Byatudya kuteka Efile bwa kukuminyibwa naaye
Efile Mukulu mmupe bantu kya buntu ki pa bwakyo kya ngobesha ya kwisamba naye bwa kumulungula byabadi nabyo lukalo pa kumusambila. Mutemuki Daavide badi mutekye’shi: ‘Bantu booso abafiki koodi, obe apushaa nteko yetu.’ (Misambo 65:2) Kadi twi kuteka mu kipaso kinyi bwa’shi Efile Mukulu etupushe na kwitwelela myabi?
ELA NTEKO AYIKATUKILA MW’ISHIMBA NA KWIYISHA
Nteko yoobe ya pa bupenka ayikukwasha bwa kufungwila Efile Mukulu eshimba dyobe bwa kumulungula byoso byopusha. (Misambo 62:8) Sha bukome booso mmufule nteko ayitukila mwishimba.
ITANYINA EFILE MUKULU MU ESHINA DYAYE NSAA YOMUTEKYE
Sunga byekala’shi Efile Mukulu e na myasu i bungi, e na penda eshina dyaye ndimune. “Nami Yehowa dyadya nyi eshina dyande.” (Yeeshaya 42:8) Eshina dya Yehowa di misusa 7 000 mu Bifundwe biselele. Batemuki be bungi babaadi abamutekye nka mu eshina dyaye. Abrahama bakwile’shi: ‘Yehowa . . . nkyakwipusha.’ (Kibangilo 18:30) N’atwe namu abitungu twikale atwitanyina eshina dya Yehowa su tukwete kumuteka.
TEKA EFILE MUKULU MU LUDJIMI LOBE
Efile Mukulu auku bi binangu byetu na byatupusha sunga twamuteka mu ludjimi kinyi. Eyi dyaye aditushinkamisha’shi: “Efile Mukulu te na ntondo, na shi mu kisamba kyooso muntu ooso amutshinyi, na akitshi myanda ya bululame apokyeelwa kwadi.”—Bikitshino 10:34, 35.
Byabya, t’abitungu nka penda kwela nteko bwashi Efile Mukulu etwelele myabi nya, abitungu tukite ingi myanda. Mu misambo ayilondo, atukatalula kyatudi balombene kukita.
