BIBLE KWETE KUSHINTUULA BANTU

NKINYI kibaadi kifuishe muntu baadi muina kisaka kya punk rock shi mukumiine kushala na bantu buashi alongye bya kufula bantu na kubanga kwitatshisha bua kuibakuasha? Nkinyi kibaadi kifuishe muntu umune mu Mexique buashi alekye muikeelo wi butete? Buakinyi muina Japon umune baadi mukile bangi mu maasha a kuipikena mu kutambusha nkinga baadi mulekye ano maasha bua kuitatshisha bua kufubila Efile Mukulu? Tutale abyakula bano bantu.

“Naadi na ngakuilo mubi, na kuitatula, n’etombo.”​—DENNIS O’BEIRNE

MUTANDIKWE MU: 1958

EUMBO DYABO: ANGLETERRE

BAADI: MUINA KISAKA KYA PUNK ROCK SHI MUKUMIINE KUSHALA NA BANTU

BINAADI KALA: Ku lupese lua nshami, kifuko kyetu tui ba mu Irlande, na nakudile mu kipuilo kya beena Katolike ka mu Irlande. Naadi nsaa ibungi n’ende ku kipuilo ami nabeene, sunga mbinaadi ntshinaadi mufule kuikuenda. Na dingi, naadi nka na nsala ya myanda ya mu kikudi. Naadi nsaa na nsaa nambuula luteko lua Yaay’etu, na natentekyesha binaadi nalala ku lusala nkuete kunangushena pabitale kyalupatuula. Naadi na kiubishi kya kuiluabuula mu bipindji bipindji na kutompa kupusha akipatuula kipindji kyooso.

Panaadi na bipua pepi n’ekumi na bisamombo, naadi mutuele mu kisaka kya ba rasta. Naadi dingi nasangala na binangu bya beena politike bu kisaka kya Anti Nazi. Kadi naadi muipane ngofu mu binangu bya buntomboshi bya beena kisaka kya punk rock. Natomonga bintu abikoluanaa, bikishekishe marijuana, anaadi natomo pepi n’efuku dyooso. Bua binangu bya “akifiki kifikye,” natomanga ngofu, naadi n’etuesha mu masaku akilekile, na ntshinaadi n’ekalakasha bua bangi nya. Ntshinaadi mukumiine kushaala na bantu, ntshinaadi n’esamba na bantu nya, anka su namono shi mwisambo wabesamba wi na muulo. Naadi mpa nampele bankwata foto. Pantentekyesha binaadi, namono shi naadi na ngakuilo mubi, na kuitatula, n’etombo. Naadi na kalolo na kupana nka kui muntu atudi na’ye bukuuku.

Panaadi pepi na bipwa 20, nabangile kusangala na Bible. Kuuku ande umune baadi mu myanda ya kutoma bintu abikolanaa bu kabangi, bangi babangile kubadika Bible pabaadi mu lukano, na tubaadi besambe naaye ngofu pabitale kulanguila, Bipuilo, na bikuete kukita Satana pano pa nsenga. Naudile Bible nabanga kumulonga ami nabeene. Ami na kuuku ande tubaadi atubadika bipindji bya Bible na kuisamba pabitale kyabitulongyesha, na kuata bitshibilo. Tubaadi bakite byabya munda mua myeshi.

Tubaadi bafikye mu kuata bino bitshibilo muyile myanda ibatudi babadikye shi: Tui mu mafuku a nfudiilo a uno ndumbuluilo; abitungu shi beena Kidishitu balambukishe mukandu wibuwa wa Bufumu; tabitungu batuelakane mu myanda ya bia pano nya, sunga myanda ya politike nya; na dingi shi Bible atusha mayi a kuitukunkusha mu muikeelo. Tubaadi bamone kalolo shi Bible ng’eyendo na shi kui na kya kuikala kipuilo kya binyibinyi. Kadi nkipuilo kinyi? Tubaadi beele binangu pabitale bipuilo bikata na myanda yaabio ya kuitatula na kuipana mu myanda ya politike, atue nkumona shi Yesu tabaadi byabya nya. Tubamuene shi Efile Mukulu ta baadi naabo nya, byabya tubatshile kitshibilo kya kutaluula bipuilo bishi bikambe kuenda nkumo bua kumona byabidi.

