Bangi bantu abeyipusha su Eyi difundjibwe dy’Efile Mukulu mbedishintuule. Mutemuki Yeeshaya bambile’shi Eyi dy’Efile Mukulu “adikala kwanka bwa looso.” (Yeeshaya 40:8) Twi kushinkamisha naminyi’shi milayilo y’Efile Mukulu ibaadi ilamiibwe kalolo?

Efile Mukulu e na bukome bwa kulama Eyi dyaye bwa’shi tabemwelanga myanda ya madimi. Mu mafuku a kala, pababadi abatentula eyi dy’Efile ku maasa, banfundji abadi abetatshisha bwa kubadika dileeta dyooso dya bifundwe biselele bwa kushinkamisha’shi tababadi bakumbashe, bashintuule sunga kukaasha kantu mwanka. Anka, bu bikale bantu mbakutwe kupwidika, bangi abadi abatentula abakitshine tu bilema tupeela.

Kwi binunu na binunu bya ma Bible a Bifundwe Biselele ababadi batentule mu ma maniskri a kala. Su kwi kwilekena kupeela, abadi abapwandjikisha na angi bwabadya kushinkamisha bya binyibinyi. Bwa kuuka myanda ibungi, tala mwisambo wa mu jw.org awamba’shi: “Bible mbamushintuule sunga kulwisha ingi myanda su?” (mu Fwalanse)

Banda kutala kileshesho kya mikanda yabetamina bu Mifungofungo ya mu Kalunga Kafwe, yabadi bapete kwi Ba Arabe mu lubwebwe peepi na Kalunga Kafwe mu kipwa kya 1947. Byabya Bifundwe bi na tupindji twa Bifundwe biselele bitabidi bipwa bikile pa binunu bibidi. Bantu abaukaa myanda kalolo abapwandjikisha ano ma maniskri a kala na Bifundwe biselele byatudi nabyo lelo uno. Nkinyi kyabadi bapete mwanka?

Bantu abakimbulaa myanda mbasangane’shi Eyi dy’Efile Mukulu dyatudi nadyo lelo uno di ki nka na bifundwe bya kwibedi. * Abaadi batalule kalolo ma maniskri a kala aashinkamisha’shi myanda yatukwete kubadika lelo mu Bifundwe biselele i na mukandu w’Efile Mukulu wa kwibedi. Nyi bwakinyi atushinkamisha’shi Efile Mukulu badi mulame kalolo Bifundwe byaye biselele bwa’shi twikale nabyo lelo uno nka bu byabibadi kwibedi.

Nyi bwakinyi twi kwikala na lukulupilo looso mu Eyi dy’Efile Mukulu’shi ndilame mukandu wadyo wa kwibedi. Bu byabidi byabya, atutalula mu mwisambo aulondo kyatudi balombene kulonga pabitale Efile Mukulu kukiila kwi batemuki baaye.