Bitadi​—We na kya kuibifuta su?

BANTU nyi abafutaa bitadi. Bantu bebungi abamona shi mono yabafutu bitadi i nka bu isumbulwe muanda tayikitshi mudimo wibuwa, ikuete kukumibue mu ingi myanda na kuyibibua. Bangi namu, abapele kufuta bitadi pa muanda wa midimo ibi yabakitshi na ino mono. Bua kulesha buakinyi mbate kitshibilo kya kupela kufuta bitadi, beena kibundji kimune mu maumbo a kutunduka nguba, abambile shi: “Tatui kuata mono yetu bua kuiyipa ba ntomboshi bakuete kuipa bana betu.”

Binangu bi byabya mbipalakana mu nsenga ishima na ta mbipya nya. Muntu mukata a beena Hindu Mohandas K. Gandhi baadi muleshe buakinyi kondo kaaye k’eshimba kabaadi akamutosha kufuta bitadi, amba shi: “Yawa akuasha Eumbo dilumbuulue na basalayi kuete kuela mboko ku muluisho. Muntu ooso mukulu sunga mukinga kuete kuela mboko ku miluisho pa’ye kutusha mono ya bitadi bua kulumbuula eumbo.”

Anka mu wawa mushindo, muina Filozofi a mu siekle a 19 Henry David Thoreau baadi muleshe shi apele kufuta bitadi pa muanda wa kondo k’eshimba muanda ino mono ya bitadi abafubu nayo bua kukuasha mu ngoshi. Belele luno lukonko: “Beena eumbo mbalombeene bua kipungo kampanda, sunga mu bua ingi myanda kampanda, kutadiila shi bano abatusha miiya baate bitshibilo abitungu shi bantu banabeene baate muyile kondo kaabo k’eshimba? Byabya, buakinyi muntu ooso e na kondo k’eshimba?”

Luno lukalakashi ndutale beena Kidishitu, muanda Bible alongyesha patooka shi abitungu balame kondo kaabo k’eshimba katooka mu myanda yooso. (2 Timotee 1:3) Ku lungi lupese, Bible alesha dingi shi bakata ba mbulamatadi be na matalua a kuteka bitadi. Amba shi: “Muntu ooso akookyele banfumu be na matalwa, mwanda bufumu booso abutuukila’nka kw’Efile Mukulu; mafumu ooso ee padi, nnaye mwiatuule. Ngi mwanda kinyi bi buwa kukookyela, t’anka bwa moo wa kunyookibwa, anka dimo bwa kukookyela ku mpango ya kalolo. Ngi kyanufutshilaa dimo bitadi: abeebifutshisha mbeebatuule kwi Efile Mukulu bwa kukumbasha uno mufubo. Futayi muntu ooso kyaakya kimufundjilwe: kitadi, kutshina, kineemo, ooso muntu kyaakya kilombeene nwamukitshina.”​—Beena-Looma 13:1, 5-7.

Pa muanda wa byabya, beena Kidishitu ba kumpala babaadi abaukibua bu bafutshi bebuwa ba bitadi, sunga byekala shi mono ibungi ibaadi ayende ku midimo ya basalayi. Bi nka byabya bua Batumonyi ba Yehowa lelo uno. a Buakinyi beena Kidishitu be na kya kufuta bitadi sunga byekala shi ino mono ayikuasha ku midimo yabashi balombeene kukumiina kukita? Muina Kidishitu e na kya kuluba kondo kaaye k’eshimba nsaa ya kufuta kitadi?

Kufuta kua bitadi na kondo k’eshimba

Eyendo shi kipindji kikata kya bitadi baadi Beena Kidishitu ba kumpala na kya kufuta bibaadi abikuasha ku midimo ya busalai. Uno nyi muanda ukata utale kondo k’eshimba ubaadi ufuishe Gandhi na Thoreau mu kupela kufuta bitadi.

Atumono dingi shi Beena Kidishitu tababaadi abakokyela muiya wi mu Beena-Looma shapitre 13 penda bua moo wa kunyokibua nya, kadi mpa muanda wa “kondo [kabo] k’eshimba.” (Beena-Looma 13:5) Oolo, kondo k’eshimba ka Mwina Kidishitu akamutekye bua kufuta bitadi, sunga byekala shi mono yabio ayikuasha ku midimo yashi mukumiine. Bua kupusha kalolo kuno kuikutuena kui pano, abitungu tushinguule kalolo muanda wa muulo utale kondo ketu k’eshimba, dino eyi di muatudi na aditulungula su bikitshino byetu bi buwa sunga shi mbibi.

