BANDA kunangushena’shi okwete kubandila video a muntu mwende nkumo, pangi muntu ayimbaa misambo akusankishaa. Mu video abalesha yawa muntu bibaadi mukinga, bibaadi mulongye kuyimba mizike, na bibaadi atompatompa misusa ibungi. Abalesha dingi byadi muyimbe ma concert, byadi mutambukye mu angi maumbo, na abamuuku mu nsenga ishima bu muntu ayimbaa mizike. Akupu, abalesha bibakulu yawa muntu, bibanunupa na kunfudiilo baafu.

Uno video, talesha myanda ya kupwandikisha nya, kadi alesha myanda ya binyibinyi itale nshalelo baadi naye muntu mupwe kufwa. Su uno muntu baadi ayimbi misambo, mwina siyanse, muntu asukaa lubilo, aashaa ndundo, sunga ungi muntu mwende nkumo, mwisambo wabo ubaadya kwikala nka mumune. Muntu ekukita myanda ibuwa ibungi, anka banda kupwandjikisha ingi myanda ibadya kukita su ta mununupe na kufwa?

Patunangushena ku wawa mwanda twi kupusha bubi, kadi bino nyi abiketufwila atwe boso. (Mulungudi 9:5) Sunga twakita naminyi, tatwi balombene kusuuka kununupa na kufwa. Pangi twi kufwa mpa na lufu lwa kibatu mwanda wa masaku sunga mukumbo kampanda. Bu byabadi bebileshe mu Bible, twi nka bu “mulemba aumweneka kapindji kapeela akupu aushimina”—Shake 4:14.

Bangi abamonaa muwa bu ushii na muulo, nyi bwakinyi bakwete kulonda mayi aamba’shi: “Tudyeeyi naa tutomeeyi, mwanda malooba atufu,” mu nshalelo aabo. (1 Beena-Kodinda 15:32) Bantu be na uno shalelo mwanda abauku’shi mbalombene kufwa mu kapindji kapeela na tabe na lukulupilo bwa mafuku aafiki. Ingi nsaa, bikishekishe pe muntu na nkalakashi, ekwiyipusha’shi: Uno muwa ndjo kyoso ki kwanka? Nkunyi kwatudya kupeta lwalulo?

Bebungi abakimbaa lwalulo kwi bena siyanse. Bena siyanse na ba doktere mbapete mushindo wa’shi bantu bekala na muwa mafuku ebungi kukila mafuku ashale. Bangi bena siyanse bakwete kukimba bya’shi bantu bashale na muwa mafuku ebungi kukila lelo uno. Bya boobesha sunga kukutwa kobesha, lukonko lwishi: Bwakinyi atununupaa na kufwa? Kwi lukulupilo lwa’shi mwishikwanyi netu lufu tekala dingi kwanka? Mwisambo aulondo awisambila ino myanda na kwaluula lunkonko alwamba’shi: Uno muwa ndjo kyoso ki kwanka?