Efile Mukulu te na ntondo na akumina kwelela bantu booso myabi.

Efile Mukulu badi mulee mutemuki Abrahame’shi: “mwishina dyoobe, nemusampila bifuko byoso bya pa nsenga.”​—Kibangilo 12:3.

Tubalongo kinyi? Efile Mukulu mmwitufule bikata na akumiina kwelela bifuko byoso myabi, byabikala​—balume, bakashi sunga bana—​abamukookyela.

Efile Mukulu e na lusa na akumiina kwelela baaba abetatshisha bwa kumwiuka myabi.

Efile Sha bukome booso badi mupe Moyiise bukome bwa kukita bilengyeleshi bikata. Anka Moyiise batekyele’shi: ‘Ngukishe mashinda oobe, nkuwukye; byabya, binyibinyi nayikala [mukuminyibwe] ku meeso oobe.’ (Efilu 33:13) Efile Mukulu badi mupushe luteko lwa Moyiise na aye nkumwelela myabi, p’aye kumupa kiwukilo ki bungi na mpushiisho a miiya na ngikashi Yaaye. Bu kileshesho, Moyiise badi muukye’shi Mupangi mmwikale “Efile sha lusa na kalolo.”​—Efilu 34:6, 7.

Tubalongo kinyi? Efile Mukulu akumiina kwelela ooso a kwatudi myabi, byabikala balume, bakashi sunga bana su atwitatshisha bwa kumwiuka kalolo. Kwete kwituleesha mu Bifundwe byaye biselele byatudya kumulangwila na kwitulesha’shi akumiina kwitwelela myabi.

Twi kupeta myabi y’Efile Mukulu ya ikalaika su twalonga pabitale Yesu, na pabitale bibakitshine na bibalongyeeshe.

Mu’Eyi dy’Efile Mukulu mwi myanda i bungi itale nshalelo a Yesu na malongyesha aaye. Efile Mukulu badi mupe Yesu bukome bwa kukita bilengyeleshi bibungi bu kupaasha ba mpofu, ba nshikwe na ba sha bilema. Badi mpa na musangushe bantu ku lufu. Yesu balesheshe myabi ayikafwisha Efile Mukulu kwi bantu booso mu mafuku e kumpala. Badi mupatuule kilombene kukita ooso a kwatudi bwa kupeta yaaya myabi, bambile’shi: “Muuwa wa looso naamu ngi’shi bantu bakuukye, obe bupenka Efile a biinyibiinyi, na yaawa aabotumine Yesu Kidishitu.”​—Yowano 17:3.

Yesu badi na lusa, kalolo na kwituula pa mbalo ya bangi. Bantu booso, byabikala balume, bakashi, ba nsongwa na bantu banunu, abadi abende kwadi bwa kwalula ku lwitamino lwaye lwa’shi: ‘Ikalayi balongi bande, mwand’ami ne mupopêle na kwipêlesha. Pa kukita byabya, anukapete kîkîsho mu mashinba enu.’ (Mateo 11:29, EEM) Mu kwilekena na bangi ba mu mafuku aaye bashibadi abaata bana bakashi na muulo, Yesu badi akitshina bana bakashi myanda na kalolo, kwibapa kineemo na kwibaneemeka.

Tubalongo kinyi? Yesu badi na kifulo kikata bwa bantu, na mwitulekyele kileshesho kikata kya byatudya kukitshina namu bangi myanda.

Bifundwe biselele abilesha’shi: “Kwi’nka Efile Mukulu umunenka,” n’ashi Yesu Kidishitu baadi mutumibwa mwiyishe a Efile Mukulu. (1 Beena-Kodinda 8:6) Yesu balesheshe kalolo’shi Efile Mukulu mumukile ku bukata na’shi Nnaye bamutumine pano pa nsenga.​—Yowano 11:41, 42; 14:28. *