Efile Mukulu badi mupangye mbidi yetu na ngobesha ya kwibuka ayo inabene. Nsaa yotapika elonda, kupoloka, sunga kintu kyakutunga, “mbidi ayibangaa kukita mudimo ukata bwa’shi elonda dipande, byadikala dikata sunga dipeela.” (Bino ngi abilesha mukanda wa Johns Hopkins Medicine) Mbidi inabene ayibangaa kwilunga na kwimika elonda adituku mase, kulekyesha kutuka kwa mase, kupanda kw’elonda, na kunyingisha kikoba.

BANDA KUNANGUSHENA: Su Mupangi a mbidi yetu mwiyipangye na ngobesha ya kubuka elonda, ta twi balombene kukumina mu milayilo yaaye ayitukwasha bwa kukatusha twinyongoshi atufiki mu kutapika ku mashimba su? Mufundji a misambo bafundjile’shi: “Abuku baa-sha-mashimba eenyongole, abuku malonda aabo.” (Misambo 147:3) Byabya su okwete kwikalakasha bwa mwanda ubadi ukitshikye kala sunga ukitshikye binobino, we kushinkamisha naminyi’shi Yehowa apasha malonda oobe oso—kubanga binobino mpa na mu mafuku aafiki?

Efile Mukulu mmwitulee’shi: “Totshiinanga, mwanda nee noobe; twekalanga na katshim’a-munda, mwanda nee Efile Mukulu oobe. Nakupa bukome; oolo, nakukwasha.” (Yeeshaya 41:10) Muntu auku’shi Yehowa amupasukilaa e na butaale bwa mu binagu na anyingishibwa na kukambila twinyongoshi. Mpoolo mutumibwa badi mwitanyine buno butaale bwa mwishimba bu “butaale bw’Efile Mukulu abo butabukile binangu byooso.” Bakumbeshe dingi’shi: “Ne mulombene kukita byooso munda mwa uno anyingisha.”—Beena-Fidipe 4:4-7, 9, 13.

Bifundwe abitukwasha bwatudya kunyingisha lukumino mu milayilo ya Yehowa yakalombasha mu mafuku aafiki. Bu kileshesho, mukanda wa Kibafumbwilwe 21:4, 5 (wabadi bateemune mwisaki adilondo) awitulungula myanda yakakitshi na bwakinyi twi balombene kukulupila’shi akebikitshi. Awamba’shi:

• “Akumuna mpolo yooso ku meeso” a bantu. Yehowa akafudiisha makyenga oso na twinyongoshi, mpa na twatwa atumweneka bu tushii na muulo ku meso kwa bangi bantu.

• Bu byadi mushale “pa lupuna-nsulu” lwa ntumbo mwiyilu, Sha bukome boso Nfumu a bipangwa byoso akafubu na bukome na matalwa aaye bwa kufudiisha makyenga ooso na kwitupa bukwashi bwatudi nabo lukalo.

• Yehowa etulaa’shi milayilo yaaye ngya ‘kishima na ya binyibinyi.’ Ngi bwakinyi etushinkamisha’shi akalombasha mayi aaye bwa kulama nkumo y’eshina dyaye.

“Akumuna mpolo yooso ku meeso aabo, lufu taalwikala kwanka dimo. Taakwikala sunga maalo, sunga nkwidila sunga mukumbo, mwanda bya-pano bya kala bibashimina. Binyi byabya mushikame pa lupuna bambile’shi: ‘Talayi naayikasha bintu byooso bipya. Akupu bambile’shi: Funda: myaaku ino tayii mpaka, ngya binyibinyi.’” —Kibafumbwilwe 21:4, 5.

Bible, n’eyilu na nsenga, byoso abilesha bi bumuntu bwaye na bi ngikashi ya Nshetu a mwiyilu. Sunga bipangwa byalesha mu kikoso’shi Efile Mukulu etwitanyina bwatudya kumuuka na kumwambula bu Kukw’etu, Bible atusha luno lwitanyino patooka na aamba’shi: “Efubwilêyi kwi Efile Mukulu, byabya Aye namu efubwila pepi neenu.” (Shake 4:8) Mukanda wa Bikitshino 17:27, EEM awamba’shi: “Efile Mukulu te kula na muntu ese yawa, ooo!”

Su bwata nsaa ya kuuka Efile Mukulu, okashinkamisha’shi ‘kwete nkulama.’ (1 Mpyeele 5:7) Mmyabi kinyi ikata yatupete nsaa yatukulupila mwi Yehowa?

Banda kutala kileshesho kya Toru a mu Japon. Babadi bamukushe kwi nyinaye mwina Kidishitu, aye nkutomboka nkutwela mu kisaka kya ba ngifi kibabadi abetanyina bu yakuza, kya mu Japon. Atentekyesha’shi: “Nadi namba’shi Efile Mukulu munshikwe, na nadi napusha’shi lufu lwa bantu bandi mufule bikishekishe lwa baba boso bandi mukumine ngofu, nnaye badi anyoko.” Toru akumbasha’shi myanda ibubi ibadi amono na ibadi mu binangu byaye ibadi imwikashe “n’eshimba di bukopo na shii na lusa.” Pabitale myanda ibadi mu binangu byaye, atentekyesha’shi: “Nadi nakumina kufwa ami ki nsongwa kunyima kwa kwipaa ungi muntu badi na nkumo kunkila na bwa’shi bangukye nka pend’ami nabene.”

Anka nsaa ibabalongyele Bible kwi Toru na mukash’aye Hannah, badi mushintulukye mu nshalelo aye mpa na mu ngyelelo aye a binangu. Hannah akula’shi: “Namwene mulume ande byashintuluka mu meeso  mwande.” Binobino, Toru akula na kushinkamisha’shi: “Efile Mukulu e kwanka binyibinyi na kwete kupasukila muntu na muntu oso a kwatudi. Takumina’shi muntu su ngumune afwe nya, anka akumina kufwila baba boso abelanga ku bilubilo byabo lusa. Apusha myanda yatudi balombene kwakula yabashi balombene kupusha kwi ungi muntu su ngumune. Mu mafuku apela’mu, Yehowa akatusha nkalakashi yoso, makyenga, na mikumbo. Binobino, kwete kwitukwasha mu mishindo ya kukaanya. Etupasukila na kwitulama nsaa yatudi batshobolokye.”—Misambo 136:23.

Nka bu abilesha kileshesho kya Toru, kuuka’shi Efile Mukulu mulombene—na mu kapindji kapela’mu—akakatusha myanda yoso i bubi na kukumuna mpolo yoso i ku meeso kwa bantu, takwitupa nka penda lukulupilo lwa mafuku aafiki nya, kadi akwitukwasha dingi bwatudya kwikala na nshalelo e buwa kubanga binobino. Oolo, sunga mbyatudi mu nsenga yiwule na makyenga, twi balombene kupeta myabi ayituku ku kifulo ky’Efile Mukulu na bulami bwaye.