DILONGIESHA 5
Kutumikila elango dia bantu bakulu
NKINYI AKITUNGU KUKITA BUA KUTUMIKILA ELANGO DIA BANTU BAKULU?
Bana be na lukalo lua malango na bukunkushi bua bantu bakulu. Bu biodi muledi, obe nyi mukumbene kuibakuasha; dingi buno nyi mbushito boobe. Anka, bangi bantu bakulu mbalombene kukuasha bana boobe.
BUAKINYI MALANGO A BANTU BAKULU E NA MUULO?
Mu maumbo ebungi ba nsongua tabashalaa pamune na bantu bakulu. Pusha buakinyi t’abebikitaa:
Bana abakishaa nsaa ibungi ku kalasa, kuakua bana abekalaa bungi kukila balongieshi na bangi bantu bakulu.
Kunyima kua kalasa, bangi bana p’abaluka ku nshibo abashalaa bupenka muanda baledi baabo be ku mudimo.
Muyile biabadi bakimbuule, mbasangane’shi mu États-Unis, bana be na bipua 8 na be na bipua 12 abakishaa nsaa pepi 6 kuifuku mu kutala kua TV, kupusha mizike sunga kuasha maasha a video. a
Ungi mukanda wa (Hold On to Your Kids) awamba’shi: “Pamutue wa’shi bana batekie malango kui mama, papa, mulongieshi, sunga bantu bakulu, ba nsongua bebungi abatekaa malango kui bakinga nabo.”
MUSHINDO WA KUTUUSHA ELANGO
Ikala okisha nsaa na bana boobe.
ELANGO DIA MU BIBLE: “Lambukisha mwana bwikashi bwibuuwa paakii mukinga; sunga ku bununu, teebulekye’ye.”—Nkindji 22:6.
Misusa ibungi bana abekalaa na lukalo lua malango a baledi baabo. Mpa na bantu balongie tulasa tui bungi abalesha’shi sunga nsaa i bana tabadi na bipua ekumi na bungi, abekalaa nka na lukalo lua’shi baledi baabo bebape malango kukila malango aebapa bakinga nabo. Doktere Laurence Steinberg, mu mukanda waye wa (You and Your Adolescent) amba’shi: “Kubanga ku bukinga mpa na p’abakulu, bana abalondaa binangu na ngikashi y’abebalongiesha kui baledi baabo.” Amba dingi’shi: “Bana abakumiinaa kuuka bi mueneno oobe na kupusha biokula, sunga biekala’shi t’abebikumiina bioso.”
Bu biabidi’shi bana boobe be na lukalo lua bukunkushi boobe, etatshishe bua kuibapa buanka. Ikala okisha nsaa nabo, webalesha bi mueneno oobe, ngikashi yomonaa’shi ibuwa na mianda yodi mufumankane nayo mu nshalelo oobe.
Mukimbile muntu a kumukuasha.
ELANGO DIA MU BIBLE: “Atambuka mu mulongo wa baa-sha-binangu eekala sha-binangu.”—Nkindji 13:20.
We kukimbila muana oobe nsongua, muntu bapu kunyinga mulombene kuikala bu kileshesho kibuwa kuadi su? We mulombene kukita bia’shi yawa nsongua ekale akisha nsaa pamune naaye su? Eyendo’shi, tosumbushena bushito boobe bua bu muledi nya. Anka, elango diabatuusha kui yawa muntu odi mukulupile, shii mulombene kuluisha muana oobe, ndilombene nkukuasha nsaa yokuete kukusha muana oobe. Bible amba’shi Timote baadi mupue kukula, kadi kuikala pamune na Mpoolo kubaadi kumukuashe, na Mpoolo baadi na muloo wa kuikala pamune na Timote.—Bena-Fidipe 2:20, 22.
Mu bipua bishaale, bifuko bibungi ta mbishaale pamune nya, na ingi nsaa ba nkambua, ba maasaba, bakuabo na mulume sunga na mukashi, na bangi be na kifuko tabe mbalo imune nya. Su bi biabia mpa na boobe, etatshishe bua’shi okimbe muntu mukulu e na ngikashi yodi mufule bua’shi bana boobe bekale nayo bua’shi bebakuashe.
a Mu kuakua kukimbuula abalesha’shi, bana bebungi abakishaa nsaa 9 kuifuku penda mu kuasha kua maasha. Mu kuno ku kimbuula ta mbaleshe nsaa ayikishaa bana na ba nsongua ku Internete ku kalasa sunga mu kukita kua devuare.