Tubaadi atukatala beena bino bipuilo na kuibeela nkonko ibungi. Tubaadi atuuku akyamba Bible pabitale lukonko looso, byabya tubaadi atuuku su abaluula muyile abyamba Eyi dy’Efile Mukulu. Kunyima kua kuisamba na bantu bino, naadi nsaa yooso nele luteko kui Efile Mukulu’shi: ‘Su bano bantu nyi be mu kipuilo kya binyibinyi, nakutekye buashi onkuashe nkumiine dingi kufumankana nabo.’ Kadi kunyima kua kufumankana na beena bipuilo byabya munda mua myeshi, ntshinaadi mubande kupeta kisaka akyaluula nkonko yetu na Bible nya; na ntshinaadi na lukalo wa kufumankana nabo dingi nya.

Akupu, ami na kuuku ande tubafikile mu kuipetena na Tumonyi tua Yehowa. Tubaadi bebeele ino nkonko imune nka bibatuelanga bangi, kadi abaadi beyaluule na Bible. Myanda ibaabadi bakule ibaadi ipushene na byooso bibaatudi bapue kulonga. Byabya tubaadi beele na nkonko yatushibaadi babande kupeta myaluulo mu Bible​—bu kileshesho, bi binangu by’Efile Mukulu pabitale kutoma kua nfuanka na kabangi. Dingi’nyi, abaadi beyaluule n’Eyi dy’Efile Mukulu.

Kuenda ku bisangilo takubaadi kubofule buande nya. Ntshinaadi mukumiine kushala na bantu; byabya, ntshinaadi nakumiina shi bano bantu ba sha kifulo kya bantu na abafuala kalolo befubuile pepi nami. Naadi nelela bangi binangu bibi, na ntshinadi dingi nakumiina kuenda ku bingi bisaka. Kadi anka binaadi na kiubishi, naadi muele luteko kui Efile Mukulu buashi nkumiine dingi kuipetena na bano bantu su abo nyi be mu kipuilo kya binyibinyi, na naadi mupete malaka akata a kulonga Bible na Tumonyi.

MUSHINDO UBAADI BIBLE MWALUULE NSHALELO ANDE: Naadi nauku shi abitungu kuleka kutoma kabangi, na naadi na mushindo wa kuikaleka bukidibukidi. Kibaadi bukopo kuleka nyi nfuanka. Naadi mutompe misango ibungi kadi ntshi mobeshe. Panaadi mupushe shi bangi abaadi bobeshe kuleka nfuanka nka musango umune kushi kutoma dingi, naadi muisambe na Yehowa pabitale uno muanda. Akupu, ku bukuashi bua Yehowa, naadi mobeshe kuleka nfuanka. Naadi mumone muulo wa kuisamba patooka na bululame booso na Yehowa mu luteko.

Kingi kintu kinaadi mushintuule nyi nfuadilo na ntshibilo a nyene. Mu kisangilo kyande kya kumpala ku Nshibo ya Bufumu, nyene yande ibaadi imane na myoshi ya bulese. Kunyima, naadi muiyaluule yafika imongolokye. Naadi mufuale jeans na ekotshi dya musokya wa nyema ubaadi na bifundwe bilekene. Ntshi namuene shi abitungu kushintuula nya, sunga mbibaadi ba Tumonyi tua Yehowa banangushene naami ngofu. Kadi, kunyima naadi munangushene pabitale 1 Yowano 2:15-17: “Tanufulanga pano pa nsenga sunga bintu bi-pano pa nsenga. Su muntu afulu bya-pano, kifulo kya Yaaya taki munda mwaye nya.” Naadi momone shi muyile nfuadilo ande, naadi nalesha kifulo kya bya-pano na dingi shi bua kulesha kifulo ky’Efile Mukulu, abitungu nshintulukye. Naadi mukite nka byabya.

