SUNGA kukutwa kwa kukookyela kwa baledi betu ba kumpala ba Adame na Eeva nkutwadile bantu milwisho na lufu, ta nkushintuule mpàngo y’Efile Mukulu bwa bantu nya. Mu Bible, Efile Mukulu mmwambuule misusa ibungi bwa kushinkamisha’shi mpàngo yaaye ta ngishintulukye nya.

• “Balulame abapete eumbo, abeemushaala looso.”—Misambo 37:29.

• “Akakatusha lufu ikalaika Nfumu Yehowa akebakumuna mpolo yoso.” —Yeeshaya 25:8.

• “Mwishikwanyi a nfudiilo akabutudibwa ndufu.”—1 Beena-Kodinda 15:26.

• “Lufu taalukekala kwanka dimo taakwikala sunga maalo sunga kwidila sunga mukumbo mwanda byaa-pano bya kala bibaashimina.” —Kibafumbwilwe 21:4.

Efile Mukulu “akakatusha lufu” sunga kufudiisha mwishikwanyi lufu naminyi? Anka bu bibatwibimono, Bible alesha patooka’shi “mululame . . . ekala kwanka looso.” Anka akula dingi’shi “takwi muntu su ngumune mululame bikumbane pa nsenga bwa kukita bibuuwa kushii kukita milwisho.” (Mulungudi 7:20) Bino abilesha’shi bwa kubutula lufu, Efile Mukulu tatekye dingi’shi bantu bakutwe kupwidika banemekye miiya yaaye bwabadya kupeta muwa wa looso su? Ta nnabyo nya! T’akitshi byabya nya, mwanda ‘Efile Mukulu . . . Tadimbanaa.’ (Tite 1:2) Paapa, nkinyi dingi akikitshi Efile Mukulu bwa kulombasha mpàngo yaaye ya kifulo ibaadi nayo pabapangile bantu?

Yehowa batshile mpàngo ya kifulo bwa kukuula bantu ku lufu—pabaadi mutushe nkuulo. Nkuulo ayilesha kintu kampanda kyabatushaa bwa kufuta kintu ki na muulo wi mumune sunga bwa kufuta kibawe kya mbulamatadi. Bu bi bantu boso mbena milwisho na mbebatshibile kibawe kya lufu, Bible alesha patooka’shi: “Muntu ta mulombeene kukuula ungi, pa kufuta Efile Mukulu kya-kumukuula-nakyo, (muulo wa nkuulo ya kuula nayo myuwa yabo ngukile bukopo nyi byabashi na mushindo wa kwiulombasha).”— Misambo 49:7, 8, NWT.

Nsaa ayifu muntu mukutwe kupwidika, afutu mususa umune kibawe kya milwisho yaaye; tamulombene kwikuula sunga kufuta nkuulo bwa milwisho ya mungi muntu nya. (Beena-Looma 6:7) Tubadi na lukalo lwa muntu mupwidikye shi na milwisho mukumbene kutusha muwa waaye, kushi bwa milwisho yaaye nya, kadi bwa milwisho yetu.—Beena-Ebelu 10:1-4.

Yaaya nyi mpàngo ibadi Efile Mukulu mwate. Batumine Mwana aaye, Yesu pa nsenga bwadya kutandikwa bu muntu mupwidikye, shi na milwisho. (1 Mpyeele 2:22) Yesu bambile’shi bafikile “bwa kupaana muuwa waaye bwa kukùula baa-miilo.” (Maako 10:45) Bafwile bwa kutshokola mwishikwanyi lufu bwa’shi tupete muwa.—Yowano 3:16.

Lelo uno, bwa kulombasha butemuki bwa mu Bible, twi mu “bipungo bibukopo,” abitushinkamisha’shi twi mu “mafuku a ku nfudiilo” a uno ndumbulwilo a myanda e bubi. (2 Timotee 3:1) Mafuku a nfudiilo aakafudiila pa “efuku dya kiimu naa dya kushimina kwa bantu babi.” (2 Mpyeele 3:3, 7) Anka bantu bafule Efile Mukulu abakapanda ku kaaka kabutu na kupeta myabi ya “muuwa wa ikalaika.”—Mateo 25:46.

 Midiyo ya bangi bantu be na mushindo wa kupeta muwa wa ikalaika nsaa yabakasanguka. Yesu baadi mubushe muntu ku lufu pabafikile mu kibundji kya Naine. Mwana umune eleka a mukashi kilele bafwile, na Yesu “bapushishe lusa,” aye nkumusangula. (Luka 7:11-15) Dingi Mpoolo mutumibwa bambile shi: “Nee na lukulupilo mwi Efile Mukulu . . . akukekala kusanguka kwa balulame na kwa bashii balulame.” Luno lukulupilo lukata nkileshesho kikata kya kifulo ky’Efile Mukulu bwa bantu.—Bikitshino 24:15.

Midiyala ya bantu abakulupila kwikala na muwa wa loso. Bible amba’shi: “Balulame abakapete eumbo [nsenga] abeemushaala looso.” (Misambo 37:29) Yaaya nsaa abekala na muloo na abanyingishibwa bwa kumona kulombana kwa mayi a Mpoolo mutumibwa abafundjile takudi bipwa pangi 2 000 shi: “Lufu’be, ngobesha yoobe ikunyi? Lufu’be munungi wobe wikunyi” (1 Beena-Kodinda 15:55) Lufu mwishikwanyi mukata a bantu akatshokolwa!