Balungudi ba bufumu abakula

Bapetele kepatshila ka nshalelo aye

YESU bakuile’shi, auku mikooko yaaye. (Yowano 10:14) Su muntu e na eshimba di buwa na mmufule butaale na kululama, yawa muntu abamukaka munkatshi mua balongi ba Yesu. Yawa muntu akapete kepatshila ka muwa, nka bu bibakitshine ungi muana mukashi a mu Belgique. Muisambo waye wi bino:

“Pabaadi ba Temue ba Yehowa bakookole ku kibelo kiande, naadi nakalakashua na binangu na naadi nakimbi kuiyipa. Naadi musankile ngofu bibaabadi bandungule pabitale kilombene kupua mianda ya pano ba nsenga, na tshi naadi nakumiiana’shi Efile Mukulu nyi mulombene kuiyipua. Naadi mupue kukita bipua musambobidi ntanyenda mu kipuilo muanda wa bunsensa bubaadi muanka. Anka naadi mutundule bia binyibinyi mu mianda ibaadi ba Temue ba Yehowa abakula, ku nfudilo kua bioso nadi mufikie mu kupusha’shi bi bukopo kushala kushi Efile Mukulu.

“Muanda wa malua, kunyima kuabo kuntembela misusa i bungi, nalekiele kuisamba na ba Temue ba Yehowa. Ntshi naadi na lukulupilo dingi nya. Naadi natomo bibombi bia nfuanka bibidi kuifuku na nabangile dingi kukolua. Bu binaadi nakumina kuisamba na nshami kulu tabapuile kufua, nalukiile mu mianda ya bikudi bibi. Naadi na moo ukata, na pa muanda wa biabia bufuku boso bikudi bibi bibaadi abintshinyisha, kino kintompuanga kibaadi kikite mieshi ibungi. Ku kiolua kioso naadi na moo ukata, panadi nele binangu’shi nashala bupenka.

“Dingi efuku, nayile mu kutemba, natuelele muishinda dishinaadi na kuibishi kia kutuela, ami nkufika mbalo ikata ibabadi abebaka. Muanda wa kukanya, nepasangene bantu be bungi. Naadi muifubuile kuabadi, ami nkumona’shi nyi ba Temue ba Yehowa babaadi abebaka Nshibo ya Bufumu. Ami nkutentekiesha bibabadi abantembela, ami nkunangushena’shi bi kuikala buwa su bantu boso bekala na nshalelo ebino.

“Nasankile buashi ba Temue ba Yehowa babangie dingi kuntembela ku nshibo kuande, biabia naadi muisambe na bangi ba kuabadi babaadi abebaka Nshibo ya Bufumu. Natekiele Efile Mukulu na kunyima kua mafuku ekumi, yawa muntu a kumpala bafikile ku nshibo kuande, bafikile dingi. Aye nkuteka bua kutungunuka na kulonga Bible na ami nkukumina. Musango umune bangitanyine bua kuenda ku bisangilo ku Nshibo ya Bufumu. Ami nkukumina. Kasha ntamuene dingi biabia binadi mu kekumone nya! Munda mua mafuku e bungi naadi nakimbi bantu befulene na bena muloo. Paapa nyi panaadi muibapete

“Kunyima nabangile kuenda mu bisangilo bioso. Kunyima kua mbingo ifikie ku isatu, nalekiele kiubishi ki bubi kia kutoma nfuanka. Nasumbuile mikanda yande ya mianda ya malenganyi na ma diske a ngono ya satana, na nabangile kumona’shi ba demo bababanga kukutua bukome muandi. Naadi mushintuule nshalelo ande buashi epushene na bibaadi Yehowa etulongiesha mu Bible, na kunyima kua mieshi isatu naadi mubangie kulungula mukandu wi buwa. Na kunyima kua mieshi isamombo naadi mubatshishibue. Mafuku abidi kunyima kuami kubatshishibua, nabangile mudimo wa bu mbala mashinda mukuashi.

“Natumbula Yehowa bua bintu bioso bi buwa biadi munkitshine. Binobino muwa wande taudi na kepatshila. Mbinyibinyi, eshina dia Yehowa nyi lubumbo lula kuandi mupete kifuamino na mbalo ya kukaluilua. (Nkindji 18:10) Napusha nka bibapushishe kayimba ka misambo, bayimbile mu Misambo 84:11 shi: ‘Kushala efuku dimune mu nshibo yoobe nkukile kwikala mafuku kinunu mu ingi mbalo, nemusangule kushala ku kitwelelo kya nshibo y’Efile Mukulu ande pamutwe pa ku kalaala mu mashibo a bantu batwelakane.’’

Uno muana mukashi baadi n’eshimba diyishe bapetele kepatshila ka muwa. Muntu oso akimbi Yehowa n’eshimba di buwa apete kepatshila ka muwa.