Kunyima kua mafuku, naadi mumone shi ta mpenda Tumonyi atuntekie bua kutuela mu bisangilo bya beena Kidishitu nya. Beena-Ebelu 10:24, 25 baadi mundeshe shi nyi Efile Mukulu antekye bwa kuibikita. Kunyima kua kubanga kutuela mu bisangilo byooso na kuiuka bantu kalolo, naadi muate kitshibilo kya kubatshishibua bua kulesha kuipana kuande kui Yehowa.

MILOO YANDI MUPETE: Kumona mushindo awitukuasha Yehowa bua kuikala mu kipuano kibuwa naaye ubaadi unkume ngofu. Lusa luaye na mushindo wetubamba ubaadi untume bua kumuambula na kulonda Muana aaye, Yesu Kidishitu, bu kileshesho mu nshalelo ande. (1 Mpiele 2:21) Naadi mulongye shi su netatshisha bua kuikala na nshalelo a buina Kidishitu, na nka kuikala na buande bu muntu. Netatshisha bua kuika bu Kidishitu mu mushindo wankitshina mukashi na muana ande mulume myanda. Netatshisha ngofu bua bakuetu balume na bakashi mu kikudi. Kulonda kua Kidishitu kubaadi kumpe muulo, kuidinga, na mushindo wa kulesha bangi kifulo.

“Babaadi bampe kineemo.”​—GUADALUPE VILLARREAL

MUTANDIKWE MU: 1964

EUMBO DYABO: MEXICO

BAADI: MUIKEELO WI BUTETE

BINAADI KALA: Naadi umune a ku bana musambo, mu kifuko kimune mu Hermosillo, mu Sonora, muiumbo dya Mexique, mbalo ibaadi bulanda ngofu. Nshami bafuile panaadi nki mukinga, byabya nynetu baadi afubu ngofu bua kukuasha kifuko. Naadi nsaa ibungi natambuka ngua muasa muanda tatubaadi na makuta a kuula bilato nya. Panaadi ki nsongualume, nabangile kufuba bua kukusha kifuko. Anka bibaadi bifuko bibungi, tubaadi abalaala muifina pamune.

Nsaa ibungi kuifuku n’efuku, mama tabaadi ku nshibo bua kuitulama atue bana nya. Panaadi na bipua 6, kubaadi nsongualume umune sha bipua 16 babangile kunduisha bua kukita naaye myanda ibutete. Batungunukile na kunkita byabya munda mua bipua bibungi. Bino bibaadi bifuishe kafutakanyi muandi pabitale myanda ya kusangisha mbidi. Namonanga shi kuiyatena mulume na mulume takui bubi nya. Panaadi mukimbe bukuashi bua ba munganga na bakata ba bipuilo pabitale uno muanda, abaadi bandungule shi takui muanda, ntshi na kintu kya kuikalakasha nya.

Panaadi na bipua 14, naadi muate kitshibilo kia kukita myanda na kufuala bu bantu abeatenaa balume na balume, bakashi na bakashi. Naadi mushale wawa mushindo munda mua bipua 11, mpa na kuiyatena na balume belekenelekene mu byabya bipua. Kunyima, naadi mubangye kutshibanga na kulumbuulanga bantu nyene, ami nkukita Salon. Nsunga mbyabya, ntshinaadi na muloo nya. Naadi nakyengye muishimba na kupusha shi mbanduishishe. Naadi napusha shi kinaadi nakitshi takibaadi kilulame nya. Nabangile kuipusha shi: ‘Kui kuikala bantu bebuwa ba kutudila lukulupilo su?’

Nabangile kuela binangu kui taata ande. Babangile kulonga Bible na Tumonyi tua Yehowa na akupu baadi mubatshishibue. Baadi andungula kibaadi alongo anka ami ntshinaadi nebikumbuka nya. Kadi, naadi nasangala naaye, nshalelo aaye na dibaka dyaye. Naadi namono bibaabadi aye na mulume aaye befulene na kuipeshena kaneemo. Abaadi abekitshishena myanda na kalolo kooso. Mu aa mafuku, umune a ku Tumonyi tua Yehowa babangile kulonga naami Bible. Ku mbangilo, naadi nka nalongo​—kushi na muloo. Akupu myanda ibaadi ishintulukye.

