We kupwandjikisha bibadya kwikala nshalelo pa nsenga su tatwi na nguba? Nguba kwete kutusha bukome bw’ashi mitshi ituushe masaki, bilongo, bikuba na ntete. Akwashaa dingi mitshi bwa kukaka meema mu nsenga ku bukwashi bwa mishi na kwiatuma ku masaki, akupu meema aapalakana mu lupapi bu mileemba.

Mpeshi nyi nkyabuntu kikata akifiki kwi Efile Mukulu, akwasha bwa kutuusha bidiibwa. Efile kwete kunokyesha mpeshi bwa kwitupa byakudya bwa’shi twikale na muloo.

Ba nfumu ba bifuko bebungi abekalakashaa bwa kupeta bidiibwa na bilamba bilombane bwa bifuko byabo. Bifundwe abyakula’shi: “Talai tonyi: t’atukunâ sunga kuumbula, sunga kubîka bya kudya mu mashibo, anka Nshenu e mwiilu etudîshâ! Anwe ta nwi na kinêmo kikilekile pe kya tonyi be?”​—Mateo 6:25, 26, EEM.

“Talai amukudilâ bilongo bya mu kisuku . . . ; sunga mbyabya, nenulungula’shi, sunga Solomonyi mu bwabwa bupeta bwe’boso, ntamufwale bilamba bibuwa bwa kufika pa buwa bwa sunga kimune kya ku byabya bilongo! Su Efile Mukulu afwadikâ lubishi . . . t’akishakisha kwinufwadika’nwe su?”​—Mateo 6:28-30, EEM.

Su Efile Mukulu e kwitukwasha bwa kwitupa bidiibwa na bilamba, eyendo’shi e kwitukwasha bwatudya kupeta bingi bintu byatudi nabyo lukalo mu nshalelo. Su atukitshi kikyebe ky’eshimba dy’Efile Mukulu, etwelela myabi bwa kwitatshisha kwetu bwa kupeta bidiibwa sunga kwitukwasha bwa kupeta mudimo awitukwasha bwa kuula bintu byatudi nabyo lukalo.​—Mateo 6:32, 33.

Eyendo, twi na tubingilo twi buwa twa kufula Efile Mukulu nsaa yatumono nguba, mpeshi, toonyi na bilongo. Mwisambo aulondo aukalesha kipaso akiisambaa Mupangi eetu na bantu.