Mbikunyi byodya kupeta bibungi kukila uno muwa?
NSHALELO atudi naye ano mafuku ta ngyawa baadi akumiina Efile Mukulu’shi twikale naye nya. Bibadi abitungu’shi nsenga iwule na bantu abanemeka bukunkushi bwa Mupangi etu, bapete bukwashi bwa bukunkushi bwaye na kwambula kifulo na ingi ngikashi yaaye ibuwa. Efile Mukulu badi na lukalo lwa’shi bashale pamune na muloo bakushe bifuko byabo, bafumbule bintu bibuwa na kwikasha nsenga mpaladiiso.
EFILE MUKULU MMULEE BWA KWALUSHA NSHALELO PA NSENGA MU MUSHINDO WAKUMIINA’SHI EKALE
-
“Aimika ngoshi nyaa na kufudiile nsenga.”—Misambo 46:10.
-
“Kipungo kya kabutu bwa abalwisha nsenga”—Kibafumbwilwe 11:18.
-
“Mwimushaale sunga umune tamba dimo’shi: ‘Nee na mukumbo.’” —Yeeshaya 33:24.
-
“Basangulwe bande abeekala balombeene kudya bituukye ku masa aabo.”—Yeeshaya 65:22.
Ano matemuki aakalombana naminyi? Efile Mukulu mmutuule Mwana aaye, Yesu, bu Nfumu a mbulamatadi aaye mupwidikye akamunana mwiyilu na pa nsenga. Bible ebwitamina bu Bufumu bw’Efile Mukulu. (Ndanyele 2:44) Bible akula pabitale Yesu’shi: ‘Efile Mukulu amupa lupuna-nsulu . . . , akamunana bu Nfumu.’—Luka 1:32, 33.
Pabaadi pa nsenga, Yesu bakitshine midimo ikata bwa kulesha’shi payikala Mukunkushi akalumbuula nshalelo a bantu kukila bi nshalelo atudi naye lelo uno.
YESU BADI MULESHE MYANDA IBUWA Y’AKAKITSHINA BAABA ABAKOKYELA
-
Baapashanga mikumbo ya mishindo yooso, alesha mushindo w’akakatusha mikumbo ya bantu.—Mateo 9:35.
-
Baadi mubatamishe mema, alesha mushindo w’akakalwila bantu ku bukome bwa bipangwa.—Maako 4:36-39.
-
Baadi mudishe bantu binunu, alesha’shi akapa bantu bintu bi na muulo mu nshalelo.—Maako 6:41-44.
-
Baadi mwalule mema afika nfinyo ku feete a dibaka, alesha’shi akakwasha bantu bwabadya kusangeela muwa—Yowano 2:7-11.
Mushindo kinyi odya kupeta muwa wabakwete kulumbuula kwi Efile Mukulu bwa baaba bamufule? Kwi “eshinda” dyodya kutwela. Bible editamina bu “eshinda adifishana ku muuwa, naa mbapela abeditundula.”—Mateo 7:14.
BYA KUPETA ESHINDA ADITWALA KU MUWA UKILE BUWA
Eshinda kinyi aditwala ku muwa? Efile Mukulu amba’shi: “Nnami Yehowa Efil’enu, enulambukishâ myanda ya kwinwikasha bibuwa na kwi nukunkusha mwishinda dyanudya kutambukila.” (Yeeshaya 48:17, EEM) Kutambukila mu dino eshinda nyi nshalelo mukile buwa.
Yesu bambile’shi: “Ami nee eshinda, nee biinyi, nee muuwa.” (Yowano 14:6) Su atukitshi bibambile Yesu na kwambula kileshesho kyaaye atwifubwila peepi n’Efile Mukulu na nshalelo etu ekala mukile buwa.
Mushindo kinyi odya kupeta eshinda aditwala ku muwa? Kwi bipwilo bibungi, anka Yesu bambile’shi: “Kungamba’shi, ‘Mwanana! Mwanana!’ tankukumbane bwa kutwela mu Bufumu bwa mwiyilu nyaa; abitungu kukita abikyebe Nshaami e mwiyilu.” (Mateo 7:21) Bakwile dingi’shi: “Ku bikitshino byabo nkwanukeebatundwila.” (Mateo 7:16) Bible mulombene nkukwasha bodya kuuka kipwilo kibuwa kya kutwela.—Yowano 17:17.
Mbikunyi byodya kubanga kutambukila mwishinda aditwala ku muwa? Abitungu olongye bwa kuuka winyi mupe bantu booso muwa: A nnanyi? Eshina dyaaye nnanyi? Ekalaa naminyi? Kwete kukita kinyi? Akumina’shi tukite kinyi? *
Efile Mukulu akumiinaa’shi bantu bakite bibungi kushi penda kufuba, kudya, kwasha, na kukusha bana. Abitungu tuukye Mupangi etu na kwikala ba kuuku baaye. Twi balombene kulesha’shi twi bamufule nsaa y’atukitshi kyakumina. Yesu bambile’shi: “Muwa wa looso namu ngi’shi bantu bakuukye, obe bupenka Efile Mukulu a biinyibiinyi.”—Yowano 17:3.
KUBUKWASHI BWA BIBLE, EFILE MUKULU AKULONGYESHA ‘BWA NKWIKASHA BI BUWA.’ —YEESHAYA 48:17
ETABULA DYA KUMPALA BWA KUBANGA LWENDO LOBE
Nsaa y’atuuku akikumiina Efile Mukulu bwa’shi tukite twi balombene kushintuula ingi myanda. Bino mbilombene kumweneka bu bi bukopo. Anka abilesha’shi nshalelo etu mukumbene kulongama nsaa y’atubanga kutambukila mwishinda dya muwa. Bwa’shi opete ngaluulo pabitale Efile Mukulu, ba Temwe ba Yehowa mbalombene kulonga nobe Bible buntu pa mbalo na nsaa y’okumiina. We mulombene kwitufundjila mu site etu a www.pr418.com.
