Nkonko ya bantu ababadikaa

Muyile miiya ya mu Bible ayilesha’shi abitungu kufubisha mase mu mushindo wibuwa, Tumonyi tua Yehowa tui na mmueneno kinyi pabitale mayele a ba munganga aatekie kubuka muntu na mase aaye aye nabene?

Pamutue pa kuata kitshibilo kimene pa lukalo luinalo muntu sunga elango dia munganga, muina Nkidishitu oso e na bushito bua kutaluula kalolo abiamba Bible. Nyi muanda umutale aye na Yehowa.

Yehowa, aye muitupe muwa, baadi muele muiya wa’shi t’abitungu kudia mase nya. (Kibangilo 9:3, 4) Mu Miiya ibaabadi bape bena Isaleele kala, Efile Mukulu baadi muibaleshe biabadia kufuba na mase muanda abaadi aalesha muwa. Bambile’shi: “Anyima [sunga muwa] wa mbidi wi mu mase, na ami nabene ne muiatuule pa kilambuilo bua kubuikila miliusho ya anyima.” Tui kuamba naminyi su muntu ayipa nyema bua kudia? Efile Mukulu bambile’shi: “Yaya nsaa abitungu apongoole mase mu nsenga eabuikile lufuufi.” a (Bena Levi 17:11, 13, NWT) Yehowa baadi muambuule uno muiya misango ibungi. (Miiya Ikituulwe 12:16, 24; 15:23) Mukanda wa bena Yunda wabetamina bu Soncino Chumash awamba’shi: “T’abitungu kulama mase nya, abitungu kuiasukumuna mu nsenga bua’shi tabeadianga.” Mui na Isalele su ngumune tabaadi mulombene kuata mase, kuialama, sunga kufubisha mase a kingi kipangua, kiabadi bape muwa kui Efile Mukulu.

Muiya wa Moyise ubaadi wimane pabafuile Yesu. Anka, mmueneno a Efile Mukulu a’shi mase nga kishila ta mmushintulukie nya. Kikudi kiselele ki’Efile Mukulu kibaadi kitakule batumibua buabadia kutumina bena Nkidishitu eyi dia ‘kuilama ku mase.’ Wawa muiya taubadi wa kuata na muulo upeela nya. Ubaadi na muulo wi mumune na kupela mu kutambuka lusandi sunga kulanguila ma nkishi. (Bikitshino 15:28, 29; 21:25) Nsaa ibabangile kupalakana muanda wa kutuusha mase na kuedibua mase mu siekele a 20, Tumonyi tua Yehowa tubaadi tusangane’shi kukita bino nkuikutuene na abiamba Eyi di’Efile Mukulu. b

Ingi nsaa, munganga mmulombene kuteka sha mukumbo bua’shi atuushe mase aaye bealame munda mua mbingo kumpala kuabadia kumubaala bua’shi nsaa ya kumubaala su kubekala na lukalo lua mase, bamuele mase aaye abekele balame biabetamina bu (transfusion autologue différée, sunga bu TAD). Biabia, kuno kuata kua mase na kuialama, akupu nkuiela muntu ta nkuipushene na bino bi mu mukanda wa Bena Levi na wa Miiya Ikituulwe nya. T’abitungu kulama mase mbalo kampanda nya; abitungu kuiasumbula, bi nka bu’shi abealusha kui Efile Mukulu. Eyendo’shi lelo uno tatui ku Muiya wa Moyise dingi nya, ba Tumonyi tua Yehowa abanemekaa mianda yabadi baleshe kui Efile Mukulu mu yaaya miiya, na be na kitshibilo kia ‘kupela mase.’ Nyi buakinyi mase etu aatungu ‘kusukumuna paashi, t’abitungu’shi tuiape muntu sunga kuialama mbalo kampanda bua’shi betuele dingi anka nya. Kukita bino nkuikutuene na miiya y’Efile Mukulu.

