Su Efile Mukulu ta nsulo ya makyenga, byabya nnanyi mutushe bipupa bya nsala, bulanda bushi’abupu, ngoshi, bipupa bya mikumbo, na masaku aatukila ku bintu bipangibwe? Bible, Eyi dy’Efile Mukulu adilesha ino myanda isatu ikata ayibwesha makyenga a bantu:

1. Bantu mbefule nka penda abo banabene, be na lwabi, na mushikwa. ‘[Bantu] mbatonte ben’abo na kwibamwesha malwa.’ (Mulungudi 8:9, EEM) Misusa ibungi bantu bakwete kukyenga pa mwanda wa bangi bantu bakutwe kupwidika, befule nka penda abo banabene, be na kifita.

2. Nsaa na myanda ya kimpulunkamba. Misusa ibungi bantu bakwete kukyenga pa mwanda wa “nsaa na myanda ya kimpulunkamba.” (Mulungudi 9:11, NWT) Bino abikitshikaa nsaa i bantu mu ma mbalo e bubi na mu nsaa i bubi. Nkwamba’shi masaku aatuuku nsaa yabakutwa kwikala badimukye sunga pabakitshi bilubilo.

3. Diabulu akunkusha uno ndumbulwilo. Bible alesha pa butooka mwanda wa kumpala aufwisha makyenga kwi bantu. Akula’shi: “Ba pa nsenga boso be mûshi mwa matalwa a yawa mubi.” (1 Yowano 5:19, EEM) Yawa “mubi” nyi Satana Diabulu, kipangwa kya mu kikudi ki na bukome badi kumpala bu mwikeyilu a Efile Mukulu anka “tamushimatshiile mu bya binyibinyi” nya. (Yowano 8:44) Bingi bipangwa bya mu kikudi bibalondele Satana na kutombokyela Efile Mukulu pabo kulonda lwabi lwabo lwa mbidi, abo banabene babadi bealule bafika bu ba demo. (Kibangilo 6:1-5) Kubanga nka pababadi bafikye bu ba ntomboshi, Satana na ba demo baye bakwete kufubisha bukome bwabo na be na bukitshishi bwa bu ntomboshi ku myanda ya pa nsenga. Abanyisha kufubisha buno bukome bwabo mu kino kipungo kyetu. Binobino, Diabulu e na nsungu ikata na kwete ‘kulendwisha baa-pano booso,’ na kwete kwibwesha ‘malwa kwi nsenga na mbuu.’ (Kibafumbwilwe 12:9, 12) Byabya, Satana e na mpupa na e n’eshimba dibukopo. Kwete kukutshishwa bantu muloo pa kutusha makyenga. Nyi Satana—t’Efile Mukulu—kwete kufwisha makyenga kwi bantu nya.

BANDA KUNANGUSHENA: Nka muntu shi na lusa, ntomboshi ngi atwadila bantu ba’shi na mwanda makyenga. Anka Bible akula’shi: “Efile Mukulu nyi nkifulo.” (1 Yowano 4:8) Muyile kifulo kyaye, “Efile Mukulu t’akukita bubi, nyâ! Ê, sha bukome boso t’akukita kintu kishi kilulame.”—Yoobo 34:10, EEM.

Byabya, we kwiyipusha’shi, ‘Efile Mukulu sha bukome boso mulekyele’shi Satana sha mushikwa atungunukye na kukunkusha nsenga munda mwa mafuku bungi kinyi?’ Nka bu bibatukatuka mu kwibimona, Efile Mukulu ta mulombene kukita bubi nya, na makyenga eetu akwete kumukalakasha ngofu. Kukatusha byabya, Eyi dyaye adyamba’shi: “Mulubwileeyi mpombo yeenu yooso, mwanda aye kwete kwinulama.” (1 Mpyeele 5:7) Efile Mukulu mmwitufule na e na bukome, bwa kukatusha makyenga ooso na kukutwa kwa kululama, bu byatukebimono mu mwisambo aulondo. *