Muntu ooso e na dino eyi munda muaye, anka bibaadi bileshe dingi Thoreau, kadi ta ndia kutudila lukulupilo nya. Bua kusankisha Efile Mukulu, abitungu shi kondo ketu k’eshimba kekale kepushene na miiya yaaye pabitale muikeelo. Nsaa na nsaa abitungu shi tushintuule ngyelelo etu a binangu buashi ekale muipushene na a Efile Mukulu muanda a binangu byaaye mbikile byetu kula. (Misambo 19:7) Byabya abitungu tuitatshishe bua kushinguula bi binangu bya Efile Mukulu pabitale guvernema ya bantu. Binangu byaye bi naminyi?

Atumono shi Mpolo mutumibua baadi muitanyina guvernema ya bantu bu bafubi ‘batudibwe kwi Efile Mukulu bua kukumbasha mudimo.’ (Beena-Looma 13:6) Bino abilesha kinyi? Bino abilesha shi abakitshi buashi kafutakanyi takekalanga kuanka munkatshi mua muilo na abakitshi ingi midimo i na muulo. Mpa na guvernema ikile bubi ayikitaa midimo bu kutambusha mikanda, tulasa tua mbulamatadi, kushima kua kaalo, na kusambisha ba nkitshishi ba bubi. Sunga mbyadi auku kalolo bi bantu basha bufumu abakita ingi myanda ibi, mutadiile buashi bekale kuanka na etutekye buashi tufute bitadi bua kulesha kanemo bua ino mpango yaye yadi muate, ya kutadiila shi ino guvernema imune bantu.

Efile Mukulu mutadiile buashi ino guvernema ya bantu penda bua mafuku apeela. Mpango yaaye ngya kukasha ino guvernema na kutuula Bufumu buaye bua muiyilu buashi bulumbuule myanda yooso ibi ifikye kubufumu bua bantu munda mua nkama ya bipua. (Danyele 2:44; Mateo 6:10) Kadi, kumpala kua byabya, Efile Mukulu tamupe beena Kidishitu matalua a kutuela buntomboshi bua bantu pa kupela kufuta bitadi sunga kukita ingi myanda.

Tui kuamba naminyi, su nka bu Gandhi, okuete nka kumona shi kufuta bitadi abikuasha ku ngoshi nyi mmuluisho? Anka byabikalaa shi nsaa yatukamina ku muengye atumono kipya kalolo kukila, tui balombeene kushintuula binangu byetu buashi bipushena na by’Efile Mukulu, su atunangushena shi binangu byaaye mbikile byetu ngofu. Kukidila kui mutemuki Yeeshaya, Efile Mukulu bambile shi: “Bikal’eyilu kunundw’a nsenga, ngi bii mashinda ande kunundw’a mashinda eenu, na mpango yande itabukile mpango yeenu.”​—Yeeshaya 55:8, 9.

Bufumu bushi na nfudiilo?

Abilongyesha Bible pabitale kufuta kua bitadi tabilesha shi guvernema ya bantu ngilombeene kumona shi bi na bufumu bushi na nfudiilo na kukimba buashi bebakokyele mu byooso nya. Yesu baadi mulongyeshe shi Efile Mukulu mupe ino guvernema ya bantu penda matalua apeela. Pabaabadi bamuele lukonko bua kuuka su ku meso ku’Efile Mukulu mbilombane bua kufuta bitadi bya mbulamatadi a beena Looma a aa mafuku, Yesu baadi mualuule na ano mayi: “Aluishayi Keezare bya Keezare, nupe Efile Mukulu by’Efile Mukulu.”​—Maako 12:13-17.

Guvernema​—yabalesha pano kui “Keezare”—​abaadi abatuusha makuta a bingolongolo na kukuasha bua kuuka muulo wao. Byabya, mu meso a Efile Mukulu, abaadi na matalua a kuteka buashi bantu bebaluishe anka pa kufutanga bitadi. Sunga mbyabya, Yesu baadi muleshe shi ‘Bintu by’Efile Mukulu’​—muwa wetu na lulanguilo luetu—​takui ndumbuluilo su ngumune a bantu su ngumune mulombeene kuibiteka. Nsaa i miiya ya bantu sunga bitungo byabo mbikutuene na miiya y’Efile Mukulu, Beena-Kidishitu be na kya “kukokyela Efile Mukulu pe kukokyela bantu.”​—Bikitshino 5:29.

