Efile Mukulu balungwile Adame’shi: “Efuku dyodi kyanka, wekala naa kya kufwa.” (Kibangilo 2:17) Su Efile Mukulu bapangile Adame bwa kununupa na kufwa, tabadya kumwelela uno mwiya. Adame badi auku’shi su akutwa kudya kikuba kya wawa mutshi tabadya kufwa.

Adame na Eeva taababadi na lukalo lwa kudya kikuba kya uno mutshi bwa kwikala na muwa nya—mwanda kubaadi mitshi ibungi ibaadi ayipa bikuba mu Edene. (Kibangilo 2:9) Pakupela kudya kikuba kya wawa mutshi, Adame na Eeva abaadya kulesha’shi abakokyela yawa baadi mwibape muwa. Dingi abadya kulesha’shi nka penda Efile Mukulu nyi mulombene kwibalungula kyabadya kukita.

Bwakupusha kalolo bwakinyi Adame na Eeva babafwile, abitungu tutalule mwisambo witutale atwe boso. Satana Diabulu baadi mufubishe nyoka bwa kudimba. Bible amba’shi: “Ku nyema yooso ya mapya ibaadi Efile Mukulu mupangye, nyoka ngi baadi mukile mayele. Aye nkwipusha mukashi’shi: ‘Eyendo Efile Mukulu mmwinulungule’shi tanudyanga bikuba bya mitshi yooso ii mu lupango?’”—Kibangilo 3:1.

Paapa Eeva balulwile’shi: ‘Efile Mukulu mmwitupe matalwa a kudya bikuba bya mitshi yoso i mu dino efuba, anka bitale kikuba kya mutshi wi munkatshi mw’efuba, mwitushidikye’shi: ‘Tanwikidianga sunga kwikikuma, tala nwakafwa!’’ Akupu nyoka bamwalulwile’shi: ‘Mbînyibînyi, t’anukafu’nwe! Efile Mukulu benushidikile mwanda eûku’shi, efuku dy’anukekidi, meeso eenu aakabûluka, anukekala bu byadi ê nabêne, pa kushingûla bi buwa na bi bubi.’ Byabya Satana badi akumina kwamba’shi Yehowa nsha madimi shibadi akumina’shi Adame na Eeva bekale na bintu bibuwa.— Kibangilo 3:2-5, EEM.

Eeva badi mukumine bibapushishe. Aye nkutala mutshi. Ubadi buwa, na wi malaka! Besesele kwaudi akuula kikuba kya kwanka, abanga kudya. Bible amba’shi: ‘Aye nkwikipa mpa na mulume aaye nsaa ibaadi naaye, aye namu nkudya.’—Kibangilo 3:6.

Bibadi binyongosha Efile Mukulu ngofu pa kumona bana baye badi mufule abapele kumukokyela! Bakitshine naminyi? Yehowa balungwile Adame’shi: ‘Okaaluka ku nsenga, mwanda kuu’yo ngi koodi mutuukile. Oolo, we lufuufi, byabya waluka ku lufuufi.’ (Kibangilo 3:17-19) Pa mwanda wa byabya “Adame nkushaala na muwa . . . bipwa 930, aye nkufwa.” (Kibangilo 5:5) Adame tabadi mwende mwiyilu sunga kwenda mu mbalo ya bikudi nya. Kumpala kwa’shi Yehowa amupangye ku lufuufi lwa nsenga tabadi kwanka nya. Ngi bwakinyi nsaa ibafwile, badi mukutwe muwa anka abikalaa lufuufi kubaadi mutuukile.  Bakutshilwe kwikala kwanka. Bi kinyongwa kikata!

Pa mwanda wa kukutwa kwabo kwa kukookyela, Adame na Eeva babadi bashimishe kupwidika kwabo na mushindo wa kupeta muwa wa looso. Mbidi yabo ibaadi ishintulukye; abo nkufika bantu bakutwe kupwidika na basha milwisho. Anka mulwisho wabo wa kukutwa kwa kukookyela tangwimene nka kwabadi nya. Abaadi bewambukiishe bana babo. Mukanda wa Beena-Looma 5:12 awamba’shi: “Bu bibaatweleele milwisho pano pa nsenga kwi muntu umune [Adame] na bibaapeteele lufu ku milwisho pa bibaabeekeele balwishe booso.”

Bible ayitamina mulwisho na lufu bu “kishiko kibashikilanga miilo yooso na kipema kibaadi kibwikile bisamba byooso.” (Yeeshaya 25:7) Kyakya kishiko akishikiila bantu anka abikala mulemba wibubi aukutshishwa muntu kwakusukila. Eyendo, ‘bantu booso abafu ku mwanda wa Adame.’ (1 Beena-Kodinda 15:22) Atwiyele lukonko lwi mumune na lubadi lwiyele Mpoolo mutumibwa’shi: “Nnanyi akunkuula ku ino mbidi ya lufu?” Kwi muntu su?—Beena-Looma 7:24.