Bible kwete kushintula bantu

MUSHINDO kinyi ubaadi ungi nsonguakashi baadi mukiengie ku bukinga mufikie mu kupeta kepatshila ka muwa? Nkinyi kibaadi kikuashe ungi muina politike baadi ntomboshi bua kufika mulungudi a mukandu wi buwa e na butaale? Badika ino miisambo bua kupeta ngalulo.

“Nadi nakimbi mbalo yabadia kundesha kifulo na kalolo.”​—INNA LEZHNINA

MUTANDIKUE MU: 1981

EUMBO DIABO: RUSSIE

BAADI: MUKIENGIE NGOFU KU BUKINGA

BINAADI KALA: Nadi mutandikue kamama, na baledi bande namu babaadi tumama. Nadi na nshalelo ebuwa bukile mpa na panaadi na bipua bisamombo. Kunyima, baledi babaadi bepeleene. Sunga biekala’shi naadi mukinga, naadi mupushe akilesha kuipeleena, abio nkuntapa kuishimba ngofu. Kunyima kuabo kuipeleena, nshami na tutuande babaadi bashale mu kibundi kia Troitsk, anka mama bayile mu kibundi kia Chelyabinsk, aye nkuenda nami. Kunyima kua mafuku, baadi muiyibakishene na ungi mulume. Mulume a mama baadi nkodi a maalua, na misango ibungi baadi etukupila na mama.

Mu kipua kia 1993, tutuande bafuile mu mema. Wawa muanda ubaadi ukiengieshe kifuko kietu ngofu. Mama babangile kukola maalua bua’shi amone bua kunyingila, na aye nkubanga kunkiengiesha namu bu bibaadi mulume aye akitshi. Nambangile kukimba nshalelo ebuwa. Nadi nakimbi mbalo yabadia kundesha kifulo na kalolo. Nambangile kuenda mu bipuilo bilekenelekene bua’shi su nanyingishibua, anka takui kipuilo sunga nkimune kibaadi kinyingishe.

MUSHINDO UBAADI BIBLE MUALUULE NSHALELO ANDE: Panadi na bipua 13, kuku ande a mu kalasa baadi Temue a Yehowa baadi andungula mianda ya mu Bible. Nadi musankie ngofu bua kulonga pabitale bangi bantu babesambila mu Bible bu Nowa na Yoobo, babaadi bafubile Efile Mukulu sunga mbibaabadi na nkalakashi. Kunyima kua mafuku apela, nabangile kulonga Bible na ba Temue ba Yehowa na kutuela mu bisangilo lubingo looso.

Kulonga kua Bible kubaadi kunkuashe bua kuuka mianda ibungi ibuwa. Bibaadi binkume kuishimba ngofu panaadi mulongie’shi Efile Mukulu e n’eshina. (Misambo 83:18) Bibaadi binkaanyishe pa kumona mushindo ubaadi Bible mupue kutemuka mianda ina kia kukitshika mu “mafuku a ku nfudilo.” (2 Timote 3:1-5) Nadi na muloo wi bungi pa kulonga lukulupilo lua lusangukilo. Banda kupuandikisha​—Nakamono dingi tutuande!​—Yowano 5:28, 29.

Anka, ta mbantu boso babaadi abapusha wawa muloo unadi nampusha. Mama na mulume aye tababaadi bafule ba Temue ba Yehowa nya. Babatompele kunkitshisha bua’shi ndekie kulonga Bible. Anka nadi mufule mianda inadi nalongo, na tankuminanga kuleka kulonga nya.

Tabibaadi bibofule bua kunyingila kubingabinga kua bena kifuko kiande. Nadi mupushe dingi kinyongua kikata pabaadi muina ande mulume baadi anshindikila mu bisangilo bia ba Temue ba Yehowa mufue naye mu mema. Anka, ba Temue ba Yehowa babaadi nka abankuasha. Munkatshi muabo, ne mupete kifulo na kalolo binadi nakimbi mu nshalelo ande oso mushima. Ne mufikie mu kuuka’shi kino nkipuilo kia binyibinyi. Mu kipua kia 1996, nadi mubatshishibue, ami nkufika Temue a Yehowa.

MILOO YANDI MUPETE: Kubapu kukila bipua bisamombo kasha tueyibakishena na mulume ande Dmitry, mulume ebuwa bukile. Atue boso tukuete kufuba ku biro bia filiale bia ba Temue ba Yehowa mu kibundi kia Saint-Pétersbourg. Muenda mafuku, muikelo wa baledi bande pabitale lukumino luande nkushintulukie.

Ne na lutumbu lukata kui Yehowa! Muanda kumufubila nkunkuashe bua kupeta kepatshila ka binyibinyi mu nshalelo.

“Nadi nakalakashua na mianda i bungi.”​—RAUDEL RODRÍGUEZ RODRÍGUEZ

MUTANDIKUE MU: 1959

EUMBO DIABO: CUBA

BAADI: NTOMBOSHI MUINA POLITIKE

BINAADI KALA: Nadi mutandikue mu kibundi kia Havana, mu Cuba, na nadi mukudile mu kartie ka balanda mubaadi bantu abulu ngoshi misango ibungi. Panadi nakulu, nadi muipane mu maasha a judo na angi maasha a ngoshi.

