1-3. Mbukwashi kinyi boodi mulombeene kupeta su obadika Bible na kutumikila ano malongyesha mu nshalelo obe?

UNGI mukwetu mukashi taadi mununu bambile shi: “Natumbulaa Yehowa namashika ooso pa’ye kunkwasha bwa kupusha Bible.” Uno mukwetu mukashi mmubadikye Bible mushima misango 40, na kyatungunuka na kubadika. Ungi mukwetu kii nsongwakashi mufunde shi kubadika kwa Bible nkumukwashe bwa kumona shi Yehowa e kwanka. Byabya, mwifubwile pepi ngofu na Nshaye e mwiyilu. Bambile shi: “Kasha ntampetele muloo wi bino mu muwa wande nya!”

² Mpyeele mutumibwa anyingisha bantu booso bwabadya kwikala ‘abadidi kutoma mabêle a mukandu wibuwa ashi asangakane na kintu.’ (1 Mp. 2:2) Baaba bakwete kulonga Bible bwa kupudisha luno lukalo na bakwete kutumikila malongyesha a mu Bible be na kondo k’eshimba kashy’akebatopeka na be na muloo mu nshalelo abo. Bakwete kutamisha bukuuku bwabo na bangi bantu bafule Efile Mukulu a binyibinyi na bakwete kumufubila. Ino myanda yooso ngilombeene kwitutuma bwa kwikala na “muloo na mwiiya w’Efile Mukulu.” (Lom. 7:22) Kadi ngilombeene kwitukwasha mu ingi mishindo. Bu mishindo kinyi?

³ Su olonga bwa kuuka Yehowa na Mwana aaye kalolo, kifulo kyoobe bwabo na bwa bantu no’be akikyebe kutama. Kwikala na kiukilo kya binyibinyi kya Bifundwe akukukwasha bwa kumona mushindo aukyebe Efile Mukulu kupasha bantu bamukokyele apakabutuka uno ndumbulwilo a myanda taadi ku nfudiilo. We na mukandu wibuwa wa kulungula bantu mu mudimo obe wa bulungudi. Yehowa akyebe nkwelela mwabi bu byokwete kulongyesha bangi myanda yokwete kulonga mu kubadika koobe kw’Eyi dy’Efile Mukulu.

4. Kubadika Bible “mundamunda” akulesha kinyi?

⁴ Yehowa takumina shi bafubi baaye bekale ababadika Eyi dyaaye lubilolubilo nya. Mu mafuku a kala, baadi mulungule Yooshwa shi: “Myanda i mu uno mukanda wa ndambukisho yande tailamukanga kukanwa kobe. Wekale we  inangushêna pa kwiibala [mundamunda] kânya na bufuku.” (Yos. 1:8; Mis. 1:2, EEM) Dino eyi dibaadi aditekye shi muntu atemune penda mukanwa n’eyi dipela bishima sunga myanda yabadika kubanga mu Kibangilo mpa na ku Bifumbulwe su? Nya. Adilesha shi abitungu kubadika kapelakapela bwa kwikala na mushindo wa kunangwila ku kyobadika. Kubadika kwa Bible “mundamunda,” akukukwasha bwa kutuula binangu ku maverse akumbeene nkukwasha na nkunyingisha kwishimba yaaya nsaa. Su bopete aa mayi, maverse, sunga mwanda kampanda wabemulondo, obadikye mundamunda, pangi we kwikala osanyisha milomo bu kwete kutuusha bishima. Kunangushena ngofu pabitale mwanda kampanda wi mu Bifundwe nkulombeene nkukuma kwishimba ngofu. Bwakinyi bibuwa kwibikita? Mwanda kupusha akipatuula malango a Efile Mukulu akukukwasha bwa kwata kitshibilo kya kwiatumikila.

5-7. Tusha bileshesho abilesha mushindo ulombeene kubadika kw’Eyi dy’Efile Mukulu mundamunda kukwasha muntu bwa (a) kulama mwikeelo wiselele; (b) kukitshina bantu myanda ibuwa kushi kukwata nsungu bukidi; (c) kukulupila mwi Yehowa mpa na mu bipungo bi bukopo.