Angi mayele sunga bipimo abitungu kuata mase a muntu nabene ta mbikutuene na miiya y’Efile Mukulu nya. Bu kileshesho, bangi bena Nkidishitu abakuminaa’shi bebaate ndambo ya mase buabadia kukita bipimo kampanda, akupu beasumbule. Ba munganga mbalombene kuteka dingi bua’shi muntu atushe mase bua tungi tubingilo tui bungi.

Bu kileshesho, ingi nsaa y’ababaala muntu, ba munganga mbalombene kukaka mase a muntu, aa mayele abeetaminaa bu hémodilution. Abakitaa bia’shi mase aashala mu mbidi ya muntu taekalanga akile bungi. Kunyima, abalusha aa mase abekeele bakakie, yaaya nsaa mase aafuimi biaekalanga. Mu mushindo umune mbalombene kuata mase aatuuku nsaa y’ababaala muntu, abakaka ma globules rouges bua kuialusha mu mbidi ya muntu; bino abebitaminaa bu cell-saver. Mu angi mayele a kubaala, mbalombene kukisha mase a muntu mu kiamo bua kapindi kapeela, aakitshi mudimo aukitaa bipindi bia mbidi (kileshesho bu, eshimba, efuafua, sunga nfiyo). Mase aakatuka mu kiamo abealusha mu mbidi ya muntu. Angi mayele namu ngatale kukisha mase mu kiamo kiabetamina bu (centrifugeuse) bua kukatusha bingi bintu sunga bintu bibaluila mu mase. Kangi kabingilo akekalaa ka kuata bingi bintu bi mu mase bua kukuasha kipindi kampanda kia mbidi ya muntu. Akuikalaa dingi bingi bipimo biabataa mase a muntu bua kuuka groupe aaye sunga bua kuiela buanga kampanda, akupu abealusha mu mbidi ya muntu.

Tu mianda tupeelapeela ntulombene kuilekena, kushi mpaka ba minganga mbalombene kutusha mayele, buanga, mpa na bipimo bibungi pabitale mase. Tatui na bushito bua kuisambila kintu na kintu kioso sunga kuata kitshibilo nya. Muina Nkidishitu e na bushito bua kuiatshila kitshibilo pabitle mushido w’abafubisha mase aaye nsaa ya kumubaala, kumupima, sunga kumubuka na mayele kampanda. Kumpala a bioso, abitungu ayipushe munganga sunga muntu kuete kumubuka bua’shi amulungule kalolo kiabakiebe kukita na mase aaye. Su bakishi biabia aata kitshibilo muyile abimutakula kondo kaaye k’eshimba. (Tala kashibo.)

Abitungu bena Nkidishitu baukie’shi mbelambule kui Efile Mukulu na, bena kitungo ‘kia kumufula na mashimba aabo oso, anyima aabo oso, bukome buabo boso, na binangu biabo bioso.’ (Luka 10:27) Mu kuilekena na bantu bebungi ba mu ino nsenga, Tumonyi tua Yehowa atuataa kipuano kiato n’Efile Mukulu na muulo ukile bukata. Yawa apeyaa bantu muwa kuete kuibateka boso buabadia kutuula lukulupilo luabo ku mase a Yesu abaadi asukumunue. Atubadika bino’shi: “Kukidila kuadi [Yesu Nkidishitu] tui bapashiibue ku bukuashi bua nkuulo ya mase aaye, eyendo’shi, kulekielua kua miluisho.”​—Bena Efeso 1:7.

[Mayi e kuushi ku’esaki]

[Kashibo/​Bifuatulo]

NKONKO YODIA KUIYELA

Su mase ande abatuuku pasha, sunga’shi mase ande abalekie kutambuka mu mbidi yande, kondo k’eshimba kande akakumiina nka’shi akii bu mase ande, kushi kukimba’shi ‘asumbudibue paashi’?

Kondo k’eshimba kande kalongieshibue na Bible ta nkalombene kunkalakasha su nsaa ya kumbaala bakaka mase ande, bealuula ungi mushindo, akupu bangela dingi anka?