‘Tungunukayi na kuteka, anukapeebwa’
‘Tungunukayi na kuteka, anukapeebwa’
“Mwanaana, etulambukishe bya kuteka.” (Luuka 11:1) Bino nyi bibabadi batekye Yesu kwi umune a ku balondji baaye. Pabaadi amwaluula, Yesu batuushile bileshesho bibidi bilombeene kwitulongyesha mushindo watudi bakumbeene kwela nteko bwashi Efile Mukulu etupushishe. Su weyipushaa bwa kuuka su Efile Mukulu ateemeshaa nteko yoobe, lwalulo lwa Yesu alukyebe nkukwasha ngofu.—Badika Luuka 11:5-13.
Kileshesho kya kumpala nkitale yawa eele nteko. (Luuka 11:5-8) Mu kileshesho kibaadi mutuushe bakwile pabitale muntu umune batambula mwenyi kwaye bufuku kadi te na byakudya bya kumupa nya. Bwa yawa bapete mwenyi, uno nyi mmwanda ukata. Sunga nsaa ngipwe kukila, bende ku nshibo ya mukwabo mu kumuteka bwashi amwiyapushe ndambo ya mikate. Mususa wa kumpala, yawa mukwabo kwete kupusha epampa bwa kubuuka mwanda ba mu nshibo yaaye booso mbalaale. Kadi, kushii kupusha bufu, uno batambula mwenyi atungunuka na kuteka mpa na abibuuku mukwabo bwa kumupa byakudya. *
Kino kileshesho akitulongyesha kinyi pabitale luteko? Yesu etulungula shi abitungu twikale atutekye kushi kukooka—tutungunukye na na kuteka, na kukimba, na kukookola. (Luuka 11:9, 10) Bwakinyi? Bino abikyebe kulesha shi Yesu baadi akyebe kwamba shi Efile Mukulu apushaa epampa bwa kuteemesha nteko yetu su? Nya. Yesu baadi akyebe kulesha shi, Efile Mukulu te bi yawa sha nshibo e na epampa nya, mwanda ekalaa na lukalo lwa kwaluula ku nteko ya booso abamutekye na lukumiino looso. Atuleesha lwalwa lukumiino nsaa yatushy’atukooko kumuteka. Patutekye kushii kukooka, atulesha shi twi na lukalo lukata lwa kyakya kyatumutekye na shi, twi na lukulupilo shi Efile Mukulu akyebe kwitupa kyanka—su atutekye muyiile akikyeb’eshimba dyaaye.—Maako 11:24; 1 Yowano 5:14.
Kileshesho kya kabidi nkitale Yehowa, aye “Apushaa nteko.” (Misambo 65:3, EEM) Yesu bayipwishe shi: “Nambutwile mulume kinyi, munkatshi mwenu, akukita’shi su mwan’aye amuteka mushipa, mmulombeene kumupa nyoka pamutwe pa mushipa? Sunga dimo, su amuteka eyi nga kumupa kaminu?” Su ngumune—mwanda ta kwi nambutwile mulume su ngumune mulombeene kupa mwan’aye kintu ki bubi. Kunyima Yesu nkupatuula shi: Su nsha bana mukutwe kupwidika apa bana baaye ‘bintu bi buwa, a byabya, Nshenu e mwiyilu t’akakishakisha kupa kikudi kiselele’—kya buntu kikile buwa—kwi bana baaye be pa nsenga abamutekye! *—Luuka 11:11-13; Mateo 7:11, EEM.
Efile Mukulu e na lukalo lwa kwaluula nteko ya booso abamutekye na lukumiino looso
Kino kileshesho akitulongyesha kinyi pabitale Yehowa aye “Apushaa nteko”? Yesu etutekye bwatudya kumona Yehowa bu Nsha bana etatshishaa ngofu bwa kulombasha nkalo ya bana baaye. Byabya, balangwidi ba Yehowa mbalombeene kwifubwila kwadi mu nteko n’eshimba dimune. Na pabauku shi etatshishaa bwa buwa bwabo, mbakumbeene kukumiina lwalulo looso, sunga lwekala lwilekeene na byabapwandikishanga. *
Kubadika kwa Bible bwa uno mweshi
^ par. 2 Kileshesho kya Yesu akilesha kiubishi kibaadi nakyo bantu mu nshalelo aabo. Beena Yuuda abaadi abamono shi kukuukila benyi nyi mmwanda wi na muulo ukata. Bantu abaadi abateekye mikate nka yabadi balombeene kudya kwifuku, byabya abaadi na kiubishi kya kuteka su bya kudya bibebapwila. Na dingi, su kifuko nkilanda, abo booso abaadi abalaala paashi mu kadimbo kamune.
^ par. 4 Misango ibungi Yesu baadi amba shi “t’akishakisha kupa” bwa kunangushena na bantu—bwa kulesha kukutwa kwa kukita myanda kampanda na kwiyikita kukila. Ungi mufundji alesha shi: “Baadi anangushena shi, ‘Su A e kwibikita eyendo, byabya B mulombeene kwibikita kukilakila.’”
^ par. 5 Bwa kuuka ingi myanda pabitale mushindo wa kwela nteko bwashi Efile Mukulu akupushishe, tala shapitre 17 a mukanda wa A nkinyi akilongyesha namu Bible? wabadi batuushe kwi Batemwe ba Yehowa.