⁵ Kubadika mundamunda akukukwasha nsaa yobadika mikanda ya mu Bible yoshi mwiubidishene nayo. Twate kileshesho kya ino myanda isatu. Wa kumpala, pwandikisha shi mu programe aaye a kwilongyela, nsongwalume umune mwina Kidishitu bafiki mu mukanda wa Osee. Mu shapitre 4, bemana kunyima kwa kubadika mundamunda verse 11 mpa na ku 13. (Badika Osee 4:11-13.) Bwakinyi? Ino verse ibamukumu kwishimba mwanda kwete kulwa ngoshi na mwanda utale lusandji ku kalasa kwi bena’ye bakwete kumutakula bwa kwibikita. Banangushena ino verse na bamba shi: ‘Yehowa amonaa myanda ibubi ayikitshi bantu mpa na mu bufyefye. Ntankyebe kumutapa kwishimba nya.’ Uno mukwetu baata kitshibilo kya kushaala shii kato kumpala kw’Efile Mukulu.

⁶ Mwanda wa kabidi, mwina Kidishitu mukashi kwete kubadika mukanda wa Yowele na bafiki mu shapitre 2, verse 13. (Badika Yowele 2:13, EEM.) Pakwete kubadika yawa verse mundamunda, kwete kunangushena pabitale mushindo wadi mulombeene kulonda kileshesho kya Yehowa, sha “kifulo na lusa, shakwatâ nsungu bukidi, muûle ndâ na bumuntu.” Baata kitshibilo kya kusumbula bishima bya kukaana na bya nsungu byekalaa nabyo nsaa y’esamba na mulume aaye sunga na bangi bantu.

⁷ Wa kasatu, nshe bana umune mwina Kidishitu mmushimishe mudimo waye na kwete kwinyongola pabitale mushindo wa kukwasha mukashi aaye na bana baaye. Mu Naume 1:7, babadika mundamunda shi Yehowa “asapîlâ baba abafwamina mwadi” na ebakalwilaa bu “kifwamino mu kipindji kya bishyotshi.” Uno mwanda ubamunyingisha kwishimba. Bamono shi Yehowa abambaa bafubi baaye na kifulo kyooso, na balekye kwinyongola. Akupu babadika mundamunda verse a 15. (Badika Naume 1:15.) Uno mukwetu bamono shi su balungula mukandu wibuwa mu kino kipungo ki bukopo, akyebe kulesha shi kwete kwata Yehowa bu kifwamino kyaaye. Sunga mbyabidi shi kwete kutungunuka na kukimba mudimo, uno mukwetu baata kitshibilo kya kufika mu kulungula mukandu wibuwa munkatshi mwa lubingo.

8. Bwela mu kikoso mwanda wa mu kikudi wa muulo ukata oodi mufumbule mu kubadika koobe kwa Bible.

⁸ Ino myanda ibatukatuka mu kumona ayifiki mu mikanda ya mu Bible yabamonaa kwi bantu bebungi shi ngikile bukopo bwa kwiyipusha. Su bobadika mukanda wa Osee, Yowele, na wa Naume na lukalo lwa kwiyipusha kalolo, bibuwa obadikye ingi verse ya mu ino mikanda mundamunda. Banda kupwandikisha mushindo ulombeene nkunyingisha mikanda ya bano batemuki na nkupa binangu! Kadi pabitale ingi mikanda yooso ya mu Bible? Eyi dy’Efile Mukulu di nka bu bwiina bwi na diama. We kutumika kalolo mu buno bwina su? Byabya, badika Bible ooso mushima na lukalo lwa kupeta mabwe a muulo ukata, bukunkushi na lukulupilo alwitupa Efile Mukulu.