MUSHINDO UBAADI BIBLE MWALUULE NSHALELO ANDE: Batumonyi babaadi bangitanyishe ku bisangilo dingi efuku, ami nkuenda. Binamuene bibaadi binkanyishe. Bantu bebungi babaadi abansepe, kadi Batumonyi babaadi bansepe nya. Babaadi banseme na muloo, na babaadi bampe kineemo. Bibaadi binkume kuishimba ngofu.

Mueneno ande ebuwa a Batumonyi baadi mutame ngofu panaadi muende ku kikongeno. Namuene shi mpa na mu bino bisaka bikata, bano bantu babaadi nka bu taata ande​—bantu ba binyibinyi mpa na muishimba. Naadi neyipusha su kino ta nyi kinyi kisaka kya bantu bebuwa ba kutudila lukulupilo banaadi nakimbi. Kifulo kyabo na buumune buabo bibaadi binkanyishe ngofu, anka bibaadi mushindo ubaabadi abaluula lukonko looso na Bible. Naadi mumone shi Bible nyi baadi ebakunkusha bua kukita myanda ibuwa mu nshalelo abo. Na namuene dingi shi bibaadi abitungu nshi nshintuule myanda ibungi bua kuikala umune a kuabadi.

Kadi, bibaadi abitungu kushintuluka ami mushima, muanda naadi bi muana mukashi. Ngakuilo ande, tu myanda tooso, nfuadilo, nyene, na bakuuku, byooso bibaadi abitungu kushintuluka. Bakuuku bande ba kala ababangile kunsepa, bambanga shi: “Buakinyi okitshi byabya? Boodi biya byoyikalanga kumpala. Leka kulonga Bible. We mulombane.” Kintu kibaadi kikile bukopo kushintuula nyi muikeelo wande wi butete.

Sunga mbyabya, naadi nauku shi ne kobesha kushintuluka muanda mukanda wa 1 Beena-Kodinda 6:9-11 ubaadi unkume kuishimba ngofu: “Byabya tanuku shi bashii balulame tabakapyana bufumu bw’Efile Mukulu su? Tanwidimbanga nya! Sunga basha lukyebanokyebano, sunga abalangwila nkishi, sunga abalwisha malunda, sunga balume abakyebe bana balume naabo . . . tabapyana bufumu bw’Efile Mukulu nya. Byabya ngi biaadi bangi ba kwanudi. Anka, mbenusuule.” Yehowa baadi mukuashe kala bua kushintuluka, na baadi munkuashe na’mi namu. Bibaadi bingate bipua bibungi na kulua ngoshi ikata, kadi bukuashi na kifulo kya Batumonyi bibaadi binkuashe bua kobesha ino ngoshi.

MILOO YANDI MUPETE: Lelo, lelo uno ne na nshalelo mululame. Ne muibakile, na ami na mukashi ande tukuete kulongyesha muana etu mulume bwashi alonda mayi a Bible mu nshalelo aaye. Nshalelo ande a kala taadi kumongo kula, na lelo ne mupete myabi na mashito ebungi mu kikudi. Ne mukulu mu kakongye, na ne mobeshe kukuasha bantu buashi balongye bya binyibinyi bya Muiyi dy’Efile Mukulu. Mushindo unaadi mushintuule nshalelo ande ubaadi upe nyinami muloo ukata, aye nkukumiina kulonga Bible na kufika muina Kidishitu mubatshishibwe. Muina ande mukashi ungi baadi namu na nshalelo e butete baadi mufikye umune a ku Batumonyi tua Yehowa.

