupeta muuwa wa ikalayika. “Na muwa wa looso nguno, bakuwukye obe Efile Mukulu umune a eyendo, na yawa abotumine, Yesu Kidishitu.”​—Yowano 17:3.

Efile Mukulu akumiina’shi osangeele ino myabi yooso. (Yeeshaya 48:18) Mwisambo aulondo aukapatuula byodi mulombeene kukita bwa kwikala umune a ku baaba abapete ino myanda ibuwa ayifiki kumpala.