9. Mushindo kinyi watudi balombeene kutamisha mpushisho etu a akikyeb’Efile Mukulu?

⁹ Sunga twamba shi kubadika Bible efuku dyooso kwi na muulo ukata, abitungu wekale na lukalo lwa kupusha kyobadika na kupeta kinangu. Byabya, tumika kalolo na mikanda yabadi batuushe kwi ndumbulwilo a Yehowa bwa kukimba ingi myanda itale bantu, bibundji, na myanda yokwete kubadika. Sunga shi su okwete kwiyipusha mushindo wi ano malongyesha ngatale muwa oobe, we mulombeene kwipusha mukulu mu kakongye sunga ungi mwina Kidishitu munyingye mu kikudi bwashi akukwashe. Bwa kulesha shi kutamisha kwa mpushisho etu kwi na muulo, twate kileshesho kya umune a ku beena Kidishitu ba kumpala. Eshina dyaaye nyi Apolose.

10, 11. (a) Mushindo kinyi ubabadi bakwashe Apolose bwa kulumbuula mudimo waye wa bu mulambukishi a mukandu wibuwa? (b) Uno mwanda wa Apolose ngulombeene kwitulongyesha kinyi? (Tala kashibo akamba shi “Okii na ndambukisho ya kala su?”)

¹⁰ Apolose baadi mwina Yuuda bafikile mwina Kidishitu na baadi “mushinguule Bifundwe ngofu” na baadi “mookye kaalo mu kikudi.” Mukanda wa Bikitshino awamba shi: “Baakulanga na kulambukisha kalolo mianda itale Yesu, anka baadi muukye penda lubatshisho lwa Yoano.” Kushi’ye kuuka, Apolose baadi alongyesha myanda ya kala pabitale lubatshisho. Kunyima kwa kumuteemesha pabaadi alongyesha mu Efeeze, Akila na mukashi aaye Prisile abaadi ‘bamupatulwile kalolo bi eshinda dy’Efile Mukulu.’ (Bik. 18:24-26, Kilombeno kipya 2009) Mushindo kinyi ubabidi bikwashe Apolose?

¹¹ Kunyima kwa kulambukisha mu Efeeze, Apolose bayile mu Akayi. “Pabekufikile, pa lusa lw’Efile Mukulu bakwashishe bikata ku kukankamana kwa baaba babakuminyine; mwanda bakambilanga beena Yuda kumpala kwa bantu na bukome bwi bungi, na kuleshanga mu Bifundwe shi Yesu nyi Kidishitu.” (Bik. 18:27, 28, Kilombeno kipya 2009) Yaaya nsaa, Apolose baadi mulombeene kupatuula kalolo myanda itale lubatshisho lwa beena Kidishitu. Kunyima kwa’ye kutamisha mpushisho aaye, Apolose “bakwashishe bikata” bano beena Kidishitu bapya bwabadya kukula mu  lulangwilo lwa binyibinyi. Uno mwanda awitulongyesha kinyi? Nka bu Apolose, tukwete kwitatshisha bwa kupusha kyatukwete kubadika mu Bible. Sunga mbyabya, su mukwetu munyingye mu kikudi betupa bingi binangu pabitale mushindo wa kulongyesha kalolo, bibuwa tukumine bukwashi bwaye na lutumbu mpa na kwiyisha. Su tubakitshi byabya, atukyebe kulumbuula mudimo wetu wiselele.

12, 13. Lesha mushindo ulombeene muntu, ku bukwashi bwa Bifundwe, akwasha bantu balongo nabo Bible bwashi bende kumpala mu kikudi.

¹² Bu Prisile, Akila, na Apolose, twi balombeene kukwasha bangi. Opushaa naminyi kwishimba su bonyingisha muntu na bomukwasha bwa kupudisha mwanda kampanda ukwete kumukutshisha kwenda kumpala mu kikudi? Sunga shi su we mukulu mu kakongye, opushaa naminyi nsaa ayikutumbula mukwenu mwina Kidishitu pabitale elango dyoobe dya mu Bifundwe dikeele dimukwashe mu kipungo ki bukopo? Kushi mpaka, kufuba n’Eyi dy’Efile Mukulu bwa kukwasha bangi bwashi balongamishe nshalelo abo nyi mwanda wa muloo ukata. * Tala mushindo oodi mulombeene kwibikita.