Mpa na bangi bantu babaadi abanguku nshalelo anandi naye abamba shi ne mushintulukye na kulongamisha nshalelo ande. Na nauku kibaadi kinkuasha bua kushintuula bino byooso. Kala naadi nakimbi bukuashi bua basha binangu kadi naadi napete nka malango ebubi. Anka, Yehowa baadi munkuashe ngofu. Sunga mbinaadi namono shi ntshi mukumbanyinyine, baadi muele meso kuandi, ankuasha na kifulo na luishinka. Kumona shi uno Efile Mukulu a kukanya, sha binangu na kifulo ammono na, akumiina shi ngikale na nshalelo ebuwa kubaadi kunkuashe ngofu.

“Ntshinaadi nasangeela kintu su nkimune, naadi nepusha bupenka, na mukutue kya nsongo.”​—KAZUHIRO KUNIMOCHI

MUTANDIKWE MU: 1951

EUMBO DYABO: JAPON

BAADI: MUINA MAASHA A KUIPIKENA MU KUTAMBUSHA NKINGA

BINAADI KALA: Naadi mukule mu kibundji kitaale kya mu kyese kya mu Prefecture a Shizuoka, mu Japon, mubaadi kifuko kyetu kya bantu muanda kishale mu kashibo kapeela. Nshami baadi apaadi apaana mankinga. Kubanga panaadi nki mukinga, naadi nasha masha a kuipikena mu kutambusha nkinga na ano maasha abaadi aansankisha ngofu. Papa babangile kukita buashi ngikale muntu mukata mu ano maasha. Panaadi nki mu kalasa ka bana bakinga babangile kundongyesha na kunfubisha ngofu mu ano maasha. Ku kalasa ka secondaire naadi mutukye kumpala misango ibungi mu kuipikene na bisaka by’eumbo dishima. Abaadi bantekye bua kutuela mu kilongyelo kikata, kadi naadi muate kitshibilo kya kuenda ku kalasa ka maasha a kuipikena. Panaadi na bipua 19, naadi mufikye muina maasha mukata a kuipikeena kua kutambusha nkinga.

Kubanga paapa, naadi na kitshibilo kya kuikala muntu a kumpala mu kutambusha nkinga mu Japon mushima. Naadi na kitshibilo kya kupeta makuta ebungi buashi mpe kifuko kyande nshibo na nshalelo ebuwa. Naadi muipane ngofu mu kulumbuula kuno kuipikeena. Nsaa yooso inaadi nakooko mbalo ibukopo patuilumbuula sunga mu kuipikeena, naadi neamba nsaa yooso shi naadi mutandjikye bua kuipikena mu kutambusha nkinga na ne nka na kya kutungunuka na kutambusha sunga naminyi! Na naadi natungunuka. Kuitatshisha kuande kubabangile kutusha bipeta. Mu kipua kyanda kya kumpala, naadi mutukye muntu a kumpala mu kisaka kya beena kuipikena bapya. Mu kipua kyande kya kabidi, naadi mobeshe kutuela mu kisaka kya maasha bua kutuusha muntu a kumpala mu Japon mushima. Misango isamombo ishima, naadi mutuukye muntu a kabidi.

Bu binaadi umune a ku bantu be kumpala, naadi muukibwe bu mikoolo inyingye ya Tokai, kibundji kimune kya mu Japon. Naadi bukome ngofu mu kuipikeena. Kunyima, abaadi abantshinyi muanda ntshinaadi na lusa mu kuipikeena nya. Naadi mubangie kupeta makuta ebungi, na namonanga shi ne mulombeene kuula kyooso akinsankisha. Naadi muule nshibo ibaadi na kadimbo ka kukita kalashishi ka mbidi ke na mashinyi ebuwa. Naadi muule motoka aufiki mu dingi eumbo ubaadi na muulo wi nka pepi na muulo wa nshibo. Bua kulama makuta ande kalolo, nabangile kuiatuesha mu kuula kua mashibo na mu bourse.

Sunga mbyabya, Ntshinaadi nasangeela kintu su nkimune, naadi nepusha bupenka, na mukutue kya nsongo. Mu aa mafuku, naadi muibakile na kutanda bana, kadi misango ibungi ntshinaadi nalesha luishinko kui kifuko kyande nya. Naadi nakuatshila mukashi ande na bana bande nsungu pa muanda wa tu myanda tupela. Babaadi abatala kalolo mumpala muande bua kumona su naadi na binangu bibuwa.