Nadi na meshi ebungi mu kalasa, na baledi bande nkunyingisha bua kuenda ku universite. Panadi ku universite nambangile kumona’shi abitungu mianda ya politike ya muiumbo dietu ishintulukie. Ami nkutomboka. Dingi efuku, ami na ungi muina kalasa nami tubaaluile na ungi mpulushi bua’shi tumunyengie mputu yaye. Biabia, yawa mpulushi baadi mutapikie bi bukopo ku mutue. Pa muanda wa biabia, babaadi betuele mu lukano na muina kalasa nami, abo nkuitutshibila kibawo kia lufu. Nadi penda na bipua 20, anka nadi pepi na kufua!

Panadi mu kadimbo kande ka lukano, nadi nele binangu pabitale biandia kukita kumpala kua’shi bangipee. Ntshinaadi nakumina kulesha’shi ne na moo. Anka, nadi nakalakashua na mianda i bungi. Nadi neyipusha’shi: ‘Buakinyi kui kukutua kua kululama kui bungi bino pa nsenga? Mianda yoso ayikafudiila nka na uno nshalelo e bino su?’

MUSHINDO UBAADI BIBLE MUALUULE NSHALELO ANDE: Babaadi bashintuule kibawo kietu kia lufu, abo nkuitutshibila bipua 30 bia lukano. Mu aa mafuku nyi munadi muimonene na ba Temue ba Yehowa babaadi mu lukano muanda wa lukumino luabo. Eshimba dinyingie na butaale bibaadi nabio ba Temue bibaadi abinkanyisha ngofu. Sunga mbibaabadi bebele mu lukano kuabashi bakite muanda, tababaadi bafiite munda nya.

Ba Temue ba Yehowa babaadi bandongieshe’shi Efile Mukulu e na mpango ibuwa pabitale bantu. Babaadi bandeshe mu Bible’shi akaluula nsenga bu mpaladiso, na tamukekala buntomboshi sunga kukutua kua kululama. Babaadi bandongieshe dingi’shi nsenga ayikekala iule na bantu bebuwa, abakashala bua looso na mbidi ipuidikie.​—Misambo 37:29.

Nadi mupushe muloo bua mianda ibabaadi bandongieshe kui ba Temue ba Yehowa, kadi nadi namono’shi bi bukopo buandia kuikala na muikelo bu wa ba Temue. N’ashi bi bukopo buandia kuleka kutuelakana mu mianda ya politike sunga kutadiila ungi muntu bua’shi ammuenene. Nyi buakinyi nadi muate kitshibilo kia kuibadikila Bible ami nabene. Nsaa inampuile kumubadika, namuene’shi nka penda ba Temue ba Yehowa nyi abakitaa mianda bu bena Kidishitu ba mu siekele a kumpala.

Kulonga kua Bible kubankuashile bua kumona’shi abitungu nshintulukie mu nshalelo ande. Bu kileshesho, bibaadi abitungu nshintuule ngakuilo ande, muanda nadi na ngakuilo ebubi. Abitunganga dingi’shi ndekie kutoma nfuanka. Na abitunganga bua’shi ndekie kutuelakana mu mianda ya politike. Kuleka ino mianda ta kubaadi kubofule nya, kadi ku bukuashi bua Yehowa, nadi moobeshe kuiyileka ku kapela kapela.

Umune wa ku mianda ishibaadi ibofule bua kushintuula, nkukuata nsungu bukidi. Mpa na nka na binobino, nkiantungunukaa na kuteka bua’shi nekale na kuikanda. Ma verse ebungi a mu Bible abaadi ankuashe ngofu, bu mukanda wa Nkindji 16:32 awamba’shi: “Sha-lwishinko ee na muloo ukile wa kimankinda, muntu mwilame ee na muloo ukile kilobo akitshokola ngoshi ikata.”

Mu kipua kia 1991 nadi mubatshishibue, ami nkufika bu Temue a Yehowa. Nadi mubatshishibue mu kipindi kia ntuku kibaadi mu lukano. Kipua kibalondele, babaadi betutushe na bangi bena lukano, betutuma mu Espagne mubaadi bena kifuko kietu. Pabanfikile mu Espagne, nangile musango umune mu bisangilo bia ba Temue ba Yehowa. Bakuetu bena Kidishitu ba mu Espagne babaadi bankuukile nka bu’shi nadi nabo takudi bipua bibungi, na babaadi bankuashe bua kubanga nshalelo mupia.

MILOO YANDI MUPETE: Binobino ne na muloo wi bungi, na nafubila Efile Mukulu pamune na mukashi ande na bana betu bakashi babidi. Namonaa’shi kukisha nsaayande ibungi bua kulongiesha bangi bantu mianda ya mu Bible nkinemo kikata. Ingi nsaa nantentekieshaa binankimbile kufua panadi nki nsongualume, anka nantentekieshaa bukuashi buandi mupete kubanga aa mafuku mpa na binobino. Lelo ne na muwa na, ne na lukulupilo. Nantengiela n’eshimba kuiyilu bua kuikala mu Mpaladiso amukekala muule na kululama na “lufu talwanakekale kwanka nya.”​—Kibafumbwilwe 21:3, 4, Kilombeno kipya 2014.

[Eyi dya kukaka nadyo binangu bya bantu]

“Bibaadi binkume kuishimba ngofu panaadi mulongie’shi Efile Mukulu e n’eshina”

[Foto]

Ami na mulume ande atuikalaa na muloo wa kulesha tumama ma video na mikanda ya mu ludimi lua tumama