¹³ Pabitale lulangwilo lwa binyibinyi na lwa madimi, beena Isaleele bebungi ba mu mafuku a Eliya abaadi lwá mwishinda lwá mu kisuku. Elango dibaadi Eliya mupe bano bantu ndilombeene kukwasha baaba abalongaa Bible na bantu bakwete kwialusha kumongo bwa kwata kitshibilo kya kwenda kumpala mu kikudi. (Badika 1 Banfumu 18:21.) Tutale ungi mwanda: Su muntu mukumine mukandu wibuwa kwete kutshina bikumbeene kukita bakuuku baaye sunga beena kifuko na’ye, we kumunyingisha bwashi atungunukye na kitshibilo kyaaye kya kufubila Yehowa po’be kunangushena naaye muyile abyamba Yeeshaya 51:12, 13.​—Badika.

14. Nkinyi kilombeene nkukwasha bwa kutentekyesha maverse a mu Bible nsaa yoodi nawo lukalo bwa kukwasha bangi?

¹⁴ Eyendo, mu Bible mwi bishima bibungi bilombeene kunyingisha bantu ku mashimba, kutopeka, sunga kupa bantu abebibadika bukome. Pangi we mulombeene kwiyipusha shi: ‘Mushindo kinyi wandi mukumbeene kwikala natentekyesha maverse nsaa yandi nawo lukalo?’ Ikala obadika Bible na kunangushena mayi a Efile Mukulu efuku dyooso. Byabya, we mulombeene kwikala n’ebombo dya myanda y’Efile Mukulu yabadi balombeene nkutentekyesha kwi kikudi kya Yehowa nsaa yoodi nayo lukalo.​—Mak. 13:11; badika Yowano 14:26.

15. Nkinyi kilombeene nkukwasha bwa kupusha Eyi dy’Efile Mukulu kalolo?

¹⁵ Anka bu Nfumu Salomone, ikala wele nteko kwi Yehowa bwa kupeta binangu nsaa yokwete kukita midimo itale lulangwilo lwetu. (2 Mya. 1:7-10) Bu bibaadi bikite batemuki ba kala, ikala ‘okimbi bwa kuuka myanda yooso’ itale Eyi dy’Efile Mukulu bwa kuuka Yehowa kalolo na kyakyebe. (1 Mp. 1:10-12) Mpoolo mutumibwa baadi munyingishe Timotee bwa kwidiisha mu kikudi “na myanda ya lukumiino lwetu na ndambukisho ya binyibinyi.” (1 Tim. 4:6) Su bokitshi byabya, we mulombeene kukwasha bangi mu kikudi. Na dingi, onyingisha lukumiino loobe.

16. (a) Mbukwashi kinyi bubaadi bupete beena Belea pa’bo ‘kutalula Bifundwe efuku dyooso’? (b) Bwakinyi kubadika kwa Bible efuku dyooso kwi na muulo bwetu’twe lelo uno?

¹⁶ Beena kibundji kya Belea, mu Masedwane, abaadi na kiubishi kya ‘kutaluula Bifundwe efuku dyooso.’ Kunyima kwa Mpoolo kulambukisha mukandu wibuwa kwi bano beena Yuuda, abaadi abatala mayi a Mpoolo bwa kumona su ngepushene na mpushisho aabo a Bifundwe. Abo nkupeta bipeta kinyi? Bantu bebungi abamwene shi baadi alongyesha bya binyibinyi, na “bantu bebungi ba munkatshi mwabo babakuminyine.” (Bik. 17:10-12, Kilombeno kipya 2009) Uno mwanda aulesha shi kubadika kwa Bible efuku dyooso  akutamisha lukumiino lwetu mwi Yehowa. Luno lukumiino, “kushinkamisha [kwa] kwikala na kyakya kyatukulupila,” kwi na muulo ukata bwashi tutwele mu nsenga ipya y’Efile Mukulu.​—Eb. 11:1.

