Ne mukudile mu kartie ka bantu bashi na bupeta bwibungi, mu kibundji kya Turku, ki ku bukunkula bwa mema na apemenaa masuwa. Papa baadi shampion a maasha a boxe, ami na mwin’ande mulume tubaadi dingi bepaane mu maasha a boxe. Mu bipwa byooso binaadi ku kalasa naadi nka naalu ngoshi. Panaadi na bipwa bikile ekumi, natwelele mu kisaka kikata kya ba ntomboshi kibaadi kintweshe mu bilumbu bi bukopo pa mwanda wa ngoshi. Naadi mufikye mu kutundula mizike ya heavy-metal, ami nkubanga kulakila kwikala ngomba mukata a mizike yabetaminaa bu rock.

Naudile biombwanga ami nkukita kisaka. Ndjo ami nkufika mukata a ba ngomba ba mu kino kisaka. Naadi mufule kwenda na kwitumbanga pa mbalo ya kuyimbila. Bu bibaadi kisaka kyetu nkiule na bantu abakitshi myanda bu bantomboshi na kukita myanda ishi mwishinda, bantu bebungi abafikile mu kwikiuka kapelakapela. Tubabangile kuyimba kumpala kwa bantu bebungi. Tubaadi batuushe ma bande apeela, bande a nfudiilo bantu abaadi abamusamuna ngofu. Ku mpwilo kwa bipwa bya 1980, tubaadi bende mu États-Unis bwashi kisaka kyetu kyende nkumo. Munda mwa mafuku apeela tubayimbile mu New York na mu Los Angeles, na atwe nkwimonena na bakata ba myanda ya mizike kumpala kwa kwalukiila mu Finlande.

Sunga mbinaadi napusha buwa bwa kwikala mu kyakya kisaka, naadi nakimbi nshalelo mukile buwa, nshalelo a muloo. Ntshinaadi dingi nasangeela mwikelo wi bubi wa benaami batubaadi atuyimbi nabo nya. Naadi mubangye kwikalakasha bwa nshalelo ebubi anaadi naaye. Nabangile kwimona bu muntu e bubi, naadi na moo wa kupya mwishiba dya kaalo ka mu inferno. Naadi mukimbe myaluulo mu mikanda ya bipwilo bilekenelekene. Natekyele dingi ngofu bwashi Efile Mukulu ankwashe, sunga mbinaadi nepusha bu shii mulombeene kumusangasha.

Bwa kwikwasha, naadi nafubu mu biro bya poste. Dingi efuku, namwene shi mwina mufubo naami baadi Temwe a Yehowa. Naadi mu mwele nkonko ibungi. Mushindo ubaadi aluula kalolo ku bukwashi bwa Bifundwe ubaadi unkanyinshe, ndjo ami nkukumiina bwashi alongye na’mi Bible. Kunyima  kwa kulonga munda mwa mbingo ipeela, abaadi basangule kisaka kyande bwa kukita album a ngono yabadya kutuusha mu États-Unis. Namwene shi uno nyi mwabi ukata mu muwa wande.

Nalungwile Temwe baadi alongo na’mi shi, nakumina kukita ungi album, kunyima kwa byabya ne mulombeene kubanga kutumikila mayi a mu Bible mu muwa wande. Tabaadi mwambe kintu su nkimune; baadi penda muntekye bwashi mbadikye mayi a Yesu e mu mukanda wa Mateo 6:24. Aamba shi: “Takwi muntu su ngumune mulombeene kufubila banfumu babidi.” Naadi mukanye panapushishe akipatuula mayi a Yesu. Kadi kunyima kwa mafuku apeela, muntu baadi alongo na’mi Bible ndjo baadi mukanye! Namulungwile shi, naapu kwilekeena na kyakya kisaka mwanda nakumiina kulonda Yesu!

Bible baadi nka bu lumweno lubaadi lundeeshe bilema byande. (Jaake 1:22-25) Namwene shi naadi muntu sh’etombo, sha kwitatula, na sha lwabi lushy’alupu. Naadi na ngakwilo ebubi, na naadi naalu ngoshi, natomo nfwanka, na kukolwa maalwa. Panamwene mushindo ubaadi nshalelo ande mwikutwene na abyamba mayi a mu Bible, naadi mukalakashwe ngofu. Sunga mbyabya, naadi mwate kitshibilo kya kushintuula nshalelo ande.​—Beena-Efeeze 4:22-24.

Bikishekishe ku mbangilo, naadi mukalashwe ngofu na kenyongoshi ka nshalelo e bubi anaadi naaye. Anka Temwe baadi alongo naami Bible, baadi munkwashe ngofu. Bandesheshe akilesha Bible mu mukanda wa Yeeshaya 1:18, awamba shi: “Sunga milwisho yenu yekala imonga, ayikatôko’nka sô bu mafulu a nsabanga.” Uno verse na angi e mu Bible nganshinkamiishe shi Nshetu e mwiyilu e na lusa, na akumiina kubuka malonda a baaba booso abelanga ku mashimba pa mwanda wa milwisho yaabo.

Nsaa inawukile Yehowa na kumufula, nakuminyine kulambula muwa wande kwadi. (Misambo 40:8) Naadi mubatshishibwe mu 1992 ku kikongeno kya Batemwe ba Yehowa kibaadi kisangishe maumbo ebungi kibakitshikile mu Russie mu kibundji kya Saint-Pétersbourg.

Ne mupete bakuuku bebuwa bebungi munkatshi mwa balangwidi ba Yehowa. Bwa binobino, tukwete kuyimba pamune misambo ibuwa na kusangeela kino kya buntu kitupe Efile Mukulu. (Jaake 1:17) Ungi muloo ukata ndibaka dyande na Kristina mukashi ande a kifulo. Ne mumulungule myanda yande yooso​—ya malwa sunga ya muloo, mpa na byooso bi mwishimba dyande.

Su ntshinaadi mufikye bu Temwe a Yehowa, nadya kwikala mupwe kufwa. Kala, naadi na nkalakasho ibungi na bilumbu. Binobino ne na muloo mu muwa wande, namono shi kintu kyooso ki pa mbalo yakyo.