Eyendo’shi, atwe booso twi na nshalelo mu mbalo i “kipapi” kikata kya kabutu kibabadi betanyine kwi Yesu bu “mpombo ikata”. (Mateo 24:21) Tatwi balombene penda kukatuka mbalo i kino kipapi nya. Kadi twi balombene kukimba kwa kufwamina. Mu kipaso kinyi?

Mu mwisambo waye wa pa mwengye, Yesu batushile buno buludiki’shi: “Kimbayi bufumu bw’Efile Mukulu kumpala na kululama kwaye.” (Mateo 6:33, Kilombeno kipya 2014) Twi kukita byabya naminyi?

Kimba Bufumu bw’Efile Mukulu kumpala. Bino abilesha’shi abitungu tumone Bufumu bw’Efile Mukulu bu kintu kii na muulo kukila bingi bintu byoso. (Mateo 6:25, 32, 33) Bwakinyi abitungu twibumone byabya? Mwanda bantu ta be na ngobesha ya kupudisha myanda ya pano pa nsenga nya. Nka penda Bufumu bw’Efile Mukulu nyi bwi kukita uno mudimo wi bukopo.

Kimba kululama kwaye. Abitungu twitatshishe bwa kukita mwetu mooso bwa kwikala na nshalelo mwipusheene na miiya ilulame y’Efile Mukulu na mayi aaye a kulonda. Bwakinyi? Mwanda su tubakutwa kwiyilonda na kwiatshila bitshibilo atwe banabene bwa kibuwa na kibubi, abitusha bipeta bibubi. (Nkindji 16:25) Mu ungi ngakwilo, su twi na nshalelo mwipushene na miiya y’ Efile Mukulu, atumusangasha na atwikala na nshalelo ebuwa.​—Yeeshaya 48:17, 18.

Tungunuka na kukimba Bufumu bw’Efile Mukulu kumpala na kululama kwaye. Yesu badimwishe’shi bangi bantu be kutuula binangu ku myanda ya bisumanga na kwela binangu’shi be kupeta bulungantu p’abo kwikala na nfwalanga ibungi. Bangi be  kuleka twinyongoshi twa mu nshalelo bwatudya kwibakambila mu kipaso kyabadi balombene kukutwa nsaa ya kukimba Bufumu bw’Efile Mukulu.​—Mateo 6:19-21, 25-32.

Aku namu Yesu balayile’ shi, baba abakwatshishena Bufumu bw’Efile Mukulu abakapete bintu byabadi nabyo lukalo binobino na kusangeela myabi ishii mpwilo mu mafuku e kumpala.​—Mateo 6:33.

Sunga byekala’shi balongi ba Yesu ba mu siekele a kumpala babadi abakimbi Bufumu bw’Efile Mukulu kumpala na kululama kwaye, tababamwene nfudiilo a malwa na makyenga ooso mu kipungo kyabo nya. Anka babadi mu bulami. Mu kipaso kinyi?

Abaadi na nshalelo mwipushene na miiya ya kululama y’Efile Mukulu, na byabya bibadi bibakalwile ku nkalakashi ibadi ayikyengyesha baaba bashibadi abakookyela bibadi abyamba Efile Mukulu. Lukumiino lwabo lwibukopo lwa’shi Bufumu bubadi na kya kufika lubebakwashishe bwabadya kunyingiila sunga mu nkalakashi ibukopo. Akupu Efile Mukulu bebapeele “bukome bushii bwa kupwandjikisha nabo kintu” bwa kunyingiila nkalakashi yabo.​—2 Beena-Kodinda 4:7-9.

Beena Kidishitu ba mu siekele a kumpala babadi bakookyele ku mwiya wa Yesu wa kukimba Bufumu kumpala. Babadi balungule mukandu wibuwa wa Bufumu mu kipindji kyabo kya nsenga. (Beena-Kolose 1:23) Kwi bantu bakwete kwibikita lelo uno su?

Oolo! Ba Temwe ba Yehowa abauku’shi kubashala mafuku apeela bwa’shi Bufumu bw’Efile Mukulu bufudiishe uno ndumbulwilo ebubi. Nyi bwakinyi bakwete kukita mwabo mooso bwa kwikala na nshalelo mwipushene na ano mayi abambile Yesu’shi: “Uno mukandu wi buwa wa Bufumu aukalungulwa pa nsenga yoso yishaadibwe, bwa kulesha bu-kamonyi kwi maumbo ooso na kunyima nfudiilo ayikafiki.”​—Mateo 24:14 Kilombeeno kipya 2014.

We kukita naminyi su bakulungula mukandu wibuwa? Atukunyingisha bwa kwikala bu beena Masedwane ba mu siekele a kumpala ba mu kibundji kya Beree. Nsaa ibaabapushishe mukandu wibuwa pabitale Bufumu kwi mutumibwa Mpoolo, babakuminyiine mukandu waye “na mashimba aabo ooso.” Akupu, ‘babaadi abataluula Bifundwe’ bwa kushinkamisha byabadi bapushe na kukimba bya kufubila bibabalongyele.​—Bikitshino 17:11, 12.

We mulombene kukita bya mumune. P’obe kukimba Bufumu bw’Efile Mukulu na kululama kwaye pa mbalo ya kumpala, okapete kifwamino na bulami binobino na kusangeela butaale bwa looso na kwiyikeela mu mafuku e kumpala.