Lelo uno beena Kidishitu mbalombeene kuikala bakalakashibwe pabitale mushindo wabafubu na ingi mmono ya bitadi, kadi tabatompaa kutuelakana mu myanda ya guvernema sunga kukimba kuikala na bukitshishi kampanda ku midimo ya mbulamatadi pa kupela kukokyela sunga kupela kufuta bitadi. Bino mbilombeene kuikala bu kukutua kua kukulupilo shi Efile Mukulu apudisha myanda ibi ya bantu. Kadi, abayindjila mpa na apakumbana nsaa ayikyebe Efile Mukulu kuata myanda ya bantu ku maboko ku bukuashi bua bufumu bua Muana aaye, Yesu, aye bambile shi: “Bufumu buande nta mbwa pano.”​—Yowano 18:36.

Myabi ya kulonda kua malongyesha a Bible

We kupeta myabi ibungi su olondo malongyesha a Bible pabitale kufuta kua bitadi. Topete dinyoka dyabapesha bantu abatupilua miiya mpa na moo kupela kukuatshibua. (Beena-Looma 13:3-5) Muanda ukile yooso, wekala na kondo k’eshimba kebuwa kumpala ku’Efile Mukulu na kumupa nkumo po’be kulama muikeelo wa kulama miiya. Sunga ingi nsaa wekala bu ashimisha mono su wepuandikisha na bano abapele kufuta bitadi sunga bakuete kudimba mu bitadi byabo, we mulombeene kukulupilo mu mulayilo w’Efile Mukulu wa kukumbasha nkalo ya bafubi baaye balulame. Davide, umune a ku bafundji ba Bible bambile shi: “Naadi mukinga, binobino ntandi mununu; ntshii mumone sunga efuku dimune mululame abadi basumbushene, sunga baana baaye baateka ka-pa-lusa.”​—Misambo 37:25.

Ku nfudiilo a nfudiilo, kuuka na kukokyela muiya wa Bible wa kufuta bitadi akukupa butaale muishimba. Efile Mukulu takusambisha bua myanda ibi ayikitshi guvernema na mono ya bitadi nya, anka byabidi shi muiya taukutshibila kiimu pa muanda wa akikitshi sha nshibo na makuta omupa bua kututshila nshibo nya. Kumpala kua kulonga bya binyibinyi bya mu Bible, mulume umune etaminwa bu Stelvio baadi akimbi nshintuluko a myanda mu politiki munda mua bipua bibungi mu Europe. Pabaadi mupatuule buakinyi baadi mulekye kuno kuitatshisha kooso, bambile shi: “Naadi na kya kukumiina shi muntu takobesha kufuisha kululama, butaale, kushala kua bu bana na bana mu nsenga nya. Nkapenda Bufumu bw’Efile Mukulu nyi bulombeene ndumbuluilo mupya na ebuwa”

Anka bu Stelvio, okuete na kululama kooso ‘kualusha bintu by’Efile Mukulu kui Efile Mukulu,’ we kuikala no’be namu na luno lukulupilo. Okyebe kumona apakyebe Efile Mukulu kutuula bufumu buaye pa nsenga ishima, kulumbuula myanda yooso ibi ya buno bufumu bua bantu na kukutua kululama.

[Myanda wi mushi mwesaki]

[Eyi dya kukaka nadyo binangu bya bantu]

Abitungu tushinguule binangu byetu buashi bipushena na by’Efile Mukulu, muanda binangu byaaye mbikile byetu ngofu

[Eyi dya kukaka nadyo binangu bya bantu]

Pa’bo kokokyela na kufuta bitadi, beena Kidishitu abalama kondo k’eshimba kebuwa kumpala kw’Efile Mukulu na kulesha shi mbakulupile muadi bua kukumbasha nkalo yaabo

[Mafoto]

“Aluishayi Keezare bya Keezare, nupe Efile Mukulu by’Efile Mukulu”

[Akufiki mafoto]

Copyright British Museum