Kadi, mu aa mafuku mukashi ande bebangile kulonga Bible na Tumonyi tua Yehowa. Bino bibaadi bishintuule myanda ibungi. Bambile shi akumiina kubanga kuenda mu bisangilo bya Tumonyi, byabya natshile kitshibilo kya’shi tuende kifuko kishima. Natentekyesha bufuku bumune bubaadi mukulu umune mufikye bua kulonga na’mi Bible. Myanda inaadi mulongye ibaadi inkume kuishimba ngofu.

MUSHINDO UBAADI BIBLE MWALUULE NSHALELO ANDE: Ntshi mulombeene kuluba mushindo ubaadi mukanda wa Beena-Efeso 5:5 unkume kwishimba. Awamba shi: “Sha bukitekite, sha myanda i butete, sha lwabi​—uno e bu mulangwidi a nkishi—​tabakapyana bufumu bua Kidishitu na bw’Efile Mukulu.” Namuene shi maasha ande a kuipikena kwa kutambusha nkinga abaadi aende pamune na maasha a kaa ka mmono na abaadi aampa luabi. Kondo kande k’eshimba kabaadi akankalakasha. Naadi mupushe shi su nakumiina kusangasha Yehowa Efile Mukulu, abitungi ndekye ano maasha a kuipikena. Kadi kino kibaadi kitshibilo ki bukopo kuandi.

Naadi mukatukye mu kukisha kipua kyanda kikile buwa mu maasha a kuipikeena, na naadi natengyela kukila paapa. Kadi, namuene shi kulonga kua Bible kubaadi akungikasha na binangu bitaale na luishinko​—bilekeene ngofu na binaadi na kya kuikala bua maasha a kuipikena! Naadi muende mu maasha a kuipikena nkapenda misango isatu kunyima kua’mi kubanga kulonga Bible, kadi muishimba dyande ntshinadi dingi muipane ngofu mu kuipikena nya. Naadi dingi nekalakasha pabitale mushindo wankyebe kukuasha kifuko kyande. Napushanga bu mushindame mbalo imune, kushi kuenda kumpala sunga kualuka kumongo, na bakwetu mu kifuko ababangile kunkalakasha pabitale lukumiino luande lupya. Nshami baadi mupushe bubi ngofu. Na dingi, naadi mukalakashibwe ngofu mu binangu ami nkukumba mukumbo wa kifu.

Kibaadi kinkuashe ngofu mu kino kipungo kibukopo nyi muanda natungunukile na kulonga Bible na kuenda ku bisangilo bya Tumonyi tua Yehowa. Kapela kapela, lukumiino luande lubaadi lukule. Naadi mutekye Yehowa atemeshe nteko yande na kunkuasha buashi mmone kyankuete kukita. Lukalakashi luande lubaadi lupue pabaadi mukashi ande munshinkamiishe shi te na lukalo lua kushala mu nshibo ikata bua kuikala na muloo nya. Kapela kapela, naadi muende kumpala.

MILOO YANDI MUPETE: Naadi mumone shi mayi a Yesu e mu Mateo 6:33 ng’eyendo. Bambile shi: “Bangaayi kukimba Bufumu na bululame by’Efile Mukulu; byooso byaabya abeenupa byanka bu ntenteko.” Kasha tatui babande kukutua ‘bingi byooso byabya’ bibaadi Yesu muisambe, byooso biatudi nabyo lukalo bua kuikala na muuwa. Sunga mbyabidi shi makuta ampete lelo e kuika misango 30 apeela kukila anandji napete panaadi natambusha nkinga, ntshi mukutue kintu su nkimune buande na bua kifuko kyande munda mua bipua 20.

Kintu kikile buwa, nsaa yankisha nsaa ibungi mu midimo ya mu kikudi, ne na muloo wanshinaadi nao kumpala. Mafuku aakidi bukidi bukidi. Nshalelo ande a mu kifuko mulongame ngofu. Bana bande balume basatu na bakashi baabo mbafikye bafubi ba Yehowa ba lulamato.