17, 18. (a) Mushindo kinyi ulombeene lukumiino lwi bukopo kukalwila eshimba dya mwina Kidishitu? (b) Mushindo kinyi ulombeene lukulupilo kwitukalwila ku masaku?

¹⁷ Mpoolo bakwile mwanda w’eyendo pabambile shi: “Atwe been’etaata, twikale batshintshikile kutoma, tufwale ngabo ya lukumiino na kifulo, pamune na lubango lwa lukulupilo na lwa kipandjilo.” (1 Tes. 5:8) Abitungu kukalwila eshimba dya musalayi kalolo. Bi mumune n’eshimba dya mwina Kidishitu, abitungu kwidikalwila ku bukome bwa milwisho. Nkinyi kikumbeene kukitshika su mufubi a Yehowa basangisha lukumiino lwaye lwi bukopo mu milayilo y’Efile Mukulu na kifulo kyaye bw’Efile Mukulu na bwa bantu naye? Yawa mufubi mmufwale ngabo ya mu kikudi ibuwa ngofu. Bi bukopo bwashi akite kintu kilombeene kulwisha kipwano kyaaye n’Efile Mukulu.

¹⁸ Mpoolo batemwine dingi lubango, “lwa lukulupilo na lwa kipandjilo.” Mu mafuku a kala, musalayi shi mushikiile mutwe waye, bibaadi bibofule bwashi afwe mu ngoshi. Kadi su e na lubango lwibuwa, mbakumbeene kumwasa mikyetwe ku mutwe kushi’ye kutapika. Bwa kutamisha lukulupilo lwetu mu myanda ya Yehowa ayitupa kipandjilo abitungu kulonga Eyi dyaaye. Lukulupilo lunyingye alwitukwasha bwa kupela “miisambo ya bisumanga” i na bulembe ya bantu basumbule lukumiino. (2 Tim. 2:16-19) Lukulupilo lwetu alwitupa bukome bwa kupela kulonda abitutekye bantu bakumbeene kwitufwisha mu kukita myanda yabadi batoshe kwi Yehowa.

19, 20. Bwakinyi atwataa Eyi dy’Efile Mukulu na muulo, na mushindo kinyi watudya kulesha shi atwidyata na muulo? (Tala kashibo akamba shi: “Yehowa kwete kumpa nka kyandi nakyo lukalo.”)

¹⁹ Bu byatukwete kwisesela ngofu mu mafuku a ku nfudiilo, abitungu tutuule lukulupilo lwetu looso mu Eyi dya Yehowa. Malango atupete mwanka aetukwasha bwa kuleka biubishi bibubi na kutonta mbidi yetu ya milwisho. Bu byadikwete kwitunyingisha kwishimba na kwitusamba, atobesha kunyinga kumpala kwa bitombwanga bya Satana na uno ndumbulwilo aye mubi. Na bukunkushi abwitupa Yehowa Mwiyi dyaaye, atushaala mwishinda dya muwa.

²⁰ Tentekyesha shi Efile Mukulu akyebe shi “bantu booso [ba mishindo yooso, NW] bapashibwe.” Bafubi ba Yehowa be munkatshi mwa “bantu ba mishindo yooso.” Bi mumune na baaba batudi balombeene kukwasha mu mudimo wetu wa kulungula na kulambakisha mukandu wibuwa. Kadi ooso akyebe kupeta kipandjilo e na kya “kuuka bya binyibinyi.” (1 Tim. 2:4) Byabya, kupanda mu mafuku a nfudiilo nkutale mushindo watubadika Bible na kutumikila mayi a Efile Mukulu. Oolo, kubadika kwetu kwa Bible efuku dyooso akulesha shi atwata Eyi dya Yehowa dya bya binyibinyi na muulo.​—Yo. 17:17.