ANO mayi a kala a Nfumu sha binangu Salomone aalesha kalolo abipushaa bantu pabitaale lufu. Pangi bu byabidi’shi muwa ngwa kapindji kapeela na takwi bya kusuuka lufu, bantu be na lukalo lwa kwikala na muwa auyisha bipwa bibungi. Munda mwa bipwa bibungi, miisambo ya kala, ngileshe bibaadi bantu bebungi abakimbi bya kufwimisha mafuku a muwa.

Tubande kwata kileshesho kya Gilgamesh, nfumu a mu Sumer. Miisambo ya kala ibungi ibaadi yakule pabitale nshalelo aaye. Umune ubaadi aulesha’shi Gilgamesh bayile lwendo lwi masaku mu kulonga bya kusuuka lufu. Kadi tabaadi mobeshe kulonga bya kusuuka lufu nya.

Mu siekele a kananka K.B.B., bantu abatalulaa bintu bilombeene kulama muwa babetamina bu ba alchemiste ba mu chine abatompele kukita “bwanga” bubaabadi abamono’shi abufwimisha mafuku a muwa. Abafikile na bintu bya kutoma byabadi bakite na ndambo ya mercure na Arsenic. Anka, abamba’shi bino bintu bibaadi bipee ba amperere bebungi ba mu chine. Pankatshi pa bipwa 500 na 1 500 B.B., bangi ba alchemiste ba mu Europe, abadi batompe kwaluula òolo bwashi bantu bamumine, mwanda abaadi abapwandikisha’shi òolo talwilaa, byabya, mmulombene kufwimisha mafuku a muwa wa bantu.

Lelo uno, bena siyanse bebungi abalongaa bintu bi na muwa na abalongaa bwa kuuka abitwelaa ngikashi ya ba nambutwile mwi bana, bakwete kutompa mwabo moso bwa kuuka bwakinyi bantu bakwete kununupa. Byabya abilesha’shi bantu bakii nka na lukalo lwa kupeta bintu bilombene kwibakwasha bwa kupela kununupa na kufwa. Kadi mbituushe bipeta kinyi?

Bena siyanse abalongaa bi ma selile a bantu, mbatuushe bipeta bikile pa 300 bilekene, abilesha bwakinyi bantu abanunupaa na kufwa. Mu bipwa bishale’bi, bena siyanse mbobeshe kufuba na ma selile a nyema na a bantu bwa kufwimisha mafuku a muwa. Wawa mwanda ubaadi utakule ba mpeta ba mwiumbo bwabadya kutuusha makuta bwashi bena siyanse batungunukye na kukimbuula “pabitale lufu.” Nkinyi kibabakitshine?

Kutompa bya kufwimisha mafuku a muwa. Bangi bena siyanse mbamone’shi kintu kikwete kwitununupisha, nyi ntupindji twi ku nsongo kwa ma kromozome  eetu twabetamina bu télomère. Télomère ayilamaa myanda i mu ma selile nsaa y’aetshibuula. Byabya, nsaa yoso ayitshibuula ma selile, ma télomère aafiki eepi. Mpa na nsaa ayilekye ma selile kwitshibuula, paapa atubanga kununupa.

Mu 2 009, Elizabeth Blackburn, ungi mwana mukashi baadi mupete bwedi mu myanda ya siyanse na kisaka kyaye, babaadi batundule Enzyme, kintu akikwashaa ma télomère bwa’shi taakambanga kutshibika, na shi ma selile taanunupanga bukidi. Kadi, ma rapore aabo abaadi aleshe’shi ma télomère “taafwimishaa mafuku a muwa mu kilengyeleshi nya—taafwimishaa mafuku a muwa wa muntu kukila byaekalaa nya.”

Kukituula bintu bi mu ma selile nyi ungi mushindo wabakwete kutompa bwa kwimika kununupa. Nsaa ayikulu ma selile bwa kwitshibuula, ngalombene kwikala na bukitshishi bwibubi kwi angi ma selile aetukalwilaa, na byabya mbilombene kuusha mbidi, kufwisha busungu bushabupu, na mikumbo. Mu mafuku ashale’mu, bena siyanse ba mu France abaadi bakituule ma selile a bantu banunu, bangi abaadi na bipwa 100 na ao nkubanga kufuba dingi. Mulongyeshi Jean-Marc Lemaître, mukata a kyakya kisaka amba shi ma selile “ababangile kufuba dingi na bukome.”

Bena siyanse bebungi abamba’shi sunga kwekala manga ebungi a kwimika kununupa, bantu tambalombene kushala na muwa bipwa bibungi kukila byabayishaa. Eyendo’shi, kubanga mu siekele a 19 bantu bakwete kwisha na muwa bipwa bibungi ndambo. Anka, mpa mwanda wa mukoso, na manga abatomo aebakalwila ku ingi mikumbo. Bantu abalongaa myanda ya ADN abashinkamisha’shi bungi bwa mafuku a muwa wa muntu bya bwikala bwibungi sunga bupela mbupwe kufika ku nfudiilo.

Takudi bipwa peepi na 3 500 Moyise mufundji a Bible badi mushinkamishe’shi: “Bipwa makumi musambobidi ngi bungi bwa mafuku a muuwa wetu, makumi mwanda su we na mbidi bukome. Kwikupilakupila, kwi nka makyenga na mpombo, mafuku aakidi lubilo, atwe namu twapapukanga.” (Misambo 90:10) Sunga bantu bakita naminyi bwa kufwimisha bungi bwa mafuku a muwa wetu, muwa wi nka bibambile Moyise.

Anka, ingi nyema ngilombene kupwa bipwa nkama na ingi mitshi namu ngilombene kupwa bipwa binunu. P’atupwandikisha bungi bwa bipwa byetu na bwa bino bintu, twi kwiyipusha’shi: ‘Uno muwa wa bipwa 70 sunga 80, ndjo kyoso ki kwanka?’