“Efile Mukulu ekalanga kunyi?”
“MISUSA IBUNGI NEYELAA LUNO LUKONKO: EFILE MUKULU EKALANGA KUNYI?”— Bino ngi bibayipwishe Pâpa Benoît XVI, pabadi mwende mu kutala mbalo ibabadi bele bantu bebungi mu lukano bwa kwibafubisha mifubo ibukopo ku Auschwitz, mu Pologne.
NSAA AYITUUKU MASAKU, OBE NAMU TOBANDILE KWIYIPUSHA’SHI: ‘EFILE MUKULU EKALANGA KUNYI?’ SUNGA’SHI MU MUWA OOBE, KWI MWANDA WI BUBI UBADI UKUTAKULE BWA KWIYIPUSHA SU EFILE MUKULU KWETE NKUPASUKILA OBE NABENE PA BUPENKA SU?
Pangi nobe namu todi mupushe bino bibapushishe Sheila mushale mu États-Unis. Bu byadi mukudile mu kifuko kya bantu bepaane mu myanda ya kipwilo, akula’shi: “Kubanga ku bukinga bwande, nadi nka mulamate kwi’Efile Mukulu mwanda mmwikale Mupangi eetu. Anka, ntshinadi nepusha peepi naye nya. Nadi nele binangu’shi kwete kummona, anka nadi namono bu e kula nami. Ntshinadi napusha’shi Efile Mukulu mmunshikwe nya, kadi ntshinadi nakumina’shi kwete kumpasukila.” Bwakinyi Sheila badi na mpaka? Apatula’shi: “Kifuko kyande kibadi kipete masaku misusa ilondeene, na bibadi abimweneka’shi Efile Mukulu tabadi akumina kwitukwasha mu ino nkalakashi yoso.”
Nka bu Sheila, nobe namu we mulombene kwikala mushinkamishe’shi Efile Mukulu sha bukome boso e kudi. Kadi, we mulombene kwiyipusha su Efile Mukulu akupasukilaa namu. Yoobo badi muntu mululame, badi na lukumino mu bukome na mu binangu bya Mupangi, naye namu badi na mpaka. (Yoobo 2:3; 9:4) Kunyima kwa Yoobo kupeta masaku akata misusa ilondeene—bu bibadi mushimishe lukulupilo—badi mwipushe Efile Mukulu’shi: “Bwakinyi onfi lukyebo lwobe, ongaata buu mulwishi oobe?”—Yoobo 13:24.
Bible akula kinyi? Efile Mukulu ngi etunyokaa nsaa ayitutukila masaku su? Kwi bishinkamisho abilesha’shi Efile Mukulu apasukilaa bantu boso mu kibungi na muntu oso pa bupenka su? Muntu oso pa bwaye mulombene kushinkamisha binyibinyi’shi Efile Mukulu etumonaa, auku byatupushaa, na etulaa pa mbalo yetu, sunga’shi etukwashaa nsaa yatudi na nkalakashi su?
Mu miisambo ayilondo, atukamono akitulongyesha bipangwa pabitale abitupasukilaa Efile Mukulu. (Beena-Looma 1:20) Na dingi, atukatalula myanda yabakula kwi Bible pabitale abitupasukilaa Efile Mukulu. Pwende na kunyisha ‘kumuwuka’ ku bukwashi bwa bipangwa na bwa Eyi dyaye, onyisha kwikala mushikamishe’shi ‘kwete nkulama.’—1 Yowano 2:3; 1 Mpyeele 5:7.
Tala dingi
KITENTA KYA MULAMI
Efile Mukulu kwete nkumona su?
Nkinyi akikushinkamisha’shi Efile Mukulu kwete nkupasukila bwa’shi wekale bibuwa?
